Ntôô Pablo a nga tsili bekristen be ya Tesalónica naa : « Nge môr aa bo ki mewokh ébe é dzam bia dzô é kalare ñi été, vahane ñe ndem ye sim naa mia wulu ye ñe » (2 Beth. 3:14). Melu mvus, bi nga dzô naa, a mbe ésèñ bemvene ba yiène bo. Nge môr a nga tsini naa a biane metsin metsing me ya Bible, atoo naa be vehang ñe melepgha abuiñ biyong, bemvene be mbe ve ntun akal a bame ékôan. Éyong té bobedzang ye bekal bèè be y’ékôan béé nga yiène ki fe bera lôr mbemba biyong ye ñe.

Ve, é ne éban naa bi songhan mboan té. Bi nga woghang ému naa, melepgha Pablo a nga ve, ma daghe nkighane kada kristen a yiène ñong, éyong bitéñ bizing bia sia boban ékôan été. Éde, déé se ki fe éban naa bemvene be bo ntun akal a bame ékôan. Amu dzé bi va tsen aval bi mbe bi wokh nten 2 Bethessalonicien 3:14 ? Nfasghane é dzam Pablo a mbe é kobe, éyong a nga ve melepgha meté.

Pablo a nga wokh naa bôr bézing be mbe béé « wulu aval daa yiène ki », ékôan été. A nga ve be melepgha me tsii a Bible été, ve be nga tep naa ma bo mewokh ébe melepgha meté. Nfeban ézing a nga sughlane be bo, a nga ve atsing di : « Nge môr ézing aa kômô ki sèñ, a tobeghe fe, kaa dzi. » Afang bo aval té, bevoo bézing be nga ke ôsu ye tep naa ba sèñ nfa ya baghle bebién, atoo naa be mbe de bo. Y’a fe naa, be mbe bé tsiè é za mam. Aval avé bekristen bevoo be nga yiène ñong aval bôr beté ? (2 Beth. 3:6, 10-12).

Pablo a nga dzô naa : « Vahane ñe ndem. » Éfiè griego té, da ve ôsimane naa, mi tugha yem môr té ye bo nkee naa a taa mia kôô mbia mefulu mèñ. Pablo a ve melepgha meté akal kada môr y’ékôan, se ki fave akal bemvene (2 Beth. 1:1 ; 3:6). Éde, kada kristen éyong ézing a nga yen ane é kristen mboo a bo melo ébe melepgha ma so a Bible été, a mbe top naa, « a sim naa a wulu » ye é môr a bo mam aval daa yiène ki.

Ye é nga yili naa, be nga yiène ñong môr té ane éñi be nga vèè ékôan été ? Kaa, amu Pablo a nga koghle naa : « Tsinighane naa mia lep ñe ane moanñang wônan. » Éde, kada kristen a mbe tsini naa a lôr tam ye é môr be nga ve ndem, fave bisulan ye minkanghle, ve a mbe top naa aa lôr ki fe tam ye ñe biyong bife, ane metam bivuiñ. Amu dzé ? Pablo a nga dzô naa : « Naa a wokh ôsoan. » Asughlane y’été é ne naa, éyong bia sim naa bia lôr tam ye moadzang té aval té, é ne ve naa a wokh mbia abo-dulu dèñ ôsoan ye tsen (2 Beth. 3:14, 15).

Aval avé bekristen be ne dzale melepgha meté ému ? Ôsusua, bia yiène tare dzeng naa bi yem nge abo-dulu moadzang té é ne faa « aval daa yiène ki » ane Pablo a nga dzô de. Éé mbe ki é kobe é mam ma daghe dzidzii nge ki ntobane môr émièn. Ye naa, éé mbe ki é kobe é bôr be va dzughu bia. Ndaane de, Pablo a mbe a bele ôsiman, é bôr ba top naa baa bo ki melepgha Nzame mewokh.

Ému, nge bi yene kristen ézing a bele aval abo-dulu té a, kada môr a ye ñong nkighane naa aa bera ki lôr mbemba metam ye ñe. Amu a ne nkighane môr émién a yiène ñong, biaa ye ki dzeng naa bi kobe de ye bôr befe, nge béé se ki é bôr ba tobe ye bia nda dzèè. Bia tsini naa bia tobe ye môr té, fave bisulan ye minkanghle. Éyong a ye tsen ôsiman ye abo-dulu, bia ye bera sum naa bia lôr tam ye ñe biyong bife.