• « Me nga wôran a ne n’nôm wom a mbe éé bo nsem évakh. »

• « Me nga wokh ôsoan ye wôrane naa, maa se ki mbeng ye kaa éban. »

• « Maa mbe ki de kare môt ézing, me nga dzukh a n’nem été. »

• « Me nga wôrane naa, Jehôva aa bis ki ma. »

É mam bi ndem man tu ayôp ma lere nté mbé minenga a dzukh éyong n’nôm a daghe ponografía nge ki pornographie. Ye naa, nge n’nôm a so a bo de ashuèñ, éyong ézing tang mengoan nge ki mimbu, a ne wôrane naa, éé se ki fe bera tobe ñe mebun. Aval ane minenga ézing a nga dzô de : « Me nga sili mamièn naa : ‘É fam da ning ya ma ñi, a ne ne faa za ? Ye mam mefe mézing me ne naa, a ngen a suale me mo ?’ »

Be nga kôman ayeghle di akal é minenga n’nôm a daghe pornografía a. Da ye lere metsin metsing ma fôlô ñe, ma ban ñe naa, Jehôva a dzing ñe, a kômô ñe vole, naa a bele mvoa ya nsisim ye baghle élat dèñ ya Jehôva b.

Amben wéé se ki kili ñu-n’nôm naa a bo mam mézing, ve, ô ne dang bitèñ bizing naa ô baghle é mvoa ya nsisim duè. Fasghe é dzam da zu di.

Ô Taa ve wamièn bidzô. Minenga ézing a ne tem naa, éñ’a ve naa, n’nôm a daghe pornographie. Alice c a mbe éé wôrane naa, n’nôm aa yen ki naa a ne mbeng. Éde a nga sili naa : ‘Amu dzé n’nôm wom a bame yebe naa a daghe binenga befe ndaane ma ?’ Binenga bézing ba ve bebién bidzô akal aval ba ñong mam, béé simane naa ébe ba ve naa ndukh ba tubane wô ô vem. Danielle a dzô naa : « Me mbe méé yen mamièn ane é minenga a ne éto-abé, éñi a tsam alukh dèñ akal meyèè moan kristen aa yiène ki bele. »

Nge wa wôran aval dèè, yemghe naa, Jehôva aa ve ki wa bidzô akal mimboan ñu-n’nôm. Jacques 1:14 da dzô naa : « Ve, môt asese a tebe meboblan été éyong a likh naa, évéé dèñ émièn é  djié ñe » (Bero. 14:12 ; Beph. 2:12). Ndaane naa a ve wa bidzô, é sôsôe wa lere ñe, Jehôva a yen de môra dzam—2 Mila. 16:9.

Minenga a ne wôrane naa, n’nôm a daghe pornografía amu éé se ki mbeng minenga, ve, déé se ki bebela. N’yem mam nfa mam meté a dzô naa, pornografía é ne ve naa, môt a bele évéé é ne kaa man minenga ézing aa se ki dzale.

Ô taa dang yep a n’nem. Catherine a nga dzô naa, é dzam étam a mbe simane é ne naa, n’nôm a nga daghe-yang pornografía. Frances ñ’a nga dzô naa : « Me mbe méé yep a n’nem éyong ésese méé nga yem ki é vôm n’nôm wom a ne. Dzam té é nga ve naa, n’nem ô tobe m’ayông môs té ôsese. » Beyèè bevoo be nga dzô nté mbé be nga wokh ôsoan éyong be mbe ézizang bekristen bevoo be mbe yem naa, beyôm ba bo dzam té. Éba bevoo be nga dzô naa, be nga wôrane naa, be ne étam, amu ba simane naa môt ézing éé se ki wokh étéñ deba.

Awôrane té da yiène. Ve, nge mi lôr é tam denan asese fave naa, mia tem mam meté, meyep menan ma ye bo va vem-vem. Ndaane de, dzenghane naa, mi bembe ébe élat denan ya Jehôva. Dzam té da ye mina vole a zôme—Bya 62:2 ; Beéph. 6:10.

Éyong ézing, é dzam éfe é ne wô vole é ne, a lang ye binan minlang é binenga be nga yep a n’nem, be nga bele afôlô éyong be nga yaghlane Jehôva. S’éyong ésese éd’a nga vèè é mam me nga ndaghle be, ve, a nga ve be mvoa. Éfônan, Ana a mbe « édedèè éwiñ » akal étéñ dèñ. Ve, niène a nga « bira mane yaghlane Jehôva », a nga wôrane mvoa, amben étéñ dèñ a ke kuè daa be ki tsen—1 Sam. 1:10, 12, 18 ; 2 Becor. 1:3, 4.

Keng yen bemvene be y’ékôan naa, be vole wa. Be ne bo « é vôm wa ke sobe môra nfungha, asuèñ é tam môra ôkôs » (Esaïe 32:2, metoan). Éyong ézing, be ne wô lep é kal dzaa ô ne kobe ñe ye bele afôlô—Mink. 17:17.

Y’ô ne vole ñu-n’nôm a dang mbia fulu ya daghe pornographie ? Éyong ézing ô ne de bo. Bible a lere naa, nfa ya kôm ntsiè ézing nge ki a wun mbia nzizing, « da dang mbeng éyong mi ne bôt bebèñ ndaane éyong ô ne étam » (Eccl. 4:9-12). Mindzeng mia lere naa, nfa y’a dang mbia fulu  ya daghe pornografía ye ve naa, minenga a bera bele mebun ébe n’nôm, é ne mbeng naa minlughane mi sèñ nsama.

Bebela a ne naa, dzam té é ne boban, fave ng’é môt émièn a n’adzô, a kômô de bo, ye ve n’nem ôsese wèñ naa, a dang mbia fulu wèñ ya daghe pornografía. Y’a dzaa-yang Jehôva naa, a ve ñe ngu’u ye sili bemvene naa be vole ñe ? (2 Becor. 4:7 ; Jacq. 5:14, 15) Y’a dzeng-hang faa naa a bele mefekh ma vole ñe naa a tup meboblan meté ; éfônan, a bo kaa belane b’aparatos electrónicos nge ki a saalé bitéñ bia ve naa, a tebe meboblan été ? (Mink. 27:12) Y’a ne nkoghane naa, a yebe avole duè ye mane wô kobe bebela ? Ng’é ne aval té, éyong ézing ô ne ñe vole.

Aval avé ? N’yenghan éfônan di. Felicia a mbe nlughane y’Ethan, éñi a nga sum daghe pornografía a too mong. Felicia a ve naa, é bo ñe ébubu naa a kobe ya ñe éyong ôzang y’a yen pornografía wa bera ñe so. Ethan a dzô naa : « Maa suale ki ngal wom dzam ézing. Y’édzing, a vole ma a ve mamièn benié ye tugha fas mamièn. A vole fe me naa, me taa bo mban a belane internet. » Bebela a ne naa, évéé n’nôm a bele akal pornografía da dzughu Felicia. A dzô naa : « Ve, ôlun wom ya mintèñ ma wokh maa vole ki ñe naa, a dang mbia fulu té. Niène bia mane fas minzukh a tubane mio, a ne nkoghane naa a vole ma a zôme mintèñ miam. »

Aval minlang mité miaa vole ki fave n’nôm a likh fulu y’a yen pornografía, mia vole fe ngal naa, a bera bele mebun ébe ñe. Bebela a ne naa, éyong n’nôm a ne nkoghane naa a kobe adzô mbia mefulu mèñ, é dzam sese a bo ébe môs, y’é vôm a ke, dzam ézing daa lighi ki fe ashuèñ.

Ye wa bunu naa, ô ne vole ñu-n’nôm aval té ? Ng’é ne aval té, amu dzé miaa lang ki ye lèè minlang nsama ébe nlô-adzô bia tsiè wi ? Minsonghane mièñ mia ye bo a dzogho naa a yen pornografía ye ve naa, ô bera bele mebun ébe ñe. Ndaane naa, a ve wô bidzô akal ayepgha ô bele, a yiène dzeng naa, a wokh aval é dzam a bo da ndaghle wa. Minsonghane muè mi ne a ve ñe ngu’u naa a dzogho mbia fulu wèñ ye likh naa, a bera wun mebun muè. Mina bebèñ mia yiène dzeng naa, mi yem é dzam da tsini bôt naa be daghe pornografía, y’aval mi ne dang ndzukh té d.

 Nge wa ko wong naa, é môt mina ñe mi ne nlughane mii se ki lèè minlang nfa té kaa naa mia ye wôman, mi ne luè é mvene mina bebèñ mia tugha woghane ñe naa, a zu tobe ya mina éyong mia ye kobe adzô té. Wa yiène fe yem naa, amben ñu-n’nôm é dang-hang fulu ya yen pornographie, da ye sili abuiñ tam naa ô bera bele mebun ébe ñe. Ô taa sili m’ôsi. Dzenghan é boan be-mam me nga wule-yang mbeng alukh denan. Beleghan ôyane naa, ya tam nge mia ñe mia lere ôdzibi, alukh denan da ye bera bo ngu’u—Eccl. 7:8 ; 1 Becor. 13:4.

Nge ñu-n’nôm a sia bera yen pornografía ye da yili naa, aa dzôban, nge ki naa mam maa se ki fe bera kômban ? S’éyong ésese. Ng’a daghe pornografía é ntoo ñe ane ôkoan, éyong ézing a ye lumane mbia fulu té éning se dzèñ. Amben a so-hang a saale de tang abuiñ mimbu, a ne sia bera daghe pornografía. Naa, a taa bera ku meboblan me ya daghe pornografía, a yiène ve mengu’u mesese, éyong ézing éé bu mefekh mefe, amben a yen an’a dang-hang mbia fulu té (Mink. 28:14 ; Mat. 5:29 ; 1 Becor. 10:12). A ye yiène bele minféféñ « mesiman ma djié ñe » ye yeghe a « vini é dzam é ne abé », da yili naa pornografía y’é mam mesese mevoo me ne abé ane, masturbación (Beéph. 4:23 ; Bya 97:10 ; Bero. 12:9). Y’a ne nkoghane naa, a ve mengu’u ? Ng’éñe ne aval té, a ngene bera dzogho mbia fulu té e.

Ô ne bo ya nge ñu-n’nôm a lere naa, aa kômô ki lumane ya mbia fulu té ? Éyong ézing ô ne wôrane naa, wa sulu, ôlun nge ki naa a dukh wa. Dzenghe naa ô bele mvoa ya nsisim wéé likh Jehôva ndzukh té émo mèñ (1 Pierre 5:7). Tsinighe naa wa yit Jehôva bebèñ ngalan ayeghe duè wamièn, meyaghlan ya binan ébe é dzam wa yeghe. Nté wa bo de, beleghe ndzi-n’nem naa, ñ’a fe, a yit wô bebéñ. Ane bia lang de nten Esaïe 57:15, a ne y’é bôt ba wôrane naa be ne « ntsiban y’éngôngoo », ye kômo be vole a bera bele mevakh. Vakh mengu’u mesese muè nfa y’a bo mbemba kristen. Silighe bemvene avole. Ye bele ndzi-n’nem naa, melu ma zu, éyong ézing ñu-n’nôm é ne tsen fulu té—Bero. 2:4 ; 2 Pierre 3:9.