Meyeghle ôsua me ya Bible be va lere é Kalare nyi été, me va yemle ényeghe wa nyeghe Jehôva. Wa yiane baghle ényeghe te éyong ésese (1 Pierre 2:2). Ô ne bune éning é ne mbèmbèè ye melu ma zu, foghe ve nge wa yire Nzame bebéñ ye yeghe medzô mèñ mban.​—A lang Jean 17:3 ; Jude 21.

Abim wa dzeng naa ôô tugha yem Nzame, abim te fe mebun mwa ma ye bo ngul. Abunu éde da ye we vole naa ô bo mam aval Nzame aa kômô (Behébreu 11:1, 6). Da ye we tsine naa ôô dzôban ye yem sanghlan aval wa ning.​—A lang Bisè Mintôl 3:19.

Ane môr ase, wa ye kômô kar é bôr bevokh é mam wa yeghe. Bia besese bia nyeghe bia kanghle mbemba mefuèñ. Nge ô tsine ayeghe Bible ôsu, wa ye yeghe aval avé ô ne belan Bible naa ô yem ve bôr ayili ye abunu dwiè ébe Jehôva ye mbemba mefuèñ a bele bia.​—A lang Beromain 10:13-15.

Mbemba mefuèñ me te, abuiñ bôr be wôle me sum kanghle mengom meba ye é nda bôr dzeba. Songhe bifia. Keghe sia dzô é bôr bwa naa n’yebe weba ô ne évus ; karghe be é mbemba bemam Nzame aa kakh bia. Siman fe naa, biyong bi’zing, mimboan mi ne mbeng mi wôle dang name e lôr bifia.​—A lang 2 Timothée 2:24, 25.

Ayeghe medzô me Nzame é ne we vole naa ôô vem a nsisim. Melu-asi-melu ayô, élar dwa ye Jehôva da ye bira vem. Ô ne bo é môr wèñ nge wa venghan môr y’é nda bôr dzèñ.​—A lang 2 Becorinthien 6:18.

Ô ne vem a nsisim nge ô tsine ayeghe Bible ôsu (Behébreu 5:13, 14). Silighe moan Bengaa Jehôva ézing naa a vole wa a yeghe Bible ye abak ba luè nkobe Boulou naa Jé Kalate Zambe a ne ye’ele bia? Abim wa ye likh naa medzô me Nzame me yeghle wa, abim te fe éde éning dwiè da ye tobe mevakh été.​—A lang Bya 1:1-3 ; 73:27, 28.

E Mbemba mefuèñ bi va yen abak di été, ma so ébe Jehôva, é Nzame a ne mevakh. Ô ne nye yire bebéñ, éyong wa yire bewume bèñ bebéñ (Behébreu 10:24, 25). Nge ô ne mban a dzeng ye ngul naa, wa ve nye n’nem mbeng, wa ke wa yire nya éning bebéñ, éning é ne mbèmbèè. A yire Nzame bebéñ, éde fe é ne é nya dzam ô ne bo.​—A lang 1 Timothée 1:11 ; 6:19.