Nyew, adanse a odzi mu wɔ Bible no mu a ɔma yehu dɛ Nyankopɔn wɔ hɔ ampa. Bible no hyɛ hɛn nkuran dɛ yennya Nyankopɔn mu gyedzi. Naaso, dɛm gyedzi a yebenya no nnkyerɛ dɛ, sɛ obi kã biribi fa Nyankopɔn ho ara pɛ nna yɛagye edzi. Na mbom, Bible no kã dɛ yɛmfa hɛn adwen ndzi dwuma na ama yeenya gyedzi wɔ Nyankopɔn mu. (Romefo 12:1; 1 John 5:20) Nkyerɛkyerɛmu ahorow a odzidzi do yi yɛ adanse ahorow a ogyina Bible no do; susu ho hwɛ:

•   Sɛ ehwɛ mbrɛ wɔahyehyɛ biribiara pɛpɛɛpɛr wɔ amansan yi mu no a, ɔkyerɛ dɛ Ɔbɔadze bi wɔ hɔ ampa. Bible no kã dɛ: “Na ofi biara obi na osi; na nyia osii adze nyina nye Nyankopɔn.” (Hebrewfo 3:4) Ɔwɔ mu dɛ dɛm ntotoho yi nnyɛ nkyerɛkyerɛmu tsentsenntsen biara dze, naaso, hɔn woesũa adze akɔ ekyir no hu dɛ nyansa wɔ dɛm ntotoho yi mu papaapa, na ɔtɔ asomu. a

•   Nyimpa dze, sɛ yɛwɔ hɔ a, yɛpɛ dɛ yehu mbrɛ osi ma ɔyɛe a yɛbaa nkwa mu, nye siantsir a yɛwɔ wiadze. Sɛ obi nya asetsena mu ndzɛmba a ohia no nyina mpo na sɛ onnyaa dɛm asɛm yi ho nkyerɛkyerɛmu a, ɔyɛ a noho mmbaa no. Dza Bible frɛ no sunsum mu ehiadze no, iyi ka ho bi. Adze fofor so a ɔka ho nye ɔpɛ a yɛwɔ dɛ yebohu Nyankopɔn yie na yaasom no. (Matthew 5:3; Nyikyerɛ 4:11) Dɛm sunsum mu ehiadze a yɛwɔ yi ma yehu dɛ Nyankopɔn wɔ hɔ, na ɔyɛ Ɔbɔadze a ɔdɔ hɛn na ɔpɛ dɛ yedzi dɛm sunsum mu ehiadze yi ho dwuma.​—Matthew 4:4.

•   Nkɔnhyɛsɛm ahorow a ɔwɔ Bible mu no, wɔkyerɛwee too hɔ mfe pii ansaana orinya mbamu. Naaso, ne nyina baa mu pɛpɛɛpɛ a no mu kor mpo anntɔ famu. Mbrɛ Bible no tum kyerɛ nsɛm pɔtsee a obesisi nye ɔkwan pɔtsee a nsɛm no bɛfa do esisi no yɛ adanse kɛse paara a ɔma yehu dɛ no mu nsɛm no mmfi nyimpa hɔ, na mbom ofi obi a ɔwɔ tum hɔ.​—2 Peter 1:​21.

•   Abɔdzenyansahu ho nsɛm a Bible akyerɛwfo kyerɛwee no, nna nyimpa a wɔwɔ hɔn aber do no nnyi ho nyimdzee koraa. Dɛ nhwɛdo no, wɔ tsetse no, nna nyimpa pii gye dzi dɛ mbowa bi tse dɛ ɔson, kɔkɔtse anaa nantwinyin na wɔasoa asaase yi wɔ hɔn ekyir. Naaso, Bible no kã dɛ Nyankopɔn dze ‘asaase no asɛn mbrɛ hwee nnyi.’ (Job 26:7) Asɛm fofor a Bible no kã fa asaase no ho a ɔno so yɛ nokwar nye dɛ, asaase no yɛ “kɔntɔnkrɔn.” (Isaiah 40:2) Nyimpa pii kã dɛ, sɛ wɔhwɛ nsɛm a ɔtsetse dɛm a Bible akyerɛwfo no kyerɛwee wɔ hɔn aber do no a, ɔyɛ hɔn nwanwa paara. Ntsi nkyerɛkyerɛmu a obotum atɔ hɔn asomu ara nye dɛ Bible akyerɛwfo no nyaa hɔn nsɛm no fii Nyankopɔn hɔ.

•   Nsɛmbisa a ɔyɛ dzen dɛ yebenya ho mbuae no, Bible no dze ho mbuae ma hɛn. Dɛm nsɛmbisa yi, sɛ obi ennya ho mbuae a ɔtɔ asomu a, annhwɛ a ɔbɛgye edzi dɛ gyama Nyankopɔn biara nnyi hɔ. Nsɛmbisa no bi nye dɛ: Sɛ Nyankopɔn dɔ hɛn na ɔyɛ tum nyina wura dze a, ɔno dze ebɛnadze ntsi na amandzehu na bɔn adɔɔ sõ wɔ wiadze dɛm? Ebɛnadze ntsi na nyamesom ma nkorɔfo yɛ ndzɛmba bɔn kyɛn dɛ ɔbɛma wɔayɛ ndzɛmba papa?​—Titus 1:​16.