Nna John Onumanyi yɛ Nyankopɔn no nkɔnhyɛnyi. (Luke 1:76) Wɔwoo no wɔ afe 2 A.H.B., na owui wɔ afe 32 H.B. Nyankopɔn somaa no dɛ ombesiesie kwan mu mma Messiah, anaa Christ no. Dɛm ntsi John kaa Nyankopɔn ho asɛm kyerɛɛ no nuanom Jewfo no, mbrɛ ɔbɛyɛ a ɔbɛdan hɔn akoma asan aba Nyankopɔn nkyɛn.​—Mark 1:1-4; Luke 1:13, 16, 17.

 Asɛm a John kae no boaa nyimpa akomapafo ma wohun dɛ, Jesus a ofi Nazareth no nye Messiah a wɔhyɛɛ noho bɔ no. (Matthew 11:10) John hyɛɛ hɔn a wotsiee no no nkuran dɛ wonnu hɔnho wɔ hɔn bɔn ho, na wonnuma hɔn mfa nkyerɛ dɛ ampaara woenu hɔnho. (Luke 3:3-6) Osiandɛ John numaa nyimpa pii ntsi, wɔfrɛɛ no Onumanyi. Nyimpa a John numaa hɔn no nyina, nyia nna n’enuma ho hia paa nye Jesus. a​—Mark 1:9.

Dza yɛrebɛka ho asɛm

•  Nna John Onumanyi no da mu fua. Ebɛnadze ntsi a?

•  Woananom na wɔwoo John Onumanyi?

•  Woana na ɔmaa wokum John Onumanyi?

•  Ehwɛ a, nna John Onumanyi nye Jesus risi akan anaa?

•  Mbarimba baahen na wɔfrɛ hɔn John wɔ Bible no mu?

 Wɔhyɛɛ edwuma a nna ɔbɛyɛ no ho nkɔm too hɔ: John nam n’asɛnka edwuma no do maa nkɔnhyɛ a ɔfa Jehovah no somafo ho no baa mu. (Malachi 3:1; Matthew 3:1-3) Ɔno na ‘osiesiee nkorɔfo na ɔboaboaa hɔn ano maa Jehovah.’ Dza asɛm yi kyerɛ nye dɛ, ɔno na ɔboaa no nuanom Jewfo no ma wɔgyee Jehovah n’ananmusinyi tsitsir a ɔno nye Jesus Christ n’asɛm dzii.​—Luke 1:17.

 Nna n’asetsena da mu fua: Jesus kaa dɛ: “Hɔn a mbaa awo hɔn nyina mu biara mmpuei a ɔyɛ kɛse kyɛn John Onumanyi no; naaso nyia ɔyɛ aketseaba wɔ sor ahenman mu no yɛ kɛse kyɛn no.” (Matthew 11:11) Nna John yɛ Nyankopɔn no nkɔnhyɛnyi, naaso nna ɔnnyɛ nkɔnhyɛnyi biara kɛkɛ. Nna ɔno nye Nyankopɔn no “bɔfoe” anaa somafo a wɔhyɛɛ noho nkɔm no. Dɛm ntsi Nyankopɔn n’asomfo a wɔtsenaa ase ansaana John reba no, yebotum aka dɛ hɔn mu biara nnyi hɔ a ɔyɛ kɛse kyɛn John. Asɛm a Jesus kae yi san so ma yehu dɛ John ronnkɔ sor Ahendzi no mu. b Dɛm nkɔnhyɛnyi nokwafo yi wui ansaana Christ rubue kwan dɛ nyimpa botum akɔ sor. (Hebrewfo 10:19, 20) Naaso, John bɛyɛ Nyankopɔn n’Ahendzi no ne mamfo no mu bi wɔ asaase do, na obotum atsena ase daa wɔ Paradise.​—Ndwom 37:29; Luke 23:43.

 Nna John ne papa ne dzin dze Zechariah, na ne maame so ne dzin dze Elizabeth. Nna Zechariah yɛ Jewnyi ɔsɔfo. John n’awoo dze, nna ɔyɛ anwanwadze osiandɛ nna ne maame yɛ ɔbɔnyin. Iyi kyerɛ dɛ nna onntum nnwo ba. Afei so, nna ɔnye no kun Zechariah “nyina so enyinyin papaapa.”​—Luke 1:5-7, 13.

 Ɔhen Herod Antipas na ɔmaa wotwaa John ne tsir. Ne yer Herodias na opiapiaa no ma okum John. Nna Herod frɛ noho dɛ ɔyɛ Jewnyi. John kasaa tsiaa no dɛ Jewfo mbra no mma no kwan dɛ ɔbɔwar Herodias. Ɔno ntsi na Herodias taan John n’enyi dɛm no.​—Matthew 14:1-12; Mark 6:16-19.

 Biribiara nnyi Bible no mu a ɔkyerɛ dɛ nna hɔn beenu no risi akan. (John 3:25-30) Nokwasɛm nye dɛ, John nankasa kaa no pen dɛ, siantsir a ɔbae nye dɛ oribesiesie kwan mu ama Messiah no, na nnyɛ dɛ ɔnye no ribesi akan. John kaa dɛ: “Wobeyi no akyerɛ Israel ntsi na mebae mubonumae wɔ nsu mu no.” John toaa do dɛ: “Ɔno nye Nyankopɔn Ba no.” (John 1:26-34) Dɛm ntsi aber a John tsee dɛ Jesus no som edwuma no rokɔ do no, n’enyi gyee paa.