Bible no ka dɛ Nyankopɔn pɛ dɛ ‘yɛtwe hɛnho fi ndwamansɛm ho.’ (1 Thessalonicafo 4:3) Sɛ Bible no ka ndwamansɛm a, dza ɔkyerɛ no bi nye awarsɛɛ, mbarimba a wɔnye mbarimba da anaa mbaa a wɔnye mbaa da. Afei so, sɛ obi nye obi fofor da aber a dɛm nyimpa no nnyɛ n’awar mu hokafo a, ɔno so ka ndwamansɛm ho.

•  Ebɛnadze ntsi na Nyankopɔn pɛ dɛ ɔbarimba war ɔbaa ansaana wɔatsena abɔ mu dɛ awarfo?

•  Sɛ ɔbarimba nye ɔbaa bi tsena mbrɛ ɔbɛyɛ a wobohu hɔnho yie ana wɔaawar so ɛ?

•  Awarfo besi dɛn ama hɔn awar aasɔ?

•   Nyankopɔn na ɔhyehyɛɛ awar. Nyankopɔn dze awar sii hɔ aber a ɔkaa nyimpa beenu a wodzi kan no bɔɔ mu dɛ awarfo no. (Genesis 2:22-24) Nna ɔnnyɛ ne pɛ nye dɛ ɔbarimba na ɔbaa bɛtsena abɔ mu dɛ awarfo aber a wɔnnwaree.

•   Nyankopɔn nyim dza oye ma nyimpa. Ɔhyehyɛɛ dɛ ɔbarimba na ɔbaa na wɔnwar, na ɔhwɛ kwan dɛ wɔbɛma awar no atsena hɔ daa. Nna iyi bɔbɔ awarfo no nye ebusua no nyina ho ban, na hɔn enyi agye. Ma yɛnyɛ mfatoho bi. Fa no dɛ akɔtɔ ngua bi na ɔsɛ dɛ ehyehyɛ. Nyia a ɔyɛɛ ngua no dze akwankyerɛ bi bɛka ho a ɔbɔboa wo ama eetum ahyehyɛ ngua no yie. Dɛmara so na Nyankopɔn ma hɛn akwankyerɛ a ɔbɔboa hɛn ma yaahyehyɛ ebusua a enyigye wɔ mu. Hɔn a wɔdze Nyankopɔn n’akwankyerɛ yɛ edwuma no nya do mfaso aber nyina.​—Isaiah 48:17, 18.

•   Sɛ obi nye obi a ɔnnyɛ n’awar mu hokafo da a, ɔdze nsunsuando bɔn ba. Dɛ mfatoho no, nyinsen a wɔnnhwɛ kwan botum aba, na wobotum enya nda mu yarba ahorow. Afei so, sɛ obi nye obi a ɔnnyɛ n’awar mu hokafo da a, obotum egya hɔn adwendwen. a

•   Nyankopɔn dze ɔbarimba na ɔbaa nda ama awarfo dɛ wɔmfa do nwo mba. Nyankopɔn bu nkwa dɛ ɔyɛ adze krɔnkrɔn. Dɛm ntsi ɔbarimba na ɔbaa nda yɛ akyɛdze a ɔsom bo a Nyankopɔn dze ama nyimpa dɛ wɔmfa do nwo mba. Nyankopɔn pɛ dɛ yɛyɛ biribi dze kyerɛ dɛ hɛn enyi sɔ dɛm akyɛdze yi. Dza yebotum ayɛ nye dɛ yebedzi awar nyi.​—Hebrewfo 13:4.

 Sɛ ɔbarimba na ɔbaa pɛ dɛ wɔwar a, nnyɛ tsena a wɔbɛtsena abɔ mu kakra dze “asɔ hɔnho ahwɛ” no na ɔbɛma woenya awar pa. Mbom dza ɔma awar sɔ nye dɛ hɔn beenu no nyina dze hɔnho bɛhyɛ awar no mu. Sɛ nsɛndzendzen bi so soɛr wɔ awar no mu a, ɔsɛ dɛ wɔbɔ mu siesie. b Awar tum ma awarfo yi mu biara dze n’akoma ma ne nyɛnko.​—Matthew 19:6.

 Awar biara nnyi hɔ ɔhaw nnyi mu. Naaso, sɛ awarfo dze Bible mu afotusɛm yɛ edwuma a hɔn awar no bɔsɔ. No ho nhwɛdo ahorow bi nye yi:

•   Fa wo hokafo n’ehiadze dzi wodze kan.​—1 Corinthfo 7:3-5; Philippifo 2:3, 4.

•   Hom nda ɔdɔ na obu edzi nkyerɛ homho.​—Ephesusfo 5:25, 33.

•   Ɔyɛ a ma wo kasaa nyɛ dɛw.​—Mbɛbusɛm 12:18.

•   Nya abotar na fa bɔn kyɛ.​—Colossaefo 3:13, 14.