Sɛ Bible no ka dɛ obi yɛ sunsummunyi a, dza ɔkyerɛ nye dɛ dɛm nyimpa no wɔ ɔpɛ a no mu yɛ dzen dɛ ɔbɛyɛ dza ɔbɛma Nyankopɔn apɛ n’asɛm na oenya Nyankopɔn n’adwen wɔ ndzɛmba ho. Obi a ɔyɛ sunsummunyi no, ɔdze Nyankopɔn ne mbra bɔ ne bra, na ɔma Nyankopɔn no sunsum krɔnkrɔn no kyerɛ no kwan. a​—Romefo 8:5; Ephesusfo 5:1.

 Mpɛn pii no, sɛ Bible no reka obi a ɔyɛ sunsummunyi ho asɛm a, ɔsan so ka obi a ɔnnyɛ sunsummunyi ho asɛm. Sɛ obi nnyɛ sunsummunyi a, ɔyɛ honammunyi anaa honam mu nyimpa, na Bible no ka dɛ: ‘Honammunyi nntum nngye dza ɔyɛ Nyankopɔn no sunsum ne ndzɛmba.’ Nyankopɔn no sunsum ne ndzɛmba no yɛ dza Nyankopɔn dze kyerɛkyerɛ hɛn no. (1 Corinthfo 2:14-16) Afei so hɔn a wɔyɛ honam mu nyimpa no, mpɛn pii no ibohu dɛ wɔyɛ ahoɔyaw na wɔtaa so twe manso. Wɔnnyɛ nkorɔfo a wobue hɔn nsamu na wɔnnhwehwɛ asomdwee so. (1 Corinthfo 3:1-3) Hɔn a wɔka nsɛm a ɔyɛ yaw tsia afofor na wɔtsetsew anyɛnkofo berɛbo ntamu no, Bible no ka dɛ wɔyɛ “honam ekyidzifo a wonnyi sunsum no.”​—Jude 19; Mbɛbusɛm 16:28. b

Dza yɛrebɛka ho asɛm

•  Ebɛnadze ntsi na yebotum ayɛ sunsummufo?

•  Ebɛnadze ntsi na ohia paa dɛ obi yɛ sunsummunyi?

•  Mibesi dɛn akɔ do ara ayɛ sunsummunyi?

•  Ohia dɛ modɔm nyamesom kuw bi ansaana mayɛ sunsummunyi anaa?

•  Akɔhwisɛm bi a wɔkeka fa sunsummunyi a obi bɛyɛ ho

•  Kyerɛwnsɛm ahorow a obotum aboa obi ma ɔaayɛ sunsummunyi

 Nyankopɔn bɔɔ nyimpa wɔ no suban do, ntsi yebotum ayɛ sunsummufo. (Genesis 1:27) Nyimpa pii enyi sɔ dɛm hokwan yi na wɔpɛ dɛ wosua ndzɛmba a yennhu no ho adze.

 Jehovah c yɛ asomdwee nye ehumbɔbɔr Nyankopɔn, na ɔnye nyimpa ahorow nyina dzi no pɛpɛɛpɛ. Osian mbrɛ osii bɔɔ hɛn no ntsi, yebotum esuasua no su ahorow no. (James 3:17) Afei so Nyankopɔn dze no sunsum krɔnkrɔn no boa hɔn a wɔbɔ mbɔdzen dɛ wobedzi ne mbra do no.​—Asomafo Ndwuma 5:32.

 Sɛ obi yɛ sunsummunyi a obenya “nkwa na asomdwee.” (Romefo 8:6) Nkwa na asomdwee yɛ akyɛdze a ɔsom bo paa a ofi Nyankopɔn hɔ.

•   Nkwa: Nyankopɔn ahyɛ hɔn a wɔyɛ sunsummufo no bɔ dɛ ɔbɛma hɔn daa nkwa.​—John 17:3; Galatiafo 6:8.

•   Asomdwee: Asomdwee bɛtsena wɔnye Nyankopɔn ntamu. Hɔn a wɔma asetsena mu ndzɛmba nkotsee ho hia hɔn no, wɔyɛ Nyankopɔn n’atamfo. (Romefo 8:7) Naaso hɔn a wɔbɔ mbɔdzen ma Nyankopɔn no som na n’apɛdze a wɔbɛyɛ no ho hia hɔn no, ɔma wonya “Nyankopɔn n’asomdwee a ɔtra ntseasee nyina no.” (Philippifo 4:6, 7) Dɛm asomdwee a wonya no ma hɔn akoma tɔ hɔn yamu na hɔn enyi gye.​—Matthew 5:3.

•   Fa Nyankopɔn ne mbra bɔ wo bra. Sɛ ibotum ayɛ dɛm a, ɔsɛ dɛ ekenkan Bible no. Bible no yɛ Nyankopɔn n’asɛm a ɔnam no ‘sunsum krɔnkrɔn no do maa’ nyimpa kyerɛwee. (2 Peter 1:21) Dza ibosua no bɔboa wo ma aasom Nyankopɔn “wɔ sunsum nye nokwar mu.” Iyi kyerɛ dɛ ebɛma Nyankopɔn no sunsum krɔnkrɔn no akyerɛ wo kwan, na ayɛ w’adze ma ɔnye Nyankopɔn n’apɛdze eehyia.​—John 4:24.

•   Bɔ Nyankopɔn mpaa ma ɔmboa wo. (Luke 11:13) Nyankopɔn bɔboa wo ma aada suban pa edzi dze akyerɛ dɛ eyɛ sunsummunyi. (Galatiafo 5:22, 23) Afei so, ɔbɔboa wo ma eenya nyansa a edze begyina wo haw ahorow ano.​—James 1:5.

•   Enye hɔn a wɔyɛ sunsummufo no mbɔ fɛkuw. Wɔbɛhyɛ wo nkuran ma aakɔ do ara ayɛ Nyankopɔn n’apɛdze. (Romefo 1:11, 12) Naaso sɛ enye hɔn a wɔnnyɛ Nyankopɔn n’apɛdze no bɔ fɛkuw a, wɔbɛsɛɛ enye Nyankopɔn ntamu anyɛnkofa no.​—James 4:4.

 Sɛ obi dze noho bɔ nyamesom kuw bi a, ɔno nnkyerɛ dɛ ɔyɛ sunsummunyi. Bible no ka dɛ: ‘Sɛ obi dwen noho dɛ ɔyɛ nyamesomnyi, na ɔannhwɛ ne kasaa yie, na ɔdaadaa nankasa n’akoma a, dɛm nyimpa no ne nyamesom yɛ kwa.’​—James 1:26.

 Naaso Bible no ma yehu dɛ hɔn a wɔyɛ sunsummufo no, wɔsom Nyankopɔn wɔ kwan pa do. Wɔgye dzi dɛ “sunsum kor” pɛ na ɔwɔ hɔ, na ɔno nye Nyankopɔn no sunsum krɔnkrɔn no. Dɛm sunsum yi kenyan hɔn ma wɔbɔ mu som Nyankopɔn dɛ “nyimpadua kor.” Osiandɛ wɔyɛ kuw kor ntsi, wɔbɔ mu suo “sunsum koryɛ mu wɔ asomdwee ahoma mu.”​—Ephesusfo 4:1-4.

 Akɔhwisɛm: Nyankopɔn bɔɔ abɔdze nyina dɛ wɔnsom no.

 Nokwasɛm: Nyankopɔn n’abɔdze nyina hyɛ no enyimnyam. (Ndwom 145:10; Romefo 1:20) Naaso Nyankopɔn n’abɔdze a wonyim nyansa no nkotsee na wobotum asom no. Mbowa nnyim nyansa ntsi worunntum mmfa Nyankopɔn nyɛnko. Sɛ mbowa reyɛ biribi a, dza ɔbɔboa hɔn ma wɔaatsena nkwa mu ntsi na wɔyɛ dɛm na nnyɛ dɛ wɔdze rosom Nyankopɔn. (2 Peter 2:12) Dɛm ntsi Bible no ma yehu dɛ hɔn a wɔdze hɔn mber nyina hwehwɛ asetsena mu ndzɛmba no nnyɛ sunsummufo.​—James 3:15; Jude 19.