Sɛ ibue Bible mu a, ibohu dɛ wɔakyerɛw nsɛm pii wɔ mu. Mma ɔno mmbɔ wo hu na ennka dɛ erennkenkan Bible no. Mbom bu Bible no dɛ pon bi a edziban pii sisi do. Irunntum nndzi edziban no nyina. Naaso ibotum afa dodow biara a epɛ na edzi amee.

 Ntsi sɛ ibotum enya wo Bible akenkan do mfaso paa a, ɔsɛ dɛ edze w’adwen nyina si dza erekenkan no do. Ma yɛnhwɛ akwan ahorow a ibotum afa do ayɛ dɛm.

Dza yerubosusu ho

•  Sɛ erekenkan Bible no a, ebɛnadze ntsi na ɔsɛ dɛ edze w’adwen si dza erekenkan no do?

•  Ebɛyɛ dɛn enya dza ekenkan fi Bible mu no do mfaso kɛse?

•  Dza w’etsipɛmfo ka

 Sɛ epɛ dɛ inya mfaso pii fi Bible akenkan mu a, ɔwɔ dɛ egye ber na ebɔ mbɔdzen kenkan Bible no yie. Ɔwodze ma yɛnyɛ mfatoho bi: Fa no dɛ epɛ dɛ eyɛ tsii. Sɛ edze tsii baag no to nsuhyew no mu a, ɔbɛgye kakra. Naaso sɛ epɛ dɛ ɔgye paa a, gyedɛ ema ɔda nsuhyew no mu kyɛr kakra.

 Dɛmara na Bible akenkan so tse. Dɛ nkyɛ ebɛkenkan no ntsɛntsɛm na eeyi wo nsa efi ho no, ɔsɛ dɛ etɔ wo bo ara kenkan na egye ber dwendwen ho. Dɛmara na obi a ɔkyerɛɛw Ndwom 119 no yɛe. Dɛm ɔdwontofo no kaa dɛ ɔdwendwen Nyankopɔn ne Mbra ho adzekyee nyina.​—Ndwom 119:97.

 Naaso iyi nnkyerɛ dɛ ɔsɛ dɛ edze wo ber nyina kenkan Bible no fi anapa kesi ewimbir na edwendwen ho. Mbom no, dza nna ɔdwontofo no pɛ dɛ ɔkyerɛ nye dɛ, nna ɔgye ber dwendwen Nyankopɔn n’Asɛm no ho. Na dɛm a ɔyɛe no boaa no ma osisii gyinae pa.​—Ndwom 119:98-100.

 “Me maame kaa kyerɛɛ me mber bi dɛ, ‘Ewɔ nda esuon wɔ dapɛn no mu a edze yɛ dza epɛ dɛ eyɛ, ebɛnadze ntsi na emmfa no mu kakra mma Jehovah? Innhu dɛ ɔyɛ no kwan do a?’”​—Melanie.

 Sɛ edwendwen Bible mu afotusɛm a ekenkan no ho a, ɔbɔboa wo paa ma eetum esisi gyinae pa. Gyinae no bi botum afa hɔn a ɔsɛ dɛ efa hɔn nyɛnko no ho, anaa mbrɛ ibesi ayɛ w’adze aber a nkorɔfo pɛ dɛ wɔhyɛ wo ma eyɛ adze bɔn bi no.

•   Yɛ nhyehyɛɛ pa. Basiaba bi a wɔfrɛ no Julia kaa dɛ, “Ɔwɔ dɛ inya nhyehyɛɛ a edze bɛkenkan Bible no da biara. Bio so, ɔsɛ dɛ ihu dza ebɛkenkan, aber a ebɛkenkan, nye beebi a ibotum atsena na akenkan.”

•   Mma biribiara nntwetwe w’adwen. Akataasia bi a wɔfrɛ no Gianna kaa dɛ, “Ɔwɔ dɛ ehwehwɛ beebi a hɔ yɛ dzinn na ekɛhyɛ. Afei so, ɔsɛ dɛ ema w’ebusua no mufo hu wo nhyehyɛɛ a edze kenkan Bible no da biara da, mbrɛ ɔbɛyɛ a wɔrennyɛ ndzɛmba bi a ɔbɔtwetwe w’adwen aber a ereyɛ wo Bible akenkan no.”

   Sɛ erekenkan Bible no a, ibotum dze wo fon anaa wo tablɛt no ato beebi a sɛ tɛst mɛsegye anaa email ba do a, ɔrennyɛ dede nntwetwe w’adwen. Sɛ epɛ a, ibotum so akenkan efi Bible a woetsintsim no mu. Mbrɛ ɔtse nye dɛ, nhwehwɛmu ma yehu dɛ sɛ ekenkan adze fi nwoma a woetsintsim mu a, ɔboa ma etse dza erekenkan no ase ntsɛm. Naaso sɛ ekenkan wɔ fon anaa tablɛt do a, obotum ayɛ dzen dɛ edze w’adwen nyina bedzi dza erekenkan no ekyir.

   “Sɛ merekenkan adze wɔ mo fon do a, ɔyɛ a ndzɛmba bi twetwe m’adwen. Mutum nya tɛst mɛsegye anaa email, na mo fon ne battery so tum kɔ famu koraa. Afei so, ɔtɔ da a nna intanɛt no so atsew kɔ. Naaso, sɛ merekenkan efi nwoma a woetsintsim mu a, dza mihia ara nye beebi a kan wɔ.”​—Elena.

•   Fa mpaabɔ hyɛ ase. Serɛ Jehovah ma ɔmboa wo na tse Bible no ne fa a epɛ dɛ ekenkan no ase. Afei so, serɛ no dɛ ɔmboa wo ma kaa dza epɛ dɛ ekenkan no ama eetum enya do mfaso.​—James 1:5.

   Sɛ epɛnsapɛnsa dza ekenkanee no mu kɔ ekyir yie a, ɔno bɛkyerɛ dɛ ereyɛ dza eserɛe fii Jehovah hɔ no ho biribi. Ibesi dɛn ayɛ dɛm? Sɛ erekenkan Bible no wɔ JW Library app anaa hɛn wɛbsaet no do, na sɛ eklek nyiyimu bi do a, ibohu nsɛm afofor a ɔfa dɛm kyerɛwsɛm no ho a ɔbɔboa wo ma aatse ase yie.

•   Bisa woho nsɛm. Dɛ nhwɛdo no: ‘Ebɛnadze na dza merekenkan yi ma muhu fa Jehovah ho? Aso ɔma muhu Jehovah no su bi a mubotum esuasua?’ (Ephesusfo 5:1) ‘Ebɛnadze na mesua efi dɛm kyerɛwsɛm yi mu a mubotum dze abɔ me bra?’ (Ndwom 119:105) ‘Mibesi dɛn dze dza makenkan yi aboa afofor?’​—Romefo 1:11.

   Bio so ibotum ebisa woho dɛ, ‘Dza makenkan yi fa adze tsitsir a Bible no ka ho asɛm no ho dɛn?’ Dɛm asɛmbisa yi ho hia paa. Ebɛnadze ntsi a? Osiandɛ nsɛm a ɔwɔ Genesis kesi Nyikyerɛ no nyina ka adze kor no ara ho asɛm. Ɔka mbrɛ Jehovah nam no sor Ahendzi no do bɛtsew ne dzin ho, na ɔaama adasamba ehu dɛ ɔno na ɔfata dɛ odzi tum, na kwan a ɔfa do dzi tum no so yɛ papa kyɛn biara.