MBABUN BISA DƐ
Aso Medze Sohyial Media Ridzi Dwuma Yie?
Aso w’awofo ma wo kwan dɛ kɔ sohyial media do a? Sɛ dɛm dze a, dza yerubosusu ho yi bɔboa wo ma eehu mbrɛ sohyial media botum aka ndzɛmba ebiasa bi a no ho hia paa wɔ w’asetsena mu.
Dza yerubosusu ho
Ebɛn kwan do na sohyial media botum asɛɛ me ber?
Sɛ enenam sohyial media do a, ɔtse dɛ mbrɛ etse pɔnkɔ bi a n’enyi aber do. Sɛ annkyerɛ pɔnkɔ no kwan a, pɔnkɔ noara bɛkyerɛ wo kwan.
“Ɔyɛ a meka dɛ medze ‘minitsi kakraabi’ rokɔ sohyial media do naaso mobɔhwɛ no, nna masɛɛ ndɔnhwer pii wɔ hɔ! Sɛ annhwɛ yie a, da biara nna isi sohyial media do, na iyi botum aka wo hɔ na wɔasɛɛ wo mber pii.”—Joanna.
Ana inyim? Wɔayɛ sohyial media wɔ kwan bi do a sɛ ekɔ hɔ kor a, da biara ɔbɛyɛ wo dɛ san kɔ hɔ. Hɔn a wɔyɛ sohyial media wɛbsaet ahorow no nyim dɛ, sɛ nkorɔfo beberee kɔ hɔn sohyial media wɛbsaet no do na wodzi mber pii wɔ do a, ɔma ndwumakuw pii so bɔbɔ hɔn ndzɛmba ho dawur wɔ dɛm sohyial media wɛbsaet no do. Na iyi ma hɔn a wɔyɛɛ dɛm sohyial media wɛbsaet no nya sika pii.
Bisa woho dɛ: ‘Sɛ ɔyɛ na menenam sohyial media do a, m’enyi bɛba moho do no nna masɛɛ mber pii wɔ hɔ anaa? Aso nkyɛ mubotum dze dɛm mber no bi ayɛ ndzɛmba bi a no ho hia?’
Dza ibotum ayɛ. Sɛ epɛ dɛ ekɔ sohyial media do a, dzi kan hu ber a epɛ dɛ idzi wɔ do. Sɛ dɛm ber no so ara pɛ a, nna efi do.
Mma nnsɛɛ mber pii wɔ sohyial media do
“Meyɛɛ settings bi wɔ mo fon no do a otum ma mifi app ahorow bi do aber a medzi ber pɔtsee bi wɔ do no. Iyi boaa me ma muhun mbrɛ mubotum dze sohyial media edzi dwuma yie na wɔanngye me ber nyinara.”—Tina.
Bible mu afotusɛm: “Hom mfa mber a hom nya no ndzi dwuma pa.”—Ephesusfo 5:16.
Ebɛn kwan do na sohyial media botum asɛɛ me nda?
Abemfo pii ka dɛ annyɛ yie koraa no, ɔbabun dze odur ewimbir a ɔsɛ dɛ ɔda bɛyɛ ndɔnhwer awɔtwe, naaso mbabun pii nnya no dɛm. Na obotum aba dɛ sohyial media a wɔdze dzi dwuma no ka ho bi na ama aba no dɛm.
“Sɛ merebɛda a midzi kan hwɛ mo fon no do hwɛ dɛ obi asɛnd me mɛsegye bi a no ho hia anaa, naaso mobɔhwɛ no nna medze ndɔnhwer pii rohwɛ nkorɔfo hɔn mfonyin wɔ sohyial media do. Morobɔ mbɔdzen dɛ mibegyaa yɛ.”—Maria.
Ana inyim? Sɛ obi enntum annda yie a, ɔtaa ma ɔyɛ basaa. Ɔbemfo bi a wɔfrɛ no Jean Twenge kaa dɛ, adze kor a ɔma nkorɔfo yɛ bɔɔm na hɔn enyi nngye nye dɛ wonnya ber nnda yie. Ɔdze kaa ho dɛ, sɛ obi nntum nnda yie na iyi “kɔ do kyɛr” a, obotum ama nyimpa no enya “adwenmuhaw.” a
Bisa woho dɛ: ‘Ber tsentsen ahen na menya dze da anafua biara?’ ‘Aso medze ber a ɔsɛ dɛ nkyɛ medze da gye m’ahom no kyinkyin sohyia media do?’
Dza ibotum ayɛ. Sɛ adze sa a, mma mmfa wo elɛktrɔnek mfir mmbɛn beebi a eda no. Sɛ ɔbɛyɛ yie a, mma mmfa wo elɛktrɔnek mfir ahorow no nndzi dwuma aber a wɔaka ndɔnhwer ebien ma ber a edze bɛda aso no. Sɛ ihia alarm bi ma woeenyan wo anapa a, bɔ mbɔdzen dɛ eremmfa dza ɔwɔ wo fon anaa wo tablɛt do no nndzi dwuma.
Mma nnkɔ sohyial media do aber a wɔaka kakra ma ber a edze bɛda aso no
“Ɔyɛ a mutum miamia mo fon araa nko, anafua nyina nna misi ho. Naaso seseiara muhu dɛ ndzɛmba bi wɔ hɔ a, ɔwɔ dɛ migyaa yɛ. Ɔsɛ dɛ meda ntsɛm ama sɛ adze kye a, dza ɔsɛ dɛ meyɛ biara metum ayɛ no yie.”—Jeremy.
Bible mu afotusɛm: “Hom nhwehwɛ mu nhu ndzɛmba a no ho hia paa no.”—Philippifo 1:10, NWT.
Ebɛn kwan do na sohyial media botum asɛɛ m’enyigye?
Wɔyɛɛ nhwehwɛmu bi, na wobisabisaa skuulfo bi nsɛm. Hɔn mu bɛyɛ fa kaa dɛ “mpɛn pii no hɔn werɛ how na wɔtse nka dɛ mfaso biara nnyi hɔn do.” Na ɔbɛyɛ dɛ sohyial media ka ho bi na ɔma wɔtse nka dɛm no. Dr. Leonard Sax kaa dɛ: “Sɛ esɛɛ ber pii wɔ sohyial media do na edze woho toto nkorɔfo afofor a wɔwɔ do no ho a, ibotum atse nka dɛ ennsɛ hwee na iyi bɛma ayɛ basaa na wo werɛ ahow.” b
“Mbabun dze, ɔreyɛ ara nye yi nna wɔdze hɔnho rototo afofor ho. Na sohyial media so mpo dze, ɔma ɔyɛ mberɛw koraa ma mbabun dɛ wɔbɛyɛ dɛm ntotoho yi. Ibotum mpo dze woho atoto nkorɔfo a innyim hɔn a ihu hɔn mfonyin wɔ sohyial media do no ho. Anaadɛ ibotum dze w’adwen esi mfonyin na video ahorow a w’anyɛnkofo dze gu hɔ no do araa ma atse nka dɛ erehwer biribi na w’anyɛnkofo no enyi gye koraa kyɛn wo.”—Phoebe.
Ana inyim? Ɔwɔ mu dɛ sohyial media botum aboa wo ma enye w’anyɛnkofo edzi nkitaho dze, naaso ɔnntse dɛ ehyia wo nyɛnko bi na enye no robɔ nkɔmbɔ enyim na enyim. Dr. Nicholas Kardaras kaa dɛ: “Sɛ yehyia nkorɔfo enyim na enyim na yɛnye hɔn bɔ nkɔmbɔ a, hɛn enyi gye koraa kyɛn dɛ yɛnye hɔn bɔbɔ nkɔmbɔ wɔ elɛktrɔnek mfir do. Sɛ nyimpa wɔ hɔ na ne nyɛnko wɔ ne nkyɛn a, ɔma onya enyigye anaa akomatɔyamu bi, naaso mfir a yɛfa do dzi nkitaho ho no dze, ɔnntse dɛm. Ɔmma yennya enyigye anaa akomatɔyamu a sɛ nyimpa no wɔ hɛn nkyɛn a nkyɛ yebenya no.” c
Bisa woho dɛ: ‘Sɛ mohwɛ dza m’anyɛnkofo reyɛ wɔ sohyial media do a, aso ɔma metse nka dɛ mayɛ ankonam?’ ‘Sɛ mohwɛ mfonyin ahorow a m’anyɛnkofo dze gu sohyial media do a, aso ɔma metse nka dɛ hɔn enyi gye kyɛn me anaa?’ ‘Sɛ medze mfonyin anaa video bi to sohyial media do na sɛ mennya “likes” pii a, aso ɔno ma meyɛ basaa?’
Dza ibotum ayɛ. Bɔ mbɔdzen dɛ eronnkɔ sohyial media nda kakra, anaa dapɛn kor, anaa mpo dɛ bosoom kor bi. Dɛ nkyɛ ebɔkɔ sohyial media do no, enye w’anyɛnkofo ntaa mbɔ nkɔmbɔ enyim na enyim anaadɛ frɛ hɔn wɔ fon do mbom. Hwɛ dɛ mber kakra a edze befi sohyial media do no bɛma atse nka dɛ woho atɔ wo naw’enyi agye anaa?
Aso ibotum nye w’anyɛnkofo ehyia mu abɔ nkɔmbɔ mpɛn pii a?
“Muhun dɛ metaa dwendwen dza nkorɔfo dze gu sohyial media do no ho dodow. Naaso migyaa hɔ kɔ no, metse nka dɛ adzesoa kɛse bi efi mo do. Afei so minya mber pii yɛ ndzɛmba ahorow a no ho hia.”—Briana.
Bible mu afotusɛm: “Hom mma obiara nhwɛ mbrɛ nankasa n’edwuma tse, na obenya biribi egyina do edzi ehurusi wɔ dza nankasa ayɛ no mu, na nnyɛ dɛ ɔdze noho bɔtoto obi ho.”—Galatiafo 6:4, NWT.
