U.S Dwumadzibea A Ɔhwɛ Siw Yarba Ano no nye mbabun a woedzi mfe 15 kesi 19 twetwee nkɔmbɔ. Amandzɛɛbɔ a Dwumadzibea no dze too gua nye dɛ, mbabun yi hɔn mu fa kaa dɛ wɔatafer banyin ne banyin ho anaa wɔatafer basia n’ase pɛn. Sharlene Azam kae wɔ no buukuu a wɔato dzin Oral Sex Is the New Goodnight Kiss mu dɛ, “Sɛ enye mbabun ka [banyin ne banyin a wɔtafer ho anaa basia n’ase a wɔtafer] ho asɛm a, dza wɔka ara nye dɛ ɔnnyɛ biribi a asɛm wɔ ho. Sɛ obi nye obi yɛ adze a ɔtse dɛm a, wommbu no dɛ ɔyɛ nda mu nkitahodzi.”

•  Edwen ho dɛn?

•  Ebɛn nokwasɛm na ɔwɔ mu?

•  Ebɛnadze ntsi na asɛm wɔ ho?

 Kyerɛ dɛ dza odzidzi do yi yɛ nyew anaa oho.

1.   Sɛ basia ma wɔtafer n’ase a, ana obotum enyinsen?

   1.   Nyew

   2.   Oho

2.   Sɛ obi tafer obi ne banyin ho anaa basia n’ase a, ana obotum etsi yarba?

   1.   Nyew

   2.   Oho

3.   Sɛ obi tafer obi ne banyin ho anaa basia n’ase a, ana ɔkyerɛ dɛ ɔnye no enya nda mu nkitahodzi?

   1.   Nyew

   2.   Oho

 Fa wo mbuae no toto dza odzidzi do yi ho.

1.   Sɛ basia ma wɔtafer n’ase a, ana obotum enyinsen?

    Mbuae: Oho. Iyi nye siantsir kor ntsi a nyimpa pii ka dɛ, sɛ obi tafer banyin ne banyin ho anaa ɔtafer basia n’ase a, asɛm nnyi ho no.

2.   Sɛ obi tafer obi ne banyin ho anaa basia n’ase a, ana obotum etsi yarba?

    Mbuae: Nyew. Sɛ obi tafer banyin ne banyin ho anaa ɔtafer ɔbaa n’ase a, obotum etsi yarba bi tse dɛ berɛbo mu yarba (hepatitis A anaa B), babaso, babaso kraman, odeepuw, HIV nye dza ɔkeka ho.

3.   Sɛ obi tafer obi ne banyin ho anaa basia n’ase a, ana ɔkyerɛ dɛ ɔnye no enya nda mu nkitahodzi?

    Mbuae: Nyew. Sɛ obi gor obi ne bɔbea ho o, sɛ ɔtafer obi ne banyin ho anaa basia n’ase o, sɛ ɔfa obi wɔ no tun o, sɛ ɔtwetwe obi ne banyin anaa odzi basia n’ase agor ma noho sen o, ne nyinara yɛ nda mu nkitahodzi.

 Obi ne banyin ho anaa basia n’ase a wɔtafer no, ma yɛnhwɛ dza Kyerɛwnsɛm ahorow bi ka wɔ ho.

 Bible no ka dɛ: “Na iyi nye Nyankopɔn ne pɛ, hom ahosan, dɛ hom nyi homho mfi ndwamansɛm ho.”​—1 Thessalonicafo 4:3.

 Greek kasafua a wɔkyerɛɛ ase “ndwamanbra” no, ɔkyerɛ ɔbrakyew biara a ɔkɔ do wɔ hɔn a wɔnnyɛ awar mu ahokafo no ntamu. Bi nye nda mu nkitahodzi, obi ne banyin ho anaa basia n’ase a wɔtafer, obi no tun a wɔfa, nye obi ne banyin a wɔtwetwe anaa ɔbaa n’ase a wɔgor ma noho sen. Sɛ obi bɔ ndwamanbra a, obotum etwa do aba yayaayaw. Dza ɔyɛ hu wɔ mu paa nye dɛ, ɔsɛɛ ɔnye Nyankopɔn ntamu anyɛnkofa.​—1 Peter 3:12.

 Bible no ka dɛ: “Nyia ɔyɛ edwaman no, ɔyɛ nankasa ne nyimpadua bɔn.”​—1 Corinthfo 6:18.

 Sɛ obi tafer obi ne banyin ho anaa basia n’ase a, obotum ahaw ne nyimpadua na asɛɛ ɔnye Nyankopɔn ntamu anyɛnkofa so. Afei so, obotum ama ɔayɛ basaa wɔ abrabɔ mu. Buukuu bi a wɔfrɛ no Talking Sex With Your Kids ka dɛ, “Sɛ nyimpa beenu a wɔnnyɛ awar mu ahokafo da a, hɔn mu biara botum atse nka dɛ ne nyɛnko dze no agyegye n’enyi, anaa ɔdze no etwa n’anomu. Afei so, wobotum atse nka dɛ wɔafɛr. Sɛ obi nya nda mu nkitahodzi biara a ɔnnyɛ no kwan do a, obotum ama ɔaatse nka dɛm. Nda mu nkitahodzi biara yɛ nda.”

 Bible no ka dɛ: ‘Emi nye Jehovah wo Nyɛnkopɔn a ɔkyerɛkyerɛ wo ma inya do mfaso.’​—Isaiah 48:17.

 Nyankopɔn ne mbra a ɔfa nda mu nkitahodzi ho, aso egye dzi dɛ idzi do a, obesi wo yie? Anaa isusu dɛ ɔka wo hyɛ? Mbrɛ ɔbɛyɛ a ibeyi nsɛmbisa yi ano no, susu kaar kwan bi a kaar dze mbirika ridzi do akɔnaaba ho hwɛ. Ndzɛmba sisi kwan no ho a ɔkyerɛ mbirika a ɔwɔ dɛ kaar biara kɔ, kandzea so wɔ hɔ a ɔkyerɛ dɛ gyina anaa kɔ. Dɛmara na bi so kyerɛ beebi a idu a, ɔwɔ dɛ igyina. Aso ihu dɛm ndzɛmba yi dɛ ɔka wo hyɛ anaa ɔbɔ woho ban? Sɛ ɔwo nye ahɛnkafo afofor enndzi akwankyerɛ yi do a, ehwɛ a, ebɛn asɛm besi?

 Yebotum dze iyi atoto Nyankopɔn ne mbra ho. Sɛ enndzi do a, ibotwa do aba yayaayaw. (Galatiafo 6:7) Buukuu bi a wɔato dzin Sex Smart ka dɛ, “Sɛ ipia wo gyedzi nye ndzɛmba a inyim dɛ ɔyɛ papa no to nkyɛn, na eyɛ ndzɛmba a ɔnntsen a, obu a ewɔ ma woho no do tsew. Naaso, sɛ edze Nyankopɔn ne mbra yɛ edwuma a, ebɔbɔ bra a no ho tsew. Dza ɔkyɛn iyi no, ibenya tsibowa pa.​—1 Peter 3:16.