October 2012 mu no, wobuee tsetse ndzɛmba korabea bi wɔ hɛn wiadze nyina edwumayɛbea tsir a ɔwɔ Brooklyn, New York a wankasa botum akɔ aprɔbɔ wɔ hɔ. Dɛm bea yi bɛma ehu Jehovah Adasefo hɔn abakɔsɛm ho nsɛm pii. a Mfonyin nye ndzɛmba ahorow a wɔada no edzi wɔ hɔ no kã nsɛndzendzen na esian ahorow a nyimpa binom a wɔyɛɛ dza wobotum biara dze bɔɔ hɔn bra dɛ Christianfo no hyiae, nye konyim a wodzii wɔ nsɔhwɛ mu no ho asɛm.

Ahɔho a wɔba hɔ nserahwɛ no hu ndzɛmba na nsɛm a osisii ofitsi Christianfo a wɔtsenaa ase wɔ afe 33 H.B. dze besi ndɛ. Wɔakyekyɛ mfonyin na ndzɛmba ahorow a wɔada no edzi no mu ayɛ no ɔfã ahorow anan, na wɔayɛ mberbu pon a ɔma yehu ebusuabɔ a ɔwɔ ɔfã ahorow yi mu. Ɔfã biara wɔ asɛntsir a ogyina Kyerɛwsɛm do, na wɔayɛ video tsiabaa bi wɔ Borɔfo kasa mu a wɔdze da ne nyienyim nsɛm no edzi. Video no wɔ nsɛntsir nkakraba wɔ kasa afofor esia mu a ɔno nye French, Italian, Japanese, Korean, Portuguese, nye Spanish.

Ɔfã a odzi kan no n’asɛntsir nye, “Nyimpa Adɔ Sum No,” na woyii dɛm asɛm yi fii Jesus n’asɛm a ɔwɔ John 3:​19 no mu. Bible no hyɛɛ nkɔm dɛ nyimpa bɔn bɔsoɛr na “wɔbɛkã nsɛnkyew.” (Ndwuma 20:30) Dɛm ɔfã yi kã nyimpa ewudzifo yi ho nsɛm pii.

Asɛntsir a ɔda ɔfã a otsĩa ebien no do no nye “Kan Mfi Sum Mu Nhyerɛn,” na woyii dɛm asɛm yi fii 2 Corinthfo 4:6. Dɛm mberbu pon yi kã nsɛm a osisii ofitsi afe 1800 mfe no ewiei dze kesi afe 1900 mfe no ahyɛse mu. Dɛm ɔfã yi n’ahyɛse kã mbarimba a wɔdze nsiyɛ hyɛɛ ase sũaa Bible no wɔ kwan pa do nye nkɔenyim a wonyae wɔ Bible mu nyimdzee mu, nye hɔn dodow a ɔkɔr enyim ansaana Wiadze Nyina Kõ I no reba no ho asɛm.

Dza odzi hɔ wɔ ɔfã a otsĩa ebien no mu no nye video a wɔato dzin “Photo-Drama of Creation.” Bible Esuafo no (dzin a nna wɔdze frɛ Jehovah Adasefo dɛm aber no) hyɛɛ ase yii dɛm video soronko yi kyerɛɛ nkorɔfo wɔ afe 1914 mu, mfonyin a no mu nyimpa na mbowa tum kekã hɔnho nye dza wonntum nnkekã hɔnho a ndze kã ho na wɔkekaa bɔɔ mu yɛɛ video yi. Ber a wɔdaa dɛm video yi edzi no, mfe kakraabi mu no, nyimpa pii bɔɔ kyirdidi kɔhwɛe. Ndzɛmba na mfonyin a wɔada no edzi wɔ hɔ no bi nye mfonyin ahorow a wɔadrɔw a akyɛr papaapa, video tsiabaa bi a wɔdze da dwumadzi no nyienyim nsɛm edzi, nye mfonyin ahorow bɔbor 500 a wodzi kyinhyia.

Ɔfã a otsĩa ebiasa no n’asɛntsir nye ‘Dragon No Bo Fuwii,’ na woyii dɛm asɛm yi fii Nyikyerɛ 12:17. Ɔfã yi kã ɔtaa a Christ n’ekyirdzifo hyiae wɔ mfeha a otsĩa 20 no mu ho asɛm. Nkyii so, ɔkã Christianfo a woenngyina ɔfã biara wɔ ɔkõ ahorow mu no ho asɛm a ɔhyɛ dzen. Video kor bi kã Remigio Cuminetti ho asɛm. Dɛm ɔbarimba yi yɛ Ɔdasefo, na ɔammpen do dɛ ɔbɛhyɛ Italy nsordaafo akontar anaa obedzi akõ wɔ Wiadze Nyina Kõ I no mu. Video fofor so kã Alois Moser a ofi Austria ho asɛm. Ɔammpen do dɛ ɔbɛkã “Heil Hitler!,” na iyi maa ɔhweer n’edwuma na ewiei koraa no wɔdze no kɔtoo Dachau ndaduadan mu.

Wɔayɛ dan ketseaba bi dɛ efiadze a no mu yɛ sum ne saso, na dɛm dan yi mu na wɔdze Jehovah Adasefo a osian hɔn gyedzi ntsi wɔdze hɔn koguu efiadze wɔ aman bi tse dɛ Greece, Japan, Poland, nye Serbia mu no hɔn ho mfonyin afemfam. Iyi ma itum twa tsebea a wɔkɔr mu no ho mfonyin wɔ w’adwen mu.

Ɔfã a otwa tun no n’asɛntsir nye “Asɛmpa A Wɔkã Kyerɛ Amanaman Nyina,” na ogyina asɛm a ɔwɔ Matthew 24:14 no do. Dɛm ɔfã yi kã dwuma a Jehovah Adasefo edzi ofitsi afe 1950 dze besi ndɛ no ho asɛm. Mfonyin ahorow pii a wɔada no edzi wɔ hɔ no ma yehu nkɔenyim mbordo a Jehovah Adasefo rinya, nsi a wɔdze reyɛ asɛnka edwuma no, nye hɔn enuadɔ a ɔyɛ hɔn ahyɛnsewdze tsitsir no.

Wɔayɛ Bible House nye Brooklyn Tabernacle adan no ho mfonyin wɔ dan ketseaba bi mu wɔ hɔ. Iyinom yɛ adan a Jehovah Adasefo dze edzi dwuma bɔbor mfrenhyia ɔha a etwa mu no mu. Ansaana ɔhɔho bi bopue efi tsetse ndzɛmba korabea hɔ no, obotum ahɛn dan ketseaba no mu akɔhwɛ dɛm mfonyin ahorow yi.

Tsetse ndzɛmba korabea no ho nhyehyɛɛ dzii afe, na ne nsii no dzii abosoom dodow bi. Adasefo a wofi wiadze mfɛndzanan nyina mu na wɔdze ndzɛmba a ɔyɛ hɔn ebusua egyapadze a ɔsom bo mae ma wɔdze yɛɛ tsetse ndzɛmba korabea yi.

Ebɛn mfaso na ɔwɔ dɛm dwumadzi yi nyina do? Aber a wobisaa mfaso a Jehovah Adasefo benya ber a wɔakɔ aprɔbɔ wɔ dɛm bea yi ho asɛm no, hɔn Akwankyerɛ Kuw no munyi kor kãa asɛm a nyimpa pii nyim a ɔnye dɛ: “Sɛ yebohu beebi a yɛrokɔ a, ɔwɔ dɛ yehu beebi a yefi bae.”