“Yɛwɔ Bethel a yɛkɛseraa hɔ no ho nkaa pii a ɔyɛ enyigye, na hɛn werɛ nnkefir da.” Dɛm na awarfo bi a wofi Vanuatu kãe aber a wɔkɛseraa hɛn edwumayɛbea a ɔwɔ United States no ekyir no. Nyimpa bɔbor mpem 70 a wɔkɛsera hɔ afe biara no mu pii so tse nkã dɛmara.

Ana abɛsera hɛn Bethel a ɔwɔ United States no pɛn? Sɛ ennyɛɛ dɛm a, yɛto nsa frɛ wo dɛ bra na yɛbɛgye wo fɛw do.

Wiadze Nyina Edwumayɛbea Tsir, Brooklyn, New York. Ma wɔnye wo nkɔ aprɔw, na eehu mbrɛ yɛbɔ mbɔdzen yɛ nhyehyɛɛ dze hwɛ wiadze nyina asɛnka edwuma no do, na yɛma ho akwankyerɛ no. Yɛwɔ mbea ahorow ebien bi so a wankasa botum akɔhwehwɛ ndzɛmba a ɔda tsetse nsɛm edzi. Kor ne dzin a ɔda do nye “A People for Jehovah’s Name” (Ɔman ma Jehovah ne Dzin). Na iyi da Jehovah no nkorɔfo hɔn abakɔsɛm edzi, fi afeha a odzi kan besi ndɛ. Dza otsĩa ebien no ne dzin a ɔda do nye “The Bible and the Divine Name” (Bible No na Nyankopɔn Dzin No). Iyi so kyerɛ Bible nkyerɛase ahorow pii a Nyankopɔn dzin soronko no wɔ mu.

Theocracy Ntsetsee, Patterson, New York. Hwɛ skuul ahorow a wɔyɛ no wɔ hɔ no, ibi nye Ɔweɔn-Aban Gilead Bible Skuul nye Skuul ma Nkorbata Egyinatukuw Mufo nye Hɔn Yernom. Afei so ibohu mfonyin nye video ahorow a ɔkyerɛ ndwuma a wɔyɛ no wɔ ɔfese ahorow, a ibi nye edwumayɛbea ahorow a Wɔdorɔw Mfonyin, Wɔyɛ Video nye Dza Wɔbɔ Tsie, Wɔhwɛ ma Aban Mbra Bɔ Hɛn ho Ban nye dza Wɔhwɛ Hɛn Som Edwuma no Do.

Nwoma Tsintsim Nye Mbrɛ Wɔdze Mona, Wallkill, New York. Ma wɔnye wo nkɔ aprɔw na hwɛ mbrɛ wotsintsim na wɔyɛ Bible nye Bible ho nwoma ahorow. Afei hwɛ mbrɛ wɔdze mona kɔ asafo ahorow a ɔwɔ United States, Caribbean, nye wiadze n’afã ahorow no.

Sɛ wɔnye obi kɔ Brooklyn hɔ nserahwɛ a, ɔbɛgye no bɛyɛ dɔnhwer kor; Patterson bɛgye bɛyɛ ndɔnhwer ebien; na Wallkill bɛgye bɛyɛ dɔnhwer kor na fã.

Ɔyɛ hɔn a wɔyɛ edwuma wɔ Bethel dwumadzibea ahorow noara na wɔnye wo bɔkɔ aprɔw. Wobu iyi dɛ ɔkã mbɔdzen a wɔrobɔ dɛ wɔbɔboa wiadze nyina nkyerɛkyerɛ edwuma no ho. Obodur May 2014 mu no, nna nyimpa bɔbor 5,000 na wɔyɛ edwuma wɔ mbea ebiasa yi, na nna wɔama hɔn mu bɔbor 3,600 ntsetsee a wobotum nye obi akɔ adan ahorow no mu nserahwɛ. Wɔyɛ nserahwɛ yi wɔ kasa bɛyɛ 40 mu.

Irunntua hwee.

Dabida. Hɔn a wɔba nserahwɛ no mu piinara nnyɛ Adasefo. Hɔn a wɔyɛ Adasefo nye hɔn a wɔnnyɛ bi nyinara ba hɔ benya mbrɛ Jehovah Adasefo bɔ mbɔdzen yɛ nhyehyɛɛ dze boa wiadze nyina asɛnka edwuma no ho ntseasee.

Ɔbaa bi a ɔyɛ Kramonyi fi India bɛseraa Patterson. Owiee nserahwɛ no, ɔkãa dɛ: “Mebɛpɛ dɛ mekã hom ahyehyɛdze no ho. Meda hom ase papaapa dɛ hom akyerɛ obu kɛse a ɔtse dɛm akyerɛ me.”

Nyew! Dɛm nserahwɛ yi tum nya mbofra do nkantando pa. John a ofi United States baa nserahwɛ no kyerɛɛw dɛ: “Ofi aber a yɛkɔr nserahwɛ na yɛbaa fie ekyir no, mbofra a yɛnye hɔn kɔree no nngyaa ho asɛm kã da. Ansaana yɛbɔkɔ nserahwɛ no, nna wonnyim mbrɛ Bethel edwumayɛ tse, naaso seseiara dze, wɔdze Bethel edwuma abɛyɛ hɔn botae.”

Nyew. Nserahwɛ hokwan wɔ hɔ wɔ aman pii do. Sɛ epɛ dɛ ehwehwɛ bea bi na ekɔ a, kɔ Edwumayɛbea Ahorow nye Nserahwɛ ɔfã a ɔwɔ hɛn wɛbsaet yi do no. Yɛdze enyigye to nsa frɛ wo dɛ bra na bɛsera Jehovah Adasefo edwumayɛbea nkorbata no mu kor.