Wɔkyekyɛ Ɔweɔn-Aban no sen magazine biara wɔ wiadze yi mu. Wɔkyekyɛ magazine biara nkorkor nkorkor ɔpepem 42. Awake! na ɔtɔ do ebien, wɔkyekyɛ ɔno so no mu biara nkorkor nkorkor ɔpepem 41. Jehovah Adasefo na wotsintsim magazine ahorow ebien no nyinara, na wɔkyekyɛ no wɔ nsaase 236 do.

Sɛ edze nwoma afofor toto ho a, ɔtse dɛn? The Association of Magazine Media no kyerɛ dɛ, AARP edwumakuw no na wotsintsim U.S. magazine a wɔtɔ paa, na dɛm edwumakuw yi dze hɔn adwen si nyimpa a woedzi abor mfe 50 no do. Dɛm magazine yi no dodow bɔbor ɔpepem 22.4 na nkorɔfo nsa kã. Germanfo edwumakuw ADAC no hɔn nwoma Motorwelt no dodow bɛyɛ ɔpepem 14 na nkorɔfo nsa kã, afei so wotsintsim Chinafo nwoma Gushi Hui (nsɛm) ɔpepem 5.4.

Ɔdze fa dawurbɔ nkrataa ho dze, Japanfo nwoma Yomiuri Shimbun na nkorɔfo nsa kã paa. Mber nyinara no, dodow a nkorɔfo nsa kã no bor ɔpepem du.

Adasefo nwoma ahorow no nya nkɔenyim so wɔ kasa asekyerɛ mu. Wɔkyerɛ Ɔweɔn-Aban no ase kɔ kasa ahorow bɔbor 190 mu, nye Awake! no so kɔ kasa ahorow bɔbor 80 mu. Sɛ edze toto Reader’s Digest nwoma no ho a, wotsintsim no wɔ kasa ahorow 21 mu, na ɔno mpo no, ɔsor ɔman biara no mu dze nye dza ɔwɔ mu.

Dza ɔnye dɛm magazine ahorow yi a yɛakã ho asɛm no bɔ ebira no, wɔdze ntoboa a nkorɔfo fi hɔn pɛ mu yi na wɔdze boa tsintsim Ɔweɔn-Aban na Awake! no, yɛmmfa nnyɛ eguadzi ho dawurbɔ, na bo biara so nnda do.

Ɔweɔn-Aban no ne tsirmpɔw nye dɛ ɔbɛkyerɛkyerɛ Bible no mu​—ne tsitsir no dza Bible no kyerɛkyerɛ fa Nyankopɔn Ahendzi no ho. Ofitsi afe 1879 na wɔakɔ do etsintsim ebesi ndɛ. Awake! no kã nsɛntsir afofor pii ho asɛm, na ibi nye abɔdze ho nsɛm nye nyansahu, a adwen no nye dɛ yɛdze benya gyedzi kɛse wɔ Bɔadze no mu. Ɔsan so si mbrɛ yebotum enya Bible no do mfaso wɔ hɛn asetsena mu no do dua.