Nyimpa fi wiadze beebiara rinya jw.org do mfaso. Obodur May 2014 no, nsɛm a nna nkorɔfo akyerɛw aba Jehovah Adasefo wiadze nyina edwumayɛbea tsir dze akyerɛ enyisɔ no mu bi na odzidzi do yi.

“Nna me ba bi a onnyae nndzii mfe 6 taa dze n’anyɛnkofo hɔn pɛnsel, abaduaba, nye ahwehwɛenyiwa ba fie. Yɛbɔɔ mbɔdzen mpɛn pii dɛ yɛbɔboa no ma ɔaatse ase dɛ dza ɔreyɛ no yɛ adzewia, na adzewia so yɛ bɔn. Hɛn mbɔdzembɔ no ennkesi hwee, kesii dɛ yɛtwẽe Stealing Is Bad video no fii jw.org. Na iyi bɛyɛɛ edwindadze a ɔwɔ tum nye hɛn ba no haw ano edur. Ɔhwɛe wiei no, ɔbɛgyee too mu dɛ adzewia yɛ bɔn wɔ Nyankopɔn enyiwa do ma ntsi nna ɔayɛ krado dɛ ɔdze ndzɛmba no nyinara bɛsan akɛma no wuranom. Wɛbsaet yi aboa hɛn dodow!”​—D. N., Africa.

“Mo mboframba no enyi gye wɛbsaet yi ho paa. Wɔtwẽ video ntsiatsiamba a wɔayɛ no tɔys, a ɔbɔboa hɔn ma wɔdze Bible ngyinadosɛm ahorow a ɔfa atordzi nye adzewia ho ayɛ edwuma yie. Afei so wosũa suban pa afofor a wɔdze bedzi dwuma wɔ hɔn asetsena nyina mu, na ama wɔaabɛyɛ aman mba pa.”​—O. W., West Indies.

“Nna mubu skuul dɛ ɔyɛ adzesoa, na mepɛɛ dɛ migyaa kɔ. Naaso dakor bi, mekenkaan asɛm bi wɔ jw.org wɛbsaet no do a wɔato dzin ‘Should I Quit School?’ Iyi boaa me ma mibenyaa adwempa wɔ skuul ho. Dɛm asɛm no maa mubohun dɛ skuulkɔ bɛtsetse me ama daakye, na ɔbɔboa me ma maabɛyɛ ɔpanyin pa.”​—N. F., Africa.

“Afotu a wɛbsaet yi dze ma mbofra no ama mehu mbrɛ mibesi ekura abrabɔ pa mu wɔ skuul. Mehu mbrɛ mibesi dze m’adwen esi adzesũa do, na maamma biribiara anntwẽtwẽ m’adwen.”​—G., Africa.

“M’edwumamunyi bi kãa dɛ nna ne babaa no skuulfo, tsitsir ababaawa bi taa hunahuna ne babaa no. Iyi hyɛɛ ne babaa no do ara ma ogyaa skuul kɔ nda kakra, osiandɛ nna osuro. Menye m’edwumamunyi no susũu asɛm bi a ɔwɔ jw.org do no ho. Ɔyɛ sene a wɔdorɔw a wɔato dzin dɛ Beat a Bully Without Using Your Fists no. Dza n’enyi gyee ho tsitsir nye afotu a ɔnye dɛ wɔmfa serew ndzi asɛm no ho dwuma no. Ɔnye ne babaa no susũu mbrɛ obedzi ehunahuna no ho dwuma no ho. Iyi maa ne ba no dze akokodur nye ahotodo kɔr skuul. Mber rokɔ do no, ndzɛmba sesãe, na ohunahunafo no mpo bɛyɛɛ ne babaa no ne nyɛnko.”​—V. K., Eastern Europe.

“Meda hom ase wɔ wɛbsaet do asɛm a ɔse ‘Why do I Cut Myself?’ no ho. Iyi yɛ nsɛndzendzen a medzi ho aperper akyɛr. Nna ɔyɛ me dɛ mankotsẽe na minyim dza merefa mu, na sɛ mekã me haw ho asɛm kyerɛ obiara a, ɔnnkɛtse ase. Nhwɛdo ahorow a ɔwɔ dɛm adzesũa asɛm no mu no boaa me paa. Afei dze obi tse me ase!”​—Ababaawa bi a ɔwɔ Australia.

“Jw.org wɛbsaet no ama ayɛ mberɛw ama me dɛ mobɔhwehwɛ mboa afa nsɛm a ɔfa mbabun ho. Asɛm kor bi a mekenkanee wɔ wɛbsaet no do no boaa me ma mubohun ndzɛmba ahorow a ɔkyerɛ dɛ wɔdze nda ho asɛm rudwoodwoo obi. Mubohun so dɛ saãna mugu do rihyia bi, na mubosũaa akwan pa a mubotum afa do edzi ho dwuma.”​—T. W., West Indies.

“Me babanyin bi a onndzii mfe 20 no enyi do yɛ hyew paa. Ɔyɛ a mbrɛ ɔyɛ n’adze gidzigidzi, ɔper na ɔfa ebufuw mpofirmu no ma metsetsee. Iyi ntsi, nna ɔyɛ dzen dɛ menye no bɔbɔ nkɔmbɔ. Ber bi, mokɔr jw.org do na mepaaw ɔfã a ɔfa awarfo nye awofo ho no. Muhun nsɛm pii a ɔfa me tsebea no ho, na nsɛm no boaa me ma mubohun ɔkwan a mubotum afa do nye me ba no abɔ nkɔmbɔ. Ɔno so enya wɛbsaet yi do mfaso paa. Afei ɔkã n’akoma mu nsɛm kyerɛ me, na ɔkã n’enyigyesɛm nye ne haw ahorow nyinara so kyerɛ me.”​—C. B., Africa.

“Dɛ awofo no, jw.org wɛbsaet no kyerɛ hɛn ɔkwan a ɔyɛ enyigye a yebotum afa do akyerɛkyerɛ hɛn mba. Dɛ nhwɛdo no, sene a wɔdorɔw no mu kor bi a ɔfa mbrɛ ibenya nyɛnko pa ho no boaa hɛn mbofra ma wobenyaa anyɛnkofa ho adwempa. Afei so, ɔboaa hɔn ma wotumii paaw anyɛnkofo a wobenya hɔn do nkantando pa. Mpɛn pii no, jw.org do nsɛm no ba wɔ ne ber mu, aber a yehia biribi dze edzi nsɛndzendzen a hɛn mbofra no rihyia ho dwuma no. Ɔyɛ bea a ibenya afotu pa pii.”​—E. L., Europe.

“Mewaar me yer no, mfe esia nye yi. Tse dɛ awarfo biara no, hɛn so, yehyiaa nsɛndzendzen a ɔnye dɛ, yɛbɛma hɛn adwen ehyia wɔ mbrɛ yesi bɔ nkɔmbɔ, hɛn adwenkyerɛ nye sorbi a ɔda hɛn suban na ndzeyɛɛ mu no. M’enyi gyee jw.org do asɛm bi a ɔse ‘How to be a Good Listener’ no ho. Ɔmaa afotu a odzi mu fa mbrɛ yebotu mpon wɔ ɔkwan a yɛfa do tsie asɛm no ho. Mekenkaan asɛm no, na menye me yer susũu ho. Yɛabɔ mbɔdzen dɛ yɛdze adwenkyerɛ ahorow a ɔwɔ mu no bɛyɛ edwuma.”​—B. B., West Indies.

“Bɛyɛ afe kor nye yi na menye Jehovah Adasefo abɔ, na mepɛ dɛ mekyerɛ m’enyisɔ ma jw.org wɛbsaet no. Mesũa ndzɛmba pii efi dɛm wɛbsaet yi do, a ibi nye mbrɛ mibedzi m’ebufuw do na maayɛ okun pa nye egya pa. Mubotum akã no nokwarem dɛ, osian dɛm wɛbsaet yi ntsi m’awar ayɛ yie.”​—L. G. , West Indies.

“Jw.org wɛbsaet no boaa me ma mesanee nyaa m’enyigye bio. Video ahorow a ɔwɔ America Mmum Kasa mu no aboa me ma metu mpon wɔ mmum kasa no mu. Nna ɔyɛ me dɛ munnkotum dze botae papa biara esi m’enyim wɔ m’asetsena mu, naaso aber a mohwɛɛ video a wɔato dzin Seeing God’s Word in My Language no, ɔkãa m’akoma. Na iyi kenyaan mo bo a mesi dɛ medze m’adwen besi ndzɛmba pa a ɔwɔ m’asetsena mu do no mu.”​—J. N., Africa.

“Wɛbsaet yi som bo ampa. Meyɛ obi a metu moho akyɛ dɛ mobɔboa hɔn a wɔyɛ mmum, tsitsir mbabun a wɔyɛ mmum. Ndzɛmba ahorow pii a menya no wɔ mmum kasa mu no aboa me ma mankasa metu mpon wɔ mmum kasa no mu. Wɛbsaet yi aboa me ma metum dze mboa ama hɔn a wɔpɛ dɛ hɔn ebusua asetsena nye anyɛnkofa tu mpon no.”​—K. J., West Indies.

“Meyɛ onyifuranyi a menya jw.org do mfaso. Ɔma minya nsɛm ahorow bi a sɛ wɔdze romona a nkyɛ obedzi abosoom pii ana me nsa akã. Wɛbsaet yi ama m’ebusua asetsena etu mpon, na ɔaboa me ma mabɛyɛ obi a m’apaamu hɔfo nya mo do mfaso kɛse. Ɔboa me so ma menye m’anyɛnkofo a wohu adze no nyinara nya nsɛm ahorow wɔ ber kor mu.”​—C. A., South America.

“Jw.org wɛbsaet no yɛ akoradze kɛse paa ma hɔn a wonntum nnkenkan Braille anaa wonnyi sika a wɔdze bɔtɔ Braille nwoma no. Enyifurafo nam nsɛm a wɔakyer egu apaawa do a wɔbɔ tsie no do nya nsɛntsir ahorow pii a wɔaba fofor no ho nsɛm. Woesiesie wɛbsaet yi ama nyimpa ahorow nyina a enyimhwɛ anaa nyiyimu biara nnyi mu. Ɔma hɛn a hɛn enyi efura no tse nkã dɛ woridzi hɛn nyi, na yɛkã nyimpa ho.​—R. D., Africa.

“Nsosoree a ɔda hom wɛbsaet no nye wɛbsaet a ɔsom afofor ayɛ no mu nye dɛ, hom wɛbsaet no mmfa nsɛm a asɔfo nkotsẽe na wobotum atse ase mpũapũa hɛn. Ɔmmfa nsɛm pii mmpũapũa wo ara ma enntse nkã dɛ wɔayew wo. Hom wɛbsaet no do nnyɛ dzen koraa, na hɔ nsɛm yɛ tsenn. Nkasafua ahorow no nnyɛ dzen, na no do nsɛm so nnyɛ akɛseakɛse. Ɔmma gyedzi nnyɛ dɛ adze bi a n’asetse yɛ dzen. Mbom no, ɔda no edzi dɛ gyedzi yɛ biribi a nyimpa biara botum enya bi.”​—A. G., Asia.

“Sɛ nkyɛ ɔnnyɛ jw.org a, nkyɛ m’asetsena bɛyɛ mbɔbɔr papa! Wɔ dɛm wiadze a oedur sum yi mu no, wɛbsaet yi abɛyɛ dɛ kandzea bi a mubotum dze ehu ndzɛmba enyiwa do yie. Ɔboa me ma mutum muhu, na metse Nyankopɔn n’adwen wɔ ndzɛmba ho ntsɛm paa. Afei so, ɔma minya asetsena mu nsɛmbisa piinara ho mbuae ntsɛm.”​—J. C., West Indies.

“M’enyi sɔ ɔsom mu mboa a ɔba ara bodu me nkyɛn wɔ dɛm kwaa kusuww yi mu wɔ South America ha no. Sɛ ɔnnyɛ wɛbsaet yi a, nkyɛ mayew koraa.”​—M. F., South America.