Yɛdze hɛn eyiyɛ ho nhyehyɛɛ nyina gyina Bible nkyerɛkyerɛ do, a dza odzidzi do yi kã ho:

• Ntseasee wɔ mu dɛ obi bedzi no dɔfo no wu ho awerɛhow. Jesus n’esuafo no dzii hɔn adɔfo wu ho awerɛhow. (John 11:33-​35, 38; Ndwuma 8:2; 9:​39) Dɛm ntsi, yemmbu eyiyɛ dɛ ɔyɛ mber a yɛyɛ dede, yɛbɔ ndwom, na yɛgye hɛn enyi. (Ɔsɛnkafo 3:​1, 4; 7:​1-4) Mbom, yebu eyiyɛ dɛ ɔyɛ mber a yɛkyekye hɔn a adze atɔ hɔn enyi no werɛ.​—Romefo 12:15.

• Ewufo nnyim biribiara. Nyimpa binom gye dzi dɛ ewufo da ho ara tse ase, na wobotum aboa anaa woepira atseasefo. Ɔmmfa ho ebusua a yefi mu anaa hɛn amambra no, yekwetsir amandze nye ndzeyɛɛ biara a ɔfoa dɛm gyedzi yi a ɔnye kyerɛwnsɛm no nnhyia no do. (Ɔsɛnkafo 9:​5, 6, 10) Dɛm amandze no bi nye epesi, eyi a wɔyɛ no hyerɛpɛɛ, eyiyɛ ho afrenhyiadzi, afɔr a wɔbɔ ma ewufo, ewufo a wobisa hɔn hɔ adze, nye kunayɛ ho amandze ahorow. Yekwetsir amandze nye ndzeyɛɛ a ɔtsetse dɛm nyina, osiandɛ yɛyɛ setsie ma Bible n’ahyɛdze a ɔnye dɛ: “Hom ntsew homho, . . . na mma hom nnkã efifidze.”​—2 Corinthfo 6:​17.

• Yɛwɔ enyidado dɛ wobenyan ewufo. Bible no kyerɛkyerɛ dɛ owusoɛr bi bɛba, na mber bi bɛba a wobeyi owu efi hɔ. (Ndwuma 24:15; Nyikyerɛ 21:4) Dɛm enyidado yi ma yekwetsir dɛ yebedzi awerɛhow abor do, na dɛmara so na ɔboaa tsetse Christianfo no ma woenndzi awerɛhow ammbor do.​—1 Thessalonicafo 4:​13.

• Bible no tu hɛn fo dɛ mma yɛnnyɛ adze nntra do. (Mbɛbusɛm 11:2) Yɛnngye nnto mu dɛ eyiyɛ yɛ ho kwan a wɔdze da “asetsena mu enyimnyampɛ” anaa ahonyadze a obi wɔ no edzi. (1 John 2:​16) Yɛnnyɛ eyi hyerɛpɛɛ a adwen nye dɛ yɛrebɛgye hɛn enyi. Dɛmara so na yɛmmfa efunndaka a no bo yɛ dzen dodoodow nnyɛ eyi, na yɛnnhyɛ ntar hyerɛpɛɛ a ɔbɛma bɔhwɛadzefo abɔ agye hɛn do.

• Yɛmmfa hɛn gyedzi a yɛwɔ wɔ eyiyɛ ho no nnhyɛ afofor do. Iyi yɛ mu no, yedzi dɛm ngyinadosɛm yi do: “Hɛn nyina bobu hɛnankasa hɛnho akontaa nkorkor akyerɛ Nyankopɔn.” (Romefo 14:12) Naaso, sɛ wɔma hɛn ho kwan no a, yefi “ɔdwe nye [obu] mu” kyerɛkyerɛ hɛn gyedzi mu kyerɛ hɔn.​—1 Peter 3:​15.

Bea: Sɛ ebusua bi pɛ dɛ wɔyɛ eyi a, wobotum ayɛ wɔ beebiara a wɔpɛ, dɛ ɔyɛ Ahendzi Asa do, bea a wɔyɛ eyi, nyia oewu no ne fie, bea a wɔhyew fun, anaa esiei.

Eyiyɛ No: Wɔma ɔkasa a ɔkyerɛkyerɛ dza Bible no kã fa owu nye owusoɛr ho enyidado ho no mu dze kyekye hɔn a adze atɔ hɔn enyi no werɛ. (John 11:25; Romefo 5:​12; 2 Peter 3:​13) Eyiyɛ ho nhyehyɛɛ yi botum ama yeehu su pa a nna owufo no wɔ ber a ɔtse ase no, nye esuadze ahorow bi a ɔhyɛ nkuran a yebotum esũa efi no nhwɛdo pa no mu.​—2 Samuel 1:​17-​27.

Wɔtow ndwom a wɔdze Kyerɛwnsɛm no mu nsɛm ahyehyɛ. (Colossaefo 3:​16) Na wɔbɔ mpaa a ɔyɛ awerɛkyekyer dze eyiyɛ no ba ewiei.​—Philippifo 4:​6, 7.

Sika anaa kɔlɛhyɛn: Sɛ yɛreyɛ hɛn som mu dwumadzi biara, a eyiyɛ kã ho a, yɛnngyegye sika anaa kɔlɛhyɛn mmfi hɛn asafomba no hɔ. Dɛmara so na yɛnngyegye kɔlɛhyɛn wɔ hɛn ehyiadzi ahorow ase.​—Matthew 10:8.

Hɔn a wobotum aba bi: Hɔn a wɔnnyɛ Adasefo botum aba eyi a wɔyɛ wɔ Ahendzi Asa do no bi. Tse dɛ hɛn Christianfo nhyiamu ahorow no, obiara botum aba eyiyɛ a ɔtse dɛm no bi.

Iyi yɛ mu no, Ɔdasefo biara gyina ne tsibowa a ɔdze Bible no atsetse no do si nankasa ne gyinae wɔ ho. (1 Timothy 1:​19) Naaso, yɛmmfa hɛnho nnhyɛ ɔsom mu ndzeyɛɛ ahorow a ɔnye Bible no nnhyia no mu.​—2 Corinthfo 6:​14-​17.