ADZESUA ASƐM 8
NDWOM 130 Fa Bɔn Kyɛ
Ibesi Dɛn Esuasua Mbrɛ Jehovah Dze Bɔn Kyɛ No?
‘Dɛ mbrɛ Jehovah dze akyɛ hom no, dɛmara na hom so nyɛ.’—COL. 3:13.
DZA YEBOSUA
Sɛ obi ayɛ adze bi ma wɔayɛ hɛn yaw a, adzesua yi bɔboa hɛn ma yeehu ndzɛmba bi a yebotum ayɛ ama yeetum dze no bɔn akyɛ no.
1-2. (a) Ebɛn aber na bi a ɔbɛyɛ dzen ama hɛn paa dɛ yɛdze obi no bɔn bɛkyɛ no? (b) Ebɛnadze na Denise yɛe dze kyerɛɛ dɛ ofii n’akoma mu dze ɔbarimba bi no bɔn kyɛɛ no?
ƆYƐ dzen ma wo dɛ edze nkorɔfo hɔn bɔn bɛkyɛ hɔn anaa? Ɔyɛ dzen ma hɛn mu piinara, nkanka aber a obi aka asɛm bi anaa wɔayɛ biribi ma wɔayɛ hɛn yaw paa no. Naaso sɛ obi yɛ adze ma ɔyɛ hɛn yaw a, yebotum eyi no ho ebufuw efi hɛn mu na yɛdze akyɛ no ma wɔaayɛ yie. Hɛn akyerɛbaa bi a wɔfrɛ no Denise a yɛɛ biribi a ɔtse dɛm. Ber bi, obi yɛɛ adze ma ɔhaaw no paa naaso ofii n’akoma mu dze kyɛɛ no. Ebɛn asɛm koraa na osii? Worubue Jehovah Adasefo Wiadze Nyina Edwumayɛbea Tsir no fofor wɔ afe 2017 mu no, Denise nye n’ebusua kɔhwɛɛ hɔ. Aber a wɔnam kwan do rokɔ fie no, obi dze ne kaar bɔbɔɔ hɔndze no mu. Akwanhyia no maa Denise n’enyi do siiw no. N’enyi do tsetseew no no, wɔkaa kyerɛɛ no dɛ ne mba no epirapira paa na no kun Brian so ewu. Aber a Denise reka dza osii no ho asɛm no, ɔkaa dɛ: “Asɛm no bubuu me koraa na ɔmaa m’adwen nyina tui forae.” Ekyir yi, Denise tsee dɛ saana ɔnnyɛ nsa, ndubɔn anaa biribi fofor bi na ɔmaa nyimpa no dze ne kaar no bɔhwee hɔndze no mu, mbom nna ɔyɛ akwanhyia ara kɛkɛ. Ntsi Denise serɛɛ Jehovah dɛ ɔmma n’akoma mbra famu.
2 Aporisifo kyeer ɔbarimba no, na wɔbɔɔ no sombo dɛ oeku nyimpa. Sɛ nna kɔɔt bu no fɔ a, nna wobotum nye no akɔto efiadze. Naaso kɔɔt no kaa kyerɛɛ Denise dɛ n’anomu asɛm na wobegyina do nye no ato mu anaa woegyaa no. Denise kaa dɛ: “Nna ɔsɛ dɛ meka dza osii no ho asɛm, na iyi maa mekaa me yaw. Nna ɔtse dɛ mbrɛ obi ebue mo kur enyim na ɔdze nkyen beberee egu mu.” Adapɛn kakraabi ekyir no, wɔnye ɔbarimba a ɔmaa Denise nye n’ebusua hun amandze a ɔtse dɛm no kegyinaa kɔɔt. Ntsi nna ɔsɛ dɛ Denise kedzi dza osii no ho dase. Ebɛn asɛm na Denise kae? Ɔkaa kyerɛɛ ɔtsɛmbuafo no dɛ onhu ɔbarimba no mbɔbɔr. b Ɔkasae wiei ara pɛr, bɔhwɛ ɔtsɛmbuafo no n’enyiwa mu nyinsuwa; osui papa. Ɔtsɛmbuafo no kaa dɛ: “Mebɛyɛɛ ɔtsɛmbuafo no, mfe 25 nye yi. Naaso menntsee asɛm a ɔtse dɛm wɔ mo kɔɔt ha da. Menntsee da dɛ ebusua bi a obi ayɛ hɔn bɔn no reserɛ dɛ wonhu nyimpa no mbɔbɔr. Bɔnfakyɛ na ɔdɔ a ɔtse dɛm dze, munnhun bi da.”
3. Ebɛnadze na ɔboaa Denise ma ɔdze ɔbarimba no no bɔn kyɛɛ no?
3 Ebɛnadze na ɔboaa Denise ma ɔdze ɔbarimba no no bɔn kyɛɛ no? Ɔdwendween mbrɛ Jehovah si dze bɔn kyɛ no ho. (Mic. 7:18) Hɛn so, sɛ yɛkyerɛ dɛ hɛn enyi sɔ mbrɛ Jehovah dze hɛn bɔn kyɛ hɛn no a, ɔbɔboa hɛn ma yɛdze afofor so hɔn bɔn akyɛ hɔn.
4. Ebɛnadze na Jehovah pɛ dɛ yɛyɛ? (Ephesusfo 4:32)
4 Dɛ mbrɛ Jehovah dze hɛn bɔn kyɛ hɛn no, ɔpɛ dɛ hɛn so yefi hɛn akoma mu dze afofor hɔn bɔn kyɛ hɔn. (Kenkan Ephesusfo 4:32.) Sɛ obi yɛ adze ma ɔyɛ hɛn yaw a, Jehovah pɛ dɛ yɛdze nyimpa no no bɔn kyɛ no. (Ndw. 86:5; Luke 17:4) Adzesua yi mu no, yɛbɔhwɛ ndzɛmba ebiasa bi a ɔbɔboa hɛn ma yeetum dze afofor hɔn bɔn akyɛ hɔn.
GYE TO MU DƐ DZA NYIMPA NO YƐE NO AYƐ WO YAW
5. Dɛ mbrɛ Mbɛbusɛm 12:18 ma yehu no, sɛ obi yɛ adze ma ɔyɛ hɛn yaw a, yebotum dze yaw no atoto ebɛnadze ho?
5 Obi botum aka asɛm bi anaa ɔayɛ biribi ma wɔayɛ hɛn yaw paa nkanka aber a dɛm nyimpa no yɛ hɛn nyɛnko berɛbo anaa hɛn busuanyi no. (Ndw. 55:12-14) Ɔtɔ da a, yaw a ɔtse dɛm no tse dɛ mbrɛ wɔawɔ hɛn sekan. (Kenkan Mbɛbusɛm 12:18.) Ɔba no dɛm a, ɔyɛ a nna yɛpɛ dɛ yɛyɛ hɛn adze tse dɛ gyama hwee nnsii. Naaso sɛ yɛyɛ dɛm a, ɔtse dɛ mbrɛ obi awɔ hɛn sekan na yeegya sekan no ahyɛ mu. Dɛmara so na sɛ obi yɛ adze ma ɔyɛ hɛn yaw na yɛyɛ hɛnho dɛ hwee nnsii a, hɛnara na yeruku hɛnho.
6. Sɛ obi yɛ adze ma ɔyɛ hɛn yaw a, obotum ama yaayɛ dɛn?
6 Sɛ obi yɛ adze ma ɔyɛ hɛn yaw a, bi a hɛn bo bofuw. Bible no mpo ma yehu dɛ sɛ hɛn bo fuw a ɔnnyɛ bɔn. Naaso, ɔsan so bɔ hɛn kɔkɔ dɛ ɔnnsɛ dɛ yɛdze ebufuw no hyɛ hɛn mu kyɛr. (Ndw. 4:4; Eph. 4:26) Ebɛnadze ntsi a? Osiandɛ mpɛn pii no, mbrɛ yesi tse nka no tum ma yɛyɛ ndzɛmba ahorow bi. Na ebufuw so dze, mpɛn pii no, adze papa biara mmfi mu mmba. (Jas. 1:20) Ntsi ɔsɛ dɛ ekaa dɛ, sɛ obi yɛ adze ma ɔyɛ wo yaw a, wo bo botum efuw. Naaso, dɛ edze ebufuw no bɛhyɛ wo mu anaa ibeyi efi wo mu no dze, ɔwɔ woara wo nsamu.
Sɛ obi yɛ adze ma ɔyɛ wo yaw a, wo bo botum efuw. Naaso dɛ edze ebufuw no bɛhyɛ wo mu anaa ibeyi efi wo mu no dze, ɔwɔ woara wo nsamu
7. Sɛ obi yɛ adze ma ɔhye hɛn paa a, yebotum atse nka dɛn?
7 Sɛ wɔnye hɛn enndzi no yie a, obotum ahye hɛn paa. Ɔwodze ma yɛnhwɛ asɛm a ɔtoo hɛn akyerɛbaa bi a wɔfrɛ no Ann. Ɔkaa dɛ: “Aber a musuar no, me papa gyaa me maame awar kɔwaar basia bi a nna wotua no kaw ma ɔhwɛ me no. Iyi maa metsee nka dɛ wɔatow me akyen. Aber a hɔn beenu no woo mba no, nna ɔyɛ me dɛ obiara nnkasa moho bio. Ntsi mirinyin no nyina, nna metse nka dɛ wɔnye me yɛ hwee a ɔnnyɛ yie.” Akyerɛbaa bi so a wɔfrɛ no Georgette no kun nye basia fofor sɛɛ awar. Ɔreka mbrɛ osi tse nka no ho asɛm no ɔkaa dɛ: “Nna yɛyɛ anyɛnkofo fitsi hɛn mbofrase. Yɛbɔɔ mu yɛɛ akwampaa edwuma no mpo. Ntsi aber a ɔkɛfaa basia fofor no, ɔyɛɛ me yaw paa.” Akyerɛbaa bi a wɔfrɛ no Naomi so kaa dɛ: “Sɛ obi kaa kyerɛɛ me dɛ mo kun botum ayɛ adze ma wɔahye me dɛm a, nkyɛ merenngye nndzi da. Ntsi aber a ɔkaa kyerɛɛ me dɛ ɔhwɛ ponografi no, metsee nka dɛ ɔadaadaa me na ɔama me nsa esi famu.”
8. (a) Siantsir a ɔsɛ dɛ yɛdze nkorɔfo hɔn bɔn kyɛ hɔn no, no mu bi nye dɛn? (b) Sɛ yɛdze afofor hɔn bɔn kyɛ hɔn a, ebɛn mfaso na yenya? (Hwɛ adakaba a wɔato dzin “Sɛ Obi Yɛ Adze Ma Ɔhye Wo Paa A, Ebɛnadze Na Ibotum Ayɛ?” no.)
8 Yerunntum nnkyerɛ nkorɔfo dza wɔnka nkyerɛ hɛn anaa dza wɔmfa nyɛ hɛn. Naaso yebotum ayɛ dza wɔdze yɛ hɛn no ho biribi. Na mpɛn pii no, dza ɔsɛ dɛ yɛyɛ ara nye dɛ yɛdze hɔn bɔn bɛkyɛ hɔn. Ebɛnadze ntsi a? Osiandɛ yɛdɔ Jehovah, na Jehovah so pɛ dɛ yɛdze afofor hɔn bɔn kyɛ hɔn. Sɛ yɛdze dza woesi no ho ebufuw hyɛ hɛn mu na sɛ yaammfa annkyɛ a, annhwɛ a yɛbɔkɔ akɛyɛ biribi a nyansa nnyi mu anaa obotum abɔ hɛn yarba mpo. (Mbɛ. 14:17, 29, 30) Ɔwodze hwɛ asɛm bi a akyerɛbaa bi a wɔfrɛ no Christine kae. Ɔkaa dɛ: “Sɛ obi yɛ adze ma ɔyɛ me yaw anaa mo bo fuw a, menntaa nnserew na ɔmma minndzidzi yie so. Afei so, ɔmma munntum nnda yie na ɔma ɔyɛ dzen ma me dɛ mebɛhyɛ moho do. Sɛ ɔba no dɛm a, ndzɛmba nnhyɛ da ara nnkɔ yie wɔ menye mo kun na afofor ntamu.”
9. Ebɛnadze ntsi na ɔsɛ dɛ yeyi obi a ɔayɛ hɛn bɔn no ho ebufuw fi hɛn mu?
9 Sɛ obi a ɔayɛ hɛn bɔn no nngye nnto mu dɛ dza ɔayɛ no ahaw hɛn mpo a, yebotum ayɛ hɛn afamudze mbrɛ ɔbɛyɛ a dza woesi no rennhaw hɛn pii. Ebɛnadze na yebotum ayɛ? Georgette a yeedzi kan aka no ho asɛm no kaa dɛ: “Ɔwɔ mu dɛ ɔgyee mber kakra dze, naaso mutumii yii mo kun a megyaa no no ho ebufuw fii mo mu. Iyi maa m’asomu dwee me paa.” Sɛ yeyi obi a ɔayɛ hɛn bɔn no ho ebufuw fi hɛn mu a, ɔremma yɛmmfa dɛm ebufuw no nnkɔ afofor do. Afei so sɛ yɛyɛ dɛm a, ɔbɔboa hɛnankasa, osiandɛ ɔbɛma hɛn asomu adwe hɛn na ɔremma yɛnnkɔ do ara nndwendwen dza woesi no ho. (Mbɛ. 11:17) Naaso sɛ iyi nyina ekyir no, ɔda ho ara yɛ dzen ma wo dɛ edze nyimpa no no bɔn bɛkyɛ no so ɛ?
YI EBUFUW NO FI WO MU
10. Sɛ yɛpɛ dɛ yeyi obi no ho ebufuw fi hɛn mu a, bi a ɔbɛgye ber kakra. Ebɛnadze ntsi a? (Ibotum so ahwɛ mfonyin ahorow no.)
10 Sɛ obi yɛ adze ma ɔhye wo paa a, ibesi dɛn eyi ebufuw no efi wo mu? Adze kor a ibotum ayɛ nye dɛ ibenya woho abotar. Yebotum dze atoto obi a oepira kɛse paa ma dɔkta ahwɛ no ewie ho. Ɔbɛgye mber kakra ansaana nyimpa a ɔtse dɛm no ho atɔ no. Dɛmara na hɛn so, sɛ obi yɛ adze ma ɔhye hɛn paa a, bi a ɔbɛgye mber kakra ansaana yeetum efi hɛn akoma mu dze akyɛ nyimpa no.—Ɔsɛnk. 3:3; 1 Pet. 1:22.
Sɛ obi pira a, ɔgye mber kakra ana noho atɔ no. Dɛmara so na sɛ obi yɛ adze ma ɔhye hɛn paa a, bi a ɔbɛgye mber kakra ansaana yeetum eyi ebufuw no efi hɛn mu (Hwɛ nkyekyɛmu 10)
11. Mpaabɔ besi dɛn aboa hɛn ma yɛdze afofor hɔn bɔn aakyɛ hɔn?
11 Bɔ Jehovah mpaa na serɛ no dɛ ɔmboa wo ma fa bɔn kyɛ. c Ann a yeedzi kan aka no ho asɛm no kaa mbrɛ mpaabɔ sii boaa no no ho asɛm. Ɔkaa dɛ: “Meserɛɛ Jehovah dɛ asɛm biara anaa biribiara a m’ebusua no munyi biara yɛe a wɔannkɔ yie no, ɔmfa nkyɛ hɛn. Afei mekyerɛɛw krataa kɛmaa me papa na ne yer fofor no nyina, na mekaa kyerɛɛ hɔn dɛ medze biribiara a wɔyɛe tsiaa me no akyɛ hɔn.” Ɔsanee so kaa dɛ: “Osiandɛ mabɔ mbɔdzen esuasua Jehovah na medze me papa na ne yer no hɔn bɔn akyɛ hɔn no ntsi, bi a ɔbɛma woebosua Jehovah ho adze.”
12. Ebɛnadze ntsi na ɔsɛ dɛ yɛdze hɛnho to Jehovah do mbom kyɛn dɛ yebedzi hɛn akoma ekyir? (Mbɛbusɛm 3:5, 6)
12 Fa woho to Jehovah do, na mma nndzi w’akoma ekyir. (Kenkan Mbɛbusɛm 3:5, 6.) Jehovah dze, onyim dza oye ma hɛn aber nyina. (Isa. 55:8, 9) Ɔremma yɛnyɛ biribi a obepira hɛn da. Dɛm ntsi sɛ ɔka kyerɛ hɛn dɛ yɛmfa bɔn nkyɛ na sɛ yetsie no a, yebotum enya awerɛhyɛmu dɛ hɛnankasa na yebenya do mfaso. (Ndw. 40:4; Isa. 48:17, 18) Naaso sɛ yedzi hɛn akoma ekyir a, bi a yerunntum mmfa bɔn nnkyɛ da. (Mbɛ. 14:12; Jer. 17:9) Naomi a yeedzi kan aka no ho asɛm no kaa dɛ: “Aber a mo kun hwɛɛ ponografi no, ahyɛse no minyaa adwen dɛ sɛ mammfa annkyɛ no a, mennyɛɛ bɔn biara. Nna musuro dɛ sɛ medze kyɛ no a, ɔbɛsan akɔhwɛ bio anaa orunnhu dɛ dza ɔyɛe no yɛɛ me yaw. Afei so nna ɔyɛ me dɛ Jehovah tse me ase. Naaso mubohun dɛ, sɛ Jehovah tse me ase mpo a, ɔno nnkyerɛ dɛ dza mereyɛ no ɔnye me yɛ adwen. Jehovah nyim dɛ dza osii no ahaw me paa na ɔbɛgye ber kakra ana metum eyi mo kun no ho ebufuw efi mo mu dze, naaso ɔsan so pɛ dɛ medze bɔn kyɛ.” d
NYA ADWEN PA
13. Dɛ mbrɛ Romefo 12:18-21 ma yehu no, ebɛnadze na ɔsɛ dɛ yɛyɛ?
13 Sɛ obi yɛ adze ma ɔyɛ hɛn yaw paa na sɛ yɛdze kyɛ no a, ɔnnyɛ dza ɔsɛ dɛ yɛyɛ ara nye dɛ yɛbɛka akyerɛ nyimpa no dɛ yentwa do. Sɛ obi a ɔayɛ adze ma wɔayɛ hɛn yaw paa no yɛ hɛn nua Christiannyi a, ɔsɛ dɛ yɛdze si hɛn enyi do dɛ yebesiesie yɛnye no ntamu. (Matt. 5:23, 24) Ntsi dɛ nkyɛ yɛdze nyimpa no ho ebufuw bɛhyɛ hɛn mu no, ɔsɛ dɛ yehu no mbɔbɔr na yɛdze no bɔn kyɛ no. (Kenkan Romefo 12:18-21; 1 Pet. 3:9) Ebɛnadze na obotum aboa hɛn ma yaayɛ dɛm?
14. Ebɛnadze na ɔsɛ dɛ ebɔ mbɔdzen dɛ ebɛyɛ, na ebɛnadze ntsi a?
14 Jehovah dze n’adwen si suban pa a nyimpa wɔ no do. Ntsi sɛ obi yɛ adze ma ɔyɛ hɛn yaw a, ɔsɛ dɛ yɛbɔ mbɔdzen dɛ yebosuasua Jehovah, na yɛdze hɛn adwen si suban pa a dɛm nyimpa no wɔ no do. (2 Mber. 16:9; Ndw. 130:3) Mpɛn pii no, dza yɛpɛ dɛ yehu wɔ nkorɔfo ho no na yɛdze hɛn adwen si do. Sɛ yɛpɛ dɛ yehu suban pa a yebohu bi, na sɛ yɛpɛ dɛ yehu suban bɔn so a yebohu bi. Naaso, sɛ yɛdze hɛn adwen si suban pa a nkorɔfo wɔ no do a, ɔrennyɛ dzen mma hɛn koraa dɛ yɛdze hɔn bɔn bɛkyɛ hɔn. Ma yɛnhwɛ asɛm a onua bi a wɔfrɛ no Jarrod kae. Ɔkaa dɛ: “Sɛ onua bi yɛ adze ma ɔyɛ me yaw, na medze m’adwen si suban pa a ɔwɔ no do kyɛn dɛ medze besi mfom a oedzi no do a, ɔma ɔyɛ mberɛw ma me dɛ medze bɔn a ɔayɛ etsia me no bɛkyɛ no.”
15. Sɛ obi yɛ adze ma ɔyɛ wo yaw na sɛ eka kyerɛ no dɛ edze no bɔn akyɛ no a, ɔboa paa. Ebɛnadze ntsi a?
15 Adze fofor so a no ho hia a ibotum ayɛ nye dɛ ebɛka akyerɛ obi a ɔayɛ adze ma wɔayɛ wo yaw no dɛ edze no bɔn akyɛ no. Ebɛnadze ntsi a? Ma yɛnhwɛ dza Naomi a yeedzi kan aka no ho asɛm no kae. Ɔkaa dɛ: “Mo kun bisaa me dɛ, ‘Edze mo bɔn akyɛ me anaa?’ Naaso menntum emmbue m’ano mpo annka annkyerɛ no dɛ medze akyɛ no. Iyi maa muhun dɛ, m’akoma mu paa dze, nna memmfaa nnkyɛɛ no. Naaso ber bi ekyir no, mutumii kaa kyerɛɛ mo kun dɛ ‘medze no bɔn akyɛ no.’ Aber a mekaa dɛm asɛm yi kyerɛɛ mo kun no, n’enyi tsetsɛwee. Muhun dɛ n’akoma atɔ ne yamu, na mara so moho tɔɔ me. Ofitsi dɛm aber no besi ndɛ, mframa mpo mmfa hɛn ntamu na magye no edzi bio.”
16. Ebɛnadze na esua afa bɔnfakyɛ ho?
16 Jehovah pɛ dɛ yɛdze bɔn kyɛ. (Col. 3:13) Yenyim no dɛm o, naaso iyi ne yɛ botum ayɛ dzen ama hɛn. Naaso sɛ yedzi kan gye to mu dɛ asɛm no ayɛ hɛn yaw, yɛbɔ mbɔdzen yi ebufuw no fi hɛn mu, na yenya adwen pa a, yebotum dze bɔn akyɛ.—Hwɛ adakaba a wɔato dzin “ Ndzɛmba Ebiasa Bi A Ɔsɛ Dɛ Eyɛ Ansaana Etum Dze Bɔn Akyɛ.”
DWENDWEN MFASO A IBENYA ABER A EDZE AFOFOR HƆN BƆN AKYƐ HƆN NO HO
17. Sɛ yɛdze nkorɔfo hɔn bɔn kyɛ hɔn a, ebɛn mfaso na yenya?
17 Siantsir a ɔsɛ dɛ yɛdze bɔn kyɛ no dze, pii kwa. Ma yensusu no mu bi ho nhwɛ. Odzi kan, sɛ yɛdze bɔn kyɛ a, nna ɔkyerɛ dɛ yerusuasua hɛn Egya Jehovah a ɔwɔ ehumbɔbɔr no, na iyi ma ɔpɛ hɛn asɛm. (Luke 6:36) Otsia ebien, sɛ yɛyɛ dɛm a, nna yɛrekyerɛ dɛ hɛn enyi sɔ mbrɛ Jehovah dze hɛn bɔn kyɛ hɛn no. (Matt. 6:12) Otsia ebiasa, ɔma hɛn apɔwmudzen yɛ papa na yɛnye afofor so ntamu yɛ kama.
18-19. Sɛ yɛdze nkorɔfo hɔn bɔn kyɛ hɔn a, ebɛnadze na obotum efi mu ba?
18 Sɛ yɛdze afofor hɔn bɔn kyɛ hɔn a, yebotum enya nhyira ahorow bi a yɛnhwɛ kwan. Hom mma yɛnhwɛ dza osii aber a Denise a yeedzi kan aka no ho asɛm no dze barimba no no bɔn kyɛɛ no no. Nna Denise nnyim dɛ barimba no ayɛ n’adwen dɛ sɛ kɔɔt dzi n’asɛm wie ara pɛr a, oboku noho. Naaso aber a Denise dze barimba no no bɔn kyɛɛ no no, ɔkaa n’akoma araa ma ɔhyɛɛ ase nye Jehovah Adasefo suaa Bible no.
19 Nokwasɛm nye dɛ, sɛ obi yɛ adze ma ɔhye wo paa a, ɔnnda famu dɛ edze bɛkyɛ no. Naaso sɛ yɛbɔ mbɔdzen dze kyɛ no a, nhyira a yebenya no dze, piigyan. (Matt. 5:7) Dɛm ntsi hom mma yɛnyɛ dza yebotum biara nsuasua mbrɛ Jehovah dze bɔn kyɛ no.
NDWOM 125 “Enyigye Nye Mbɔbɔrhufo!”
a Wɔasesa edzin ahorow no bi.
b Sɛ asɛm bi a ɔtse dɛm si a, ɔsɛ dɛ Christiannyi biara si dza ɔpɛ dɛ ɔyɛ ho gyinae.
c Ibotum ahwɛ ndwom a onnyi hɛn ndwom nwoma mu a odzidzi do yi no ho video wɔ jw.org do. Dɛm ndwom yi nye “Fa Bɔn Kyɛ,” “Fa Kyɛ,” na “Meenya Me Nyɛnko Bio.”
d Ɔwɔ mu dɛ sɛ okun anaa ɔyer bi hwɛ ponografi a ɔayɛ bɔn na obotum so ama no hokafo no eedzi yaw dze, naaso Bible no mma ɔhokafo a noho nnyi asɛm no kwan dɛ obotum egyina do egyaa awar.
