1. Sɛ obi ka dɛ ɔdze wo bɔn akyɛ wo a, mpɛn pii no ɔyɛ dzen dɛ ebɛtse dza ɔpɛ dɛ ɔkyerɛ no ase. Ebɛnadze ntsi a?

 “MEDZE wo bɔn akyɛ wo.” Sɛ eka asɛm bi anaa eyɛ biribi ma ɔyɛ obi yaw paa na sɛ ɔka dɛm asɛm yi kyerɛ wo a, ebɛtse nka dɛn? Innhu dɛ ɔbɛma w’akoma atɔ wo yamu paa a? Naaso sɛ obi ka dɛ ‘ɔdze wo bɔn akyɛ wo’ a, ɔkyerɛ dɛn ankasa? Iyi kyerɛ dɛ nyimpa no eyi biribiara efi no mu ma asɛm dze n’asɛm kɔ anaa? Anaa ɔreka dɛm dze etwa asɛm no do ara kɛkɛ? Asɛm no nye dɛ, sɛ nyimpa ka dɛ ɔdze wo bɔn akyɛ wo a, annhwɛ a irunnhu ne tsirmu.

2. Kyerɛwnsɛm no ka mbrɛ Jehovah dze bɔn kyɛ no ho asɛm dɛn? (Hwɛ ase hɔ asɛm no so.)

² Mbrɛ Jehovah dze nyimpa a wɔtɔ sin no hɔn bɔn kyɛ hɔn no, ɔnnyɛ dɛm koraa na nyimpa dze ne nyɛnko no bɔn kyɛ no. Mbrɛ Jehovah dze hɛn bɔn kyɛ hɛn no dze, ɔda mu fua. Ɔdwontofo no kaa Jehovah ho asɛm dɛ: “Ɔwo na edze bɔn kyɛ korakora mbrɛ ɔbɛyɛ a nyimpa bosuro wo.” a (Ndw. 130:​4, NWT.) Ampa, sɛ Jehovah dze hɛn bɔn kyɛ hɛn a, nna ɔdze ‘akyɛ hɛn korakora.’ Jehovah ma yehu dza bɔnfakyɛ kyerɛ ankasa. Hebrew Kyerɛwnsɛm ahorow bi mu no, Bible akyerɛwfo no dze kasafua bi kaa mbrɛ Jehovah dze bɔn kyɛ no ho asɛm. Naaso sɛ wɔreka mbrɛ nyimpa dze ne nyɛnko no bɔn kyɛ no ho asɛm a, nna wɔmmfa dɛm kasafua no nndzi dwuma.

3. Ebɛn kwan do na mbrɛ Jehovah dze bɔn kyɛ no nntse dɛ nyimpa nedze? (Isaiah 55:​6, 7)

³ Sɛ Jehovah dze hɛn bɔn kyɛ hɛn a, ɔpepa hɛn bɔn no korakora. Iyi ma yɛsan nye no ntamu yɛ kama bio tse dɛ mbrɛ biribiara nnsii. Enyigyesɛm nye dɛ, Jehovah ne yamu ye paa,  ntsi aber biara a yɛbɛserɛ no dɛ ɔmfa hɛn bɔn nkyɛ hɛn no, ɔdze kyɛ hɛn korakora.—Kenkan Isaiah 55:​6, 7.

4. Jehovah si dɛn boa hɛn ma yɛtse mbrɛ ɔdze bɔn kyɛ korakora no ase yie?

⁴ Sɛ mbrɛ yɛdze bɔn kyɛ no nntse dɛ mbrɛ Jehovah dze bɔn kyɛ no dze a, nna ɔno yebesi dɛn atse Jehovah no bɔnfakyɛ ase yie? Jehovah dze mbrɛ ɔdze bɔn kyɛ no toto ndzɛmba ahorow bi ho, na iyi boa hɛn ma yɛtse ase yie. Yebosusu dɛm ndzɛmba no bi ho wɔ adzesua yi mu, na ɔbɛma yeehu mbrɛ Jehovah yi hɛn bɔn fi hɔ na ɔma yɛsan nye no ntamu yɛ papa bio no. Afei so, ɔbɔboa hɛn ma yaakyerɛ dza hɛn Egya a ɔwɔ ehumbɔbɔr na ayamuyie no ayɛ ama hɛn no ho enyisɔ kɛse, osiandɛ ɔno dze sɛ ɔdze bɔn kyɛ a, nna ɔdze akyɛ korakora.

JEHOVAH YI HƐN BƆN FI HƆ

5. Sɛ Jehovah dze hɛn bɔn kyɛ hɛn a, ɔyɛ bɔn no dɛn?

⁵ Bible mu no, wɔtaa dze bɔn toto adzesoa a no mu yɛ dur ho. Dɛ mfatoho no, Ɔhen David kaa nankasa no bɔn ho asɛm dɛ: ‘M’emumuyɛ abor mo do; ayɛ mo do dur dɛ adzesoadze durdur.’ (Ndw. 38:4) Naaso sɛ ndzebɔnyɛfo nu hɔnho wɔ hɔn bɔn ho a, Jehovah dze kyɛ hɔn. (Ndw. 25:18; 32:5) Hebrew asɛmfua a wɔakyerɛ ase “dze akyɛ” no, dza ɔkyerɛ ankasa nye “ma do” anaa “soa.” Ntsi ɔkwan bi do no, sɛ Jehovah dze hɛn bɔn kyɛ hɛn a, ɔtse dɛ mbrɛ ɔama hɛn bɔn a wɔayɛ adzesoa ama hɛn no do ato ne mbatsir do dze kɔ tse dɛ ɔbarimba ɔhoɔdzenfo bi.

6. Sɛ Jehovah soa hɛn bɔn fi hɛn nkyɛn a, ɔdze kɔ hen?

⁶ Bible no yɛ ntotoho fofor bi so, na ɔma yehu beebi a sɛ Jehovah soa hɛn bɔn no fi hɛn nkyɛn a, ɔdze kɔ. Ndwom 103:12 ka dɛ: “Dɛ mbrɛ anee na boka ntamu war no, dɛmara so na ɔama yɛnye hɛn mbrato ntamu awar.” Boka na anee ntamu war paa na ɔnnyɛ adze a wobotum ehyia da. Iyi kyerɛ dɛ, sɛ Jehovah yi hɛn bɔn fi hɛn nkyɛn a, ɔdze kɔ ekyirekyir. Iyi ma yenya awerɛhyɛmu dɛ, sɛ Jehovah dze hɛn bɔn kyɛ hɛn a, nna ɔdze akyɛ hɛn korakora.

7. Bible no ma yehu dɛ sɛ Jehovah soa hɛn bɔn kɔ ekyirekyir a, ɔyɛ bɔn no dɛn? (Micah 7:​18, 19)

⁷ Yeebohu dɛ sɛ Jehovah soa hɛn bɔn fi hɛn nkyɛn a, ɔdze kɔ ekyirekyir. Naaso yembisa o, ehwɛ a, Jehovah kɔ do ara kitsa bɔn no mu anaa? Oho. Ɔhen Hezekiah kaa Jehovah ho asɛm dɛ: “Ɔwo atow mo bɔn nyinara egu w’ekyir.” (Isa. 38:​9, 17) Dɛm ntotoho yi ma yehu dɛ, sɛ Jehovah yi hɔn a woenu hɔnho no hɔn bɔn fi hɔn nkyɛn a, ɔtow kyen beebi a onnkohu no bio. Yebotum aka asɛm a Ɔhen Hezekiah kae no wɔ kwan fofor do dɛ: “Ɔwo ama [mo bɔn] ayɛ tse dɛ mbrɛ mennyɛɛ bɔn mpo da.” Bible no yɛ ntotoho fofor bi a ɔma yɛtse dɛm asɛm yi ase yie. Wɔayɛ ho kyerɛwtohɔ wɔ Micah 7:​18, 19. (Kenkan.) Dɛm kyerɛwsɛm no ka Jehovah ho asɛm dɛ ɔtow hɛn bɔn gu po n’ase tɔnn. Tsetse no, sɛ nna wɔtow biribi to po n’ase tɔnn a, nna obiara nnyi hɔ a obotum akɔ ekeyi aba.

8. Dze besi ha yi, ebɛnadze na yeebohu?

⁸ Ntotoho ahorow a yɛayɛ no ama yeebohu dɛ, sɛ Jehovah dze hɛn bɔn kyɛ hɛn a, oyi hɛn bɔn a wɔayɛ tse dɛ adzesoa no fi hɛn do koraa. David kaa asɛm bi, na yɛnye no yɛ adwen paa. Ɔkaa dɛ: ‘Enyigye nye hɔn a wɔdze hɔn mbrato akyɛ hɔn, na wɔakata hɔn ndzebɔn do. Enyigye nye nyimpa a Jehovah rummbu no bɔn nngu no do.’ (Rom. 4:​7, 8) Nokwasɛm nye dɛ, sɛ Jehovah dze hɛn bɔn kyɛ hɛn a, ɔdze kyɛ hɛn korakora.

JEHOVAH PEPA HƐN BƆN

9. Ebɛn ntotoho afofor na Jehovah yɛe a ɔma yehu dɛ sɛ ɔdze bɔn kyɛ a, nna ɔdze akyɛ korakora?

⁹ Jehovah yɛɛ ntotoho afofor bi so, na ɔboa  hɛn ma yɛtse mbrɛ ɔdze werdam afɔrbɔ no pepa hɔn a wonu hɔnho no hɔn bɔn no ase yie. Bible no ka Jehovah ho asɛm dɛ ɔhor anaa ɔhohor hɔn a woenu hɔnho no hɔn bɔn. Sɛ ɔyɛ dɛm a, ɔma hɔn ho tsew. (Ndw. 51:7; Isa. 4:4; Jer. 33:8) Jehovah nankasa ka dza ɔyɛ yi ho asɛm dɛ: ‘Kaansa hom bɔn tse dɛ koogyan mpo a, ɔbɔhoa dɛ esukwankyɛba; kaansa ɔber dɛ bɔgyaben mpo a, ɔbɛyɛ fufuw dɛ guannhwi.’ (Isa. 1:18) Sɛ adze kɔkɔɔ ka tam fitaa bi mu a, ɔyɛ dzen paa dɛ ebɔhor ma wɔaakɔ. Naaso dɛm ntotoho a Jehovah ayɛ yi ma yenya awerɛhyɛmu dɛ obotum ahor hɛn bɔn ma wɔaakɔ korakora a yerunnhu no bio.

10. Ebɛn ntotoho bio na Jehovah yɛe dze kyerɛɛ dɛ sɛ ɔdze bɔn kyɛ a, nna ɔdze akyɛ korakora?

¹⁰ Adzesua a odzi iyi enyim mu no, wɔdze hɛn bɔn totoo ‘kaw’ bi a yɛdze ho. (Matt. 6:12; Luke 11:4) Dɛm ntsi aber biara a yɛbɛyɛ bɔn no, nna kaw a yɛdze Jehovah no reyɛ kɛse. Jehovah dze, yɛdze no kaw beberee. Naaso sɛ ɔdze hɛn bɔn kyɛ hɛn a, ɔtse dɛ mbrɛ oetwa kaw a yɛdze no no nyinara mu; ɔnnhwɛ kwan dɛ yebotua no bio. Dɛm ntotoho yi ma yehu dɛ sɛ Jehovah dze hɛn bɔn kyɛ hɛn a, ɔma hɛnho dwe hɛn na hɛn akoma so tɔ hɛn yamu.

11. Sɛ Bible no ka dɛ ‘wɔapepa’ hɛn bɔn a, ɔkyerɛ dɛn? (Asomafo Ndwuma 3:19)

¹¹ Sɛ yɛdze kaw a Jehovah twa mu no to nkyɛn a, adze fofor so a ɔyɛ nye dɛ ɔpepa hɛn bɔn. (Kenkan Asomafo Ndwuma 3:19.) Ɔwodze ma yɛnyɛ dɛm mfatoho yi: Sɛ obi dze pɛn kyerɛw kaw bi a edze no no to hɔ, na ekyir yi ɔpɛ dɛ ɔdze kyɛ wo a, obotwa dza ɔakyerɛw no mu. Naaso obiara a ɔbɔhwɛ buukuu no mu no botum ehu kaw a nna edze no. Naaso sɛ oenntwa mu na mbom ɔpepa dza ɔkyerɛwee no a, ɔnodze obiara runnhu. Tsetse no, nna dubir anaa ink a nna wɔdze kyerɛw adze no, nna wotum dze nsu pepa ma ɔyɛ yie. Ntsi nna obi botum afɔw biribi dze apepa adze bi a wɔdze ink akyerɛw no. Dɛm ntsi sɛ wɔpepa obi ne kaw a, nna ɔnnyɛ adze a obiara botum ehu kaw a nna wɔakyerɛw ato hɔ no, na ɔyɛ tse dɛ mbrɛ nyimpa no nndze kaw biara. Biribi a ɔtse dɛm na Jehovah yɛ ma hɛn; sɛ ɔdze hɛn bɔn kyɛ hɛn a, ɔpepa fi hɔ korakora. Ɔyɛ hɛn dɛw paa dɛ Jehovah yɛ dɛm.—Ndw. 51:9.

12. Ebɛnadze na ntotoho a ɔfa mununkum kumbɔɔ ho no ma yehu?

¹² Jehovah yɛɛ ntotoho fofor bi so a ɔma yɛtse mbrɛ osi pepa hɛn bɔn no ase. Ɔkaa dɛ: ‘Mebɛpepa wo mbrato tse dɛ mbrɛ mununkum akata do na wo ndzebɔn tse dɛ mbrɛ mununkum kumbɔɔ akata do.’ (Isa. 44:22) Sɛ Jehovah dze hɛn bɔn kyɛ hɛn a, ɔtse dɛ mbrɛ ɔdze mununkum kumbɔɔ akata do. Sɛ ɔyɛ dɛm a, bɔn no yew korakora; yennhu no bio. Dɛmara na Jehovah so nnhu no bio.

13. Sɛ Jehovah dze hɛn bɔn kyɛ hɛn a, ebɛn adwen na ɔnnsɛ dɛ yenya?

¹³ Ebɛnadze na yesua fi dɛm ntotoho ahorow yi mu? Sɛ Jehovah dze hɛn bɔn kyɛ hɛn a, ɔnnsɛ dɛ yɛma hɛn tsibowa kɔ do ara bu hɛn fɔ. Jehovah dze ne Ba Jesus Christ no bɔgyaa no apepa hɛn bɔn korakora. Sɛ Jehovah yɛ dɛm a ɔtse dɛ mbrɛ yɛannyɛ bɔn no mpo. Iyi ma yehu dɛ sɛ yɛyɛ bɔn na yenu hɛnho na Jehovah ka dɛ ɔdze akyɛ hɛn a, nna ɔdze akyɛ hɛn korakora.

JEHOVAH SIESIE YƐNYE NO NTAMU MA ƆSAN YƐ KAMA

14. Ebɛnadze ntsi na yebotum agye edzi dɛ sɛ Jehovah dze hɛn bɔn kyɛ hɛn a, nna ɔdze akyɛ hɛn korakora? (Hwɛ mfonyin ahorow no so.)

¹⁴ Sɛ Jehovah dze hɛn bɔn kyɛ hɛn korakora a, ɔma yɛnye no ntamu yɛ kamakama bio. Ntsi sɛ Jehovah ka dɛ ɔdze hɛn bɔn akyɛ hɛn a, ɔnnsɛ dɛ yɛma hɛn tsibowa kɔ do ara bu  hɛn fɔ. Afei so, ɔnnsɛ dɛ yesuro dɛ bi a hɛnho ebufuw da ho ara hyɛ no mu na ɔrotweɔn dɛ yɛbɛyɛ biribi ketseketse bi na oeegyina do dze atwe hɛn asowa. Ɔsɛ dɛ yɛka hɛn akoma to hɛn yamu, osiandɛ Jehovah rennyɛ biribi a ɔtse dɛm da. Sɛ Jehovah ka dɛ ɔdze hɛn bɔn akyɛ hɛn a, ebɛnadze ntsi na yebotum agye no edzi? Siantsir no nye dɛ, mber bi Jehovah kaa kyerɛɛ nkɔnhyɛnyi Jeremiah dɛ ɔnkɛka nkyerɛ Israelfo no dɛ: “Medze hɔn emumuyɛ mebɛkyɛ hɔn, na hɔn bɔn so merennkaa bio.” (Jer. 31:34) Ɔsomafo Paul risi asɛm a nkɔnhyɛnyi Jeremiah kae no do dua no, ɔkaa dɛ: “Mennkɛkaa hɔn bɔn bio.” (Heb. 8:12) Naaso dɛm asɛm no koraa, ɔkyerɛ dɛn ankasa?

15. Sɛ Jehovah ka dɛ ɔnnkaa hɛn bɔn bio a, ɔkyerɛ dɛn?

¹⁵ Sɛ Bible no dze kasafua “kaa” dzi dwuma a, ɔnnyɛ aber nyina na ɔkyerɛ dɛ obi bɔdwendwen biribi a woesi ho anaa ɔbɛkaa biribi kɛkɛ. Obotum so akyerɛ dɛ obi bɛyɛ biribi afa dza woesi no ho. Nsɛmbɔndzinyi no a nna wɔasɛn no dua do wɔ Jesus ne nkyɛn no serɛɛ no dɛ: “Jesus, sɛ eba w’Ahenman mu a, kaa me.” (Luke 23:​42, 43) Nna ɔnnyɛ dza nsɛmbɔndzinyi no pɛ dɛ ɔkyerɛ nye dɛ sɛ Jesus ba n’Ahendzi mu a ɔndwendwen no ho ara kɛkɛ, mbom nna ɔpɛ dɛ ɔyɛ biribi dze boa no. Jesus so tsiee n’adzeserɛ no na ɔmaa ohun dɛ daakye obenyan no. Ntsi sɛ Jehovah ka dɛ ɔnnkaa hɛn bɔn bio a, dza ɔkyerɛ nye dɛ ɔdze akyɛ hɛn korakora na orinngyina do mmfa nntwe hɛn aso.

16. Mbrɛ yesi tse nka aber a Jehovah dze hɛn bɔn akyɛ hɛn no, Bible no dze toto ebɛnadze ho?

¹⁶ Sɛ Jehovah dze hɛn bɔn kyɛ hɛn a, ɔma yɛdze hɛnho. Bible no yɛ ntotoho bi a ɔma yɛtse dɛm asɛm no ase. Osiandɛ bɔn wɔ hɛnho na yɛtɔ sin ntsi, Bible no ka dɛ, yɛyɛ ‘bɔn no nkowaa.’ Naaso osiandɛ Jehovah dze hɛn bɔn akyɛ hɛn ntsi yɛakɛyɛ tse dɛ nkowaa a ‘woeyi hɛn efi bɔn no nkowaasom ase.’ (Rom. 6:​17, 18; Nyi. 1:5) Nokwasɛm nye dɛ, sɛ Jehovah dze hɛn bɔn kyɛ hɛn a, ɔma hɛn enyi gye tse dɛ akowaa bi a ɔadze noho.

17. Ebɛn kwan do na mbrɛ Jehovah dze hɛn bɔn kyɛ hɛn no sa hɛn yarba? (Isaiah 53:5)

 ¹⁷ Kenkan Isaiah 53:5. Ntotoho a otwa tun a yerubosusu ho yi mu no, Bible no dze hɛn toto nkorɔfo bi a yarba kodziewu bi abɔ hɔn no ho. Naaso Jehovah dze ne Ba no werdam afɔrbɔ no asa hɛn yarba. (1 Pet. 2:24) Sɛ yɛyɛ bɔn a, yɛnye Jehovah ntamu ebusuabɔ no sɛɛ. Naaso osian werdam no ntsi, Jehovah tum dze hɛn bɔn kyɛ hɛn ma yɛsan nye no ntamu yɛ papa bio. Sɛ yarba a no mu yɛ dzen bɔ obi na ekyir yi noho tɔ no a, n’enyi gye paa. Dɛmara so na sɛ Jehovah dze hɛn bɔn kyɛ hɛn na yɛnye no ntamu san yɛ papa bio a, ɔma hɛn enyi gye paa.

SƐ JEHOVAH DZE HƐN BƆN KYƐ HƐN A, EBƐN MFASO NA YENYA?

18. Ntotoho ahorow a ɔwɔ Bible mu a ɔma yehu mbrɛ Jehovah dze bɔn kyɛ no, ebɛnadze na yeesua efi mu? (Hwɛ adakaba a wɔato dzin “Mbrɛ Jehovah Dze Hɛn Bɔn Kyɛ Hɛn” no so.)

¹⁸ Dze besi ha yi, ntotoho ahorow a ɔwɔ Bible mu a ɔma yehu mbrɛ Jehovah dze bɔn kyɛ no, ebɛnadze na yeesua efi mu? Yeebohu dɛ sɛ Jehovah dze hɛn bɔn kyɛ hɛn a, ɔdze kyɛ hɛn korakora a ɔnnkaa mpo bio. Iyi ma yɛsan nye hɛn sor Egya no ntamu yɛ papa bio. Naaso ɔsɛ dɛ yɛma ɔtsena hɛn adwen mu dɛ sɛ Jehovah dze hɛn bɔn kyɛ hɛn a, nna ɔakyɛ hɛn adze kɛse bi paa. Ɔnnyɛ biribi a yɛayɛ ntsi na ɔma ɔdze hɛn bɔn kyɛ hɛn, mbom ɔyɛ dɛm osiandɛ ɔdɔ hɛn paa na ne yamu ye.—Rom. 3:24.

19. (a) Ebɛnadze na ɔsɛ dɛ yɛkyerɛ ho enyisɔ paa? (Romefo 4:8) (b) Ebɛnadze na yebosusu ho wɔ adzesua a odzi hɔ no mu?

¹⁹ Kenkan Romefo 4:8. Hɛn enyi sɔ paa dɛ Jehovah Nyankopɔn dze hɛn mu biara no ‘bɔn kyɛ no korakora.’ (Ndw. 130:4) Naaso, sɛ yɛpɛ dɛ Jehovah dze hɛn bɔn kyɛ hɛn a, ɔsɛ dɛ yɛyɛ biribi a no ho hia paa. Jesus kaa dɛ: “Sɛ hom ammfa nkorɔfo hɔn bɔn annkyɛ hɔn a, hom Egya no so remmfa homdze nnkyɛ hom.” (Matt. 6:​14, 15) Dɛm asɛm yi ma yehu dɛ no ho hia paa dɛ hɛn so yesuasua Jehovah na yɛdze bɔn kyɛ. Naaso yebesi dɛn ayɛ dɛm? Yebenya dɛm asɛmbisa yi ho mbuae wɔ adzesua a odzi hɔ no mu.