1. Sɛ yɛka mbrɛ yesii hun “nokwar no” ho asɛm kyerɛ hɛn nuanom a, ebɛn kwan do na yenya do mfaso?

 “ISII dɛn hun nokwar no?” Ɔda edzi dɛ enuanom ebisa wo dɛm asɛm yi mpɛn pii. Sɛ onua bi pɛ dɛ ɔfa wo nyɛnko a, mpɛn pii no asɛm a odzi kan a obebisa wo nye no. Ɔyɛ a hɛn enyi gye ho dɛ yebohu mbrɛ ɔyɛe a enuanom bohun nokwar no. Afei so, hɛn enyi gye ho dɛ yɛbɛma enuanom ehu mbrɛ nokwar no si som hɛn bo fa. (Rom. 1:11) Nkɔmbɔ a ɔtse dɛm no boa hɛn ma yɛdze hɛn adwen si nokwar no a ɔsom bo ma hɛn no do. Afei so, ɔma yesi hɛn bo dɛ yɛbɔkɔ do anantsew nokwar no mu, kyerɛ dɛ, yɛbɔbɔ hɛn bra wɔ kwan bi do a Jehovah bɛgye hɛn ato mu na oeehyira hɛn.​—3 John 4.

2. Ebɛnadze na yebosusu ho wɔ adzesua yi mu?

² Adzesua yi mu no, yɛbɔhwɛ siantsir a nokwar no som bo ma hɛn no. Nkyii so, yɛbɔhwɛ ndzɛmba a ɔwɔ dɛ yɛyɛ dze kyerɛ dɛ nokwar no som bo ma hɛn. Nokwasɛm nye dɛ, dza yerubosusu ho yi bɛma enyisɔ a yɛwɔ dɛ Jehovah atwe hɛn aba nokwar no mu no ayɛ kɛse. (John 6:44) Afei so, ɔbɛma yɛakɔ do aka nokwar no ho asɛm akyerɛ nkorɔfo.

3. Ebɛnadze paa ntsi na nokwar no da hɛn akoma do?

³ Yɛwɔ siantsir pii ntsi a nokwar no da hɛn akoma do. No mu  tsitsir nye dɛ yɛdɔ Jehovah Nyankopɔn. Ɔno nye nokwar no ne Fibea. Yeesua n’Asɛm Bible no ma yeebohu dɛ ɔno nye otumfo a ɔbɔɔ ɔsor na asaase. Iyi da nkyɛn a, yeebohu dɛ ɔyɛ hɛn sor Egya a ɔwɔ ɔdɔ, na ɔhwɛ hɛn bɔ hɛnho ban. (1 Pet. 5:7) Yenyim dɛ ɔyɛ Nyankopɔn a ‘ayamuhyehye nye adom ahyɛ no ma, ɔfa ebufuw nyaa, na no mbɔbɔrhu nye no nokwar dɔɔ so.’ (Ex. 34:6) Jehovah dɔ atsɛntsenenee. (Isa. 61:8) Sɛ ohu dɛ yeruhu amandze a, ɔyɛ no yaw. Ntsi ɔayɛ krado dɛ wɔ ne ber a ɔahyɛ mu no, obeyi amandzehu nyina efi hɔ, na ɔbɛyɛ so. (Jer. 29:11) Yɛrohwɛ da a ɔtse dɛm no kwan dzendzenndzen! Iyi nye siantsir kor ntsi a yɛdɔ Jehovah papaapa no!

4-5. Ebɛnadze ntsi na ɔsomafo Paul dze enyidado a yɛwɔ no totoo sekyɛ ho?

⁴ Ebɛnadze bio ntsi na nokwar no da hɛn akoma do? Nokwar no ma yenya nhyira pii. Hom mma yɛnhwɛ no mu kor. Daakye ho enyidado a yɛwɔ no ka Bible mu nokwar no ho. Paul yɛɛ ntotoho dze kyerɛɛ mbrɛ dɛm enyidado no som bo fa. Ɔkaa dɛ: “Enyidado a yɛwɔ no [tse] dɛ ɔkra ne sekyɛ a ɔnntsɛw na otsim.” (Heb. 6:19) Sekyɛ ma po do hɛn gyina hɔ pintsinn. Dɛmara so na hɛn enyidado a ogyina Bible do no ma yegyina pintsinn aber a yerihyia nsɔhwɛ no.

⁵ Sɛ ehwɛ asɛm a nna Paul reka no a, nna ɔreka dɛ ɔsor enyidado no som bo ma Christianfo a wɔasera hɔn no. Naaso, nsɛm a ɔkae no so fa Christianfo a wɔwɔ enyidado dɛ wɔbɛtsena asaase do no ho. (John 3:16) Nokwasɛm nye dɛ, enyidado a yɛwɔ dɛ yebenya onnyiewiei nkwa no ama yeenya akomatɔyamu wɔ asetsena mu.

6-7. Ebɛn kwan do na nokwasɛm a ɔfa daakye ho a Yvonne suae no boaa no?

⁶ Hom mma yensusu hɛn akyerɛbaa bi a wɔfrɛ no Yvonne n’asɛm no ho. Wɔanntsetse no wɔ nokwar no mu. Aber a ɔyɛ abofra no nna osuro owu. Ɔkenkaan asɛm bi na no werɛ emmfir da. Nna asɛm no se dɛ: “Ɔkyena na yennyi wiadze.” Yvonne kaa dɛ: “Dɛm da no, asɛm yi amma menntum annda. Misii pe anadwe mu no nyina dwendween daakye ho. Mekaa dɛ, ‘Minngye nndzi dɛ asetsena ara nye yi. Ei ntsi mebaa wiadze bɛyɛɛ dɛn? Nna memmpɛ dɛ mubowu!’”

⁷ Ekyir yi, aber a nna Yvonne yɛ ɔbabun no, ohyiaa Jehovah Adasefo. Ɔkaa dɛ: “Megyee too mu dɛ mubotum atsena ase daa wɔ Paradise wɔ asaase yi do.” Ebɛn kwan do na nokwar no a hɛn akyerɛbaa yi bohunii no aboa no? Ɔtoaa do dɛ: “Daakye na owu ho suro nngya me adwendwen bio.” Ibotum dze w’adwen ebu dɛ nokwar no som bo ma Yvonne paa. Seseiara, daakye ho enyidado a ɔwɔ no, n’enyi gye ho paa dɛ ɔbɛka ho asɛm akyerɛ nkorɔfo.​—1 Tim. 4:16.

8-9. (a) Jesus ne mfatoho kor bi mu no, ebɛnadze na ɔbarimba bi yɛe dze kyerɛɛ dɛ nna akoradze a okohunii no som bo ma no? (b) Ebɛyɛ dɛn akyerɛ dɛ nokwar no som bo ma wo?

⁸ Nokwasɛm a ɔwɔ Bible mu no, Nyankopɔn n’Ahendzi no ho asɛmpa no so ka ho. Jesus dze dɛm Ahendzi no ho nokwasɛm no totoo akoradze bi a wɔdze esuma ho. Jesus kaa asɛm bi wɔ Matthew 13:44 dɛ: “Sor ahenman no tse dɛ akoradze a wɔdze sumaa haban mu a nyimpa hunii no, ɔdze huntae, na no ho dɛw ntsi ɔkɔree kɔtɔɔn dza ɔwɔ nyina na ɔtɔɔ haban no.” Hyɛ no nsew dɛ, nna ɔnnyɛ dɛ ɔbarimba no rohwehwɛ akoradze no. Naaso, aber a ɔbarimba no hun akoradze no, ɔdze ne ndzɛmba bɔɔ afɔr mbrɛ ɔbɛyɛ a ne nsa bɛka. Nokwasɛm nye dɛ ɔkɔtɔɔn dza ɔwɔ nyinara dze kɔtɔɔ haban no mbrɛ ɔbɛyɛ a ne nsa bɛka akoradze no. Ebɛnadze ntsi na ɔyɛɛ dɛm? Nna onyim dɛ akoradze no som bo paa. Nna ɔsom bo kyɛn adze biara a ɔahwer no.

 ⁹ Aso dɛm na nokwar no som bo ma wo? Ɔda edzi kofee dɛ ɔsom bo ma wo! Seseiara yɛdze enyigye rosom Jehovah, na yɛwɔ enyidado dɛ yɛbɛtsena ase daa wɔ Nyankopɔn n’Ahendzi no mu. Biribiara nnyi wiadze yi mu a yebotum dze atoto iyinom ho. Yɛnye Jehovah wɔ ebusuabɔ a no mu yɛ dzen, na ndzɛmba a yɛdze abɔ afɔr no mu biara nnyi hɔ a yebotum dze atoto ho. Adze a ɔma hɛn enyi gye papaapa nye dɛ ‘yɛbɔsɔ n’enyi koraa.’​—Col. 1:10.

10-11. Ebɛnadze na ɔmaa Michael yɛɛ nsesa akɛse wɔ n’asetsena mu?

¹⁰ Hɛn mu binom wɔ hɔ a, yɛdze ndzɛmba pii abɔ afɔr mbrɛ ɔbɛyɛ a Jehovah bɛgye hɛn ato mu. Binom apow ndwuma akɛse wɔ wiadze no mu. Binom so apow dɛ wɔbɛyɛ ahonyafo. Nnyɛ iyi nkotsee, binom so suaa Jehovah ho adze no, wɔasesa hɔn abrabɔ. Dɛm na Michael yɛe. Wɔanntsetse no wɔ nokwar no mu. Osuaa karate aber a nna ɔyɛ ɔbabun no. Ɔkaa dɛ: “Nna m’enyi gye ho dɛ mebɛyɛ ndzɛmba a ɔbɛma moho akɔ do ayɛ dzen. Ɔtɔ da a, nna metse nka dɛ obiara runntum me.” Naaso, aber a Michael hyɛɛ ase suaa Bible no, ohun dɛ Jehovah kyir basabasayɛ. (Ndw. 11:5) Michael kaa awarfo a wɔnye no suaa adze no ho asɛm dɛ: “Wɔannka annkyerɛ me da dɛ mingyaa karate no bɔ. Dza wɔyɛe ara nye dɛ, wɔkɔr do nye me suaa nokwar no.”

¹¹ Michael suaa Jehovah ho adze kɔr ekyir, na iyi maa ɔdɔ a ɔwɔ ma Jehovah no yɛɛ kɛse. Adze a ɔkaa n’akoma paa nye ɔdɔ na ayamuhyehye a Jehovah wɔ ma n’asomfo no. Mber bi ekyir no, Michael hun dɛ ɔwɔ dɛ ɔyɛ nsesa kɛse bi wɔ n’asetsena mu. Ɔkaa dɛ: “Nna minyim dɛ ɔbɛyɛ dzen ama me paa dɛ mibegyaa karate bɔ. Naaso nna minyim dɛ, sɛ migyaa a, Jehovah bɛgye me ato mu. Afei so, nna megye dzi paa dɛ Jehovah a mobɔsom no no, ohia kyɛn adze biara a mobɔhwer wɔ asetsena mu.” Michael hun dɛ nokwar no a oehu no som bo ma no papaapa, dɛm ntsi ɔyɛɛ nsesa akɛse wɔ n’asetsena mu.​—Jas. 1:25.

12-13. Ebɛn kwan do na Bible mu nokwar no boaa Mayli?

¹² Bible no rekyerɛ mbrɛ nokwar no si som bo fa no, ɔdze totoo kandzea a ɔhyerɛn wɔ sum mu ho. (Ndw. 119:105; Eph. 5:8) Mayli yɛ hɛn akyerɛbaa a ɔwɔ Azerbaijan. N’enyi sɔ dza oesua efi Nyankopɔn n’Asɛm mu no papaapa. Nna ne maame na ne papa nnyi ɔsom kor mu. Nna ne papa yɛ Kramonyi na ne maame so yɛ Jewnyi. Mayli kaa dɛ: “Mannka da dɛ Nyankopɔn nnyi hɔ, naaso nna nsɛm bi kyer m’adwen. Nna mibisa moho dɛ, ‘Ebɛnadze ntsi na Nyankopɔn bɔɔ nyimpa? Ebɛnadze ntsi na nyimpa bɛberɛ wɔ n’asetsena mu na ɔno ekyir no wɔasan ayɛ no ayaayaadze wɔ hellgya mu?’ Nna nkorɔfo ka dɛ adze biara a obesi no yɛ Nyankopɔn ne pɛ. Ntsi nna mibisa moho dɛ, ‘Ana Nyankopɔn ma nyimpa hu amandze dze gyegye n’enyi?’”

¹³ Mayli kɔr do hwehwɛɛ nsɛmbisa a nna ɔkyer n’adwen no ho mbuae. Mber bi ekyir no, ɔgyee too mu dɛ Jehovah Adasefo nye no nsua adze. Iyi maa obohun nokwar no. Ɔkaa dɛ: “Bible mu nokwar no boaa me ma minyaa enyigye wɔ m’asetsena mu. Nkyerɛkyerɛmu a no mu da hɔ a minyae wɔ Nyankopɔn n’Asɛm mu no maa moho tɔɔ me paa.” Ɔsɛ dɛ yesuasua Mayli na yeyi Jehovah, “Nyia oyii [hɛn] fii sum mu baa n’anwanwa kan mu no” ayɛw.​—1 Pet. 2:9.

14. Yebesi dɛn ama enyisɔ a yɛwɔ ma nokwar no aayɛ kɛse? (Hwɛ adakaba a wɔato dzin “ Ndzɛmba Afofor A Yebotum Dze Bible Mu Nokwar No Atoto Ho” no so.)

¹⁴ Iyinom yɛ nhwɛdo kakraabi a ɔma yehu mbrɛ nokwar no si som bo fa. Ɔda edzi pefee dɛ ibotum enya nhwɛdo pii aka dza yɛaka yi ho. Sɛ ereyɛ w’ankorankor adzesua a, ibotum  ahwehwɛ ndzɛmba afofor so a ɔma nokwar no som bo ma wo. Sɛ yɛma nokwar no som bo ma hɛn paa a, yɛbɔhwehwɛ akwan ahorow a ɔbɛma yɛakɔ do akyerɛ ho enyisɔ.

15. Adze kor a yebotum ayɛ dze akyerɛ dɛ nokwar no som bo ma hɛn nye dɛn?

¹⁵ Sɛ yɛkenkan Bible no nye asafo nwoma daa a, nna yɛrekyerɛ dɛ nokwar no som bo ma hɛn. Ɔmmfa ho mfe dodow a yɛdze atsena nokwar no mu no, dabaa yɛwɔ pii sua. Ɔweɔn-Aban a wodzii kan tsintsimii no kaa asɛm bi dɛ, atorsɛm ahyɛ wiadze yi mu ma, ntsi ɔyɛ dzen dɛ ibohu nokwar no. Sɛ ibotum ehu nokwar no a, ɔsɛ dɛ ehwehwɛ. Sɛ wo nsa ka a, ɔwɔ dɛ eyer woho dɛ ebɔbɔ ho ban. Bɔ mbɔdzen dɛ aber nyina ebɔhwehwɛ Bible mu nokwar no pii aka ho. Adzesua nnda famu koraa, naaso mfaso pii wɔ do.

16. Sɛ irusua adze a, ebɛnadze na ehu dɛ sɛ eyɛ a ɔboa wo paa? (Mbɛbusɛm 2:4-6)

¹⁶ Nnyɛ hɛn nyina na hɛn enyi gye akenkan na adzesua ho. Naaso, Jehovah ka kyerɛ hɛn dɛ, ɔsɛ dɛ yɛkɔ do hwehwɛ nokwar no ama yaatse ase yie. (Kenkan Mbɛbusɛm 2:4-6.) Sɛ yɛyer hɛnho yɛ dɛm a, yebenya do mfaso aber nyina. Onua bi a wɔfrɛ no Corey kyerɛɛ  mbrɛ osi yɛ ne Bible akenkan. Ɔka dɛ ɔdze n’adwen si nyiyimu kortsee do susu ho kɔ ekyir ansaana ɔakɔ fofor do. Ɔkaa dɛ: “Mekenkan ase hɔ asɛm biara a ɔwɔ ɔfa a merekenkan no, mohwɛ kyerɛwnsɛm a wɔahyehyɛ wɔ krataafa biara ne finimfin, na meyɛ nhwehwɛmu afofor ka ho. . . . Kwan a ɔtse dɛm a mefa do kenkan Bible no boa me paa!” Sɛ dɛm kwan yi ara na yɛfa do kenkan Bible no o, sɛ yɛwɔ kwan fofor a yɛfa do yɛ o, sɛ yɛyer hɛnho na yɛgye ber dze sua nokwar no ho adze a, nna yɛrekyerɛ dɛ nokwar no som bo ma hɛn.​—Ndw. 1:1-3.

17. Sɛ wɔka dɛ yɛmfa nokwar no mbɔ hɛn bra a, ɔkyerɛ dɛn? (James 1:25)

¹⁷ Ɔyɛ ampa dɛ ɔsɛ dɛ yesua nokwar no ho adze. Naaso, ɔnnyɛ ɔno nkotsee, biribi fofor so wɔ hɔ a ɔsɛ dɛ yɛyɛ. Sɛ yebotum enya nokwar no do mfaso kɛse a, ɔsɛ dɛ yɛdze bɔ hɛn bra so. Dza ɔno kyerɛ nye dɛ yɛdze dza yesua no bɛyɛ edwuma wɔ hɛn asetsena mu. Sɛ yɛyɛ dɛm nkotsee a, nokwar no bɛma yeenya enyigye mapa. (Kenkan James 1:25.) Yebesi dɛn ehu paa dɛ yɛdze nokwar no robɔ hɛn bra? Onua bi kaa iyi ho asɛm dɛ, dza obotum aboa hɛn nye dɛ yɛbɛyɛ hɛnho mu nhwehwɛmu. Sɛ yɛyɛ dɛm a, ɔbɔboa hɛn ma yeehu beebi a yɛrobɔ mbɔdzen nye beebi a ɔsɛ dɛ yetu mpon. Ɔsomafo Paul kaa iyi ho asɛm dɛ: “Dza yeedu ho dada no, ɔnoara so do na hom mma yendua nnantsew.”​—Phil. 3:16.

18. Ebɛnadze ntsi na yɛyɛ dza yebotum biara dɛ yɛbɔkɔ do anantsew nokwar no mu?

¹⁸ Ɔwodze susu mfaso a ɔwɔ nokwar no a yɛbɔkɔ do anantsew mu no ho hwɛ! Ɔma hɛn asetsena sesa yɛ papa na yenya akomatɔyamu. Ɔno da nkyɛn a, ɔma Jehovah nye hɛn nuanom enyi gye. (Mbɛ. 27:11; 3 John 4) Nokwasɛm nye dɛ, biribiara nnyi hɔ a ɔbɛma yeenya mfaso kɛse akyɛn dɛ yɛbɛma nokwar no ada hɛn akoma do na yɛdze abɔ hɛn bra!