Ɔda edzi dɛ mbuae no yɛ oho. Abɔnsam annkã annkyerɛ Eve dɛ eduaba no a Nyankopɔn se mma wɔmmfa hɔn nsa nnka no, sɛ odzi a ɔbɛyɛ tse dɛ mbrɛ oewu, kyerɛ dɛ, ne nyimpadua na obowu, naaso no sunsum (dza ndɛ nyimpa binom frɛ no ɔkra a onnwu da no) befi no mu akɛtsena beebi. Satan nam abowatsena do na ɔkasaa kyerɛɛ Eve. Ɔkãa kyerɛɛ no dɛ sɛ odzi dua no n’eduaba no a, ‘onnkowu ara ampa bi.’ Dza nna Satan rekyerɛ nye dɛ Eve bɔkɔ do atsena ase. Afei, n’asetsena bɛyɛ papa asen dza ɔwɔ mu no, osiandɛ ɔbɛtsena asaase do na ɔaayɛ dza noara pɛ, na onnkehia Nyankopɔn n’akwankyerɛ biara.​—Gen. 2:17; 3:3-5.

Ndɛ, ɔsom pii kyerɛkyerɛ dɛ ɔkra a onnwu da hyɛ nyimpa mu. Sɛ dɛm nkyerɛkyerɛ yi annhyɛ ase wɔ Eden ture mu hɔ dze a, ɔnodze ebɛn aber na ɔhyɛɛ ase? Yerunntum nnkã nnsi no pi. Naaso, yenyim dɛ wɔtɔɔr ator som nyina ase wɔ Noah n’aber do Nsuyirii no mu. Noah nye n’ebusua nko na wonyaa nkwa wɔ Nsuyirii no mu. Nna hɔn nyina som nokwar Nyankopɔn no. Ntsi, nna nyimpa biara nnyi hɔ a ɔbɛkyerɛkyerɛ ator som nkyerɛkyerɛ biara.

Ntsi, ɔkra a onnwu da nkyerɛkyerɛ a ndɛ ɔsom pii kyerɛkyerɛ no, obotum aba dɛ ɔyɛ Noah Nsuyirii no ekyir na ɔhyɛɛ ase. Aber a Nyankopɔn maa nyimpa hɔn kasaa yɛɛ basabasa wɔ Babel, na ɔbɔɔ hɔn “petsee asaase nyinara enyi” no, ekyingye biara nnyi ho dɛ wɔdze nsusui a ɔnye dɛ ɔkra a onnwu da hyɛ nyimpa mu no kɔr beebi a wɔkɛtsenae no. (Gen. 11:8, 9) Ɔmmfa ho ber a dɛm ator nkyerɛkyerɛ yi hyɛɛ ase no, yebotum agye edzi dɛ Satan Abɔnsam a ɔyɛ “atofosɛm n’egya” no, nna ɔno na ɔhyɛ ekyir. Nkyii so, ɔyɛɛ no dɛw dɛ dɛm nkyerɛkyerɛ yi tserɛwee.​—John 8:44.