1. Sɛ akyerɛbaa bi a ɔnnwaree rususu obi a ɔbɔwar no ho a, ebɛn nsɛm na obotum ebisa noho?

CHRISTIANFO nyina hyɛ Jesus Christ a odzi mũ no ne tsiryɛ ase. Naaso, sɛ Christiannyi baa bi war a ɔbɛhyɛ no kun a onndzi mũ no ne tsiryɛ ase. Iyi botum dze nsɛndzendzen aba. Dɛm ntsi, sɛ Christiannyi baa bi repaw nyia ɔbɔwar no a, ɔbɛyɛ papa dɛ obebisa noho dɛm nsɛm yi: ‘Ebɛnadze na ɔma muhu dɛ onua yi bɛyɛ ebusua tsir pa? Ana ɔdze Jehovah no som dzi kan wɔ n’asetsena mu? Sɛ ɔnntse dɛm a, ebɛnadze na ɔma muhu dɛ, wɔ hɛn awar ekyir no obotum aboa ma yaakɔ do nye Jehovah enya ebusuabɔ a no mu yɛ dzen?’ Afei, ɔsɛ dɛ akyerɛbaa no san so bisa noho dɛm nsɛm yi: ‘Ebɛn suban na mowɔ a ɔbɔboa hɛn wɔ hɛn awar mu? Ana mowɔ abotar na me yamu ye? Ana menye Jehovah wɔ ebusuabɔ a no mu yɛ dzen?’ (Ɔsɛnk. 4:9, 12) Sɛ ɔyer bi benya enyigye wɔ n’awar mu a, kwan bi do no obegyina gyinae ahorow a obesisi ansaana ɔawar no do.

2. Ebɛnadze na yebosusu ho wɔ adzesua yi mu?

² Hɛn nuanom Christianfo mbaa ɔpepem piinara brɛ hɔnho adze ma hɔn kunnom dze yɛ nhwɛdo pa. Hɛn nkyerɛbaa yi fata nkamfo! Ɔyɛ hɛn enyigye dɛ yɛnye mbaa anokwafo a wɔtse dɛm yi bɔ mu som Jehovah! Wɔ adzesua yi mu no, yebenya dɛm nsɛmbisa ebiasa yi ho mbuae: (1) Nsɛndzendzen a ɔsɛ dɛ yernom gyina ano no bi nye dɛn? (2) Ebɛnadze ntsi na ɔyer paw dɛ ɔbɛbrɛ noho adze ama no kun? (3) Ebɛnadze na Christianfo kunnom nye yernom botum esũa efi ahobrɛadze ho nhwɛdo a Jesus, Abigail nye Joseph ne yer Mary a ɔsan so yɛ Jesus ne maame yɛe no mu?

3. Ebɛnadze ntsi na awarfo nyina hyia nsɛndzendzen?

³ Awar yɛ akyɛdze a odzi mũ a ofi Nyankopɔn hɔ, naaso nyimpa beenu a wɔawar no nndzi mũ. (1 John 1:8) Dɛm ntsi na Nyankopɔn n’Asɛm no bɔ awarfo kɔkɔ dɛ wobehyia nsɛndzendzen a ɔtse dɛ “ɔhaw wɔ honam mu,” kyerɛ dɛ, hɔnho behiahia hɔn wɔ honam mu. (1 Cor. 7:28) Hom mma yɛnhwɛ nsɛndzendzen a ɔyer botum ehyia no mu bi.

4. Ebɛnadze ntsi na bi a ɔyer botum atse nka dɛ ɔyɛ enyimtsiabu dɛ ɔbɛbrɛ noho adze ama no kun?

⁴ Obotum aba dɛ osian beebi a ɔyer bi fi ntsi, bi a ɔbɛtse nka dɛ ɔyɛ enyimtsiabu dɛ ɔbɛbrɛ noho adze ama no kun. Hɛn akyerɛbaa bi a wɔfrɛ no Marisol a ɔwɔ United States kãa dɛ: “Beebi a m’enyi firii no, nna wɔtaa kã kyerɛ mbaa dɛ ɔsɛ dɛ wɔnye mbarimba yɛ pɛ wɔ biribiara mu. Minyim dɛ Jehovah na ɔyɛɛ tsiryɛ ho nhyehyɛɛ no, na ɔama mbaa asodzi dɛ wɔmbrɛ hɔnho adze; iyi yɛ asodzi a enyidzi wɔ mu. Naaso ɔyɛ dzen ma me dɛ mebɛbrɛ moho adze ama mo kun.”

5. Ebɛn adwen a ɔnye Bible no nnhyia na nyimpa binom wɔ wɔ mbaa ho?

⁵ Dza ɔnye iyi bɔ ebira no, bi a ɔbaa bi bɔwar ɔbarimba bi a ɔwɔ adwen dɛ mbarimba ho hia sen mbaa. Hɛn akyerɛbaa bi a wɔfrɛ no Ivon a ɔwɔ South America kãa dɛ: “Beebi a yɛtse no, mbarimba dzidzi ansaana mbaa edzidzi. Wɔhwɛ kwan dɛ mbasiamba bɛyɛ edziban na woeesiesie fie, naaso mbanyimba dze wɔtsena hɔ ma hɔn nkyerɛbaa nye hɔn maame som hɔn. Adwen a wɔdze hyɛ hɔn tsirmu ara nye dɛ hɔn na wɔyɛ ‘Dada wɔ fie.’” Hɛn akyerɛbaa bi a wɔfrɛ no Yingling a ɔwɔ Asia kãa dɛ: “Wɔ me kasaa mu no, wɔkã asɛm bi a ɔkyerɛ dɛ no ho nnhia dɛ mbaa bohu nyansa anaa wobenya adomakyɛdze. Hɔndze ara nye dɛ wɔbɛyɛ fie ndwuma nyina, na wonnyi ho kwan dɛ wɔma hɔn kunnom adwenkyerɛ.” Sɛ okun ma adwen a ɔtse dɛm a ɔnnkyerɛ ɔdɔ na ɔnye Bible no nnhyia no nya no do nkantando a, ɔma asetsena yɛ dzen ma ne yer. Okun a ɔtse dɛm no nnsũasua Jesus, na Jehovah nngye no nnto mu.​—Eph. 5:28, 29; 1 Pet. 3:7.

6. Sɛ yernom botum nye Jehovah enya ebusuabɔ a no mu yɛ dzen a, ebɛnadze na ohia dɛ wɔyɛ?

⁶ Dɛ mbrɛ yehunii wɔ adzesua a odzi iyi enyim mu no, Jehovah hwɛ kwan dɛ Christianfo kunnom dze hɔn ebusua no hɔn sunsum afamu, nkãtse afamu nye honam afamu ehiadze bɛma hɔn. (1 Tim. 5:8) Yernom nnyi adagyer naaso ɔsɛ dɛ wɔgye mber da biara kenkan Nyankopɔn n’Asɛm no na wɔdwendwen ho. Bio so, ɔsɛ dɛ wofi hɔn akoma mu bɔ Jehovah mpaa. Iyi ne yɛ botum ayɛ dzen. Ɔwɔ mu dɛ yernom nnyi adagyer, ntsi bi a wɔbɛtse nka dɛ wonnyi ber nye ahoɔdzen a wɔdze bɛyɛ dɛm ndzɛmba no, naaso ohia dɛ wɔgye ber yɛ dɛm. Ebɛnadze ntsi a? Osiandɛ, Jehovah pɛ dɛ hɛn mu biara nye no nya ebusuabɔ, na ɔkɔ do ma ebusuabɔ no mu yɛ dzen.​—Andw. 17:27.

7. Ebɛnadze na ɔbɛma ayɛ mberɛw ama ɔyer dɛ ɔbɛbrɛ noho adze ama no kun?

⁷ Ntseasee wɔ mu dɛ, bi a ɔsɛ dɛ ɔyer yer noho ama oeetum abrɛ noho adze ama no kun a onndzi mũ no. Naaso, sɛ ɔtse asodzi a Jehovah dze ama no no ase, na ɔgye siantsir a Kyerɛwnsɛm no kã dɛ ɔmbrɛ noho adze mma no kun no to mu a, ɔbɛyɛ mberɛw ama no dɛ ɔbɛyɛ dɛm.

8. Dɛ mbrɛ Ephesusfo 5:22-24 kyerɛ no, ebɛnadze ntsi na ɔyer a ɔyɛ Christiannyi no paw dɛ ɔbɛbrɛ noho adze ama no kun?

⁸ Ɔyer a ɔyɛ Christiannyi no paw dɛ ɔbɛbrɛ noho adze ama no kun osiandɛ iyi yɛ adze a Jehovah hwehwɛ fi no hɔ. (Kenkan Ephesusfo 5:22-24.) Ɔwɔ no sor Egya no mu ahotodo,  osiandɛ onyim dɛ aber biara ɔdɔ na ɔka no ma ɔyɛ n’adze, na biribiara a ɔbɛkã dɛ ɔnyɛ no yɛ noara n’eyiedzi ntsi a.​—Deut. 6:24; 1 John 5:3.

9. Sɛ ɔyer brɛ noho adze ma no kun a, ebɛn mfaso na n’ebusua no benya?

⁹ Wiadze no hyɛ mbaa nkuran dɛ wɔmfa Jehovah ne gyinapɛn nto nkyɛn na wombu hɔnho a wɔbɛbrɛ no adze no dɛ ɔyɛ enyimtsiabu. Mbrɛ ɔtse nye dɛ, hɔn a wɔhyɛ adwen a ɔtse dɛm ho nkuran no nnyim hɛn Nyankopɔn a ɔyɛ ɔdɔ no. Jehovah nnkɛma ne mbabaa a wɔsom bo ma no no ahyɛdze a ɔbɛma woebu hɔn enyimtsia da. Sɛ ɔyer yɛ setsie ma Jehovah dze nam mbɔdzen a ɔbɔbɔ dɛ ɔbɛbrɛ noho adze ama no kun no do a, ɔboa ma asomdwee kɔ do tsena ne fie. (Ndw. 119:165) No kun, noara na ne mba nya do mfaso.

10. Ebɛnadze na yebotum esũa efi asɛm a Carol kãe no mu?

¹⁰ Ɔyer a ɔbrɛ noho adze ma no kun a onndzi mũ no da no edzi dɛ ɔdɔ Jehovah, nyia ɔyɛɛ tsiryɛ ho nhyehyɛɛ, no na obu no so. Akyerɛbaa bi a wɔfrɛ no Carol a ɔwɔ South America no kãa dɛ: “Minyim dɛ mo kun bedzi mfomdo. Minyim so dɛ, mbrɛ misi yɛ m’adze wɔ mfom a ɔtse dɛm ho no da mbrɛ misi bu anyɛnkofa a menye Jehovah wɔ no edzi. Dɛm ntsi mobɔ mbɔdzen dɛ mobɔkɔ do ara abrɛ moho adze osiandɛ mepɛ dɛ mosɔ mo sor Egya no enyi.”

11. Ebɛnadze na ɔboa akyerɛbaa bi a wɔfrɛ no Aneese ma ɔdze no kun no mfom kyɛ no? Ebɛnadze na yebotum esũa efi dza ɔkãe no mu?

¹¹ Sɛ ɔyer bi tse nka dɛ no kun nndwen mbrɛ osi tse nka ho na n’asɛm mmfa no ho a, obotum ayɛ dzen ama no dɛ ɔbɛbrɛ noho adze ama no na oeebu no so. Naaso hom mma yɛnhwɛ mbrɛ akyerɛbaa bi a wɔfrɛ no Aneese a ɔyɛ ɔwarfo no si yɛ n’adze ber a biribi a ɔtse dɛm esi no. Ɔkãa dɛ: “Mobɔ mbɔdzen dɛ meremmfa mo kun ho ebufuw nnhyɛ mo mu. Mema ɔtsena m’adwen mu dɛ hɛn nyinara yedzi mfomdo. Medze yɛ mo botae dɛ mibefi m’akoma mu dze akyɛ no dɛ mbrɛ Jehovah yɛ no. Sɛ medze kyɛ no a, m’asomu dwe me.” (Ndw. 86:5) Ɔyer a ɔdze no kun no mfom kyɛ no no, ɔbɛyɛ mberɛw ama no dɛ ɔbɛbrɛ noho adze ama no.

12. Ebɛn nhwɛdo ahorow na ɔwɔ Bible no mu?

¹² Bi a nkorɔfo wɔ adwen dɛ sɛ obi brɛ noho adze a, ɔkyerɛ dɛ n’enyi nnyɛ dzen. Naaso,  adwen a ɔtse dɛm no nnyɛ nokwar koraa. Sɛ yɛhwɛ Bible no mu a, yehu nhwɛdo ahorow a ɔfa nyimpa binom a nna wɔwɔ akokodur naaso wɔbrɛɛ hɔnho adze ho. Hom mma yɛnhwɛ dza yebotum esũa efi Jesus, Abigail, nye Mary hɔn nhwɛdo no mu.

13. Ebɛnadze ntsi na Jesus brɛ noho adze ma Jehovah? Kyerɛkyerɛ mu.

¹³ Jesus brɛ noho adze ma Jehovah, naaso ɔno nnkyerɛ dɛ onnyim nyansa anaa onnyi biribiara ho nyimdzee. Obi a n’adwen mu da hɔ pɛ na obotum dze nsɛm a n’ase tse nnyɛ dzen akyerɛkyerɛ ma nkorɔfo aatse ase dɛ mbrɛ Jesus yɛe no. (John 7:45, 46) Nna Jehovah nyim dza Jesus botum ayɛ papaapa, ntsi na ɔnye no bɔɔ mu yɛɛ edwuma ber a ɔbɔɔ amansan no. (Mbɛ. 8:30; Heb. 1:2-4) Afei so, ofitsi ber a Jehovah nyaan Jesus no, ɔdze “sor nye asaase do tum nyina” ahyɛ ne nsa. (Matt. 28:18) Ɔmmfa ho dɛ Jesus tum yɛ ndzɛmba pii no, ɔda ho ara gye akwankyerɛ fi Jehovah hɔ. Ebɛnadze ntsi a? Osiandɛ ɔdɔ n’Egya no.​—John 14:31.

14. Ebɛnadze na kunnom botum esũa efi (a) mbrɛ Jehovah si bu mbaa no mu? (b) asɛm a ɔwɔ Mbɛbusɛm 31 no mu?

¹⁴ Dza kunnom botum esũa efi mu. Ɔnnyɛ dɛ Jehovah bu mbanyin dɛ hɔnho hia kyɛn mbaa ntsi na ɔyɛɛ nhyehyɛɛ dɛ yernom mbrɛ hɔnho adze mma hɔn kunnom no. Paw a Jehovah apaw mbaa na mbanyin nyinara dɛ wɔnye Jesus mbɔ mu ndzi adze no da no edzi dɛ obu hɔn nyinara pɛr. (Gal. 3:26-29) Jehovah ada no edzi dɛ ɔwɔ ahotodo wɔ ne Ba no mu ntsi na ɔdze tum ahyɛ ne nsa no. Dɛmara na okun a ɔyɛ n’adze nyansa mu no bɛma ne yer tum kakra ma ɔdze eedzi dwuma ahorow bi. Ber a Nyankopɔn n’Asɛm no rekã ɔyer pa ho asɛm no, ɔkãa dɛ ɔhwɛ ne fie, ɔtɔ na ɔtɔn egyapadze, na odzi gua. (Kenkan Mbɛbusɛm 31:15, 16, 18.) Ɔnnyɛ akowaa a onnyi ho kwan dɛ ɔkyerɛ n’adwen. Mbom, no kun wɔ no mu awerɛhyɛmu, na otsie n’adwenkyerɛ. (Kenkan Mbɛbusɛm 31:11, 26, 27.) Sɛ okun da obu a ɔtse dɛm edzi a, ne yer n’enyi bɛgye mpo dɛ ɔbɛbrɛ noho adze ama no.

15. Ebɛnadze na yernom botum esũa efi Jesus no nhwɛdo no mu?

¹⁵ Dza yernom botum esũa efi mu. Ɔmmfa ho ndzɛmba akɛse a Jesus yɛ no nyinara ekyir no, ɔnntse nka dɛ ɔyɛ enyimtsiabu dɛ ɔbɛbrɛ noho adze ahyɛ Jehovah ne tsiryɛ ase. (1 Cor. 15:28; Phil. 2:5, 6) Dɛmara na ɔyer pa a osũasua Jesus no nhwɛdo na ɔbrɛ noho adze ma no kun no renntse nka dɛ wɔabrɛ no adze. Ɔyer pa bɔboa no kun osiandɛ ɔdɔ no, naaso ne tsitsir no, ɔdɔ nye obu a ɔwɔ ma Jehovah no na ɔka no ma ɔyɛ dɛm.

16. Dɛ mbrɛ 1 Samuel 25:3, 23-28 kyerɛ no, ebɛn nsɛndzendzen na Abigail hyiae? (Hwɛ mfonyin a ɔwɔ Ɔweɔn-Aban yi enyim no.)

¹⁶ Nna Abigail no kun ne dzin dze Nabal. Nna ɔyɛ ɔbarimba a ɔyɛ pɛsɛankonya, ahomemado nye bɔnyiayɛ. Ɔno mpo no, Abigail enngyina do enngyaa no awar. Nkyɛ obotum ayɛ dzinn ma David na ne mbarimba no ekoku no kun. Mbom ɔyɛɛ ndzɛmba ahorow bi dze bɔɔ Nabal nye hɔn fie nyinara ho ban. Ɔwodze hwɛ akokodur ara a nna ɔsɛ dɛ Abigail nya ansaana oetum akɔ mbarimba 400 a wokitsakitsa akodze no enyim na oeefi obu mu nye David esusu nsɛm ho. Nna ɔpɛ mpo dɛ wɔdze bɔn a no kun ayɛ no ho asodzi bɔto no do. (Kenkan 1 Samuel 25:3, 23-28.) David nankasa mpo hun dɛ ɔyɛ Jehovah na ɔsomaa dɛm ɔbaa kokodurnyi yi ma ɔdze afotu a ohia no brɛɛ no, na iyi boaa no ma oenndzi mfom kɛse a ɔtse dɛm.

17. Ebɛnadze na kunnom botum esũa efi David na Abigail hɔn asɛm no mu?

¹⁷ Dza kunnom botum esũa efi mu. Nna Abigail yɛ nyansafo. David yɛɛ n’adze nyansa mu dɛ otsiee no. Dɛm a ɔyɛe no maa okwetsiir bɔn a ɔnye dɛ obedzi nyimpa a hɔnho  nnyi asɛm no hɔn bɔgyaa ho fɔ. Dɛmara na sɛ okun a ɔyɛ n’adze nyansa mu risisi gyinae a no ho hia a, obosusu ne yer n’adwenkyerɛ ho yie ana oeesisi gyinae a ɔtsetse dɛm. Bi a ne yer n’adwenkyerɛ no bɔboa no amma oeennsi gyinae a nyansa nnyi mu.

18. Ebɛnadze na yernom botum esũa efi Abigail no nhwɛdo no mu?

¹⁸ Dza yernom botum esũa efi mu. Ɔyer a ɔdɔ Jehovah na obu no no botum enya n’ebusua no do nkantando pa, sɛ mpo no kun nnsom Jehovah anaa ɔmmfa Ne gyinapɛn ahorow nnyɛ edwuma a. Orinngyina biribiara a ɔnye Kyerɛwnsɛm no nnhyia do nngyaa awar. Mbom no, obefi obu nye ahobrɛadze mu abɔ mbɔdzen dɛ ɔbɔboa no kun ma oeesũa Jehovah ho adze. (1 Pet. 3:1, 2) Naaso, ɔmmfa ho no nhwɛdo pa nyina ekyir no, sɛ no kun no ammbɔsom Jehovah mpo a, Jehovah n’enyi bɔsɔ no dɛ odzi no nokwar na ɔbrɛ noho adze ma no kun.

19. Ebɛn aber na ɔyer rennyɛ setsie mma no kun?

¹⁹ Naaso, ɔyer a ɔyɛ Christiannyi a ɔbrɛ noho adze no, sɛ no kun kã dɛ ombu Bible mu mbra anaa ngyinadonsɛm do a, ɔnnkɛyɛ. Dɛ nhwɛdo no, yɛmfa no dɛ ɔyer bi a no kun nnyɛ Ɔdasefo akã akyerɛ no dɛ ondzi ator, onwia adze anaa ɔnyɛ adze bi a ɔnye Kyerɛwnsɛm no nnhyia. Nyia odzi kan a ɔsɛ dɛ Christianfo nyina a yernom ka ho yɛ setsie ma no nye Jehovah Nyankopɔn. Sɛ okun kã kyerɛ ne yer dɛ ombu Bible mu ngyinadonsɛm do a, ɔnnsɛ dɛ ɔgye to mu, mbom no, ɔsɛ dɛ ogyina pintsinn na ofi obu mu kyerɛkyerɛ siantsir a orunntum nnyɛ biribi a ɔtse dɛm no mu.​—Andw. 5:29.

20. Yesi dɛn hu dɛ nna Mary nye Jehovah wɔ ebusuabɔ a no mu yɛ dzen?

²⁰ Nna Mary nye Jehovah wɔ ebusuabɔ a no mu yɛ dzen. Ɔda edzi kofee dɛ nna onyim Kyerɛwnsɛm no yie. Wɔ nkɔmbɔ a ɔnye John Onumanyi ne maame Elizabeth bɔe no mu no, ɔkãa Hebrew Kyerɛwnsɛm bɔbor 20 mu asɛm. (Luke 1:46-55) Afei, susu ho hwɛ: Ɔwɔ mu mpo dɛ nna Mary nye Joseph ahyehyɛ dɛ wɔbɔwar dze, naaso Jehovah no bɔfoe no enndzi kan ennyi noho edzi annkyerɛ Joseph. Mbom no, ɔbɔfo no dzii kan nye Mary kasaa tsenn na ɔkãa kyerɛ no dɛ ɔbɔwo Nyankopɔn ne Ba. (Luke 1:26-33) Nna Jehovah nyim Mary yie na ɔwɔ no mu ahotodo dɛ ɔbɔdɔ ne Ba no na  ɔaahwɛ no. Ekyingye biara nnyi ho dɛ ber a Jesus wui na wonyaan no kɔr sor ekyir mpo no, Mary kɔr do nye Jehovah nyaa ebusuabɔ a no mu yɛ dzen.​—Andw. 1:14.

21. Ebɛnadze na kunnom botum esũa efi dza Bible kã fa Mary ho no mu?

²¹ Dza kunnom botum esũa efi mu. Okun a n’adwen mu da hɔ no, sɛ ne yer nyim Bible no mu yie a n’enyi gye. Bible no mu a ne yer nyim no yie no mmbɔ no hũ anaa ɔmma onnya adwen dɛ ne yer pɛ dɛ ɔbɛyɛ ebusua no ne tsir. Mbom, ɔgye to mu dɛ, sɛ ne yer nyim Bible no mu yie, na onyim Bible mu ngyinadonsɛm a, obotum aboa ebusua no kɛse. Ɔwɔ mu, sɛ ne yer no no nwomasua kɔ ekyir sen nedze no mpo a, ɔyɛ n’asodzii dɛ odzi enyim ma wɔyɛ ebusua som nye Nyankopɔn no som mu ndzɛmba ahorow.​—Eph. 6:4.

22. Ebɛnadze na yernom botum esũa efi Mary hɔ?

²² Dza yernom botum esũa efi mu. Ɔwɔ mu dɛ ɔsɛ dɛ ɔyer brɛ noho adze ma no kun, naaso ɔyɛ nankasa n’asodzii dɛ ɔbɛhyɛ ebusuabɔ a ɔnye Jehovah wɔ no mu dzen. (Gal. 6:5) Iyi ntsi, ɔsɛ dɛ ɔgye ber dze yɛ n’ankorankor adzesua na ɔdwendwen dza osũa no ho. Sɛ ɔyɛ dɛm a, ɔbɔboa no ma ɔaakɔ do enya ɔdɔ na obu ama Jehovah. Bio so, n’enyi bɛgye dɛ ɔbrɛ noho adze ma no kun.

23. Sɛ yernom brɛ hɔnho adze a, ebɛn kwan do na ɔboa hɔnankasa, hɔn mbusua nye asafo no?

²³ Yernom a wɔkɔ do brɛ hɔnho adze ma hɔn kunnom osian ɔdɔ a wɔwɔ ma Jehovah ntsi no benya enyigye na akomatɔyamu akyɛn hɔn a wɔmmfa tsiryɛ ho nhyehyɛɛ a Jehovah ayɛ no nnyɛ edwuma no. Wɔyɛ nhwɛdo pa ma mberantsɛ na nkataasia nyinara. Afei so, wɔboa ma ɔdɔ nye asomdwee tsena hɔn mbusua no nye asafo no mu. (Titus 2:3-5) Ndɛ, hɔn a wɔdze nokwardzi rosom Jehovah no mu fã kɛsenara yɛ mbaa. (Ndw. 68:11) Hɛn nyinara, dɛ yɛyɛ mbarimba o, dɛ yɛyɛ mbaa o, yɛwɔ asodzi a no ho hia a ɔsɛ dɛ yedzi ho dwuma wɔ asafo no mu. Wɔ adzesua a odzi hɔ mu no, yɛbɔhwɛ kwan a hɛn mu biara botum afa do edzi asodzi a ɔtse dɛm ho dwuma.