1-2. Ebɛn asɛm na ɔbɔfo bi kãa kyerɛɛ mbaa no a wɔkɔr Jesus ne nda no do no, na ebɛn asɛm na Jesus nankasa kãa kyerɛɛ hɔn?

NNA ɔyɛ Nisan 16, afe 33 H.B. Dɛm da no, nna adze nnkyee papa na mbaa nyamesurofo bi a hɔn werɛ ahow kɔr beebi a wosiee Jesus no. Nna woesie Ewuradze Jesus Christ wɔ dɛm bea no ma bɔbor ndɔnhwer 36 abɛsen kɔ. Wɔkɔr dɛ wɔdze nduhuam nye ngohuam rekɛsera Jesus no fun ho. Aber a wodur nda no do no, hɔnho dwuruuw hɔn, osiandɛ woennhu fun no wɔ nda no mu! Ɔbɔfo bi kãa kyerɛɛ mbaa no dɛ Jesus asoɛr efi ewufo mu. Ɔtoaa do kãa kyerɛɛ hɔn dɛ: “Oedzi hom enyim kɔ Galilee: hɔ na hom bohu no.”​—Matt. 28:1-7; Luke 23:56; 24:10.

² Aber a mbaa no fii nda no do dɛ wɔrokɔ no, Jesus nankasa hyiaa hɔn, na ɔkãa kyerɛɛ hɔn dɛ: “Hom nkɔ nkɛkã nkyerɛ mo nuanom dɛ wɔnkɔ Galilee, na hɔ na wobohu me.” (Matt. 28:10) Wonyaan Jesus fii ewufo mu no, adze a odzii kan yɛe nye dɛ ɔyɛɛ nhyehyɛɛ nye n’esuafo no hyiaa mu. Ɔdze akwankyerɛ ahorow bi a no ho hia paara maa hɔn wɔ dɛm nhyiamu no ase!

3-4. Nnyɛ asomafo no nkotsee na wɔdze ahyɛdze a ɔwɔ Matthew 28:19, 20 no maa hɔn. Ebɛnadze ntsi na yebotum akã dɛm? (Hwɛ mfonyin a ɔwɔ Ɔweɔn-Aban yi enyim no.)

³ Kenkan Matthew 28:16-20. Nhyiamu no ase no, Jesus kãa edwuma a no ho hia a n’esuafo no bɛyɛ dɛm aber no ho asɛm kyerɛɛ hɔn. Dɛm edwuma kor yi ara na ndɛ yɛreyɛ. Jesus kãa dɛ: “Dɛm ntsi hom nkɔ nkɛyɛ amanaman nyina m’esuafo . . . na hom nkyerɛkyerɛ hɔn dɛ wondzi dza mahyɛ hom nyina do.”

⁴ Jesus pɛ dɛ n’esuafo nyinara yɛ esuafoyɛ edwuma no. Nnyɛ asomafo anokwafo 11 no pɛ na Jesus maa hɔn ahyɛdze dɛ wɔnyɛ  dɛm edwuma yi. Ebɛnadze ntsi na yebotum dze ahotodo akã no dɛm? Aber a Jesus dze ahyɛdze mae wɔ bepɔw no do wɔ Galilee dɛ wɔnkɛyɛ amanaman nyina n’esuafo no, nna nnyɛ asomafo no nkotsee na wɔwɔ hɔ. Yɛnkaa dza ɔbɔfo no kãa kyerɛɛ mbaa no. Ɔkãa kyerɛɛ hɔn dɛ: “Hom bohu no [wɔ Galilee].” Ntsi, obotum aba dɛ nna mbaa anokwafo so wɔ dɛm nhyiamu no ase bi. Nnyɛ ɔno nko. Ɔsomafo Paul ma yehu dɛ Jesus ‘yii noho kyerɛɛ enuanom bɔbor ahaenum prɛko.’ (1 Cor. 15:6) Dɛm enuanom ahaenum yi hyiaa mu wɔ hen?

5. Nhyiamu a wɔyɛe wɔ Galilee a no ho kyerɛwtohɔ wɔ Matthew tsir 28 no, ɔno ho asɛm na 1 Corinthfo 15:6 kã. Ebɛnadze ntsi na yɛgye dzi?

⁵ Nhyiamu a wɔyɛe wɔ Galilee a no ho kyerɛwtohɔ wɔ Matthew tsir 28 no, ɔno ho asɛm na Paul kãe wɔ 1 Corinthfo 15:6 no. Yɛwɔ ngyinado a ɔma yɛgye dzi dɛ dɛm asɛm yi yɛ ampa. Ɔyɛ ebɛn ngyinado? Odzi kan, nna Jesus n’esuafo no mu dodow no ara yɛ Galileefo. Ntsi, nna bepɔw a ɔwɔ Galilee no bɛyɛ beebi a oye a ɔnye nyimpadodow behyia mu sen dɛ ɔnye hɔn behyia mu wɔ ofie bi mu wɔ Jerusalem. Otsĩa ebien, nna Jesus a woenyan no efi owu mu no edzi kan nye n’asomafo 11 no ehyia dada wɔ ofie bi mu wɔ Jerusalem. Ntsi, sɛ Jesus pɛ dɛ ɔdze ahyɛdze ma asomafo no nkotsee dɛ wɔnkɛyɛ nkorɔfo n’esuafo a, nkyɛ ɔbɛyɛ dɛm wɔ Jerusalem kyɛn dɛ ɔbɛkã akyerɛ asomafo no, mbaa no nye esuafo afofor dɛ wonhyia no wɔ Galilee.​—Luke 24:33, 36.

6. Ebɛn kwan do na Matthew 28:20 ma yehu dɛ ahyɛdze a ɔnye dɛ yɛnkɛyɛ nkorɔfo Jesus n’esuafo no fa hɛnho ndɛ, na ebɛn kwan do na nkorɔfo ridzi dɛm ahyɛdze yi do ndɛ?

⁶ Ma yɛnhwɛ ngyinado a no ho hia a otsĩa ebiasa. Nnyɛ Christianfo a nna wɔwɔ hɔ dɛm aber no nkotsee na Jesus maa hɔn ahyɛdze dɛ wɔnkɛyɛ nkorɔfo n’esuafo. Yesi dɛn hu dɛm? Jesus dze n’asɛm reba ewiei no, ɔkãa kyerɛɛ n’ekyirdzifo no dɛ: “Menye hom wɔ hɔ daa, dze kesi wiadze ewiei.” (Matt. 28:20) Dɛ mbrɛ Jesus kãe no, ndɛ nyimpa pii reyɛ esuafoyɛ edwuma no. Susu ho hwɛ! Afe biara, nyimpa bɛyɛ 300,000 na wɔbɔ hɔn esu dɛ Jehovah Adasefo, na wɔba bɛyɛ Jesus Christ n’esuafo!

7. Ebɛnadze na yɛrobɔhwɛ, na ebɛnadze ntsi a?

⁷ Nyimpa pii a yɛnye hɔn sũa Bible no, wonya nkɔenyim ma wɔbɔ hɔn esu. Naaso, nyimpa binom a daa yɛnye hɔn sũa Bible no, akɛyɛ tse dɛ wosuro dɛ wɔbɛyɛ Christ n’esuafo. Hɔn enyi gye adzesua no ho, naaso wonnya nkɔenyim a ɔbɛma wɔafata dɛ wɔbɔ hɔn esu. Obiara a ɔwɔ Bible esuafo pɛ dɛ ɔboa hɔn ma wɔdze dza worusũa no yɛ edwuma wɔ hɔn abrabɔ mu, na wɔba bɛyɛ Christ n’esuafo. Adzesua yi mu no, yɛbɔhwɛ mbrɛ yebesi aboa hɛn Bible esuafo ma woeenya Jehovah ho dɔ. Afei so, yɛbɔhwɛ mbrɛ yebesi aboa hɔn ma woeenya nkɔenyim wɔ Nyankopɔn no som mu. Ebɛnadze ntsi na ɔsɛ dɛ yesusu dɛm asɛm yi ho? Osiandɛ ɔtɔfabi a, obotum aba dɛ yebesi gyinae bi, dɛ yɛbɔtoa adzesua no do anaadɛ yebegyaa adzesua no yɛ.

8. Ebɛnadze ntsi na ɔtɔ da a, ɔyɛ dzen dɛ yɛbɔboa hɛn Bible esuafo ma woeenya Jehovah ho dɔ?

⁸ Jehovah pɛ dɛ nyimpa som no. Naaso, ɔpɛ dɛ ɔdɔ a wɔwɔ ma no no ka hɔn ma wɔyɛ dɛm. Ntsi, hɛn botae nye dɛ yɛbɔboa hɛn Bible esuafo ma woeehu dɛ Jehovah dwen hɔnho ankasa dɛ ankorankor, na ɔdɔ hɔn papaapa. Ɔsɛ dɛ yɛboa hɔn ma wohu Jehovah dɛ ɔyɛ “ngyanka hɔn egya, na ekunafo hɔn sɛndzifo.” (Ndw. 68:5) Sɛ wo Bible esuafo hu mbrɛ Nyankopɔn si dɔ hɔn a, bi a ɔbɛka hɔn akoma, na ɔdɔ a wɔwɔ ma no no bɛyɛ kɛse. Bi a ɔbɛyɛ dzen ama Bible esuafo binom dɛ wobohu Jehovah dɛ ɔyɛ Egya a ɔwɔ ɔdɔ, osiandɛ hɔn egyanom annda ɔdɔ na tsema edzi annkyerɛ hɔn ntsi. (2 Tim. 3:1, 3) Ntsi, sɛ enye hɔn rusũa adze a, ɔyɛ a twe adwen si Jehovah no su ahorow a ɔyɛ ahomka no do. Boa wo Bible esuafo ma wonhu dɛ hɛn  Nyankopɔn a ɔwɔ ɔdɔ no pɛ dɛ wonya nkwa a onnyi ewiei, na ɔayɛ krado dɛ ɔbɔboa hɔn ma woeenya nkwa a ɔtse dɛm. Ebɛnadze bio na yebotum ayɛ?

9-10. Sɛ yɛreyɛ Bible adzesua a, ebɛn nwoma ahorow na ɔsɛ dɛ yɛdze yɛ, na ebɛnadze ntsi na ɔsɛ dɛ yɛdze dɛm nwoma no dzi dwuma?

⁹ Fa “Ebɛnadze na Bible no Kyerɛkyerɛ Hɛn?” nye “Momfa Mo Ho Nsie Onyankopɔn Dɔ Mu” nwoma no dzi dwuma. Wɔayɛ dɛm nwoma ebien yi wɔ ɔkwan soronko bi do a ɔbɔboa hɛn ma yɛnye obi eesũa Bible no ma aaka n’akoma. Dɛ nhwɛdo no, Bible Kyerɛkyerɛ Hɛn nwoma no, tsir 1 no ma yenya nsɛmbisa yi ho mbuae: Aso Nyankopɔn dwen hɛnho anaa ɔyɛ otsiɔdzennyi?, Sɛ Nyankopɔn hu dɛ nyimpa ruhu amandze a, ɔtse nka dɛn wɔ ho?, nye Aso ibotum abɛyɛ Jehovah ne nyɛnko? Na Onyankopɔn Dɔ nwoma no so ɛ? Dɛm nwoma yi bɔboa Bible suanyi no ma oeehu mbrɛ ɔdze Bible ngyinadonsɛm bɔbɔ ne bra, na ɔaatwe abɛn Jehovah kɛse. Sɛ enye Bible esuafo afofor esũa dɛm nwoma yi dada mpo a, ɔsɛ dɛ isiesie woho yie ma adzesua no mu biara mbrɛ ɔbɛyɛ a  ibotum dze edzi Bible suanyi no n’ehiadze ho dwuma.

¹⁰ Fa no dɛ, wo Bible suanyi no n’enyi gye asɛm bi a wɔakyerɛkyerɛ mu wɔ nwoma fofor bi mu ho. Naaso, dɛm nwoma no nnka Edwindadze Etsitsir A Yɛdze Kyerɛkyerɛ no ho. Mbrɛ ɔbɛyɛ a hom bɔtoa adzesua no do wɔ Bible Kyerɛkyerɛ Hɛn anaa Onyankopɔn Dɔ nwoma no mu no, bi a ibotum ahyɛ no nkuran dɛ nankasa nkenkan dɛm nwoma no.

11. Sɛ yɛhyehyɛ Bible adzesua a, ebɛn aber na ɔsɛ dɛ yɛdze mpaabɔ hyɛ ase na yɛdze wie, na yebesi dɛn nye Bible esuafo esusu mpaabɔ ho?

¹¹ Fa mpaabɔ hyɛ adzesua no ase. Sɛ enye obi hyehyɛ Bible adzesua a, ɔbɛyɛ papa dɛ hom dze mpaabɔ bɛhyɛ ase na hom dze ewie. Ɔwɔ dɛ hom hyɛ ase yɛ dɛm ntsɛmara. Ɔsɛ dɛ yɛboa Bible suanyi no ma ohu dɛ Nyankopɔn no sunsum krɔnkrɔn nkotsee na obotum aboa hɛn ma yaatse Nyankopɔn n’Asɛm ase. Sɛ Bible akyerɛkyerɛfo binom nye hɔn esuafo rususu mpaabɔ a ɔtse dɛm ho a, wodzi kan nye hɔn kenkan asɛm a ɔwɔ James 1:5 no. Hɔ kã dɛ: “Sɛ hom mu biara ne nyansaa tɔ sin a, ombisa Nyankopɔn.” Afei, Bible kyerɛkyerɛfo no bisa osuanyi no dɛ, “Yebesi dɛn ebisa Nyankopɔn hɔ nyansa?” Ekyingye biara nnyi ho dɛ osuanyi no bɛgye ato mu dɛ ɔsɛ dɛ yɛbɔ Nyankopɔn mpaa.

12. Ibesi dɛn dze asɛm a ɔwɔ Ndwom 139:2-4 no aboa wo Bible suanyi ma oeetum efi n’akoma mu aabɔ mpaa?

¹² Kyerɛ wo Bible suanyi no mbrɛ onsi mbɔ mpaa. Ma onhu dɛ Jehovah pɛ dɛ otsie mpaa a obefi n’akoma mu abɔ no. Kyerɛ mu kyerɛ no dɛ yebotum akã hɛn akoma mu nsɛm akyerɛ Jehovah wɔ hɛn mpaabɔ mu. Nkyii so, ma onhu dɛ hɛn nsɛm a ibia yɛremmpɛ dɛ yɛnye nyimpa fofor biara bɛkyɛ no, yebotum akã akyerɛ Jehovah wɔ hɛn mpaabɔ mu. Boa no ma ɔntsena n’adwen mu dɛ Jehovah nyim hɛn adwen mu nsusui dada. (Kenkan Ndwom 139:2-4.) Afei so, sɛ hɛn Bible suanyi pɛ dɛ ɔyɛ nsesa wɔ nsusui bɔn bi ho na ogyaa suban bɔn bi a, yebotum ahyɛ no nkuran dɛ ɔmbɔ mpaa nserɛ Nyankopɔn hɔ mboa. Ɔwodze, fa no dɛ enye obi esũa adze ber tsentsen bi, naaso n’enyi da ho ara gye dapɔn anaa afahyɛ bi a onnyi dɛ Christianfo dze hɔnho hyɛ mu ho. Onyim dɛ ɔyɛ bɔn, naaso nokwasɛm nye dɛ ndzɛmba ahorow bi a ɔkɔ do wɔ dapɔn no anaa afahyɛ no mu no, n’enyi gye ho. Ibotum ahyɛ no nkuran dɛ ɔnkã mbrɛ osi tse nka ankasa ho asɛm nkyerɛ Jehovah, na ɔnserɛ no hɔ mboa ama oeetum ayɛ dza Nyankopɔn pɛ nkotsee.​—Ndw. 97:10.

13. (a) Ebɛnadze ntsi na ɔsɛ dɛ yɛto nsa frɛ hɛn Bible esuafo ntsɛmara dɛ wɔmbra asafo nhyiamu? (b) Ebɛnadze na yɛyɛ a obotum ama Bible suanyi bi n’enyi aaka wɔ Ahendzi Asa do?

¹³ To nsa frɛ wo Bible suanyi no ntsɛmara ma ɔmbra asafo nhyiamu. Sɛ wo Bible suanyi ba asafo nhyiamu a, dza ɔbɛtse wɔ ase nye dza obohu wɔ hɔ no botum aka n’akoma ma ɔaasom Jehovah. Yi video a wɔato dzin Ebɛnadze na Ɔkɔ do wɔ Hɛn Ahendzi Asa Do? no kyerɛ no, na to nsa frɛ no dɛ ɔnye wo nkɔ asafo nhyiamu. Sɛ ɔbɛyɛ yie a, ibotum ayɛ kaar ho nhyehyɛɛ ama no. Sɛ enye wo Bible suanyi rukosũa adze a, oye paara dɛ ebɔto nsa afrɛ adawurbɔfo afofor na enye hɔn aakɔ. Sɛ eyɛ dɛm a, wo Bible suanyi no bohu enuanom afofor a wɔwɔ asafo no mu no, na sɛ ɔba asafo nhyiamu a, n’enyi bɛka.

14. Ebɛnadze na obotum ekenyan Bible suanyi bi ma oeenya nkɔenyim wɔ Nyankopɔn no som mu?

¹⁴ Hɛn botae nye dɛ yɛbɔboa hɛn Bible esuafo ma woeenya nkɔenyim. (Eph. 4:13) Sɛ obi pen do dɛ yɛnye no nsũa Bible a, bi a dza ɔhwehwɛ ara nye dɛ obohu mbrɛ Bible no besi aboa no. Naaso, ber a ɔdɔ a ɔwɔ ma Jehovah reyɛ kɛse no, bi a ɔbɛhyɛ ase adwen mbrɛ obesi aboa afofor nye hɔn a wɔwɔ asafo no mu dada no ho. (Matt. 22:37-39) Sɛ mber pa ba a, mma nntwentweɔn w’anan adze dɛ ebɛma oehu  ho kwan a ɔwɔ hɔ dɛ obeyi ntoboa dze aboa Ahendzi asɛmpaka edwuma no.

15. Sɛ wo Bible suanyi hyia ɔhaw a, ibesi dɛn aboa no ma ɔaayɛ dza ɔtsen?

¹⁵ Kyerɛ wo Bible suanyi no dza ɔsɛ dɛ ɔyɛ ber a orihyia ɔhaw no. Ɔwodze fa no dɛ wo Bible suanyi no yɛ dawurbɔfo a ɔmmbɔɔ esu, nna ɔabɛkã akyerɛ wo dɛ onua bi a ɔwɔ asafo no mu ayɛ biribi etsia no. Dɛ nkyɛ ebɛkã akyerɛ no dɛ oyi na odzi bem anaa oyi na odzi fɔ no, ebɛnadze ntsi na ennkyerɛ no dza Kyerɛwnsɛm no hwehwɛ dɛ ɔyɛ wɔ asɛm no ho? Obotum dze onua no no mfom akyɛ no na oeegyaa mu ma aaka. Sɛ orunntum nngyaa mu ma ɔnnka a, ɔnodze ɔnye onua no nkɛkã ho asɛm wɔ ɔdɔ na ayamuyie mu. Botae a ɔsɛ dɛ ɔdze yɛ dɛm nye dɛ ‘obenya no nua.’ (Fa toto Matthew 18:15 ho.) Boa wo Bible suanyi no ma onsiesie asɛm a ɔkɔ a ɔbɛkã. Kyerɛ no mbrɛ obesi dze JW Library^® app, Research Guide for Jehovah’s Witnesses (Nwoma A Jehovah Adasefo Dze Yɛ Nhwehwɛmu), nye jw.org^® no ayɛ nhwehwɛmu dze ehu akwan a ɔbɛfa do edzi tsebea no ho dwuma. Sɛ onya ntsetsee pii ansaana ɔaabɔ esu a, ɔbɛyɛ mberɛw ama no dɛ ɔnye afofor bɛtsena asomdwee mu wɔ asafo no mu wɔ n’esubɔ ekyir.

16. Ebɛnadze ntsi na mfaso wɔ do dɛ yɛbɔto nsa afrɛ afofor na yɛnye hɔn akɛyɛ hɛn Bible adzesua?

¹⁶ To nsa frɛ enuanom afofor a wɔwɔ asafo no mu ber a erekɛyɛ Bible adzesua no. Afei so, sɛ ɔmansin do hwɛfo no bɛsera hom asafo no a, ibotum ato nsa afrɛ no na enye no akɔ. Ebɛnadze ntsi a? Dza yeedzi kan akã ho asɛm a ɔsɛ dɛ eyɛ no da nkyɛn a, adawurbɔfo afofor so botum aboa wo Bible suanyi no wɔ akwan bi do a irunntum nnyɛ. Fa no dɛ wo Bible suanyi no robɔ mbɔdzen dɛ obegyaa sigyarɛtsenom, naaso ɔyɛ ara a nna ɔasan akɔnom bio. Bi a, onua bi wɔ asafo no mu a ɔakɔ tsebea a ɔtse dɛm mu pɛn, naaso ɔbɔɔ mbɔdzen dzii suban a ɔtse dɛm do. Ibotum ato nsa afrɛ no ma enye no akɛyɛ adzesua no. Onua a ɔtse dɛm no botum ama wo Bible suanyi no nyansahyɛ a mfaso wɔ do a ɔbɔboa no kɛse. Sɛ ɔyɛ dzen ma wo dɛ ebɛyɛ Bible adzesua no ber a onua bi a noho akokwaa wɔ hɔ a, dɛm da no, ibotum akã akyerɛ no dɛ ɔnyɛ adzesua no mma wo. Sɛ eto nsa frɛ afofor na enye hɔn kɛyɛ wo Bible adzesua a, wo Bible suanyi no botum enya hɔn suahu do mfaso. Kaa dɛ hɛn botae nye dɛ yɛbɔboa Bible suanyi no ma oeenya nkɔenyim.

17-18. Dɛ ibegyaa Bible adzesua bi yɛ anaa ebɔkɔ do ayɛ no, sɛ irisi ho gyinae a, ebɛnadze na ɔsɛ dɛ isusu ho?

¹⁷ Sɛ wo Bible suanyi nnya nkɔenyim wɔ Bible adzesua no mu a, odu beebi a ɔwɔ dɛ ibisa woho dɛ, ‘Ɔsɛ dɛ migyaa adzesua no yɛ?’ Ɔwɔ dɛ isusu Bible suanyi no no mbɔdzembɔ ho ansaana eesi gyinae a ɔtse dɛm. Nyimpa binom wɔ hɔ a, ɔbɛgye hɔn ber tsentsen bi ansaana woeenya nkɔenyim. Binom so dze, ɔnntse dɛm. Ntsi, ɔwɔ dɛ ibisa woho dɛ: ‘Sɛ mohwɛ mbrɛ mo suanyi no ne tsebea tse a, ana orinya nkɔenyim dɛ mbrɛ ɔsɛ?’ ‘Dza orusũa no, ana ɔahyɛ ase ‘ridzi do’ anaa ɔdze reyɛ edwuma?’ (Matt. 28:20) Obotum agye ber tsentsen bi ansaana Bible suanyi bi abɛyɛ Christ no suanyi. Naaso, ɔsɛ dɛ ɔyɛ nsesa nkakrankakra wɔ n’asetsena mu.

 ¹⁸ Sɛ enye obi esũa adze ber tsentsen bi, naaso nyimpa no nnyɛ biribi a ɔkyerɛ dɛ n’enyi sɔ dza orusũa no a, ebɛnadze na ɔsɛ dɛ eyɛ? Ma yensusu tsebea yi ho nhwɛ: Enye wo Bible suanyi esũa Bible Kyerɛkyerɛ Hɛn nwoma no ewie, anaa mpo bi a enye no ahyɛ ase rusũa Onyankopɔn Dɔ nwoma no. Naaso, ɔmmbaa asafo nhyiamu da. Nkaadzi no mpo ɔmmbaa bi da! Nkyii so, sɛ enye no rukosũa adze a, ɔtaa dze nsɛm yiyi noho ano. Tsebea a ɔtse dɛm mu no, ɔsɛ dɛ enye Bible suanyi no tsena ase na hom bɔ nkɔmbɔ kɔ ekyir. *

19. Sɛ ɔtse dɛ mbrɛ obi nnkyerɛ Bible a enye no sũa no ho enyisɔ a, ebɛn asɛm na ibotum ebisa no, na ebɛnadze na no ho behia dɛ isusu ho?

¹⁹ Ibotum ebisa no dɛm asɛm yi dze ahyɛ nkɔmbɔ no ase, ‘Sɛ ehwɛ ndzɛmba a ɔsɛ dɛ eyɛ ama eetum abɛyɛ Jehovah Adasefo no mu kor a, no mu dza ɔwɔ hen na ɔyɛ dzen ma wo papaapa dɛ ebɛyɛ?’ Bi a Bible suanyi no bɛkã dɛ, ‘M’enyi gye Bible adzesua no ho, naaso ɔnnyɛ adze a mebɛba abɛyɛ Jehovah Adasefo no mu kor da!’ Sɛ ehwɛ ber tsentsen a enye no esũa adze, na sɛ dɛmara na no suban tse a, ana ɔsɛ dɛ ekɔ do araa nye no sũa adze? Naaso, bi a ber a odzi kan koraa no, wo Bible suanyi no bɛkã adze prɛko a osiw no kwan akyerɛ wo. Dɛ nhwɛdo no, bi a nna ɔtse nka dɛ orunntum nnkã asɛm no wɔ efiefi mu da. Sɛ ihu adze a osiw no kwan anaa mbrɛ ɔtse nka a, ibohu ɔkwan a ebɛfa do aboa no ma oeenya nkɔenyim.

20. Sɛ yɛtse asɛm a ɔwɔ Asomafo Ndwuma 13:48 no ase a, ebɛn kwan do na ɔbɔboa hɛn ma yeehu dɛ, yɛnye obi nkɔ do nsũa Bible no anaa yɛnye no ngyaa?

²⁰ Awerɛhosɛm nye dɛ Bible esuafo binom tse dɛ Israelfo a wɔtsenaa ase wɔ Ezekiel n’aber do no. Asɛm a Jehovah kãe faa hɔnho kyerɛɛ Ezekiel nye yi: “Na, hwɛ, eyɛ hɔn dɛ obi a ne ndze fenemfenem na onyim sanku bɔ papaara no ndwom dɛdɛɛdɛw: osiandɛ wɔtse wo nsɛm, na wɔnnyɛ.” (Ezek. 33:32) Bi a ɔbɛyɛ dzen ama hɛn dɛ yɛbɛkã akyerɛ Bible suanyi bi dɛ yɛnye no begyaa Bible adzesua yɛ. Naaso, “woetwa mber no tsia,” kyerɛ dɛ, mber a aka no suar. (1 Cor. 7:29) Dɛ nkyɛ yɛbɛsɛɛ ber nye obi ayɛ Bible adzesua a ɔnnsow aba no, ɔbɛyɛ papa dɛ yɛbɔhwehwɛ nyimpa a ne ndzeyɛɛ da no edzi dɛ ɔyɛ obi a ‘woeyi no ama onnyiewiei nkwa,’ kyerɛ dɛ, obi a ɔpɛ daa nkwa.​—Kenkan Asomafo Ndwuma 13:48.

21. Hɛn afe asɛm ma afe 2020 nye dɛn, na ebɛnadze ntsi na ɔfata?

²¹ Afe 2020 mu no, hɛn afe asɛm no bɔboa hɛn ma yaadwendwen mbrɛ yebesi etu mpon wɔ esuafoyɛ edwuma no mu ho. Nhyiamu tsitsir a Jesus nye n’esuafo no yɛe wɔ bepɔw bi do wɔ Galilee no, nsɛm a ɔkãe wɔ ase no, hɛn afe asɛm no ka ho bi: ‘Dɛm ntsi hom nkɔ nkɛyɛ esuafo, na hom nnuma hɔn.’​—Matt. 28:19.