1-2. Ebɛnadze ntsi na afe biara yɛkɔ Nkaadzi no bi?

 BƐYƐ mfe 2,000 nye yi na Jesus dze no nkwa bɔɔ afɔr maa hɛn, na iyi ama wɔayɛ yie ama hɛn dɛ yebenya onnyiewiei nkwa. Anafua a adze rebɛkye ma Jesus ewu no, ɔdze afahyɛ bi sii hɔ. Ɔdze paanoo na wenyin na ɔdze yɛe, na ɔhyɛɛ n’ekyirdzifo dɛ wɔnyɛ adze a ɔtse dɛm mfa nkaa no nkwa a ɔdze bɔɔ afɔr no.​—1 Cor. 11:23-26.

² Yɛdɔ Jesus paa, ntsi yedzi ahyɛdze a ɔdze mae no do. (John 14:15) Afe biara sɛ Nkaadzi ber no so a, yɛgye ber bɔ mpaa na yɛdwendwen mfaso a Jesus no wu no ama adasamba enya no ho. Yɛyɛ dɛm kyerɛ dɛ hɛn enyi sɔ dza Jesus ayɛ ama hɛn no. Afei so, yɛdze enyigye yer hɛnho wɔ asɛnka edwuma no mu, na yɛto nsa frɛ nkorɔfo pii dɛ wɔmbɛka hɛnho ma yendzi afahyɛ tsitsir yi. Na yeesi hɛn bo pintsinn so dɛ yɛremma biribiara nnsiw hɛn kwan dɛ yɛbɔkɔ Nkaadzi no.

3. Ebɛnadze na yebosusu ho wɔ adzesua yi mu?

³ Jehovah n’asomfo ayɛ dza wobotum biara dɛ wɔbɛkaa Jesus no wu no. Adzesua yi mu no yɛbɔhwɛ akwan ebiasa a wɔafa do ayɛ dɛm. Ɔno nye: (1) wɔyɛ Nkaadzi no wɔ kwan a Jesus kyerɛe no do, (2) wɔto nsa frɛ afofor ba Nkaadzi no ase, na (3) wɔyɛ Nkaadzi no ɔmmfa ho ɔhaw biara a wohyia no.

4. Ebɛn nokwasɛm na wɔka ho asɛm wɔ Nkaadzi no ase afe biara, na ebɛnadze ntsi na ɔnnsɛ dɛ yebu dɛm nokwasɛm yi tootooba? (Luke 22:19, 20)

⁴ Afe biara sɛ yɛkɔ Nkaadzi no ase a, wɔma Bible mu ɔkasa a ɔma yenya nsɛmbisa ahorow bi ho mbuae a ɔtɔ asomu. Ɔma  yehu siantsir a adasamba hia werdam no nye mbrɛ ɔbaakofo no wu botum etua nyimpa beberee no ara hɔn bɔn ho kaw. Bio so ɔkaa hɛn dza paanoo na wenyin no gyina hɔ ma, nye hɔn a ɔsɛ dɛ wodzi paanoo no na wɔnom wenyin no bi. (Kenkan Luke 22:19, 20.) Ɔno da nkyɛn a, ɔma yɛdwendwen nhyira kamakama a hɔn a wɔbɛtsena asaase no do daa no benya no ho. (Isa. 35:5, 6; 65:17, 21-23) Ɔnnsɛ dɛ yebu dɛm nokwasɛm ahorow yi tootooba koraa. Nyimpa ɔpepepem pii nntse dɛm nokwasɛm yi ase. Afei so, wonnyim mbrɛ Jesus n’afɔrbɔ no som bo fa. Bio so, wɔnnyɛ Nkaadzi no wɔ kwan a Jesus kyerɛe no do. Ebɛnadze ntsi a?

5. Aber a Jesus n’asomafo no mu dodowara wui no, nkorɔfo yɛɛ hɔn adze dɛn wɔ kwan a Jesus kyerɛe dɛ wɔmfa do nkaa no wu no ho?

⁵ Aber a Jesus n’asomafo no mu dodowara wui no, annkyɛr koraa na ator Christianfo wiawiaa hɔnho baa asafo no mu. (Matt. 13:24-27, 37-39) Wokyinkyiim nokwasɛm no ‘dze twee esuafo no dzii hɔn ekyir.’ (Andw. 20:29, 30) Bible no ka dɛ wɔdze Jesus “bɔɔ afɔr prɛko dɛ ɔnsoa nyimpa pii hɔn bɔn.” Naaso ator Christianfo yi kyinkyiim dɛm nokwasɛm yi kaa dɛ ɔnntse dɛm na mbom ɔsɛ dɛ wɔkɔ do ara bɔ dɛm afɔr no. (Heb. 9:27, 28) Awerɛhosɛm nye dɛ nyimpa piinara so gye dɛm ator nkyerɛkyerɛ yi to mu. Wɔtaa hyia wɔ asɔrdan mu na ɔtɔ da mpo a wohyia da biara yɛ dza wɔfrɛ no “Holy Communion” no. b Asɔr afofor bi so wɔ hɔ a, wɔnntaa nnkaa Jesus no wu no, naaso ɔno mpo no, mfaso a Jesus no wu no ama adasamba enya no, hɔn asɔrmba no mu dodowara nntse ase papa. Bi a binom bebisa dɛ, ‘Ana afɔr a Jesus bɔe no kyerɛ dɛ wobotum dze mo bɔn akyɛ me ampa?’ Ebɛnadze ntsi na wobisa asɛm a ɔtse dɛm? Ɔtɔ da a, ebɔhwɛ no nna hɔn a wɔnngye nndzi dɛ wobotum egyina Jesus n’afɔrbɔ no do dze hɛn bɔn akyɛ hɛn no na wɔadaadaa hɔn. Ebɛnadze na hɔn a wodzi Jesus n’ekyir nokwar mu no ayɛ dze aboa nkorɔfo ma woehu mfaso a ɔwɔ Jesus no wu no do nye kwan pa a ɔsɛ dɛ yɛfa do kaa no wu no?

6. Odur 1872 no, nna ebɛn nokwasɛm na Bible esuafo no ebohu?

⁶ Afe 1870 mu no, kuw bi a nna wohyia mu sua Bible no hyɛɛ ase yɛɛ Bible no mu nhwehwɛmu kɔr ekyir. Nna Charles Taze Russell na ɔda hɔn ano. Nna wɔpɛ dɛ wohu nokwasɛm a ɔfa mbrɛ Jesus n’afɔrbɔ no som bo fa, nye kwan a ɔsɛ dɛ wɔfa do kaa no wu no ho. Odur 1872 no, nna woebohu dɛ Bible no kyerɛkyerɛ dɛ ampaara Jesus dze no nkwa yɛɛ werdam maa adasamba nyinara. Dza wohunii no, wɔanntsena do koraa. Mbom wɔnam nwoma, dawurbɔ nkrataa nye magazine do kaa ho asɛm kyerɛɛ nkorɔfo. Ɔno ekyir ber tsiabaa bi no, wɔhyɛɛ ase hyiaa mu pɛnkor afe biara yɛɛ Nkaadzi no dze suasuaa tsetse Christianfo no.

7. Nhwehwɛmu a Bible esuafo no yɛe no, ebɛn kwan do na yenya do mfaso ndɛ?

⁷ Nhwehwɛmu a dɛm Christianfo anokwafo no yɛe mfe pii a etwa mu no, yenya do mfaso ndɛ. Ebɛn kwan do? Ɔnye dɛ, Jehovah aboa hɛn ma yeehu nokwasɛm a ɔfa Jesus n’afɔrbɔ no ho, nye mfaso a adasamba nyinara botum enya efi mu. (1 John 2:1, 2) Afei so yeebohu dɛ Bible no ka dɛ enyidado ebien na ɔwɔ hɔ ma adasamba a wɔyɛ dza Nyankopɔn pɛ. Nyimpa binom benya nkwa a owu nnyi mu wɔ sor, na ɔpepem pii so benya onnyiewiei nkwa wɔ asaase yi do. Sɛ yɛdwendwen mbrɛ Jehovah si dɔ hɛn nye mfaso a hɛnankasa yenya fi Jesus n’afɔrbɔ no do no ho a, ɔma yɛbɛn Jehovah kɛse. (1 Pet. 3:18;  1 John 4:9) Yesuasua hɛn nuanom anokwafo a yɛaka hɔnho asɛm no, na yɛto nsa frɛ nkorɔfo dɛ wɔmbɛka hɛnho ma yɛnyɛ Nkaadzi no dɛ mbrɛ Jesus kyerɛe no.

8. Ebɛnadze na Jehovah no nkorɔfo ayɛ dze ato nsa afrɛ afofor aba Nkaadzi no ase? (Hwɛ mfonyin no.)

⁸ Mfe pii nye yi na Jehovah no nkorɔfo ato nsa afrɛ afofor aba Nkaadzi no ase. Afe 1881 mu no, wɔtoo nsa frɛɛ enuanom a nna wɔwɔ United States no dɛ wonhyia mu wɔ onua bi ne fie wɔ Allegheny, Pennsylvania, na wɔnkɛyɛ Nkaadzi no. Ekyir yi, asafo biara hyiaa mu yɛɛ Nkaadzi no. Afei wɔ March 1940 no, wɔkaa kyerɛɛ adawurbɔfo dɛ wobotum ato nsa afrɛ obiara a ɔtse hɔn asaasesin no mu a ɔpɛ dɛ ɔba Nkaadzi no bi no. Afe 1960 nye ber a odzi kan a Bethel tsintsiim Nkaadzi no ho nsato krataa maa asafo ahorow no. Ofitsi dɛm aber no, wɔakyekyɛ Nkaadzi no ho nsato krataa ɔpepepem pii. Ebɛnadze ntsi na yɛyɛ dza yebotum biara dze hɛn ber na hɛn ahoɔdzen to nsa frɛ afofor ba Nkaadzi no ase?

9-10. Sɛ yɛyer hɛnho to nsa frɛ nkorɔfo dɛ wɔmbra Nkaadzi no ase a, woananom na wonya do mfaso? (John 3:16)

⁹ Siantsir a yɛto nsa frɛ afofor ba Nkaadzi no ase no, no mu kor nye dɛ, yɛpɛ dɛ hɔn a wɔmmbaa bi da no, sɛ wɔba a, wohu dza Jehovah na Jesus ayɛ ama hɛn nyinara no. (Kenkan John 3:16.) Hɛn yamu ara a nkyɛ dza wobohu nye dza wɔbɛtse wɔ Nkaadzi no ase no bekenyan hɔn ma woeesua Jehovah ho adze pii na wɔaabɔsom no. Naaso nnyɛ hɔn a wɔmmbaa bi da no nkotsee na sɛ wɔba a wonya do mfaso.

¹⁰ Yɛto nsa frɛ hɔn a woegyaa Jehovah no som no so. Yɛyɛ dɛm osiandɛ yɛpɛ dɛ wɔkaa dɛ Nyankopɔn da ho ara dɔ hɔn. Hɔn mu piinara ba Nkaadzi no bi, na sɛ yehu hɔn a hɛn  enyi gye paa. Sɛ wɔba Nkaadzi no ase a, ɔma wɔkaa dɛ aber a nna wɔsom Jehovah no nna hɔn enyi gye paa. Ma yɛmfa Monica n’asɛm no dɛ nhwɛdo. c Aber a COVID-19 yarba no bae no na ɔsanee hyɛɛ ase dɛ ɔrokɔ asɛnka. Aber a ɔkɔr 2021 Nkaadzi no, ɔkaa dɛ: “Dɛm Nkaadzi yi dze, m’enyi agye paa. Migyaa Jehovah no som no mfe 20 nye yi. Na iyi nye ber a odzi kan wɔ mfe 20 no mu a metum aka asɛm no akyerɛ nkorɔfo na mato nsa afrɛ hɔn dɛ wɔmbra Nkaadzi no bi. Meyeer moho yɛɛ dza mubotum biara too nsa frɛɛ nkorɔfo, osiandɛ m’enyi sɔ dza Jehovah na Jesus ayɛ ama me no.” (Ndw. 103:1-4) Sɛ yɛto nsa frɛ nkorɔfo na sɛ wɔba o, wɔammba o, hɛndze yɛbɔkɔ do ayɛ dza yebotum biara ato nsa afrɛ afofor aba Nkaadzi no ase. Yenyim dɛ sɛ yɛyɛ dɛm a, Jehovah n’enyiwa sɔ paa.

11. Ebɛn kwan do na Jehovah ehyira mbɔdzen a yɛbɔ dze to nsa frɛ afofor dɛ wɔmbra Nkaadzi no ase no do? (Haggai 2:7)

¹¹ Jehovah ehyira mbɔdzen a yɛbɔ dze to nsa frɛ nkorɔfo dɛ wɔmbra Nkaadzi no ase no do paa. Ɔwɔ mu dɛ COVID-19 yarba no ntsi nna yenntum nnhyia mu anaa yɛnnyɛ ndzɛmba ahorow bi dze, naaso wɔ 2021 mu no nkorɔfo 21,367,603 na wotumii baa Nkaadzi no bi. Dza besi 2021 no dze, nna iyi nye nyimpa dodow a ɔsen biara a wɔaba Nkaadzi no. Nyimpa dodow a wɔbae no yɛ Jehovah Adasefo a wɔwɔ wiadze nyina no bɛyɛ mbɔho ebien na fa! Nokwasɛm nye dɛ, ɔnnyɛ nyimpa dodow a wɔba Nkaadzi no nkotsee na ohia Jehovah. Ankorankor a wɔba Nkaadzi no bi no so, hɔnho hia Jehovah. (Luke 15:7; 1 Tim. 2:3, 4) Yɛgye dzi paa dɛ, Jehovah fa mbɔdzen a yɛbɔ dze to nsa frɛ afofor dɛ wɔmbra Nkaadzi no ase no do ma yehu hɔn a hɔn enyi gye asɛm no ho no.​—Kenkan Haggai 2:7.

12. Ebɛn ɔhaw ahorow na obotum ama wɔayɛ dzen ama hɛn dɛ yɛbɛyɛ Nkaadzi no? (Hwɛ mfonyin no.)

¹² Jesus hyɛɛ nkɔm dɛ, wɔ ewiei mber no mu no, yebehyia ɔhaw ahorow pii. Ɔhaw no bi nye dɛ, hɛn ebusuafo botum asoɛr etsia hɛn, afofor botum atan hɛn enyi, ɔko botum esi anaa yarba botum atserɛw wɔ beebi a yɛwɔ no nye pii a ɔkeka ho. (Matt. 10:36; Mark 13:9; Luke 21:10, 11) Ɔtɔ da a, ɔhaw a ɔtsetse dɛm no ma ɔyɛ dzen ma hɛn dɛ yɛbɛkaa Jesus no wu no. Ebɛnadze na hɛn nuanom no ayɛ dze edzi ɔhaw ahorow a ɔtsetse dɛm do, na ebɛn kwan do na Jehovah aboa hɔn?

13. Ebɛn kwan do na Jehovah hyiraa mbɔdzen a Artem bɔe nye akokodur a ɔdaa no edzi mbrɛ ɔbɛyɛ a obotum ayɛ Nkaadzi no wɔ efiadze no do?

¹³ Aber a wɔdze hɛn akɔto efiadze. Hɛn nuanom a osian hɔn gyedzi ntsi wɔnye hɔn akɔto efiadze no, wɔyɛ dza wobotum biara kaa Jesus no wu no. Ma yɛmfa Artem n’asɛm no nyɛ nhwɛdo. Afe 2020 Nkaadzi ber no mu no, nna ɔda efiadze dan ketseketse bi mu. Nna nkorɔfo 5 na wobotum ada dan no mu. Ɔmmfa ho dɛ nna ɔda efiadze mpo no, ɔdze ndzɛmba a nna ɔwɔ no yɛɛ Nkaadzi no. Osii gyinae dɛ ɔbɛma Nkaadzi ho ɔkasa no mbrɛ ɔbɛyɛ a nankasa benya do mfaso. Naaso, nna hɔn a ɔnye hɔn da efiadze dan no mu no nom sigarɛt anaa ndubɔn na wɔka kasafi so. Ntsi ebɛnadze na ɔyɛe? Ɔkaa kyerɛɛ hɔn dɛ, ɔbɛyɛ yie a nkyɛ mma wɔnnom sigarɛt anaa ndubɔn na mma wɔnnka kasafi dɔnhwer kor pɛ. Wɔkaa kyerɛɛ Artem dɛ wɔatse, wɔrennyɛ dɛm ndzɛmba no aber a ɔreyɛ Nkaadzi no. Ɔyɛɛ Artem hu o. Ɔkaa dɛ: “Meyɛɛ dɛ mebɛka Nkaadzi no ho asɛm akyerɛ hɔn.” Ɔwɔ mu, wɔkaa dɛ wɔmmpɛ dɛ wotsie Nkaadzi no ho asɛm biara, naaso wohun dza Artem yɛe nye nsɛm a ɔkae wɔ Nkaadzi no  ase. Ɔno ekyir no, wobisaa no Nkaadzi no ho nsɛm pii.

14. Ɔmmfa ho dɛ nna COVID-19 yarba no wɔ hɔ no, ebɛn mbɔdzen na enuanom no bɔe mbrɛ ɔbɛyɛ a wobotum ayɛ Nkaadzi no?

¹⁴ Aber a COVID-19 yarba no bae no. Osian yarba no ntsi, Jehovah n’asomfo enntum ennhyia mu enyim na enyim annyɛ Nkaadzi no. Naaso, ɔno ennsiw hɔn kwan dɛ wɔbɛyɛ Nkaadzi no. d Asafo ahorow a wɔwɔ intanɛt no yɛɛ Nkaadzi no wɔ video kɔnferɛns do. Naaso, enuanom ɔpepem pii a hɔndze wonnyi intanɛt no, nna wobesi dɛn ayɛ Nkaadzi no? Aman ahorow bi do no, wɔyɛɛ nhyehyɛɛ mbrɛ ɔbɛyɛ a nkorɔfo betsie Nkaadzi ho ɔkasa no wɔ radio do anaa wɔbɔhwɛ no wɔ TV do. Afei so, Bethel ahorow no bɔɔ mbɔdzen dɛ wɔbɔrekɔɔd Nkaadzi ho ɔkasa no wɔ kasa bɔbor 500 mu, mbrɛ ɔbɛyɛ a, hɔn a wɔtsetse ekyir ekyir no mpo botum ayɛ Nkaadzi no. Afei enuanom binom dze Nkaadzi ho ɔkasa a wɔarekɔɔd no kɛmaa enuanom a wɔtsetse ekyir no.

15. Ebɛnadze na isua fi Bible suanyi bi a wɔfrɛ no Sue n’asɛm no mu?

 ¹⁵ Aber a hɛn ebusuafo rosoɛr etsia hɛn. Binom wɔ hɔ a, hɔn ebusuafo soɛr tsia hɔn, na iyi nye adze a ɔma ɔyɛ dzen ma hɔn paa dɛ wɔbɛyɛ Nkaadzi no. Ma yɛmfa Bible suanyi bi a wɔfrɛ no Sue n’asɛm no dɛ nhwɛdo. Wɔaka da kor ma wɔayɛ 2021 Nkaadzi no, Sue kaa kyerɛɛ ne Bible kyerɛkyerɛfo dɛ, osiandɛ n’ebusuafo rosoɛr etsia no ntsi, orunntum nnkɔ Nkaadzi no bi. Aber a ne Bible kyerɛkyerɛfo no tsee dza ɔrefa mu no, ɔnye no kenkaan Luke 22:44. Afei ɔkaa kyerɛɛ no dɛ, sɛ yerihyia ɔhaw a, ɔsɛ dɛ yɛbɔ Jehovah mpaa na yɛdze hɛn werɛ nyina hyɛ no mu dze suasua Jesus. Da a odzi hɔ no, Sue hwɛe hun dɛ ne nsa aka paanoo na wenyin a ɔdze bɛyɛ Nkaadzi no, na otsiee Daa Asɛm tsitsir a wɔyɛ no Nkaadzi da no wɔ jw.org do. Dɛm da no ewimbir no, nankotsee kɛhyɛɛ ne dan mu, na otsiee Nkaadzi no wɔ no fon do. Iyi ekyir no, ɔkyerɛɛw krataa kɛmaa ne Bible kyerɛkyerɛfo no. Asɛm a ɔkae wɔ ne krataa no mu nye dɛ: “Ndeda ehyɛɛ me nkuran papa. Meyɛɛ dza mubotum biara mbrɛ ɔbɛyɛ a mobɔkɔ Nkaadzi no bi, na Jehovah so boaa me paa. M’enyi sɔ dza Jehovah ayɛ ama me no paa. Mese sɛ mereka enyigye a menya a, adze bɛkye hɛn!” Sɛ irihyia ɔhaw a ɔtse dɛ dza yɛaka ho asɛm yi bi a, enngye nndzi dɛ Jehovah botum aboa wo a?

16. Ebɛnadze na ɔma yɛgye dzi dɛ Jehovah behyira mbɔdzen a yɛbɔ dɛ yɛbɔkɔ Nkaadzi no bi no do? (Romefo 8:31, 32)

¹⁶ Sɛ yɛyɛ dza yebotum biara kaa Jesus no wu no a, Jehovah n’enyi sɔ paa. Yɛgye dzi paa dɛ, sɛ yɛkyerɛ dɛ hɛn enyi sɔ dza Jehovah ayɛ ama hɛn no a, obehyira hɛn. (Kenkan Romefo 8:31, 32.) Hom mma yensi hɛn bo dɛ yɛbɔkɔ Nkaadzi a wɔbɛyɛ no afe yi no bi, na yɛnyer hɛnho dɛ yɛbɛyɛ pii wɔ Jehovah no som mu wɔ Nkaadzi ber no mu.