Yɛwɔ adanse a ɔkyerɛ dɛ Jesus bɛyɛɛ Sɔfopanyin ber a wonumaa no wɔ afe 29 H.B. no. Ɔyɛ ebɛn adanse a? Ber a wonumaa Jesus no, ɔdze noho maa dɛ afɔrbɔdze wɔ afɔrmbukyia a ogyina hɔ ma Nyankopɔn “ne pɛ” no do. (Gal. 1:4; Heb. 10:5-10) Obotum aba dɛ, ofi ber a wonumaa Jesus no na wɔdze sunsum afamu asɔrfi kɛse no sii hɔ. Afɔrmbukyia no yɛ dɛm sunsum afamu asɔrfi no ne fã tsitsir. Jehovah no sunsum afamu asɔrfi kɛse no gyina hɔ ma nhyehyɛɛ a ogyina Jesus no werdam afɔrbɔ no do a ɔma yetum som Jehovah wɔ nokwar mu.​—Matt. 3:16, 17; Heb. 5:4-6.

Sɛ wɔdze sunsum afamu asɔrfi kɛse no esi hɔ dze a, nna wobehia Sɔfopanyin bi ma ɔaasom wɔ hɔ. Ntsi, Jehovah dze “sunsum krɔnkrɔn nye ahoɔdzen” seraa Jesus dɛ Sɔfopanyin. (Andw. 10:37, 38; Mark 1:9-11) Naaso, yebesi dɛn agye edzi dɛ woyii Jesus dɛ Sɔfopanyin ansaana no wu nye no wusoɛr no reba? Aaron na hɔn a wɔbɛhyɛɛ n’anan soom dɛ asɔfompanyin wɔ Moses Mbra no ase a yebosusu hɔnho no bɔboa hɛn ma yeenya asɛmbisa yi ho mbuae.

Dɛ mbrɛ Mbra no kyerɛ no, nna sɔfopanyin no nkotsee na obotum ahɛn ntamadan no Krɔnkrɔn mu Krɔnkrɔn no mu. Ekyir yi, nna ɔno nkotsee so na obotum ahɛn asɔrfi no Krɔnkrɔn mu Krɔnkrɔn no mu. Nna ntwamutam na ɔkyɛ Krɔnkrɔn-bea no nye Krɔnkrɔn mu Krɔnkrɔn no mu. Sɛ odu Mpata Da no nkotsee a, nna sɔfopanyin no dua ntwamutam no ho hɛn Krɔnkrɔn mu Krɔnkrɔn no mu. (Heb. 9:1-3, 6, 7) Wɔseraa Aaron nye hɔn a wodzii n’ekyir bae nyina dɛ asɔfompanyin ana worudua ntamadan no mu “ntwamutam” no ho akɔ Krɔnkrɔn mu Krɔnkrɔn no mu. Dɛmara so na ɔbɛyɛ dɛ wɔpaaw Jesus dɛ Sɔfopanyin wɔ Jehovah no sunsum afamu asɔrfi kɛse no mu ansaana oruwu. Iyi ekyir no, “ɔnam ntwamutam a ɔnye no honam mu” kɔr sor dɛ sunsum abɔdze. (Heb. 10:20) Iyi ntsi, ɔsomafo Paul kãa dɛ Jesus reba dɛ “sɔfopanyin,” na “ɔnam ntamadan a ɔsõ na odzi mu kyɛn do a wɔammfa nsa ennsi no do,” na ɔhɛɛn “ɔsor ankasa.”​—Heb. 9:11, 24.

Nsonsonee biara nnyi ber a ahyɛmu fofor no dzii mũ nye ber a ɔhyɛɛ ase yɛɛ edwuma no mu. Ebɛnadze ntsi a? Ber a Jesus kɔr sor na ɔkɛserɛɛ Jehovah dɛ ɔngye no nkwa a odzi mũ a ɔdze abɔ afɔr no nto mu no, otuu anamɔn ahorow bi a ɔbɛma ahyɛmu fofor no edzi mũ. Dɛm anamɔn ahorow a otui no na ɔmaa ahyɛmu fofor no so hyɛɛ ase yɛɛ edwuma. Ebɛn anamɔn ahorow na otui?

Odzi kan, Jesus kɔr Jehovah enyim; ɔno ekyir no, Jesus serɛɛ Jehovah dɛ ɔngye n’afɔrbɔ no nto mu; ewiei koraa no, Jehovah gyee Jesus no nkwa a ɔdze bɔɔ afɔr no too mu. Jesus tuu anamɔn ahorow yi ansaana ahyɛmu fofor no rehyɛ ase ayɛ edwuma.

Bible no nnkyerɛ ber pɔtsee a Jehovah gyee Jesus n’afɔrbɔ a ɔsom bo no too mu. Dɛm ntsi, yerunntum nnkyerɛ ber pɔtsee a wɔmaa ahyɛmu fofor no dzii mũ, nna afei so, ber a wɔmaa ɔhyɛɛ ase yɛɛ edwuma. Naaso, yenyim dɛ Jesus kɔr sor no, dadu ekyir ana Pentecost da no reba. (Andw. 1:3) Ntsi mber bi mu wɔ dɛm ber tsiabaa yi mu na Jesus serɛɛ Jehovah dɛ ɔngye n’afɔrbɔ no nto mu, na ɔgyee too mu so. (Heb. 9:12) Adanse a ɔkyerɛ dɛ nna ahyɛmu fofor no ahyɛ ase reyɛ edwuma no daa edzi kofee wɔ Pentecost da no. (Andw. 2:1-4, 32, 33) Dɛm aber no, nna ɔda edzi dɛ ahyɛmu fofor no edzi mũ ma ahyɛ ase reyɛ edwuma dada.

Sɛ yebotwa no tsia a, ahyɛmu fofor no dzii mũ na ɔhyɛɛ ase yɛɛ edwuma aber a Jehovah gyee Jesus no nkwa a ɔsom bo a ɔdze bɔɔ afɔr no too mu, na ɔdze hɔn a wɔasera hɔn no bɛkaa ahyɛmu no ho no. Sɔfopanyin Jesus bɛyɛɛ ahyɛmu no ne Ntamugyinafo.​—Heb. 7:25; 8:1-3, 6; 9:13-15.