“Ber a me maame no nua ne babanyin hyɛɛ ase dɛ ɔnye me reham no, musuoo ne meneba mu, na mehyɛɛ ase miaa no. Nna mepɛ dɛ muku no.”​—Paul.

“Biribi kakraabi na obesi fie a, nna mo bo efuw. Ɔba dɛm a, biribiara a me nsa bosuo mu no, nna masɛɛ no, dɛ ɔyɛ egua, pon, anaa adze fofor biara.”​—Marco.

Bi a, yɛrennyɛ hɛn adze tse dɛ mbarimba beenu yi a yɛakã hɔnho asɛm no. Naaso, ɔtɔ da a, ɔyɛ dzen ma hɛn nyina dɛ yɛbɛhyɛ hɛnho do. Iyi tse dɛm osiandɛ nyimpa a odzi kan, Adam, dze bɔn na sintɔ awo hɛn nyina. (Rom. 5:12) Nyimpa binom a wɔtse dɛ Paul na Marco no, ɔyɛ dzen ma hɔn dɛ wɔbɛhyɛ hɔn ebufuw do. Binom so hɔn afamu no, bi a ɔyɛ dzen ma hɔn dɛ wɔbɛka hɔn nsusui ahyɛ. Dɛ nhwɛdo no, wɔkɔ do dwendwen ndzɛmba a ɔma wɔbɔ hũ anaa ɔma hɔn abaw mu bu no ho. Iyi da nkyɛn a, binom so hɔn afamu no, bi a ɔyɛ dzen ma hɔn dɛ wɔbɔkõ etsia ndwamanbra, asabow, anaa ndubɔn ho akɔndɔ.

Nyimpa a wonntum nnka hɔn nsusui, hɔn akɔndɔ, nye hɔn ndzeyɛɛ nnhyɛ no, hɔn abrabɔ botum asɛɛ. Naaso, yebotum ekwetsir biribi a ɔtse dɛm. Ebɛn kwan do? Ɔsɛ dɛ yɛhyɛ hɛnho do. Mbrɛ ɔbɛyɛ ma yeetum ayɛ dɛm no, hom mma yensusu dɛm nsɛmbisa ebiasa yi ho: (1) Ebɛnadze nye ahohyɛdo? (2) Ebɛnadze ntsi na ɔyɛ su a ohia? (3) Yebesi dɛn enya dɛm su yi a ɔyɛ “sunsum no aba” ne fã no bi? (Gal. 5:22, 23) Afei, yɛbɔhwɛ dza yebotum ayɛ ber a ɔyɛ dzen ma hɛn dɛ yɛbɛhyɛ hɛnho do no.

Sɛ obi wɔ ahohyɛdo a, nnyɛ biribiara na ɔbɛyɛ anaa asɛm biara na ɔbɛkã. Ɔnnkasa anaa ɔnnyɛ n’adze wɔ ɔkwan a ɔnnsɔ Nyankopɔn n’enyi do.

Wɔkã ahohyɛdo a, Jesus ama yeehu dza ɔkyerɛ. Bible no kã dɛ: “Ɔno, na wɔyaaw no na ɔannyaw bi; ohun amandze no, ɔammbɔ empuw; na ɔdze noho hyɛɛ nyia obua atsɛn tsenenee no nsa.” (1 Pet. 2:23) Jesus daa ahohyɛdo a ɔtse dɛm edzi ber a nna ɔsɛn dua do na n’atamfo ridzi noho fɛw no. (Matt. 27:39-44) Nna Jesus ada ahohyɛdo kɛse edzi ber a nyamesom akandzifo a hɔn tsirmu yɛ dzen bɔɔ pɔw dɛ wobosua no efir wɔ ne kasaa mu no. (Matt. 22:15-22) Hwɛ ahohyɛdo ara a Jesus daa no edzi ber a Jewfo bi a nna hɔn bo efuw faa mbobaa dɛ wɔbɔtow abɔ no no! Dɛ nkyɛ ɔnye hɔn bedzi no wenwen no, ‘ohuntsaa noho na ofiir edzi fii asɔrfi no mu.’​—John 8:57-59.

Ana yebotum esũasua Jesus no nhwɛdo no? Yebotum esũasua no ekodu beebi. Ɔsomafo Peter kyerɛɛw dɛ: “Christ so hun amandze maa hom, gyaa hom esusudo dɛ hom ndzi n’anamɔn ekyir.” (1 Pet. 2:21) Ɔwɔ mu dɛ yɛyɛ nyimpa a yɛtɔ sin dze, naaso, yebotum esũasua nhwɛdo a Jesus yɛe no, na yaada ahohyɛdo edzi. Ebɛnadze ntsi na ohia dɛ yɛyɛ dɛm?

Sɛ yebenya Jehovah n’enyimpa a, ɔsɛ dɛ yɛda ahohyɛdo edzi. Sɛ mpo yɛdze nokwardzi asom  Jehovah ber tsentsen, na sɛ yɛannhyɛ hɛnho do wɔ hɛn kasaa na hɛn ndzeyɛɛ mu a, yebotum ahwer anyɛnkofa a yɛnye no wɔ no.

Hom mma yensusu Moses ho nhwɛ. N’aber do no, nna ɔyɛ ɔbarimba a ‘ɔdwe dodoodow, ɔbor nyimpa a wɔwɔ asaase do nyinara do.’ (Nka. 12:3) Israelfo no hwinhwinii guu Moses do mfe pii, naaso onyaa hɔnho akoma. Da kor bi dze, Moses enntum annhyɛ noho do. Ber a Israelfo no hwinhwiin dɛ wonnyi nsu no, Moses no bo fuwii. Ɔtseatseaa mu guu hɔn do, na ɔkãa dɛ: “Afei hom ntsie, hom asoɔdzenfo; ana yɛntwe ɔbotan yi mu nsu mma hom?”​—Nka. 20:2-11.

Moses enntum annda ahohyɛdo edzi. Ɔammfa enyimnyam no amma Jehovah dɛ Nyia ɔayɛ anwanwadze ma ɔman no enya nsu. (Ndw. 106:32, 33) Dza ofii mu bae nye dɛ Jehovah enntsie Moses ma ɔannkɔ Anohoba Asaase no do. (Nka. 20:12) Obotum aba dɛ Moses annda ahohyɛdo edzi no, onuu noho ara kesii no wu da.​—Deut. 3:23-27.

Ebɛn esuadze na ɔwɔ mu ma hɛn? Sɛ yɛdze mfe pii asom Jehovah mpo a, onnyi dɛ yɛkasa tsia hɔn a wɔhyɛ hɛn ebufuw anaa hɔn a ɔsɛ dɛ yɛdze ntsẽa ma hɔn no. (Eph. 4:32; Col. 3:12) Sɛ hɛn mfe rokɔ enyim a, ɔtɔ da a ɔbɛyɛ dzen ama hɛn papaapa dɛ yebesie abotar. Naaso, yɛmma asɛm a ɔtoo Moses no ntsena hɛn adwen mu. Yɛmmpɛ dɛ ahohyɛdo a yɛrennda no edzi no bɛsɛɛ dzin pa a yɛwɔ wɔ Jehovah enyim no. Ebɛnadze na yebotum ayɛ ama yeenya su a ohia yi?

Bɔ mpaa hwehwɛ sunsum krɔnkrɔn. Ebɛnadze ntsi a? Osiandɛ ahohyɛdo yɛ Nyankopɔn no sunsum aba no ne fã bi, na Jehovah dze no sunsum ma hɔn a wobisa no. (Luke 11:13) Jehovah nam no sunsum no do botum ama hɛn ahoɔdzen a yehia dze aada ahohyɛdo edzi. (Phil. 4:13) Afei so, obotum aboa hɛn ma yaada sunsum no aba n’afã afofor edzi. Bi nye ɔdɔ, na dɛm su yi bɛma ayɛ mberɛw ama hɛn dɛ yɛbɛda ahohyɛdo edzi.​—1 Cor. 13:5.

Kwetsir adze biara a obotum ama aayɛ dzen ama wo dɛ ebɛda ahohyɛdo edzi. Dɛ nhwɛdo no, kwetsir dɛ ebɔkɔ wɛbsaet ahorow a ɔhyɛ ndzeyɛbɔn ho nkuran no do. Afei so, ɔsɛ dɛ etwe woho fi enyigyedze a ɔhyɛ ndzeyɛbɔn ho nkuran ho. (Eph. 5:3, 4) Nokwasɛm nye dɛ, ɔsɛ dɛ yekwetsir adze biara a obotum asɔ hɛn ahwɛ ma yaayɛ bɔn. (Mbɛ. 22:3; 1 Cor. 6:12) Dɛ nhwɛdo no, obi a ɔyɛ mberɛw ma no dɛ obenya nda ho akɔndɔ no, ɔsɛ dɛ okwetsir dɛ ɔbɛkenkan nwoma ahorow anaa ɔbɔhwɛ video a ɔhyɛ nda ho nkuran.

 Bi a obotum ayɛ dzen ama hɛn dɛ yɛdze dɛm afotu yi bɛyɛ edwuma. Naaso, sɛ yɛyer hɛnho a, Jehovah bɛma hɛn ahoɔdzen a yehia no ama yaahyɛ hɛnho do. (2 Pet. 1:5-8) Afei so, ɔbɔboa hɛn ma yaahyɛ hɛnho do wɔ hɛn nsusui, hɛn kasaa, nye hɛn ndzeyɛɛ mu. Adanse a yɛwɔ wɔ asɛm yi ho nye Paul na Marco a yedzii kan kãa hɔnho asɛm no. Hɔn beenu nyinara ehu mbrɛ wobesi ahyɛ hɔn ebufuw do. Hom mma yɛnhwɛ onua fofor bi so. Sɛ nna ɔreka kaar a, ɔtaa nya ahɛnkafo afofor ho ebufuw, na ɔnye hɔn ham mpo. Ebɛnadze na ɔyɛe wɔ ho? Ɔkãa dɛ: “Da biara, nna mobɔ mpaa dzendzenndzen. Musũaa nsɛm a ɔfa ahohyɛdo ho, na mekyeer Kyerɛwnsɛm a ɔbɔboa me no guu me tsirmu. Mehyɛɛ ase dɛ mereyɛ dɛm akyɛr dze, naaso anapa biara mekaa moho dɛ ɔsɛ dɛ minya ahohyɛdo. Afei so, sɛ mowɔ dwumadzi bi yɛ a, mifi fie ntsɛm mbrɛ ɔbɛyɛ a mennkɛka ekyir. Osiandɛ sɛ metse me kaar mu na maka ekyir a, ɔno na ahɛnkafo afofor hɔn ndzeyɛɛ hyɛ me ebufuw.”

Ɔtɔ da a, hɛn nyina nntum nnda ahohyɛdo edzi. Sɛ ɔba dɛm a, bi a ɔbɛyɛ dzen ama hɛn dɛ yɛbɔbɔ Jehovah mpaa. Naaso, dɛm aber yi na ɔsɛ dɛ yɛbɔ mpaa papaapa. Ntsi, bɔ Jehovah mpaa ntsɛmara. Serɛ no dɛ ɔmfa wo bɔn nkyɛ wo, hwehwɛ no mboa, na si wo bo dɛ erennyɛ dɛm mfomdo no bio. (Ndw. 51:9-11) Mpaa a ibefi w’akoma mu abɔ Jehovah dɛ onhu wo mbɔbɔr no, orummbu no enyimtsia. (Ndw. 102:17) Ɔsomafo John ama yɛatse hɛnho ase dɛ Nyankopɔn ne Ba no no bɔgyaa no “tsew hɛn ho fi bɔn nyina mu.” (1 John 1:7; 2:1; Ndw. 86:5) Kaa dɛ Jehovah kã kyerɛ n’asomfo a yɛyɛ nyimpa no dɛ yɛnkɔ do mfa bɔn nkyɛ. Ntsi, yebotum enya awerɛhyɛmu dɛ ɔbɔkɔ do dze hɛn mfom akyɛ hɛn.​—Matt. 18:21, 22; Col. 3:13.

Ber tsiabaa mu a Moses ennya ahohyɛdo no, Jehovah no bo fuuw no. Naaso, Jehovah dze no mfom kyɛɛ no. Nyankopɔn n’Asɛm kã Moses ho asɛm dɛ ɔyɛ ɔbarimba nokwafo a ɔsɛ dɛ yesũasua ne gyedzi. (Deut. 34:10; Heb. 11:24-28) Ɔwɔ mu dɛ Jehovah enntsie Moses ma ɔannhɛn Anohoba Asaase no do dze, naaso ɔbɛma no kwan ma ɔaatsena Paradise wɔ asaase do, na ɔaama oenya ho kwan atsena ase afebɔɔ. Sɛ yɛyer hɛnho dɛ yɛbɛda ahohyɛdo edzi a, yebotum ahwɛ kwan dɛ yebenya nkwa a onnyi ewiei.​—1 Cor. 9:25.