1. Ebɛnadze na Ɔsɛnkafo 3:1, 7 ma yehu?

HƐN mu bi wɔ hɔ a, yɛpɛ kasa papaapa. Binom so dze, wɔmmpɛ kasa. Dɛ mbrɛ kyerɛwsɛm a adzesua yi gyina do ma yehu no, kommyɛ wɔ n’aber, na ɔkasa so wɔ n’aber. (Kenkan Ɔsɛnkafo 3:1, 7.) Naaso, hɛn nuanom mbarimba na mbaa no bi wɔ hɔ a, hɛn yamu a nkyɛ wɔpɛ kasa. Binom so dze, hɛn yamu a nkyɛ wɔmmpɛ kasa.

2. Ɔdze fa ber a ɔwɔ dɛ yɛkasa nye mbrɛ ɔwɔ dɛ yɛkasa ho no, woana na ɔwɔ ho kwan dɛ ɔhyɛ ho mbra ma hɛn?

² Kasa yɛ akyɛdze a Jehovah dze ama hɛn. (Ex. 4:10, 11; Nyi. 4:11) Ɔnam n’Asɛm, Bible no do boa hɛn ma yehu mbrɛ yebesi dze akyɛdze yi edzi dwuma yie. Adzesua yi mu no, yɛbɔhwɛ nyimpa binom a Kyerɛwnsɛm no kã hɔnho asɛm. Dza wɔyɛe no bɔboa hɛn ma yeehu ber a ɔwɔ dɛ yɛkasa nye ber a ɔwɔ dɛ yɛyɛ komm. Afei so, yebohu mbrɛ Jehovah si tse nka wɔ nsɛm a yɛkã kyerɛ afofor no ho. Odzi kan, hom mma yɛnhwɛ ber a ɔwɔ dɛ yɛkasa.

3. Dɛ mbrɛ Romefo 10:14 ma yehu no, ebɛn aber na ɔwɔ dɛ yɛkasa?

³ Ɔwɔ dɛ yɛyɛ krado aber nyina dɛ yɛbɛkã Jehovah nye n’Ahendzi no ho asɛm akyerɛ nkorɔfo. (Matt. 24:14; kenkan Romefo 10:14.) Sɛ yɛyɛ dɛm a, nna yerusũasua Jesus. Ndzɛmba etsitsir bi ntsi na Jesus baa asaase do. No mu kor nye dɛ ɔbɛkã n’Egya ho nokwasɛm akyerɛ afofor. (John 18:37) Naaso, ɔwɔ dɛ yɛma ɔtsena hɛn adwen mu dɛ mbrɛ yesi kasa no, ɔno so ho hia. Dɛm ntsi, sɛ yɛrekã Jehovah ho asɛm akyerɛ afofor a, ɔsɛ dɛ yɛyɛ dɛm wɔ “ɔdwe nye suro mu.” Afei so, ɔwɔ dɛ yɛma wohu dɛ yɛwɔ obu ma hɔn gyedzi, na yɛdwen mbrɛ wosi tse nka ho. (1 Pet. 3:15) Sɛ yɛyɛ dɛm a, nnyɛ asɛm no kɛkɛ na yɛbɛkã akyerɛ  hɔn, mbom yɛbɛkyerɛkyerɛ hɔn so, na bi a yebodu hɔn akoma mu.

4. Dɛ mbrɛ Mbɛbusɛm 9:9 kã no, yebesi dɛn dze hɛn anomu nsɛm aboa afofor?

⁴ Sɛ asafo mu mpanyimfo hu dɛ onua anaa akyerɛbaa bi hia afotu a, onnyi dɛ wɔtwentweɔn hɔn ananadze dɛ wɔbɛkasa. Naaso, wɔbɛyɛ dɛm wɔ ber a ɔfata mu amma wɔannyɛ biribi a ɔbɛma nyimpa no enyim egu ase. Wobotum atweɔn ber a obiara nnyi hɔ ana wɔaayɛ dɛm. Dabaa asafo mu mpanyimfo bɔ mbɔdzen dɛ wɔbɛkasa wɔ kwan bi do a ɔnnkɛhyɛ nyia oritsie hɔn no enyiwu. Naaso, wɔmmfa afotu a ɔbɔboa afofor ma wɔaayɛ hɔn adze nyansa mu no nnkam hɔn. (Kenkan Mbɛbusɛm 9:9.) Ebɛnadze ntsi na ohia papaapa dɛ yenya akokodur kasa ber a no ho ebehia no? Hom mma yensusu tsebea ebien bi ho nhwɛ. Ɔsor tsebea no mu biara. Tsebea a odzi kan no mu no, nna ɔsɛ dɛ egya bi tsẽa ne mba. Dza otsĩa ebien no mu no, nna ɔsɛ dɛ ɔbaa bi kɔ ɔbarimba bi enyim na ɔnye no kɛkasa. Dɛm ɔbarimba yi, nna ɔbɛyɛ ɔhen daakye.

5. Ebɛn aber na nkyɛ ɔwɔ dɛ Sɔfopanyin Eli kasa?

⁵ Nna Sɔfopanyin Eli wɔ mbabanyin beenu. Nna ɔwɔ ɔdɔ kɛse ma ne mbabanyin beenu yi. Naaso, nna dɛm mbabanyin yi mmbu Jehovah koraa. Nna wɔdze asodzi a no ho hia ahyɛ hɔn nsa. Nna wɔsom dɛ asɔfo wɔ ntamadan no mu. Naaso, wɔdze tum a ɔhyɛ hɔn nsa no dzii dwuma wɔ kwan bɔn do. Afei so, wobuu Jehovah n’afɔrbɔdze enyimtsia na wɔnye mbaa a wɔbɛyɛɛ edwuma wɔ ehyiadzibuw no ano no dedae. (1 Sam. 2:12-17, 22) Dɛ mbrɛ Moses Mbra no kyerɛ no, nna Eli ne mbabanyin no fata owu, naaso ɔammfa ne nan ennsi famu enntwuw hɔn enyim yie. Mbom, ogyaa hɔn ma wɔkɔr do soom dɛ asɔfo wɔ ntamadan no mu. (Deut. 21:18-21) Dza Eli yɛe wɔ asɛm yi ho no, Jehovah tsee nka dɛn wɔ ho? Ɔkãa kyerɛɛ Eli dɛ: ‘Ɔyɛ dɛn ntsi na idzi wo mba nyi sen me?’ Dɛm ntsi, Jehovah sii gyinae dɛ oboku Eli ne mbabanyin beenu no.​—1 Sam. 2:29, 34.

6. Ebɛnadze na yebotum esũa efi Eli n’asɛm no mu?

⁶ Yebotum enya esuadze tsitsir bi efi Eli n’asɛm no mu. Sɛ yehu dɛ hɛn nyɛnko bi anaa hɛn busuanyi bi ebu Nyankopɔn ne mbra do a, ɔsɛ dɛ yɛnye no kasa, na yɛtwe n’adwen si Jehovah ne mbra do. Ɔno ekyir no, ɔsɛ dɛ yɛhwɛ hu dɛ ɔbɔhwehwɛ mboa efi asafo mu mpanyimfo hɔ. (Jas. 5:14) Yɛmmpɛ dɛ yebosũasua dza Eli yɛe no da. Yerinndzi hɛn nyɛnko anaa hɛn busuanyi bi nyi nnsen Jehovah. Ɔgye akokodur ama yɛnye obi a ohia ntsẽa aakasa, naaso sɛ yɛyer hɛnho yɛ dɛm a, ndzepa botum efi mu aba. Hom mma yɛnhwɛ dza Israelnyi ɔbaa bi a wɔfrɛ no  Abigail yɛe. Yebohu dɛ dza ɔyɛe no yɛ soronko koraa fi dza Eli yɛe no ho.

7. Ebɛnadze ntsi na Abigail nye David kasae?

⁷ Nna Abigail no kun nye Nabal, asaase wura bi a ɔwɔ ahonyadze pii. Aber a David nye ne mbarimba no ruguan efi Ɔhen Saul nkyɛn no, wɔnye Nabal no nguanhwɛfo no kɛtsenaa kakra. Wɔbɔɔ Nabal no nguan ho ban fii epoobɔfo ho. Aso Nabal n’enyi sɔɔ mboa a wɔdze boaa no no? Oho. Ber a David somaa ne mbarimba no wɔ Nabal nkyɛn dɛ ɔmma hɔn edziban na nsu kakra no, Nabal no bo fuuw hɔn na ɔkekaa mu guu hɔn do hyehyɛɛ hɔn ahorba. (1 Sam. 25:5-8, 10-12, 14) Iyi maa David sii gyinae dɛ oboku ɔbanyin biara a ɔwɔ Nabal ne fie. (1 Sam. 25:13, 22) Dɛm asɛm kɛse yi, wɔbɛyɛ dɛn esiw ano? Abigail hun dɛ dɛm aber yi na ɔwɔ dɛ ɔkasa, ntsi ofii akokodur mu kehyiaa mbarimba 400 a wɔdze hɔn akodze, na ɔkɔm dze hɔn na ber kor no ara so hɔn bo efuw no, na ɔnye David kasae.

8. Ebɛnadze na yesũa fi Abigail n’asɛm no mu?

⁸ Aber a Abigail hyiaa David no, ɔkwan a ɔfaa do kasae no daa no edzi dɛ nna ɔwɔ akokodur na obu adze, na iyi maa David nyaa ɔpɛ dɛ ɔbɛyɛ dza Abigail kãe no. Ɔwɔ mu dɛ nnyɛ Abigail na ɔkɛfaa ɔhaw no bae dze, naaso ɔpaa David kyɛw. Abigail dze noho too Jehovah do hwehwɛɛ no hɔ mboa. Afei, ɔkãa kyerɛɛ David dɛ onyim dɛ David yɛ nyimpa papa na ɔrennyɛ dza ɔnntsen. (1 Sam. 25:24, 26, 28, 33, 34) Dɛ mbrɛ Abigail yɛe no, sɛ yehu dɛ hɛn nua bi reyɛ biribi a ɔbɛma ɔayɛ bɔn a no mu yɛ dur a, ɔwɔ dɛ yenya akokodur na yɛkã ho asɛm kyerɛ no. (Ndw. 141:5) Ɔwɔ dɛ yɛda obu edzi ber a yɛreyɛ dɛm no, naaso ɔwɔ dɛ yɛda akokodur so edzi. Sɛ yefi ɔdɔ mu dze afotu ma obi ber a no ho ebehia a, yɛda no edzi dɛ yɛyɛ nyɛnko berɛbo.​—Mbɛ. 27:17.

9-10. Sɛ asafo mu mpanyimfo dze afotu rema obi a, ebɛnadze na ɔwɔ dɛ wɔma ɔtsena hɔn adwen mu?

⁹ No ho hia papaapa dɛ asafo mu mpanyimfo benya akokodur akasa akyerɛ enuanom a wɔwɔ  asafo no mu a wodzi mfom no. (Gal. 6:1) Asafo mu mpanyimfo fi ahobrɛadze mu gye to mu dɛ wɔyɛ nyimpa a wonndzi mũ, ntsi ɔtɔ da a, hɔn so wobehia afotu. Naaso, wɔmma iyi nnsiw hɔn kwan dɛ wɔdze nkaenyim bɛma hɔn a wohia nkaenyim a ɔtse dɛm. (2 Tim. 4:2; Titus 1:9) Sɛ wɔdze afotu rema obi a, wonya nyimpa no ho abotar, na wɔbɔ mbɔdzen dɛ wɔdze hɔn kasaa a ɔyɛ akyɛdze no bɛkyerɛkyerɛ no wɔ kwan a otu mpon do. Wɔdɔ hɔn nuanom, na dɛm ɔdɔ yi na okenyan hɔn ma wɔboa hɔn nuanom. (Mbɛ. 13:24) Naaso, dza ohia hɔn tsitsir nye dɛ wɔbɛhyɛ Jehovah enyimnyam. Dɛm ntsi, wɔboa ma wɔdze ne gyinapɛn ahorow yɛ edwuma, na wɔbɔ asafo no ho ban fi ɔhaw ho.​—Andw. 20:28.

¹⁰ Dze besi ha yi, yeehu ber a ɔwɔ dɛ yɛkasa. Naaso, ɔtɔ da a, ɔbɛyɛ papa dɛ yennkobue hɛn ano koraa. Ebɛn nsɛndzendzen na bi a yebotum ehyia wɔ tsebea a ɔtse dɛm mu?

11. Ebɛn mfatoho na James dze dzii dwuma, na ebɛnadze ntsi na ɔfata?

¹¹ Obotum ayɛ dzen ama hɛn dɛ yɛbɛhyɛ hɛnho do wɔ hɛn kasaa ho. Bible kyerɛwfo James dze mfatoho a ɔfata kyerɛɛ dɛm tsebea yi mu. Ɔkãa dɛ: “Sɛ obi mmfom asɛm mu a, ɔno na ɔyɛ nyimpa a odzi mu a otum dɛ ɔto ne nyimpadua nyinara so ndabraka.” (Jas. 3:2, 3) Wɔdze ndabraka hyɛ pɔnkɔ n’ano. Nyia ɔtse pɔnkɔ no do no botum atwe ahoma a ɔsa do no dze akyerɛ abowa no kwan anaa ɔaama abowa no egyina. Sɛ nyia ɔtse do no ennsuo ahoma no mu yie a, abowa no botum agye nsamu ma hɔn nyina eepira. Dɛmara so na sɛ yɛannhyɛ hɛnho do wɔ hɛn kasaa ho a, obotum dze ɔhaw pii aba. Hom mma yɛnhwɛ tsebea ahorow bi a no ho behia dɛ yɛto hɛn tɛkyerɛma ndabraka na yɛyɛ komm.

12. Ebɛn aber na ɔsɛ dɛ yɛto hɛn tɛkyerɛma ndabraka na yɛyɛ komm?

¹² Sɛ hɛn nua bi anaa hɛn akyerɛbaa bi nyim asɛm bi a onnyi dɛ ɔkã ho asɛm kyerɛ obiara a,  ebɛyɛ w’adze dɛn wɔ ho? Dɛ nhwɛdo no, sɛ ihyia onua bi a ɔtse ɔman a wɔabra hɛn som no wɔ hɔ a, ɔyɛ a biribi ka wo ma ibisa no mbrɛ yesi yɛ hɛn som edwuma no wɔ dɛm ɔman no mu anaa? Ɔda edzi dɛ nnyɛ adwembɔn na edze yɛ dɛm. Yɛdɔ hɛn nuanom na yɛpɛ dɛ yehu ɔhaw a worihyia. Afei so, yɛpɛ dɛ yɛkã ɔhaw pɔtsee a worihyia no ho asɛm wɔ hɛn mpaabɔ mu. Naaso, tsebea a ɔtse dɛm mu na ɔwɔ dɛ yɛto hɛn tɛkyerɛma ndabraka na yɛyɛ komm. Sɛ onua bi nyim asɛm bi a onnyi dɛ ɔkã ho asɛm kyerɛ obiara, na sɛ yɛhyɛ no ma ɔkã ho asɛm kyerɛ hɛn a, ɔkyerɛ dɛ yɛnndɔ dɛm onua no. Afei so, ɔkyerɛ dɛ yɛnndɔ enuanom mbarimba na mbaa a wɔwɔ dɛm onua no mu ahotodo dɛ ɔbɔkora asɛm a ɔtse dɛm do no. Nokwasɛm nye dɛ, ɔhaw a hɛn nuanom rihyia wɔ aman a wɔabra hɛn som edwuma no wɔ do no, hɛn mu biara nnkɛpɛ dɛ ɔbɛyɛ biribi ma ɔhaw no aayɛ kɛse. Dɛmara so na onua anaa akyerɛbaa biara a ɔrosom wɔ ɔman a wɔabra hɛn som edwuma no wɔ do no mmpɛ dɛ ɔbɛkã mbrɛ Adasefo a wɔwɔ hɔ no si yɛ hɔn som edwuma no ho asɛm akyerɛ obiara.

13. Dɛ mbrɛ wɔakã wɔ Mbɛbusɛm 11:13 no, ebɛnadze na ɔwɔ dɛ asafo mu mpanyimfo yɛ, na ebɛnadze ntsi a?

¹³ No ho hia papaapa dɛ asafo mu mpanyimfo dze Bible mu ngyinadosɛm a ɔwɔ Mbɛbusɛm 11:13 no bɛyɛ edwuma na wɔaakora kukua mu nsɛm do. (Kenkan.) Sɛ asafo mu panyin bi yɛ ɔwarfo a, obotum ayɛ dzen ama no dɛ ɔbɛyɛ dɛm. Sɛ awarfo taa bɔ nkɔmbɔ, na wɔkã hɔn kukua mu nsɛm, mbrɛ wɔtse nka, nye ndzɛmba a ɔhyɛ hɔn do no ho asɛm kyerɛ hɔnho a, wobotum ahyɛ hɔn awar no mu dzen. Naaso, obi a ɔyɛ asafo mu panyin no nyim dɛ ɔnnsɛ dɛ ɔkã hɔn a wɔwɔ asafo no mu hɔn “esumasɛm” anaa hɔn kukua mu nsɛm kyerɛ ne yer. Sɛ ɔyɛ dɛm a, ɔbɔhwer ahotodo a enuanom wɔ wɔ no mu no, na ɔbɛsɛɛ dzin pa a ɔwɔ no. Onnyi dɛ asafo mu mpanyimfo nye asomfo yɛ “tɛkyerɛmanta” anaa adaadaafo. (1 Tim. 3:8) Iyi kyerɛ dɛ, ɔnnsɛ dɛ wɔdaadaa afofor anaa wodzi afofor ho nkɔnkɔnsa. Sɛ asafo mu panyin bi dɔ ne yer a, nsɛm a ɔnnsɛ dɛ ne yer tse no, ɔrennkã ho asɛm nnkyerɛ no.

14. Sɛ ɔyer bɔboa no kun a ɔyɛ asafo mu panyin ma ɔaabɔ dzin pa a ɔwɔ no ho ban a, ebɛnadze na obotum ayɛ?

¹⁴ Sɛ ɔyer botum aboa no kun ma ɔaabɔ dzin pa a ɔwɔ no ho ban a, kukua mu nsɛm a onnyi dɛ ɔtse no, ɔnnsɛ dɛ ɔhyɛ no kun ma ɔkã ho asɛm kyerɛ no. Sɛ ɔyer dze dɛm afotu yi yɛ edwuma a, ɔbɛkyerɛ dɛ ɔtaa no kun ekyir. Afei so, ɔbɛkyerɛ dɛ ɔwɔ enyidzi ma hɔn a wɔakã hɔn kukua mu nsɛm akyerɛ no kun no. Na dza ɔkyɛn ne nyina no, ɔbɛma Jehovah n’enyi agye, osiandɛ ɔroboa ma asomdwee na koryɛ aatsena asafo no mu.​—Rom. 14:19.

15. Mbrɛ Job n’anyɛnkofo baasa no sii yɛɛ hɔn adze no, Jehovah tsee nka dɛn wɔ ho, na ebɛnadze ntsi a?

¹⁵ Yebotum esũa mbrɛ yebesi akasa nye ber a ɔwɔ dɛ yɛkasa ho adze pii efi Bible mu nwoma a wɔfrɛ no Job no mu. Ber a Job hyiaa ɔhaw a no mu yɛ dzen a ɔbaa no do ntoatoado no, ɔno ekyir no, mbarimba baanan bi baa dɛ wɔrebɛkyekye no werɛ na woeetu no fo. Dɛm mbarimba yi yɛɛ dzinn ber tsentsen. Hɔn mu baasa nye Eliphaz, Bildad, nye Zophar. Sɛ yɛhwɛ nsɛm a ekyir yi wɔkãe a, ɔda edzi pefee dɛ ber tsentsen a wɔyɛɛ dzinn no, wɔammfa dɛm ber no anndwendwen mbrɛ wobesi aboa Job no ho. Mbom, nna wɔrodwendwen mbrɛ wobesi ama Job ehu dɛ ɔayɛ adze bɔn bi ho. Ɔwɔ mu dɛ wɔkekãa nsɛm bi a ɔyɛ nokwar dze, naaso nsɛm dodowara a wɔkãe faa Job nye Jehovah ho no nnyɛ nokwar. Afei so, nna ɔyɛ nsɛm a ɔyɛ yaw. Wɔbɔɔ Job sombo dɛ ɔyɛ nyimpa bɔn. (Job 32:1-3) Jehovah yɛɛ n’adze dɛn wɔ asɛm yi ho? No bo fuuw dɛm mbarimba baasa no dzendzenndzen. Ɔkãa kyerɛɛ hɔn dɛ woedzi nkwaseasɛm, na ɔsee hɔn dɛ wɔnkɛserɛ Job ma ɔmbɔ mpaa mma hɔn.​—Job 42:7-9.

16. Ebɛnadze na yebotum esũa efi nhwɛdo bɔn a Eliphaz, Bildad, nye Zophar yɛe no mu?

 ¹⁶ Yebotum enya esuadze pii efi nhwɛdo bɔn a Eliphaz, Bildad, nye Zophar yɛe no mu. Odzi kan, ɔnnsɛ dɛ yebu hɛn nuanom atsɛn. (Matt. 7:1-5) Mbom, ɔsɛ dɛ yɛyɛ komm tsie hɔn ansaana yɛwɔ asɛm bi kã a yaakã. Sɛ yɛyɛ dɛm nkotsee dze a, yebotum atse tsebea a wɔrefa mu no ase. (1 Pet. 3:8) Otsĩa ebien, sɛ yɛpɛ dɛ yɛkã asɛm bi a, ɔsɛ dɛ yɛhwɛ hu dɛ dza yɛbɛkã no yɛ nokwar na ɔda ayamuyie so edzi. (Eph. 4:25) Otsĩa ebiasa, nsɛm a yɛkã kyerɛ afofor no, no ho hia Jehovah papaapa.

17. Ebɛnadze na yebotum esũa efi Elihu no nhwɛdo no mu?

¹⁷ Ɔbarimba a otsĩa anan a ɔkɛseraa Job nye Elihu. Nna ɔyɛ Abraham no busuanyi. Aber a nna mbarimba baasa no rekasa no, ɔyɛɛ komm tsiee hɔn. Ɔda edzi dɛ ɔkyɛɛn n’aso pɛnn tsiee asɛm a nna wɔrekã no, osiandɛ otumii dze afotu a ayamuyie wɔ mu na no mu da hɔ maa Job. Iyi boaa Job ma ɔtseen n’adwen. (Job 33:1, 6, 17) Dza nna ohia Elihu papaapa nye dɛ ɔbɛhyɛ Jehovah enyimnyam, na nnyɛ dɛ ɔbɛhyɛ nankasa noho anaa nyimpa fofor biara enyimnyam. (Job 32:21, 22; 37:23, 24) Sɛ yɛhwɛ dza Elihu yɛe no a, yehu dɛ kommyɛ wɔ n’aber, nna kasa so wɔ n’aber. (Jas. 1:19) Afei so, yehu dɛ, sɛ yɛdze afotu rema obi a, dza ɔsɛ dɛ ohia hɛn tsitsir nye dɛ yɛbɛhyɛ Jehovah enyimnyam, na nnyɛ dɛ yɛbɔtwe adwen aba hɛnho do.

18. Yebesi dɛn akyerɛ dɛ hɛn enyi sɔ kasa a ɔyɛ akyɛdze a Nyankopɔn dze ama hɛn no?

¹⁸ Bible no ama hɛn afotu a ɔfa ber a ɔwɔ dɛ yɛkasa nye mbrɛ yebesi akasa ho. Sɛ yɛdze afotu yi yɛ edwuma a, yebotum akyerɛ dɛ hɛn enyi sɔ kasa a ɔyɛ akyɛdze a Nyankopɔn dze ama hɛn no. Sunsum kaa Ɔhen Solomon a ɔyɛ onyansafo no ma ɔkãa dɛ: “Asɛm a wɔkã no n’enyiwa do no, ɔtse dɛ sika eduaba a ɔwɔ dwetɛ kɛntsɛn mu.” (Mbɛ. 25:11) Sɛ yɛyɛ komm tsie asɛm a afofor kã, na yɛdwen asɛm a yɛbɛkã no ho yie ana yaakã a, hɛn nsɛm botum ayɛ tse dɛ sika eduaba no. Ɔbɛyɛ dza ɔka akoma na mfaso wɔ do. Afei, dɛ yɛbɛkasa pii anaa yɛnnkɛkasa pii no, hɛn nsɛm bɛyɛ dza ɔtow afofor gyedzi do, na yɛbɔsɔ Jehovah n’enyi. (Mbɛ. 23:15; Eph. 4:29) Iyi nye ɔkwan a ɔkyɛn do a yebotum akyerɛ dɛ hɛn enyi sɔ kasa a ɔyɛ akyɛdze a Nyankopɔn dze ama hɛn no!