1-2. Ebɛnadze na ɔbɛma Nyankopɔn agye hɛn som ato mu?

 SƐ ETSE kasafua “ɔsom” a, ebɛnadze na ɔba w’adwen mu? Bi a dza ɔba w’adwen mu nye onua bi a oefi ahobrɛadze mu ebu nkotodwe wɔ ne mpa nkyɛn na oefi n’akoma mu robɔ mpaa no. Anaa bi a dza ɔba w’adwen mu nye ebusua bi a wɔdze enyigye rusũa Bible no.

² Nhwɛdo ebien a yɛakã ho asɛm yi mu biara mu no, yehu dɛ hɔn mu biara reyɛ biribi dze asom Nyankopɔn. Aso Jehovah bɛgye hɔn som no ato mu? Sɛ dza wɔreyɛ no nye Jehovah ne tsirmpɔw hyia, na sɛ wofi ɔdɔ nye obu mu yɛ nkotsee dze a, Jehovah bɛgye ato mu. Yɛdɔ Jehovah papaapa. Yenyim dɛ ɔno nkotsee na otwar dɛ yɛsom no. Afei so, yɛpɛ dɛ kwan a yɛfa do som no no yɛ dza odzi mũ.

3. Ebɛnadze na yebosusu ho wɔ adzesua yi mu?

³ Adzesua yi mu no, yɛbɔhwɛ ɔsom a nna Jehovah gye to mu wɔ tsetse mber mu. Afei so, yɛbɔhwɛ ndzɛmba ahorow awɔtwe bi a yɛyɛ no ndɛ dze som Jehovah wɔ kwan a ɔsɔ n’enyi do. Aber a yerususu nsɛm yi ho no, ɔwɔ dɛ yɛhwɛ dza hɛnankasa so yebotum ayɛ ama yeetu mpon wɔ ɔsom a yɛdze ma Jehovah no mu. Yɛbɛsan ahwɛ siantsir a sɛ yɛsom Jehovah wɔ nokwar mu a hɛn enyi gye no.

4. Ebɛnadze na Jehovah n’asomfo binom a wɔtsenaa ase ansaana Christ reba no yɛe dze kyerɛɛ dɛ wɔdɔ Jehovah na wobu no?

⁴ Ansaana Christ reba no, mbarimba anokwafo bi tse dɛ Abel, Noah, Abraham, nye Job daa no edzi dɛ wɔdɔ Jehovah na wobu no so. Wɔyɛɛ no dɛn? Wɔnam hɔn gyedzi, setsie nye ndzɛmba a wɔdze bɔɔ afɔr no do na wɔyɛɛ dɛm. Bible no nnkã ɔkwan pɔtsee a nna ɔsɛ dɛ wɔfa do som Jehovah ho asɛm. Wɔyɛɛ hɔn afamu dze biara a wobotum dze dzii Jehovah nyi, na Jehovah so gyee hɔn som too mu. Ekyir yi, Jehovah dze Moses Mbra no maa Abraham n’asefo. Nna dɛm mbra ahorow no kyerɛ kwan pɔtsee a ɔsɛ dɛ wɔfa do som Jehovah ama ɔaagye hɔn som no ato mu.

5. Jesus no wusoɛr ekyir no, ebɛn nsakyer na Jehovah yɛe wɔ nokwar som mu?

⁵ Jesus no wusoɛr ekyir no, nna Jehovah nnhwɛ kwan dɛ n’asomfo bedzi Moses Mbra no do bio. (Rom. 10:4) Nna ɔsɛ dɛ Christianfo dzi mbra fofor bi do. Ɔno nye “Christ mbra” no. (Gal. 6:2) Nna no ho nnhia dɛ wɔkyer “mbra” yi mu nsɛm gu hɔn tsirmu, anaa wodzi nsɛm pii bi do. Mbom dza nna ohia dɛ wɔyɛ ara nye dɛ wobosũasua Jesus na wɔdze ne nkyerɛkyerɛ aayɛ edwuma. Ndɛ so, Christianfo yɛ dza wobotum biara dɛ wobedzi Christ n’ekyir mbrɛ ɔbɛyɛ a wɔbɔsɔ Jehovah n’enyi na ‘woeenya ahomgye’ ama hɔnho.​—Matt. 11:29.

6. Yebesi dɛn enya adzesua yi do mfaso kɛse?

⁶ Aber a yerususu ndzɛmba a yɛyɛ dze som Jehovah no mu biara ho no, bisa woho dɛ, ‘Ebɛn nkɔenyim na menya wɔ dɛm ɔfa yi mu?’ Afei, ibotum asan ebisa dɛ, ‘Ana mubotum etu mpon wɔ ɔsom a medze ma Jehovah no mu?’ Ma w’enyi ngye wɔ nkɔenyim a enya wɔ Jehovah no som mu no ho. Naaso, sɛ ihu dɛ ɔwɔ dɛ itu mpon wɔ wo som ne fã bi a, fi w’akoma mu bɔ ho mpaa.

7. Sɛ yefi hɛn akoma mu bɔ Jehovah mpaa a, ɔtse nka dɛn?

⁷ Mpaa a yɛbɔ. Bible no dze hɛn mpaabɔ toto eduhuam a wɔafora no yie a nna wɔhyew wɔ ntamadan no mu ho. Ekyir yi, wɔhyeew bi so wɔ asɔrfi hɔ. (Ndw. 141:2) Nna nka a ofi eduhuam no mu ba no sɔ Nyankopɔn n’enyi. Hɛn so, sɛ yefi hɛn akoma mu bɔ Jehovah mpaa na sɛ nkasafua a yɛdze dzi dwuma no ba famu mpo a, Jehovah gye to mu. (Mbɛ. 15:8; Deut. 33:10) Ɔsɛ dɛ yenya awerɛhyɛmu dɛ, sɛ yɛrobɔ Jehovah mpaa na yɛma ohu dɛ yɛdɔ no na hɛn enyi sɔ ndzɛmba a ɔyɛ ma hɛn no a, ɔma n’enyi gye ho dɛ obetsie hɛn. Ɔpɛ dɛ yɛkã hɛn haw, ndzɛmba a yɛpɛ dɛ yɛyɛ nye dza hɛn enyi gye ho no ho asɛm kyerɛ no. Ansaana ebɔbɔ mpaa no, ɔsɛ dɛ edwendwen dza ebɛkã no ho yie. Sɛ eyɛ dɛm a, wo mpaabɔ bɛyɛ dɛ “eduhuam” a ɔsɔ wo sor Egya no enyi.

8. Ebɛnadze na yebotum ayɛ dze eyi Jehovah ayɛw?

⁸ Ayɛyi a yɛdze ma no. (Ndw. 34:1) Yɛkã Jehovah no su ahorow a ɔyɛ ahomka nye n’anwanwa ndwuma ho asɛm kyerɛ afofor dze yi no ayɛw. Sɛ hɛn enyi sɔ ndzɛmba pa a Jehovah yɛ ma hɛn no a, yebefi hɛn akoma mu eyi no ayɛw. Sɛ yɛgye mber dwendwen ndzɛmba pa a Jehovah ayɛ ama hɛn no ho a, yebenya ndzɛmba pii egyina do eyi no ayɛw. Hɛn asɛnka edwuma no ma yenya ho kwan kɛse dze ‘bɔ ayɛyiafɔr ma Nyankopɔn daa, ɔno nye hɛn anofamfa aba a yɛdze bɔ ne dzin kyerɛ nkorɔfo.’ (Heb. 13:15) Dɛ mbrɛ ɔsɛ dɛ yedzi kan dwendwen nsɛm a yɛbɛkã wɔ hɛn mpaabɔ mu ho ansaana yɛabɔ mpaa no, dɛmara na ɔsɛ dɛ yedzi kan dwendwen nsɛm a yɛbɛkã akyerɛ hɔn a yebehyia hɔn wɔ asɛnka mu  no ho yie. Yɛpɛ dɛ hɛn “ayɛyiafɔr” no yɛ dza odzi mũ. Dɛm ntsi, yɛdze enyigye kã nokwar no ho asɛm kyerɛ afofor.

9. Dɛ mbrɛ nna ɔtse wɔ Israelfo no hɔn afamu no, ebɛn kwan do na asafo nhyiamu a yɛkɔ no boa hɛn? Ebɛn kwan do na asafo nhyiamu a ekɔ no aboa wankasa so?

⁹ Asafo nhyiamu a yɛkɔ. Jehovah kãa kyerɛɛ Israelfo no dɛ: “Mpɛn ebiasa na wo mbanyin nyinara nkefir Ewuradze wo Nyankopɔn enyim wɔ beebi mbrɛ ɔbɛsan mu eyi no.” (Deut. 16:16) Nna ɔwɔ dɛ wogya hɔn efie nye hɔn nhaban hɔ na wɔkɔ Jehovah n’enyim. Jehovah bɔɔ Israelfo no anohoba dɛ: “Sɛ erofow akɔ ekefir wɔ Ewuradze wo Nyankopɔn enyim afrenhyia mu mpɛn ebiasa a, nyimpa biara n’enyi nnkɛber w’asaase.” (Ex. 34:24) Nna Israelfo no wɔ gyedzi kɛse wɔ Jehovah mu, ntsi afe biara nna wɔkɔ dɛm ehyiadzi ahorow yi. Sɛ nna wɔkɔ ehyiadzi yi a wonya mfaso pii. Mfaso no bi nye dɛ nna wosũa Nyankopɔn ne Mbra no ho adze pii. Afei so, nna wonya ho kwan dwendwen ndzɛmba pa a Nyankopɔn ayɛ ama hɔn no ho. Nkyii so, nna wɔnye hɔn nuanom bɔ fɛkuw na wɔhyɛ hɔnho nkuran. (Deut. 16:15) Yenya mfaso a ɔtse dɛm ber a yɛdze ndzɛmba bɔ afɔr na yɛkɔ Christianfo nhyiamu no. Sɛ yɛgye mber siesie hɛnho ansaana yɛakɔ asafo nhyiamu na yɛma hɛn mbuae yɛ ntsiantsia na ɔtɔ asomu a, Jehovah n’enyi gye papaapa.

10. Ebɛnadze ntsi na ndwontow ho hia paa wɔ hɛn som mu?

¹⁰ Ndwom a yɛtow. (Ndw. 28:7) Nna Israelfo no bu ndwontow dɛ no ho hia paa wɔ hɔn som mu. Ɔhen David yii Levifo 288 dɛ adwontofo wɔ asɔrfi hɔ. (1 Mber. 25:1, 6-8) Ndɛ so yɛtow ayɛyindwom ma Nyankopɔn dze kyerɛ dɛ yɛdɔ no. Dɛ hɛn ndze yɛ dɛw anaa ɔnnyɛ dɛw no, nnyɛ ɔno na ohia. Hom mma yɛnyɛ dɛm ntotoho yi: Sɛ yɛkasa a ‘yɛfom mpɛn pii,’ naaso ɔno nnsiw hɛn kwan dɛ yɛbɛkasa wɔ asafo nhyiamu ase nye asɛnka mu. (Jas. 3:2) Dɛmara na sɛ yɛtse nka dɛ hɛn ndze nnyɛ dɛw mpo a, ɔnnsɛ dɛ yɛma ɔno siw hɛn kwan dɛ yɛbɔtow ndwom eyi Jehovah ayɛw.

11. Dɛ mbrɛ asɛm a ɔwɔ Ndwom 48:13 ma yehu no, ebɛnadze ntsi na ɔsɛ dɛ yeyi mber si hɔ na yɛnye hɛn mbusua no bɔ mu sũa Bible no?

¹¹ Bible no a yesũa nye hɛn mba a yɛkyerɛkyerɛ hɔn Jehovah ho adze. Sɛ nna odu Ahomgyeda a, Israelfo no nnyɛ hɔn daadaa ndwuma ahorow no. Mbom nna wɔdze hɔn adwen si ndzɛmba a ɔbɛma wɔnye Jehovah enya ebusuabɔ a no mu yɛ dzen no do. (Ex. 31:16, 17) Nna anokwafo a wɔwɔ hɔn mu no kyerɛkyerɛ hɔn mba Jehovah ho adze na wɔkã ne papayɛ ho asɛm kyerɛ hɔn. Ndɛ, ɔsɛ dɛ hɛn so yeyi mber si hɔ dze kenkan Bible no na yɛdwendwen ho. Iyi ka ɔsom a yɛdze ma Jehovah no ho na ɔboa hɛn ma yɛtwe bɛn no. (Ndw. 73:28) Sɛ yɛnye hɛn mbusua bɔ mu sũa Bible no a, yɛbɔboa hɛn mba ma wɔnye hɛn sor Egya a ɔwɔ ɔdɔ no eenya ebusuabɔ a no mu yɛ dzen.​—Kenkan Ndwom 48:13.

12. Ebɛnadze na yesũa fi mbrɛ Jehovah buu edwuma a wɔyɛe wɔ ntamadan no ho no mu?

¹² Asafo adan ahorow a yesisi nye dza yesiesie. Bible no kã dɛ nna ntamadan no nye no ho edwuma no yɛ edwuma krɔnkrɔn. (Ex. 36:1, 4) Ndɛ so, Jehovah bu Ahendzi Asa ahorow nye asafo adan ahorow a yerisisi no dɛ ɔyɛ ɔsom krɔnn. Hɛn nuanom mbarimba na mbaa binom wɔ hɔ a wɔdze mber pii kɔboa edwuma a ɔtse dɛm. Ɔsɛ dɛ yɛma hɛn enyi sɔ mbɔdzen a enuanom yi robɔ wɔ Ahendzi edwuma yi mu no. Nokwasɛm nye dɛ wɔsan dze hɔnho hyɛ asɛnka edwuma no mu. Hɔn mu binom wɔ hɔ a wɔwɔ ɔpɛ dɛ wɔbɛyɛ akwampaae edwuma no. Sɛ dɛm enuanom yi pɛ dɛ wɔsom dɛ akwampaaefo na wɔfata nkotsee dze a,  ɔsɛ dɛ asafo mu mpanyimfo no pen hɔn do ntsɛmara. Asafo mu mpanyimfo no yɛ dɛm dze boa adansi edwuma no. Dɛ yɛwɔ adansi ho nyimdzee anaa yennyi bi no, hɛn nyina botum aboa ma yaahwɛ asafo adan no do yie na yeesiesie no kama.

13. Ɔsɛ dɛ yebu ntoboa a yeyi dze boa Ahendzi edwuma no dɛn?

¹³ Ntoboa a yeyi dze boa Ahendzi edwuma no. Sɛ nna Israelfo no rokɔ Jehovah n’enyim a, nna ɔnnsɛ dɛ wɔdze nsapan kɔ. (Deut. 16:16) Nna ɔsɛ dɛ woyi ntoboa dɛ mbrɛ hɔn ahoɔdzen botum. Sɛ wɔyɛ dɛm a nna ɔbɛkyerɛ dɛ hɔn enyi sɔ ndzɛmba ahorow a Jehovah ma hɔn nsa ka no. Yebesi dɛn akyerɛ dɛ yɛdɔ Jehovah na hɛn enyi sɔ sunsum afamu ndzɛmba a ɔdze ma hɛn no? Kwan kor a yebotum afa do ayɛ dɛm nye dɛ, yebeyi ntoboa dze aboa asafo a yɛwɔ mu nye wiadze nyina som edwuma no dɛ mbrɛ hɛn ahoɔdzen botum. Ɔsomafo Paul kãa iyi ho asɛm dɛ: “Sɛ ɔpɛ mu dze obi yɛ krado a, enyisɔ wɔ mu dɛ mbrɛ obi wɔ, nna nnyɛ mbrɛ onnyi bi a.” (2 Cor. 8:4, 12) Ntoboa biara a yebefi hɛn akoma mu eyi no, Jehovah n’enyi sɔ ɔmmfa ho mpo dɛ osuar no.​—Mark 12:42-44; 2 Cor. 9:7.

14. Dɛ mbrɛ Mbɛbusɛm 19:17 kyerɛ no, sɛ yɛboa hɛn nuanom a hɔnho akyer hɔn no a, Jehovah bu no dɛn?

¹⁴ Mboa a yɛdze ma hɛn nuanom Christianfo a hɔnho akyer hɔn. Jehovah bɔɔ Israelfo no anohoba dɛ hɔn a wɔyɛ ehiafo papa no ɔbɛhyɛ hɔn ananmu. (Deut. 15:7, 10) Nokwasɛm nye dɛ, aber biara a yɛbɔboa hɛn nua Christiannyi bi a noho akyer no no, Jehovah bu no dɛ ɔyɛ akyɛdze a yɛdze rema nankasa. (Kenkan Mbɛbusɛm 19:17.) Dɛ nhwɛdo no, aber a Paul da efiadze no Christianfo a wɔwɔ Philippi no dze akyɛdze monaa no. Paul frɛɛ dɛm akyɛdze no dɛ “afɔrbɔ a wɔgye a ɔsɔ Nyankopɔn enyi papa.” (Phil. 4:18) Hwɛ w’asafo no mu na fa w’enyi to famu na bisa woho dɛ, ‘Ana onua bi wɔ hɔ a mubotum ayɛ no mboa?’ Sɛ Jehovah hu dɛ yɛdze hɛn mber, hɛn ahoɔdzen, hɛn nyimdzee, nye hɛn ahonyadze roboa hɛn nuanom a hɔnho akyer hɔn no a, n’enyi gye. Obu no dɛ ɔyɛ ɔsom a yɛdze ma no.​—Jas. 1:27.

15. Ɔgye mber na mbɔdzembɔ ana yeetum asom Jehovah nokwar mu. Naaso, ebɛnadze ntsi na ɔnnyɛ adzesoa?

¹⁵ Ɔgye mber na mbɔdzembɔ ana yeetum asom Jehovah nokwar mu. Naaso, iyi nnyɛ adzesoa. (1 John 5:3) Ebɛnadze ntsi a? Osian ɔdɔ a yɛwɔ ma Jehovah ntsi na yɛsom no no. Fa no dɛ abofra kakraba bi pɛ dɛ ɔkyɛ ne papa adze. Bi a ɔdze ndɔnhwer pii bɔdorɔw biribi ama ne papa. Abofra no runnu noho dɛ ɔdze mber pii yɛɛ dɛm. Ɔdɔ ne papa na n’enyi gye ho dɛ ɔdze akyɛdze no bɛma no. Dɛmara na hɛn so, osiandɛ yɛdɔ Jehovah ntsi, hɛn enyi gye ho dɛ yɛdze hɛn mber nye hɛn ahoɔdzen nyina bɔsom no.

16. Dɛ mbrɛ Hebrewfo 6:10 ma yehu no, Jehovah bu mbɔdzen a yefi hɛn akoma mu bɔ dɛ yɛbɔsom no no dɛn?

¹⁶ Sɛ mbofra bi rekɛkyɛ hɔn awofo adze a, ɔdɔ a awofo no wɔ ma hɔn mba no remma wɔnnhwɛ kwan dɛ akyɛdze a hɔn mba no nyinara dze bɛbrɛ hɔn no bɛyɛ pɛ. Wɔgye to mu dɛ ɔsor mbofra no mu biara nye dza obotum ayɛ. Dɛmara na hɛn sor Egya no so nyim hɛn mu biara ne nsɛm tsebea. Bi a ebɔ woho mbɔdzen kyɛn wo nuanom pii. Anaa bi a osian mpanyinyɛ, yarba anaa asodzi a ewɔ wɔ w’ebusua mu ntsi, irunntum nnyɛ pii dɛ mbrɛ enuanom binom yɛ no. Naaso sɛ dɛm na ɔtse wɔ w’afamu a, mma w’abaw mu mmbu. (Gal. 6:4) Jehovah no werɛ nnkefir wo mbɔdzembɔ. Sɛ ifi w’akoma mu yɛ dza ibotum biara na edze adwen pa yɛ nkotsee dze a, ɔgye to mu.  (Kenkan Hebrewfo 6:10.) Jehovah nyim w’akoma mu nsusui mpo. Ɔpɛ dɛ inya enyigye na akomatɔyamu wɔ ɔsom a ifi wo pɛ mu dze ma no no ho.

17. (a) Ndzɛmba ahorow a yɛyɛ dze som Jehovah no, sɛ yehu dɛ no mu bi yɛ dzen ma hɛn dɛ yɛbɛyɛ a, ebɛnadze na ɔwɔ dɛ yɛyɛ? (b) Dza ɔwɔ adakaba a wɔato dzin “ Ndzɛmba A Ɔbɛma W’enyigye Ayɛ Kɛse” mu no, ebɛn kwan do na no mu bi aboa wo?

¹⁷ Sɛ ɔyɛ dzen ma hɛn dɛ yɛbɛyɛ ndzɛmba ahorow a yɛyɛ dze som Jehovah no, tse dɛ asɛnka edwuma nye Bible a yebosũa a, ebɛnadze na yebotum ayɛ? Yeebohu dɛ sɛ yɛyer hɛnho yɛ dɛm ndzɛmba ahorow yi a, hɛn enyi bɛgye ho kɛse na yebenya do mfaso. Yebotum dze ndzɛmba a yɛyɛ dze som Jehovah no atoto biribi a yɛpɛ dɛ yɛyɛ dze tsentsen hɛn apɔw mu anaa sanku a yɛpɛ dɛ yesũa bɔ no ho. Sɛ yɛannkɔ do annyɛ a, bi a ɔbɛyɛ dzen dɛ yebotu mpon wɔ mu. Naaso, sɛ yɛbɔ mbɔdzen dɛ yɛbɔkɔ do ayɛ no da biara a, ɔbɛyɛ yie. Bi a yɛbɛhyɛ ase ayɛ no nkakrankakra na ekyir yi yɛdze mber pii ayɛ. Sɛ yehu nkɔenyim a yeenya no a, bi a hɛn enyi bɛgye ho, na iyi bɛma yɛakɔ do ayɛ no aber biara. Dɛm na ndzɛmba a yɛyɛ dze som Jehovah no so tse.

18. Ebɛnadze na no ho hia paa dɛ yɛyɛ wɔ asetsena mu, na sɛ yɛyɛ dɛm a, ebɛn mfaso na yenya?

¹⁸ Hɛn akoma nyina mu a yebefi asom Jehovah no nye adze a no ho hia paa wɔ hɛn asetsena mu. Iyi ma yenya asetsena a enyigye nye akomatɔyamu wɔ mu, na yɛwɔ enyidado dɛ yɛbɔsom Jehovah afebɔɔ. (Mbɛ. 10:22) Seseiara mpo yɛwɔ asomdwee, osiandɛ yenyim dɛ Jehovah boa n’asomfo ber a worihyia ɔhaw no. (Isa. 41:9, 10) Yɛwɔ ndzɛmba pa pii a ntsi ɔwɔ dɛ yɛma hɛn enyi gye dɛ yɛrosom hɛn Egya a ɔwɔ ɔdɔ no. Ɔno na ɔfata dɛ n’abɔdze nyina dze “enyimnyam nye enyidzi” ma no!​—Nyi. 4:11.