1. Ebɛnadze na Nyikyerɛ nwoma no ma yehu fa Nyankopɔn no nkorɔfo ho?

 NYIKYERƐ nwoma no ma yehu dɛ wɔdze Nyankopɔn n’Ahendzi esi hɔ wɔ sor na wɔatow Satan efi sor akyen asaase do. (Nyi. 12:1-9) Iyi ama ahotɔ aba sor, naaso asaase do dze, ɔhaw na ɔdze aba. Ebɛnadze ntsi a? Asɛm no ara nye dɛ Satan no bo efuw hɔn a wɔdze nokwardzi rosom Jehovah wɔ asaase do no.​—Nyi. 12:12, 15, 17.

2. Ebɛnadze na obotum aboa hɛn ma yaakɔ do edzi Jehovah nokwar?

² Yebesi dɛn akɔ do dze nokwardzi egyina ɔsoɛrtsia a Satan dze ba hɛn do no ano? (Nyi. 13:10) Adze kor a obotum aboa hɛn paa nye dɛ yebohu dza obesi daakye. Dɛ nhwɛdo no, ɔsomafo John maa yehun nhyira ahorow a hɛn nsa bɛka no ndaansa yi ara wɔ Nyikyerɛ nwoma no mu. Dɛm nhyira yi mu kor nye dɛ wobeyi Nyankopɔn n’atamfo nyina efi hɔ koraa. Afei, hom mma yɛnhwɛ mbrɛ Nyikyerɛ nwoma no si ka Nyankopɔn n’atamfo yi ho asɛm nye dza ɔbɔto hɔn.

3. Asɛnkyerɛdze a Nyikyerɛ nwoma no dze dzi dwuma no bi nye dɛn?

³ Nyiyimu a odzi kan wɔ Nyikyerɛ nwoma no mu no ma yehu dɛ wɔnam asɛnkyerɛdze do na wɔdze nwoma no mu nsɛm no too gua. (Nyi. 1:1) Nyikyerɛ nwoma no dze asɛnkyerɛdze ahorow bi gyina hɔ ma Nyankopɔn n’atamfo. Nwoma no ka mbowa ahorow bi a hɔnho yɛ hu ho asɛm. Dɛ nhwɛdo no, wɔ Nyikyerɛ nwoma no mu no, John kaa dɛ ohun “abowa bi dɛ ofi po mu reba.” Nna abowa no wɔ “mmbɛn du nye etsir esuon.” (Nyi. 13:1) Ɔno ekyir no, abowa fofor bi so ‘fi asaase mu puei.’  Nna dɛm abowa no kasa dɛ dragon na “ɔma ogya mpo fi sor ba asaase do.” (Nyi. 13:11-13) Afei, ɔsanee hun “abowa memen” bi so a edwaman bi tse no do. Dɛm mbowa ebiasa yi gyina hɔ ma atamfo bi a wɔdze mfe pii asoɛr etsia Jehovah Nyankopɔn nye n’Ahendzi no. Dɛm ntsi no ho hia paa dɛ yehu dɛm atamfo yi.​—Nyi. 17:1, 3.

4-5. Ebɛn kwan do na asɛm a ɔwɔ Daniel 7:15-17 no boa hɛn ma yehu dza dɛm asɛnkyerɛdze ahorow yi kyerɛ?

⁴ Sɛ yebotum ehu dɛm atamfo yi a, ɔsɛ dɛ yedzi kan hu dza mbowa no nye edwaman no gyina hɔ ma. Sɛ yɛbɛtse dɛm asɛm yi ase paa a, ɔsɛ dɛ yɛma kwan ma Bible no ankasa kyerɛ hɛn. Asɛnkyerɛdze a ɔwɔ Nyikyerɛ nwoma no mu pii wɔ hɔ a, wɔakyerɛkyerɛ mu wɔ Bible mu nwoma afofor bi mu. Dɛ nhwɛdo no, nkɔnhyɛnyi Daniel nyaa enyido-adzehu bi, na ohun ‘mbowa akɛse anan bi a wofi po mu puei.’ (Dan. 7:1-3) Daniel maa yehun dza dɛm mbowa yi gyina hɔ ma. Ɔkaa dɛ wogyina hɔ ma “ahemfo” baanan anaa tumdzi anan. (Kenkan Daniel 7:15-17.) Dɛm nkyerɛkyerɛmu a no mu da hɔ yi ma yehu dɛ mbowa a Nyikyerɛ nwoma no ka hɔnho asɛm no so gyina hɔ ma aban ahorow.

⁵ Ɔnodze, asɛnkyerɛdze ahorow a ɔwɔ Nyikyerɛ nwoma no mu no, hom mma yensusu no mu bi ho nhwɛ. Dɛm a yɛbɛyɛ no bɔboa hɛn ma yeehu dza asɛnkyerɛdze no mu biara gyina hɔ ma. Hom mma yendzi kan nsusu mbowa ahorow no ho. Odzi kan no, yɛbɔhwɛ dza mbowa yi gyina hɔ ma. Ɔno ekyir no, yɛbɔhwɛ dza ɔbɔto hɔn. Yewie a, yɛbɔhwɛ mbrɛ dɛm nsɛm yi fa hɛnho.

6. Abowa a ɔwɔ etsir esuon a Nyikyerɛ 13:1-4 ka ho asɛm no gyina hɔ ma ebɛnadze?

⁶ Abowa a ɔwɔ etsir esuon no gyina hɔ ma ebɛnadze? (Kenkan Nyikyerɛ 13:1-4.) Dɛm abowa yi tse dɛ ɔsebɔ, naaso ne nan tse dɛ sisi ne nan na n’ano tse dɛ gyata n’ano na ɔwɔ mmbɛn du. Dɛmara na mbowa anan a Daniel tsir 7 no ka hɔn ho asɛm no so tse. Naaso sɛ yɛhwɛ Nyikyerɛ nwoma no mu a, abowa kor pɛ na wɔkyerɛ dɛ ɔtse dɛm, na nnyɛ mbowa anan. Dɛm abowa yi nngyina hɔ mma aban kor pɛ anaa tumdzi kor bi. Mbom Nyikyerɛ nwoma no ka no ho asɛm dɛ odzi tum “wɔ mbusuakuw nye nkorɔfo, nye kasa nye aman nyina do.” Ntsi, yebotum aka dɛ abowa yi nngyina hɔ mma aban kortsee. (Nyi. 13:7) Sɛ dɛm dze a, nna ɔno abowa yi gyina hɔ ma aban ahorow nyina a woedzi nyimpa do fi tsetse dze besi ndɛ. *​—Ɔsɛnk. 8:9.

7. Abowa no ne tsir esuon no mu biara gyina hɔ ma ebɛnadze?

⁷ Etsir esuon no mu biara gyina hɔ ma ebɛnadze? Nyikyerɛ tsir 17 no boa hɛn ma yenya mbuae no. Osiandɛ ɔkyerɛkyerɛ abowa no no honyi a wɔaka ho asɛm wɔ tsir 13 no mu. Nyikyerɛ 17:10 ka dɛ: “Wɔyɛ ahemfo esuon; na beenum ahwe ase, na ɔbaako wɔ hɔ, na ɔbaako no so nnyae mmbae; na sɛ ɔba a, otwar dɛ ɔtsena hɔ kakraabi.” Aban ahorow a Satan dze hɔn edzi dwuma dɔɔ so paa, naaso hɔn mu etsitsir esuon na wɔdze hɔn atoto “etsir” ho. Iyinom yɛ aban ahorow a ɔkwan a wɔfaa do dzii tum wɔ wiadze nyina no kaa Nyankopɔn no nkorɔfo paa. Ɔsomafo John n’aber do no, nna dɛm tumdzi yi mu enum abɛsen kɔ. Hɔn nye: Egypt, Assyria, Babylon, Medo-Persia, nye Greece. Aber a John nyaa enyido-adzehu yi no, nna Rome nye aban a otsia esia a oridzi wiadze do. Nna ebɛn aban na ɔbɛyɛ wiadze tumdzi a otwa tun anaa tsir a otsia esuon no?

8. Abowa no ne tsir a otsia esuon no gyina hɔ ma ebɛn tumdzi?

 ⁸ Adzesua yi bɛma yeehu dɛ, nkɔnhyɛ ahorow a ɔwɔ Daniel nwoma no mu boa hɛn ma yehu abowa no ne tsir a otsia esuon a ɔno ara so nye tsir a otwa tun no. Ɔnodze yembisa dɛ, ewiei mber yi mu anaa “Ewuradze ne da” mu no, ebɛn aban na oridzi wiadze nyina do tum? (Nyi. 1:10) Ɔno nye United Kingdom nye United States of America aban a wɔaka hɔnho abɔ mu no. Wɔsan frɛ hɔn Anglo-America Wiadze Tumdzi. Iyi ntsi yebotum aka dɛ abowa no ne tsir a otsia esuon a wɔaka ho asɛm wɔ Nyikyerɛ 13:1-4 no gyina hɔ ma Anglo-America Wiadze Tumdzi no.

9. Abowa a “ɔwɔ mmbɛn ebien dɛ eguambaa” no gyina hɔ ma ebɛnadze?

⁹ Nyikyerɛ tsir 13 no ma yehu dɛ abowa no ne tsir a otsia esuon, anaa Anglo-America Wiadze Tumdzi no, ɔsan so yɛ n’adze dɛ abowa a “ɔwɔ mmbɛn ebien dɛ eguambaa, na ɔkasaa dɛ dragon” no. Dɛm abowa yi ‘yɛ nsɛnkyerɛdze akɛse, na ɔma ogya mpo fi sor ba asaase do wɔ nyimpa enyim.’ (Nyi. 13:11-15) Nyikyerɛ tsir 16 nye 19 no ka abowa yi ho asɛm dɛ ɔno nye “nkɔnhyɛnyi torfo no.” (Nyi. 16:13; 19:20) Daniel nwoma no so kaa biribi a ɔtse dɛmara. Ɔkaa dɛ Anglo-America Wiadze Tumdzi no ‘bɛsɛɛ adze ma wɔaayɛ nwanwa.’ (Dan. 8:19, 23, 24) Dɛm pɛpɛɛpɛ na osii wɔ Wiadze Ko II no mu. Ɔtopaa akɛse ebien a wɔtowee ma ɔdze akodzi no baa ewiei wɔ Pacific hɔ no, ɔyɛ Britainfo nye Americafo na wɔbɔɔ mu yɛe. Osian ɔtopaa yi a Anglo-America Wiadze Tumdzi no yɛe yi ntsi, wɔ kwan bi do no, ɔmaa ‘ogya fi sor baa asaase do.’

10. “Abowa no no honyi no” gyina hɔ ma ebɛnadze? (Nyikyerɛ 13:14, 15; 17:3, 8, 11)

¹⁰ Abowa fofor bi so yii ne tsir. Dɛm abowa no sɛ abowa a ɔwɔ etsir esuon no paa. Adze a ɔma ɔyɛ soronko ara nye dɛ ɔyɛ memen anaa kɔkɔɔ. Wɔfrɛ no “abowa no no honyi” na wɔka noho asɛm dɛ ɔyɛ ‘ɔhen a otsia awɔtwe.’ * (Kenkan Nyikyerɛ 13:14, 15; 17:3, 8, 11.) Wɔka dɛm ɔhen yi ho asɛm dɛ nna ɔwɔ hɔ, na ɔkɔree, nna ekyir yi ɔsanee bae. Asɛm yi dze, ɔfa Amanaman Nkabɔmu Kuw no ho paa. Dza osi aban ahorow pii a wɔwɔ wiadze nyina enyi do no, ɔno na dɛm kuw yi hwɛ yɛ ma hɔn! Ahyɛse no nna wɔfrɛ no Amanaman Apam. Naaso dɛm kuw no gui wɔ Wiadze Ko II no mu. Ekyir yi, ɔsanee baa bio, na wɔfrɛɛ no Amanaman Nkabɔmu Kuw.

11. Mbowa a wogyina hɔ ma tumdzi ahorow no ripiapia nkorɔfo akɔ hen, naaso ebɛnadze ntsi na ɔnnsɛ dɛ yesuro koraa?

¹¹ Mbowa a wogyina hɔ ma aban ahorow no ka atorsɛm fa Jehovah na n’asomfo ho. Dɛm atorsɛm yi ama nkorɔfo mmpɛ hɛn enyim ahwɛ koraa. John kaa dɛ dza wɔreyɛ no tse dɛ mbrɛ wɔroboaboa “wiadze ahemfo nyina” ano ama Har-Magedon ko no. Iyi nye “adze nyina do Tumfo ne da kɛse” ko no. (Nyi. 16:13, 14, 16) Naaso, sɛ wɔkɛfa dɛm ɔko no ba a, hɛndze yerunnsuro koraa. Ebɛnadze ntsi a? Osiandɛ hɛn Nyankopɔn kɛse, Jehovah, bɛkeka noho ntsɛmara na ɔbɛgye hɔn a wɔtaa no tumdzi ekyir no nyina nkwa.​—Ezek. 38:21-23.

12. Ebɛn asɛm na ɔbɔto mbowa yi nyina?

¹² Ebɛn asɛm na ɔbɔto mbowa yi nyina? Nyikyerɛ 19:20 yi dɛm asɛmbisa yi ano dɛ: “Wɔkyeer abowa no, nye nkɔnhyɛnyi torfo no a ɔyɛɛ n’enyim nsɛnkyerɛdze dze daadaa hɔn a wɔgyee abowa no ne nsewhyɛ, nye hɔn a wɔkotoow no honyi: wɔtoow hɔn beenu enyimon  guu ogya nsutaae a brimstone dzɛw mu no mu.” Ntsi Nyankopɔn bɛsɛɛ dɛm aban ahorow a wɔyɛ n’atamfo yi korakora aber a wɔda ho ara ridzi tum no.

13. Ebɛn ɔhaw na wiadze etumfo no ama Christianfo rihyia?

¹³ Asɛm yi fa hɛnho dɛn? Yɛyɛ Christianfo, ntsi ɔsɛ dɛ yedzi Nyankopɔn nokwar na yɛtaa n’Ahendzi no ekyir. (John 18:36) Sɛ yebotum ayɛ dɛm a, ɔnnsɛ dɛ yegyina ɔfa biara ekyir wɔ amanyɛsɛm a ɔrokɔ do wɔ wiadze yi mu no. Naaso, iyi ne yɛ nnda famu, osiandɛ adze rekye a adze resa yi, aban ahorow a wɔwɔ wiadze yi mu beebiara pɛ dɛ yɛdze hɛn ndzeyɛɛ na nsɛm a yɛka kyerɛ dɛ yɛtaa hɔn ekyir. Hɔn a wobegyaa hɔnho ma aban ahorow yi enya hɔn no benya abowa no ne nsewhyɛ no bi. (Nyi. 13:16, 17) Dɛm nsewhyɛ no so dze, obiara a ɔbɛgye bi no, Jehovah no bo bofuw no, na onnyiewiei nkwa so bɔbɔ no. (Nyi. 14:9, 10; 20:4) Iyi ntsi, ɔmmfa ho nhyɛdo biara a wɔdze bɛba hɛn do no, no ho hia paa dɛ yɛtwe hɛnho fi amanyɛsɛm ho koraa!

14. Dɛ mbrɛ Nyikyerɛ 17:3-5 ma yehu no, ebɛnadze na ɔsomafo John sanee hunii ma ɔyɛɛ no nwanwa no?

¹⁴ Ɔsomafo John kaa dɛ ohun adze fofor bi ma ɔyɛɛ no “nwanwa kɛse.” Ebɛnadze na ohunii no? Ɔse ohun dɛ nna ɔbaa bi tsena mbowa a hɔnho yɛ hu yi mu kor do. (Nyi. 17:1, 2, 6) Wɔka ɔbaa yi ho asɛm dɛ ɔyɛ “edwaman kɛse” na wɔfrɛ no “Babylon Kɛse.” John kyerɛ a, dɛm ɔbaa yi nye “asaase do ahemfo” abɔ ‘edwaman.’​—Kenkan Nyikyerɛ 17:3-5.

15-16. “Babylon Kɛse” no gyina hɔ ma ebɛnadze, na yesi dɛn hu?

¹⁵ Woana nye “Babylon Kɛse” no? Dɛm ɔbaa yi runntum nngyina hɔ mma aban bi, osiandɛ Nyikyerɛ nwoma no ka dɛ ɔbaa no nye etumfo a wɔwɔ wiadze no abɔ edwaman. (Nyi. 18:9) Bible no ma yehu dɛ ɔbaa yi tsena etumfo yi do, kyerɛ dɛ, ɔpɛ dɛ ɔkyerɛ etumfo no dza wɔnyɛ. Dɛmara so na yerunntum nnka dɛ ɔbaa no gyina hɔ ma eguadzi nhyehyɛɛ a ɔwɔ Satan wiadze yi mu a nsisi ahyɛ hɔn ma no. Ebɛnadze ntsi a? Osiandɛ Nyikyerɛ nwoma no ne tsir 18 ma yehu dɛ wɔfrɛ hɔn “asaase do eguadzifo.”​—Nyi. 18:11, 15, 16.

¹⁶ Sɛ ehwɛ Bible mu a, wotum dze kasafua “edwaman” gyina hɔ ma hɔn a wɔka dɛ wɔsom Nyankopɔn naaso wɔdze hɔnho hyehyɛ abosonsɔr ndzeyɛɛ bi mu anaa kwan bi do no, wɔdze hɔnho hyehyɛ dza ɔkɔ do wɔ wiadze mu no. (1 Mber. 5:25; Jas. 4:4) Naaso, hɔn a wɔdze nokwardzi som Nyankopɔn no dze, Bible no ka hɔnho asɛm dɛ wɔyɛ “krɔnn” anaa wɔyɛ “mbaabun.” (2 Cor. 11:2; Nyi. 14:4) Tsetse no, nna kurow a ator som agye ndwow wɔ hɔ paa nye Babylon. Iyi ntsi, yebotum aka dɛ Babylon Kɛse no gyina hɔ ma ator som nyina. Ɔno nye wiadze ator som ahenman no ampa.​—Nyi. 17:5, 18; hwɛ asɛm a wɔato dzin “What Is Babylon the Great?” (Ebɛnadze Nye Babylon Kɛse No?) a ɔwɔ jw.org do no.

17. Ebɛn asɛm na ɔbɔto Babylon Kɛse no?

¹⁷ Ebɛn asɛm na ɔbɔto Babylon Kɛse no? Nyikyerɛ 17:16, 17 no yi dɛm asɛmbisa yi ano dɛ: “Mmbɛn du no a ihunii no, nye abowa no, hɔn na wobekyir edwaman no, na wɔato no seraha, na wɔato no etumpan, na woedzi ne nam, na wɔdze ogya ahyew no koraa. Na Nyankopɔn dze hyɛɛ hɔn akoma mu dɛ wɔnyɛ ne tsirmsɛm.” Ampaara, Nyankopɔn bɛma abowa kɔkɔɔ a ogyina hɔ ma Amanaman Nkabɔmu Kuw no atow ahyɛ wiadze ator som ahenman no do na wɔaasɛɛ no pasaa.​—Nyi. 18:21-24.

18. Ebɛnadze na ɔsɛ dɛ yɛyɛ dze kyerɛ dɛ yɛnye Babylon Kɛse no nnyi hwee yɛ?

¹⁸ Asɛm yi fa hɛnho dɛn? Sɛ Nyankopɔn bɛgye hɛn som ato mu a, ɔsɛ dɛ yɛma hɛn som  ho tsew na ɔnnsɛ dɛ yɛma fi biara ba ho. (Jas. 1:27) Dɛm ntsi, afahyɛ ahorow a ofi abosonsɔr mu, ator nkyerɛkyerɛ, ɔbrakyew a ebu do, nye esumansɛm a Babylon Kɛse no hyɛ ho nkuran no, ɔsɛ dɛ yɛtwe hɛnho fi ho koraa! Afei so, ɔsɛ dɛ yɛkɔ do ara bɔ nkorɔfo kɔkɔ dɛ sɛ wɔmmpɛ dɛ wonya asotwe a Nyankopɔn dze reba Babylon Kɛse do no bi dze a, ɔno ‘womfi no mu mfi.’​—Nyi. 18:4.

19. Woana nye “dragon memen kokroko” no?

¹⁹ Nyikyerɛ nwoma no san ka “dragon memen kokroko” bi ho asɛm. (Nyi. 12:3) Dɛm dragon yi nye Jesus na n’abɔfoe no koe. (Nyi. 12:7-9) Ɔtow hyɛ Nyankopɔn no nkorɔfo do, na ɔma mbowa a wogyina hɔ ma wiadze etumfo no tum. (Nyi. 12:17; 13:4) Dragon yi gyina hɔ ma woana? Ɔnnyɛ obiara dɛ “ɔwɔ dadaw no a wɔfrɛ no Abɔnsam nye Satan no.” (Nyi. 12:9; 20:2) Ɔno na ɔtaa Jehovah n’atamfo nyina ekyir.

20. Ebɛn asɛm na ɔbɔto dragon no?

²⁰ Ebɛn asɛm na ɔbɔto dragon no? Nyikyerɛ 20:1-3 ka dɛ ɔbɔfo bi bɔtow Satan akyen bun bi mu. Iyi bɛyɛ tse dɛ dza wɔdze no ato efiadze. Dɛm aber no, Satan runntum ‘nndaadaa amanaman no bio, gyedɛ mfe 1,000 no aso ana.’ Ewiei koraa no, wɔbɔtow Satan nye n’abɔfo bɔn no egu “gya nye brimestone nsutaae no mu.” Iyi kyerɛ dɛ wɔbɛsɛɛ hɔn korakora. (Nyi. 20:10) Ɔwodze, fa no dɛ etse wiadze bi a Satan nye n’abɔfo bɔn nnyi hɔ mu. Enyigye a yebenya no dɛm aber no dze, wɔnnka!

21. Ebɛnadze ntsi na ɔsɛ dɛ nsɛm a yeesusu ho wɔ Nyikyerɛ nwoma no mu no ma hɛn enyi gye?

²¹ Yɛatse asɛnkyerɛdze ahorow a wɔaka ho asɛm wɔ Nyikyerɛ nwoma no mu no ase. Iyi hyɛ nkuran paa! Wɔaboa hɛn ma yeehu Jehovah n’atamfo. Ɔnnyɛ ɔno nko, yeehu dza ɔbɔto hɔn so. Sɛ Nyikyerɛ nwoma ka dɛ, “nhyira nye onyii no a ɔkenkan, nye hɔn a wotsie nkɔnhyɛnsɛm no” a, ɔyɛ nokwar! (Nyi. 1:3) Naaso, sɛ woyi Nyankopɔn n’atamfo fi hɔ a, ebɛn nhyira na hɔn a wodzi Nyankopɔn nokwar no benya? Yebosusu iyi ho wɔ adzesua asɛm a otsia ebiasa wɔ Ɔweɔn-Aban yi mu no mu.