ADZESUA ASƐM 21
NDWOM 107 Ɔdɔ Ho Nhwɛdo
Ibesi Dɛn Enya Obi A Ɔfata Awar No?
‘Ɔyer nokwafo, woana benya? Na ne tsibo sen awendze pa koraa.’—MBƐ. 31:10.
DZA YEBOSUA
Bible mu afotusɛm ahorow bi a obotum aboa hɔn a wɔnnwaree ma woeenya obi a ɔfata awar no nye dza enuanom a wɔwɔ asafo no mu no botum ayɛ dze aboa esigyafo a wɔpɛ dɛ wɔwar no.
1-2. (a) Ebɛnadze na ɔsɛ dɛ Christianfo a wɔnnwaree susu ho ansaana wɔnye obi anantsew? (b) Sɛ yɛka dɛ “obi nye obi renantsew” a, ɔkyerɛ dɛn? (Hwɛ “Asɛm Bi A Wɔakyerɛkyerɛ Mu.”)
EPƐ dɛ ewar anaa? Ɔwɔ mu dɛ onnhia dɛ obi war ansaana n’enyi agye dze, naaso Christianfo mpanyin na mbofra beberee hwɛ kwan dɛ daakye bi wobenya obi awar no. Naaso ansaana enye obi bɛnantsew no, ɔsɛ dɛ ehwɛ hu dɛ aso awar. Kyerɛ dɛ, ɔsɛ dɛ enye Jehovah ntamu yɛ papa, ihu wankasa woho yie, na ehwɛ hu dɛ ewɔ sika a sɛ ewar a ibotum dze ahwɛ w’ebusua. a (1 Cor. 7:36) Sɛ eyɛ dɛm a, w’enyi bɛgye wɔ w’awar mu.
2 Ɔnnyɛ aber nyina na ɔyɛ mberɛw dɛ ibenya obi a ɔfata awar no. (Mbɛ. 31:10) Na sɛ inya obi so a ebɛpɛ dɛ ihu no yie mpo a, bi a ɔbɛyɛ dzen ama wo dɛ ebɛka akyerɛ no dɛ epɛ no, na epɛ dɛ enye no nantsew. b Yɛbɔhwɛ dza obotum aboa Christianfo a wɔnnwaree no ma woeenya obi a wɔhwɛ a wobotum awar no na wɔnye no aahyɛ nantsew a odzi awar enyim ase. Afei so, yɛbɔhwɛ dza enuanom a wɔwɔ asafo no mu no botum ayɛ dze aboa esigyafo a wɔpɛ dɛ wɔwar no.
EBƐNADZE NA OBOTUM ABOA WO MA EENYA OBI A ƆFATA AWAR NO?
3. Sɛ Christiannyi bi a ɔnnwaree rohwehwɛ obi a obotum awar no a, ebɛn ndzɛmba ahorow na ɔsɛ dɛ osusu ho?
3 Sɛ epɛ dɛ ewar a, no ho hia dɛ ihu dza epɛ ansaana enye obi anantsew. Annyɛ dɛm a, annhwɛ a ibotwa obi a ɔfata no abɔ anaa ebɔkɔ ekedzi obi a ɔmmfata ekyir. Kaa dɛ, ɔsɛ dɛ obi a epɛ dɛ ewar no no yɛ Christiannyi a oenuma. (1 Cor. 7:39) Naaso ɔnnyɛ obi a oenuma no biara na ɔbɛyɛ okun pa anaa ɔyer pa a ɔbɛfata ama wo. Ntsi ɔsɛ dɛ ibisa woho dɛ: ‘Marankasa koraa ebɛn ndzɛmba na medze esisi m’enyi do wɔ asetsena mu? Obi a mepɛ dɛ mowar no no, ebɛn suban paa na mepɛ dɛ muhu wɔ no ho? Dza morohwɛ kwan no, ntseasee wɔ mu anaa?’
4. Ebɛn ndzɛmba na binom abɔ ho mpaa?
4 Sɛ epɛ dɛ ewar dze a, ɔno yɛgye dzi paa dɛ abɔ ho mpaa dada. (Phil. 4:6) Dza ɔwɔ mu nye dɛ, Jehovah nnhyɛɛ obiara bɔ dɛ ɔbɛma no obi awar no. Naaso ɔdwen wo ho na onyim dza ihia nye dza ɔda w’akoma do, ntsi obotum aboa wo ma eenya obi awar no. Ntsi dza epɛ nye mbrɛ isi tse nka no, kɔ do ara ka ho asɛm kyerɛ no. (Ndw. 62:8) Serɛ Jehovah dɛ ɔmma wo abotar na nyansa. (Jas. 1:5) John c yɛ onua sigyanyi bi a ɔwɔ United States. Dza ɔyɛ a ɔbɔ ho mpaa no, ɔkaa ho asɛm dɛ: “Suban pa a mepɛ dɛ ɔbaa a mobɔwar no no da no edzi no, meka ho asɛm kyerɛ Jehovah. Afei so, meserɛ no dɛ ɔmma minnya hokwan nhyia obi a mubotum awar no. Mesan so serɛ Jehovah dɛ ɔmma minnya suban ahorow a ɔbɛma mayɛ okun pa.” Akyerɛbaa bi a ofi Sri Lanka a wɔfrɛ no Tanya so kaa dɛ: “Aber a mugu do rohwehwɛ obi a mubotum awar no no, mobɔ mpaa serɛ Jehovah dɛ ɔmboa me ma monkɔ do ndzi no nokwar, minnya adwen pa na ɔmboa me ma m’enyi ngye.” Sɛ ennya obi a ɔfata annwar no seseiara mpo a, Jehovah ahyɛ bɔ dɛ ɔbɔkɔ do ama wo nsa aka dza ihia, na ɔbɛma ehu dɛ ɔdɔ wo na ɔdwen wo ho so.—Ndw. 55:22.
5. Ebɛn aber na Christianfo esigyafo botum ehyia obi a ɔdɔ Jehovah? (1 Corinthfo 15:58) (Hwɛ mfonyin no so.)
5 Bible no hyɛ hɛn nkuran dɛ ‘yɛmbor do anaa yɛnyɛ pii wɔ Ewuradze edwuma no mu.’ (Kenkan 1 Corinthfo 15:58.) Sɛ ekɔ do yer woho wɔ Jehovah no som mu na enye enuanom ahorow bɔ a, w’enyi bɛgye na ɔbɛhyɛ wo nkuran so. Afei so, ibenya hokwan ehyia enuanom esigyafo a hɔn so wɔdze Jehovah no som ridzi kan wɔ hɔn asetsena mu. Bio so, sɛ eyɛ dza ibotum biara ma Jehovah n’enyi gye a, woara so w’enyi bɛgye paa.
Sɛ eyer woho wɔ Jehovah no som mu na enye enuanom ahorow bɔ a, bi a ibehyia obi a ɔno so pɛ dɛ ɔwar (Hwɛ nkyekyɛmu 5)
6. Sɛ Christianfo esigyafo rohwehwɛ obi a wobotum awar no a, ebɛnadze na ɔsɛ dɛ wɔma ɔtsena hɔn adwen mu?
6 Naaso, hwɛ yie na amma okun anaa ɔyer a erohwehwɛ no anngye w’adwen anaa wɔannyɛ adze tsitsir wɔ w’asetsena mu. (Phil. 1:10) Sɛ w’enyi bɛgye ankasa a, onngyina awar anaa sigyadzi do, mbom ogyina anyɛnkofa a enye Jehovah wɔ no do. (Matt. 5:3) Afei so, aber a ennwaree yi, ibotum enya hokwan dze ayɛ pii wɔ ɔsom edwuma no mu. (1 Cor. 7:32, 33) Ntsi fa dɛm ber yi dzi dwuma yie. Aber a akyerɛbaa bi a wɔfrɛ no Jessica a ofi United States rowar no, nna wɔaka kakra ma oedzi mfe 40. Ɔkaa dɛ: “Ɔwɔ mu dɛ nna mepɛ dɛ mowar dze, naaso mammfa asɛnka edwuma no enndzi agor. Iyi boaa me ma m’enyi gyee.”
SIE ABOTAR HU OBI A EPƐ DƐ EWAR NO NO YIE
7. Sɛ epɛ obi a, ebɛnadze ntsi na oye paa dɛ isie abotar hu nyimpa no yie ansaana ase no pɛ? (Mbɛbusɛm 13:16)
7 Na sɛ ihu obi a isusu dɛ ibotum awar no no so ɛ, ebɛnadze na ɔsɛ dɛ eyɛ? Ɔsɛ dɛ ntsɛmara edze to n’enyim dɛ w’enyi gye no ho anaa? Bible no ka dɛ ansaana obi a onyim nyansa bɛyɛ biribi no, odzi kan hwehwɛ ho nyimdzee. (Kenkan Mbɛbusɛm 13:16.) Ntsi ɔbɛyɛ papa dɛ isie abotar na edze w’enyi to famu hu nyimpa kor no yie ansaana aka akyerɛ no dɛ epɛ no. Onua bi a wɔfrɛ no Aschwin a ofi Netherlands no kaa dɛ: “Atsenka a yenya ma obi no, obotum asoɛr prɛko pɛ na dɛmara so na obotum atsew akɔ prɛko pɛ. Ntsi sɛ egye ber dze w’enyi to famu hu nyimpa kor no yie a, atsenka a ɔba ndɛ a ɔkyena nna wɔatsew kɔ no, irinngyina do nye obi nnhyɛ nantsew a odzi awar enyim ase.” Afei so, sɛ eto wo bo ara hu nyimpa no yie a, bi a ibohu dɛ ɔnnyɛ obi a ɔsɛ dɛ ewar no.
8. Sɛ sigyanyi bi pɛ dɛ ohu obi a ɔpɛ dɛ ɔnye no nantsew no yie a, obotum ayɛ no dɛn? (Hwɛ mfonyin no so.)
8 Sɛ epɛ dɛ edze w’enyi to famu hu nyimpa no yie a, ebɛyɛ no dɛn? Sɛ wɔkɔ asafo nhyiamu anaa wohyia mu wɔ aponto bi ase a, ibotum ehu mbrɛ ɔnye Jehovah ntamu tse, no suban ahorow bi, nye mbrɛ osi yɛ n’adze. Woananom nye n’anyɛnkofo, na ebɛnadze na ɔtaa dzi ho nkɔmbɔ? (Luke 6:45) Dza ɔdze esisi n’enyi do no, ɔno ara bi na osisi w’enyi do anaa? Ibotum ebisa n’ase efi n’asafo mu mpanyimfo anaa Christianfo a hɔnho akokwaa a wonyim no yie no hɔ. (Mbɛ. 20:18) Ibotum ebisa mbrɛ nyimpa no si tse anaa no suban ho asɛm. (Ruth 2:11) Naaso aber a erobɔ mbɔdzen dɛ ibohu nyimpa no yie no, hwɛ yie na aannyɛ biribi a ɔbɛhyɛ no fɛr anaa ɔbɛma ɔayɛ basaa. Sɛ ɔkyerɛ mbrɛ ɔtse nka wɔ biribi ho a, tse no ase na mma mmfa woho nnhyehyɛ no anaa mmfeefee ne nsɛm mu.
Fa w’enyi to famu hu obi yie ansaana ase no pɛ (Hwɛ nkyekyɛmu 7-8)
9. Ansaana ebɛka akyerɛ obi dɛ epɛ dɛ enye no nantsew no, ebɛnadze na ɔsɛ dɛ wankasa gye to mu?
9 Mber tsentsen ahen na ɔsɛ dɛ edze w’enyi to famu hwɛ nyimpa no ansaana ase no pɛ? Sɛ efa nyimpa no nyɛnko nda ebien anaa ebiasa bi pɛ na edze kɔto n’enyim dɛ epɛ no a, bi a obotum enya adwen dɛ eper woho wɔ ndzɛmba ho. (Mbɛ. 29:20) Naaso, sɛ ema ɔkyɛr so a, bi a obotum enya adwen dɛ w’adwen nnsi wo pi anaa innyim dza epɛ, nkanka aber a nyimpa no so ehu dɛ w’enyi gye no ho no. (Ɔsɛnk. 11:4) Kaa dɛ, ansaana ebɛse nyimpa no pɛ no, ɔnnsɛ dɛ inya adwen dɛ dɛm nyimpa no ara na ebɔwar no. Naaso ɔsɛ dɛ wankasa egye to mu dɛ ayɛ krado dɛ ebɔwar, na dɛm nyimpa no yɛ obi a isusu dɛ obotum ayɛ wo kun anaa wo yer.
10. Sɛ ihu dɛ obi n’enyi gye wo ho naaso ɔwodze w’enyi nngye no ho a, ebɛnadze na ɔsɛ dɛ eyɛ?
10 Naaso, sɛ ɔyɛ ɔwo so na ehu dɛ obi n’enyi gye wo ho na ɔpɛ dɛ ohu wo yie so ɛ? Sɛ w’enyi nngye nyimpa kor no ho a, bɔ mbɔdzen fa wo ndzeyɛɛ kyerɛ no ma onhu no pefee dɛ w’enyi nngye no ho. Ɔrennyɛ papa dɛ ebɛma nyimpa no enya adwen dɛ bi a obotum nye wo anantsew aber a inyim paa dɛ biribi a ɔtse dɛm runntum nnyɛ yie.—1 Cor. 10:24; Eph. 4:25.
11. Sɛ obi pɛ dɛ ehwehwɛ obi a obotum nye no anantsew ma no a, ebɛnadze na ɔsɛ dɛ ema ɔtsena w’adwen mu?
11 Sɛ ekɔ aman bi do a, awofo anaa ebusuafo afofor a hɔn enyi efir na wɔhwehwɛ okun anaa ɔyer ma hɔn ebusuafo a wɔnnwaree. Aman afofor bi so do no, ebusuafo anaa anyɛnkofo na wɔhwehwɛ obi a obotum afata dɛ okun anaa ɔyer ama obi a ɔnnwaree. Sɛ wonya bi a, nna wɔama hɔn beenu no ehyia ahwɛ dɛ wobotum anantsew anaa. Sɛ enuanom bi dze bɔto w’enyim dɛ boa hɔn ma wonnya obi a wobotum nye no anantsew a, bɔ mbɔdzen hu dza afa ebien no nyinara pɛ. Na sɛ inya bi a, bɔ mbɔdzen hu mbrɛ dɛm nyimpa no si tse nye no suban yie na dza ohia paa no, hu dɛ ɔnye Jehovah ntamu tse dɛn. Sɛ obi nye Jehovah wɔ ebusuabɔ a no mu yɛ dzen a, oye koraa kyɛn sika a ɔwɔ, beebi a ɔakɔ skuul ekodu anaa dzibew a ɔwɔ wɔ asetsena mu. Naaso kaa dɛ ewiei koraa no, onua no na akyerɛbaa no ankasa na ɔsɛ dɛ wosi gyinae dɛ wɔbɔwar anaa wɔronnwar.—Gal. 6:5.
MBRƐ IBESI AHYƐ NANTSEW A ODZI AWAR ENYIM ASE
12. Sɛ epɛ dɛ enye obi nantsew a, ibesi dɛn aka akyerɛ no?
12 Sɛ epɛ dɛ enye obi nantsew a, ibesi dɛn dze ato n’enyim? d Ibotum nye no akɛtsena beebi a nkorɔfo bohu hom na edze aato n’enyim, anaa ibotum afrɛ no wɔ tɛlefon do na aaka akyerɛ no. Ma ɔntse ase pefee dɛ, w’enyi gye no ho anaa epɛ no, na epɛ dɛ enye no nantsew. (1 Cor. 14:9) Sɛ no ho behia a, ma nyimpa no ber ma ɔmfa ndwen ho. (Mbɛ. 15:28) Naaso sɛ nyimpa no n’enyi nngye ho dɛ ɔnye wo bɛnantsew a, gye to mu na tse no ase.
13. Sɛ obi ka kyerɛ wo dɛ ɔpɛ wo a, ebɛnadze na ibotum ayɛ? (Colossaefo 4:6)
13 Na sɛ obi ka kyerɛ wo dɛ ɔpɛ wo so ɛ? Bi a nna ɔnnda famu mma nyimpa no koraa dɛ ɔbɛba abɛka akyerɛ wo dɛ ɔpɛ wo. Ntsi ɔyɛ a tsew w’enyim ma no, na ma onhu dɛ ibu no. (Kenkan Colossaefo 4:6.) Sɛ epɛ dɛ egye ber na edze susu ho hwɛ dɛ ibotum nye no anantsew anaa irunntum a, ma onhu. Naaso ɔnnsɛ dɛ ema ɔkyɛr pii ansaana ama no mbuae. (Mbɛ. 13:12) Sɛ w’enyi nngye no ho a, ma ɔntse ase pefee, naaso ka no wɔ kwan bi do a ɔrennhaw no. Tsie dza onua bi a wɔfrɛ no Hans a ɔwɔ Austria no yɛe aber a akyerɛbaa bi kaa kyerɛɛ no dɛ ɔpɛ no no. Ɔse: “Memaa ohuu no pefee dɛ m’enyi nngye no ho. Naaso mekaa no wɔ kwan bi do a wɔannhaw no. Mannkyɛr mo mbuae no ho koraa, osiandɛ nna memmpɛ dɛ onya adwen dɛ daakye bi mebɛsesa m’adwen. Afei so, ofitsi dɛm aber no rokɔ no, mohwɛɛ yie paa dɛ merennyɛ biribi anaa merennka biribi a ɔbɛma oenya adwen dɛ gyama masesa m’adwen.” Naaso, sɛ woara so w’enyi gye dɛm nyimpa no ho na epɛ dɛ enye no nantsew a, ɔno mma mmfa nnsie, ka kyerɛ no. Afei hom beenu no mbɔ mu mbɔ mbrɛ hom pɛ dɛ hom nantsew no si kɔ no ho nkɔmbɔ. Osian mbrɛ wɔtsetsee wo nye nsɛm afofor bi ntsi, bi a dza hom mu biara bɔhwehwɛ efi ne nyɛnko hɔ no rennyɛ kor.
EBƐNADZE NA AFOFOR BOTUM AYƐ DZE ABOA CHRISTIANFO A WƆNNWAREE?
14. Yebesi dɛn dze nsɛm a yɛka no ahyɛ Christianfo a wɔnnwaree no nkuran?
14 Ebɛnadze na hɛn nyina botum ayɛ dze aboa Christianfo a wɔpɛ dɛ wɔwar no? Kwan kor nye dɛ yɛbɔhwɛ nsɛm a yɛka kyerɛ hɔn no yie. (Eph. 4:29) Yebotum ebisa hɛnho dɛ: ‘Hɔn a wɔpɛ dɛ wɔwar no, midzi hɔn ho fɛw anaa? Sɛ muhu dɛ onua bi a ɔnnwaree nye akyerɛbaa bi a ɔnnwaree robɔ nkɔmbɔ a, minya adwen dɛ wɔpɛ hɔnho anaa?’ (1 Tim. 5:13) Afei so, ɔnnsɛ dɛ yɛma Christianfo a wɔnnwaree no tse nka dɛ osiandɛ wɔnnwaree ntsi wɔnnka nyimpa ho, wɔatɔ mu, anaa wonnyim hwee. Hans a yeedzi kan aka no ho asɛm no kaa dɛ: “Ɔyɛ a enuanom binom ka dɛ, ‘Ebɛnadze ntsi na ennwaree? Irinyin o, nnyɛ abofra.’ Nsɛm a ɔtsetse dɛm no ma esigyafo tse nka dɛ wɔnnsɛ hwee, na obotum epiapia hɔn ma wɔaatse nka dɛ ɔsɛ dɛ wɔwar.” Ndzɛmba pa a Christianfo a wɔnnwaree reyɛ wɔ asafo no mu no, sɛ yɛbɔ mbɔdzen kamfo hɔn wɔ ho a, innhu dɛ ɔbɔboa paa a?—1 Thess. 5:11.
15. (a) Dɛ mbrɛ afotusɛm a ɔwɔ Romefo 15:2 no ma yehu no, ebɛnadze na ɔsɛ dɛ yesusu ho ansaana yɛaboa obi ma oeenya kun anaa yer? (Hwɛ mfonyin no so.) (b) Ehwɛɛ video no, ebɛnadze na isuae fii mu?
15 Sɛ yenya adwen dɛ onua nye akyerɛbaa bi war a, ɔbɛyɛ kama paa so ɛ? Bible no tu hɛn fo dɛ ɔnnsɛ dɛ yɛyɛ biribi a ɔbɛhaw afofor. (Kenkan Romefo 15:2.) Enuanom a wɔnnwaree pii wɔ hɔ a, wɔmmpɛ dɛ obi bɔhwehwɛ okun anaa ɔyer ama hɔn, na ɔsɛ dɛ yɛgye to mu na yɛtse hɔn ase. (2 Thess. 3:11) Binom so bɛpɛ dɛ afofor boa hɔn. Naaso sɛ wɔnnkaa nnkyerɛɛ hɛn dɛ yɛmboa hɔn a, ɔnnsɛ dɛ yɛyɛ biribi a ɔtse dɛm. e (Mbɛ. 3:27) Esigyafo binom wɔ hɔ a, wɔmmpɛ dɛ eka si hɔn enyim dɛ ɔno na osimesi bi botum awar. Lydia yɛ akyerɛbaa sigyanyi bi a ɔwɔ Germany. Dza ɔkae nye dɛ: “Ibotum ayɛ nhyehyɛɛ ma enuanom beberee eehyia mu na aato nsa afrɛ onua no na akyerɛbaa no dɛ wɔmbra bi. Dza ɔsɛ dɛ eyɛ ara nye dɛ ebɛyɛ biribi a ɔbɛma hɔn beenu no etum ehyia. Naaso dza wɔaka no dze, gya ma hɔnankasa.”
Aponto botum ebue kwan ma Christianfo a wɔnnwaree ehyia (Hwɛ nkyekyɛmu 15)
16. Ebɛnadze na ɔsɛ dɛ Christianfo a wɔnnwaree no dze to hɔn tsirmu?
16 Sɛ awar o, sɛ ennwaree o, hɛn nyina enyi botum agye na hɛn akoma aatɔ hɛn yamu! (Ndw. 128:1) Ntsi sɛ epɛ dɛ ewar naaso innyaa obi a ibotum awar no a, kɔ do ara yer woho wɔ Jehovah no som mu. Akyerɛbaa bi a wɔfrɛ no Sin Yi a ofi Macao kaa dɛ: “Mber a edze ridzi sigya no, sɛ edze toto mber a enye wo kun anaa wo yer bedzi wɔ Paradise no ho a, sigyadzi runndu beebiara. Ntsi aber a ennwaree yi, ma w’enyi ngye na fa wo ber dzi dwuma yie.” Naaso sɛ ehyia obi a w’enyi gye no ho na hom ahyɛ ase renantsew so ɛ? Ebɛnadze na ɔbɔboa hom ma hom nantsew no akɔ yie? Yebosusu iyi ho wɔ adzesua a odzi hɔ no mu.
NDWOM 137 Tsetse Mbaa Anokwafo Nye Christianfo Mbaa
a Sɛ epɛ dɛ ihu dɛ aso awar a, kenkan asɛm a wɔato dzin “Nantsew A Odzi Awar Enyim—Ɔfa 1: Maso Dɛ Mefa Boy Anaa Girl Anaa?” wɔ jw.org do.
b ASƐM BI A WƆAKYERƐKYERƐ MU: Sɛ yɛka “nantsew” anaa “nantsew a odzi awar enyim” wɔ adzesua yi nye dza odzi hɔ no mu a, dza ɔkyerɛ nye ber tsentsen a banyin bi nye basia bi fa nyɛnko dzendzenndzen dze hwɛ dɛ wobotum awar anaa. Ɔyɛ so a, binom frɛ ɔbaa a ɔnye obi afa dɛm nyɛnko yi “girl” na wɔfrɛ banyin no so “boy.” Sɛ ɔbarimba na ɔbaa bi ka dɛ wɔpɛ hɔnho a, ɔkyerɛ dɛ wɔahyɛ nantsew a odzi awar enyim ase. Na dɛm nantsew yi toa do ara kesi dɛ wɔbɛgye ato mu dɛ wɔbɔwar anaadɛ wobotwa nantsew no do.
c Wɔasesa edzin ahorow no bi.
d Sɛ ekɔ mbea ahorow bi a, mbarimba na wɔtaa se mbaa pɛ dze hyɛ nantsew a odzi awar enyim no ase. Naaso, ɔnnyɛ bɔn dɛ ɔbaa bi so bɛse banyin bi pɛ. (Ruth 3:1-13) Sɛ epɛ iyi ho nsɛm pii a, hwɛ asɛm a wɔato dzin “Young People Ask . . . How Can I Tell Him How I Feel?” Ɔwɔ October 22, 2004 Nyan! no mu.
e Hwɛ video a wɔato dzin Hɔn A Wɔroko Gyedzi Ko No Yie—Christianfo Esigyafo. Ɔwɔ jw.org do.
