MFE kakra a abɛsen kɔ no, sɛ ekɔr supɔw kakraba bi a wɔfrɛ no Sangir Besar a ɔwɔ Indonesia no do a, nkyɛ ibohu hɛn nkyerɛbaa baasa bi wɔ hɔ. Nna wɔbɔ mu yɛ edwuma wɔ mpoano hɔ. Asɛnka edwuma no a wɔyɛ no ntsi, wonyim hɔn wɔ supɔw no do dɛ wɔyɛ nkorɔfo a wɔboa afofor ma wɔtse Bible no ase. Naaso dɛm aber no dze, nna wɔreyɛ edwuma fofor koraa.

Odzi kan, nna wɔkɔ nsu mu kɛsesaw mbobaa akɛse dze ba mpoano hɔ. Nna mbobaa no bi ne kɛse tse dɛ bɔɔl. Afei, sɛ wɔboa mbobaa no ano wie a, nna wɔtsenatsena ngua nkakraba bi do wɔ mbobaa no ho, na wɔdze hamma apaapaa mbobaa no ma ɔayɛ nkakraba tse dɛ kyirefuwa. Sɛ wɔpaa wie a, nna wɔdze gu rɔba bokitsi mu soa dze fow atwer kɔ beebi a wɔtse no. Nna wɔdze gu nkotoku akɛse mu ama woeetum dze egu kaar kɛse mu ma nkorɔfo bi abɔtɔ dze akɛyɛ kaar kwan.

Nkyerɛbaa a yɛreka hɔnho asɛm yi, hɔn mu kor nye Hulda. Ɔnodze nna ne tsebea ma no kwan ma otum nya ber pii dze yɛ dɛm edwuma yi kyɛn hɔn a wɔaka no. Nna ɔtaa dze sika a onya fi edwuma yi mu totɔ ndzɛmba a n’ebusua behia da biara da no ma hɔn. Naaso, nna ɔpɛ dɛ ɔdze sika no bi yɛ biribi fofor bi a ɔdze esi n’enyi do. Nna ohia tablɛt a obotum enya JW Library^® app no wɔ do. Nna Hulda nyim dɛ video nye ndzɛmba afofor a ɔwɔ app no do no botum aboa no ma ne nkyerɛkyerɛ eetu mpon wɔ asɛnka mu, na wɔaboa nankasa so ma wɔaatse Bible no ase yie.

Dɛm ntsi, Hulda dze ndɔnhwer ebien kaa mber a nna ɔdze paapaa mbobaa no ho anapa biara, na ɔyɛɛ iyi bosoom kor na fa. Otumii paapaa mbobaa pii a nna obotum ayɛ kaar kakraba a wɔdze fa mbobaa wɔ hɔ no ma. Ewiei koraa no, onyaa sika a nna afei dze obotum dze atɔ tablɛt no.

Hulda kaa dɛ: “Mbobaa a mepaapaa no, nna ɔma meberɛ na bi mpo tum twitwa me. Naaso aber a me nsa kaa me tablɛt no, asɛnka o, asafo nhyiamu o, nna mutum siesie moho yie kɔ, ntsi nna mennkaa dɛm yaw no nyina mpo bio.” Ɔsanee so kaa dɛ, aber a COVID-19 yii ne tsir no, tablɛt no boaa no paa osiandɛ nna ɔno na ɔdze yɛ asafo nhyiamu na asɛnka nyina. Hɛn enyi agye ama Hulda dɛ otumii dur botae a ɔdze sii n’enyi do no ho.