1. Yesi dɛn hu dɛ esuafoyɛ edwuma no yɛ edwuma a ɔgye nkwa?

ESUAFOYƐ edwuma no yɛ edwuma a ɔgye nkwa! Yesi dɛn hu? Ber a Jesus dze ahyɛdze a wɔayɛ ho kyerɛwtohɔ wɔ Matthew 28:19, 20 mae no, ɔkãa dɛ: ‘Hom nkɔ nkɛyɛ esuafo, na hom nnuma hɔn.’ Ebɛnadze ntsi na esubɔ ho hia? Ɔyɛ ahwehwɛdze ma hɔn a wɔrohwehwɛ nkwagye no nyina. Ɔsɛ dɛ nyia ɔpɛ dɛ wɔbɔ no esu no gye dzi dɛ obotum enya onnyiewiei nkwa osiandɛ Jesus wui maa hɛn, na no wu ekyir no wonyaan no. Iyi ntsi na ɔsomafo Paul kãa kyerɛɛ ne mfɛfo Christianfo dɛ, dza sesei ‘ɔgye hom nkwa no, ɔno nye enuma wɔ Jesus Christ no wusoɛr mu.’ (1 Pet. 3:21) Dɛm ntsi sɛ osuanyi fofor bɔ esu a, ɔno kyerɛ dɛ oesi nkwa kwan no do.

2. Ebɛn akyerɛkyerɛfo na 2 Timothy 4:1, 2 hyɛ hɛn nkuran dɛ yɛnyɛ?

² Sɛ yebotum ayɛ nkorɔfo esuafo a, no ho hia dɛ yɛyɛ nkorɔfo a hɛnho akokwaa wɔ “nkyerɛkyerɛ” mu. (Kenkan 2 Timothy 4:1, 2.) Ebɛnadze ntsi a? Osiandɛ Jesus hyɛɛ hɛn dɛ: ‘Hom nkɔ nkɛyɛ esuafo na hom nkyerɛkyerɛ hɔn.’ Ɔsomafo Paul so kãa dɛ “tsena” edwuma no mu “na eyɛ dɛm a, ebɛgye woho nye w’etsiefo nkwa.” Nna iyi ho hia, ntsi Paul kãa dɛ: “Ma w’enyi nkuku . . . wo nkyerɛkyerɛ ho.” (1 Tim. 4:16) Osiandɛ esuafoyɛ edwuma no nye nkyerɛkyerɛ nam ntsi, yɛpɛ dɛ hɛn nkyerɛkyerɛ yɛ dza odzi mũ papaapa.

3. Adzesua yi mu no, ebɛnadze na yebosũa afa Bible adzesua a yɛbɛyɛ ho?

³ Dabaa, yɛkyerɛkyerɛ nyimpa ɔpepem pii Bible mu nokwasɛm. Naaso, dɛ mbrɛ yehunii wɔ adzesua a odzi iyi enyim mu no, yɛpɛ dɛ yehu mbrɛ yebesi aboa hɔn mu dodow no ara ama wɔaabɛyɛ Jesus Christ n’esuafo a wɔabɔ esu. Adzesua yi mu no, yɛbɔhwɛ ndzɛmba afofor enum bi a no ho hia dɛ Bible kyerɛkyerɛfo biara yɛ dze boa no suanyi ma oeetum abɔ esu.

4. Ebɛnadze ntsi na ɔsɛ dɛ Bible kyerɛkyerɛfo a ɔnye obi rusũa Bible no hyɛ no ho do? (Hwɛ ase hɔ asɛm no so.)

⁴ Hɛn enyi gye nsɛm a ofi Nyankopɔn n’Asɛm mu a yɛdze kyerɛkyerɛ nkorɔfo no ho. Dɛm ntsi sɛ annhwɛ a, nsɛm a ɔtsetse dɛm no yɛbɛkã ho nsɛm pii. Naaso, dɛ yɛreyɛ Ɔweɔn-Aban Adzesua, Asafo Bible Adzesua, anaadɛ fie Bible adzesua no, ɔnnsɛ dɛ nyia ɔrohwɛ do no kasa pii wɔ adzesua no mu. Mbrɛ ɔbɛyɛ a nyia ɔrohwɛ adzesua no do dze Bible no bedzi dwuma wɔ ne nkyerɛkyerɛ mu no, ɔsɛ dɛ ɔhyɛ noho do. Afei so, ɔnnyɛ dza onyim fa Bible mu asɛm anaa nyiyimu biara ho na ɔsɛ dɛ ɔkyerɛkyerɛ mu. * (John 16:12) Bible mu nyimdzee a nna ewɔ ber a ebɔɔ esu nye dza seseiara ewɔ no, yɛ ntotoho hwɛ. Bi a ibohu dɛ aber a ebɔɔ esu no, nna Bible mu mfitsiase nkyerɛkyerɛ pɛr na etse ase. (Heb. 6:1) Dza inyim no sesei no, mfe pii na edze esũa, dɛm ntsi mma mmfa dza inyim no nyina nnkyerɛkyerɛ osuanyi fofor no prɛko pɛr.

5. (a) Dɛ mbrɛ asɛm a ɔwɔ 1 Thessalonicafo 2:13 kyerɛ no, ebɛnadze na yɛpɛ dɛ hɛn suanyi no tse ase wɔ adzesua a yɛnye no yɛ no ho? (b) Yebesi dɛn ahyɛ osuanyi bi nkuran ma ɔaakã dza orusũa no bi akyerɛ hɛn?

⁵ Yɛpɛ dɛ yɛma hɛn suanyi no tse ase dɛ dza yɛnye no rusũa no, ofi Nyankopɔn n’Asɛm a wɔnam no sunsum do kyerɛwee no mu. (Kenkan 1 Thessalonicafo 2:13.) Yebesi dɛn ayɛ dɛm? Ɔsɛ dɛ yɛhyɛ osuanyi no nkuran ma ɔkã dza orusũa no bi kyerɛ hɛn. Dɛ nkyɛ aber biara ebɛkyerɛkyerɛ Kyerɛwsɛm mu nsɛm bi mu akyerɛ osuanyi no, ma ɔnkyerɛkyerɛ bi mu nkyerɛ wo. Afei, boa no ma onhu mbrɛ Nyankopɔn n’Asɛm no si fa nankasa noho. Bisa nsɛm a ɔbɔboa no ma ɔaakã mbrɛ osi tse nka nye adwen a ɔwɔ wɔ kyerɛwnsɛm a ɔkenkan no ho. (Luke 10:25-28) Dɛ nhwɛdo no, ibotum ebisa no dɛ: “Jehovah no su ahorow no, ebɛn kwan do na dɛm kyerɛwsɛm yi aboa wo ma ehu no mu kor?” “Ibesi dɛn enya mfaso efi Bible mu nokwasɛm yi mu?” “Etse nka dɛn wɔ dza esũa yi ho?” (Mbɛ. 20:5) Dza no ho hia kɛse nye dɛ osuanyi no enyi bɛgye dza orusũa no ho na ɔdze ayɛ edwuma, na nnyɛ nyimdzee dodow a ɔwɔ no.

6. Ebɛnadze ntsi na ɔbɛyɛ papa dɛ yɛnye Bible kyerɛkyerɛfo a noho akokwaa bɛka hɛnho akɛyɛ Bible adzesua?

⁶ Sɛ erekɛyɛ Bible adzesua a, ana enye adawurbɔfo a wɔyɛ akyerɛkyerɛfo a hɔnho akokwaa no bi kɔ? Sɛ enye hɔn a wɔtse dɛm no bi kɔ a, mbrɛ isi yɛ adzesua no, nye kwan a edze Bible no dzi dwuma wɔ wo nkyerɛkyerɛ mu no, ibotum ebisa hɔn ma wɔaakã ho asɛm akyerɛ wo. Naaso, sɛ ibotum etu mpon wɔ wo nkyerɛkyerɛ mu a, ɔsɛ dɛ inya ahobrɛadze. (Fa toto Asomafo Ndwuma 18:24-26 ho.) Ɔno ekyir no, ibotum ebisa ɔdawurbɔfo a noho akowaa no ahwɛ, dɛ bi a ohu dɛ osuanyi no tse nokwar no a orusũa  no ase anaa. Nkyii so, sɛ biribi ntsi irunntum nnkɛyɛ adzesua no wɔ dapɛn kor anaa adapɛn dodow bi ntamu a, ibotum akã ho asɛm akyerɛ ɔdawurbɔfo a ɔtse dɛm no ma ɔaakɛyɛ adzesua no ama wo. Dɛm a ebɛyɛ no bɛma adzesua no akɔ do, na afei so, ɔbɛma osuanyi no ehu dɛ adzesua no ho hia. Mma nnya adwen da dɛ adzesua no yɛ “wodze” ntsi nyimpa fofor biara nnkotum ayɛ adzesua no. Adze yi, dza erohwehwɛ ara nye dɛ ebɔboa osuanyi no ama oeenya nkɔenyim wɔ nokwar no a orusũa no mu.

7. Ebɛnadze na ɔbɔboa Bible suanyi bi ama n’enyi aagye dza orusũa no ho?

⁷ Ɔsɛ dɛ osuanyi no hu ahokekã nye gyedzi a ewɔ wɔ Bible mu nokwar no ho. (1 Thess. 1:5) Sɛ eyɛ dɛm a, bi a osuanyi no n’enyi bɛgye dza orusũa no ho kɛse. Sɛ no ho ba hia a, ibotum akã mfaso a enya efi Bible mu ngyinadonsɛm a edze bɔ wo bra no mu ho asɛm akyerɛ no. Iyi bɔboa no ma oeehu dɛ akwankyerɛ a mfaso wɔ do wɔ Bible no mu a obotum aboa nankasa so.

8. Ebɛnadze bio na ibotum ayɛ aboa wo Bible suanyi no, na ebɛnadze ntsi na ebɛyɛ dɛm?

⁸ Enye wo suanyi no rusũa adze a, kã nyimpa binom a wohyiaa ɔhaw tse dɛ dza orihyia no, naaso wodzii konyim wɔ ɔhaw no do ho asɛm kyerɛ no. Onua bi a ɔwɔ asafo no mu a bi a no nhwɛdo no botum aboa no no, ibotum enye no akɔ ber a erekɛyɛ adzesua no. Anaadɛ ibotum ahwehwɛ suahu ahorow a ɔka akoma wɔ jw.org, ɔfã a wɔato dzin “Bible No Sesa Nyimpa N’abrabɔ.” * Nsɛm a ɔtsetse dɛm nye video ahorow no bɔboa wo suanyi no ma oeehu nyansa a ɔwɔ mu dɛ ɔdze Bible mu ngyinadonsɛm bɔbɔ ne bra.

9. Ibesi dɛn ahyɛ Bible suanyi bi nkuran ma ɔaakã dza orusũa no ho asɛm akyerɛ n’ebusuafo nye n’anyɛnkofo?

⁹ Sɛ wo Bible suanyi no awar a, ana obi nye no hokafo no so sũa Bible no? Sɛ obiara nnye no nnsũa Bible no a, ɔnodze to nsa frɛ no dɛ ɔmbɛtsena adzesua no mu bi. Hyɛ osuanyi no nkuran ma ɔnkã dza orusũa no ho asɛm nkyerɛ n’ebusuafo nye n’anyɛnkofo. (John 1:40-45) Ibesi dɛn ayɛ dɛm? Bi a ibotum ebisa asɛm bi tse dɛ: “Ibesi dɛn akyerɛkyerɛ dɛm nokwasɛm yi mu akyerɛ w’ebusuafo?” anaadɛ “Ebɛn kyerɛwsɛm na edze bɛkyerɛkyerɛ asɛm yi mu akyerɛ wo nyɛnko?” Sɛ efa dɛm kwan yi do a, ibotum aboa wo suanyi no ma ɔno so abɛyɛ Bible kyerɛkyerɛfo. Afei, sɛ wo suanyi no nya nkɔenyim na ɔda edzi dɛ ɔfata dɛ ɔkɔ asɛnka a, obotum dze noho ahyɛ asɛnka edwuma no mu dɛ ɔdawurbɔfo a ɔmmbɔɔ esu. Ibotum ebisa wo suanyi no  ahwɛ dɛ bi a onyim nyimpa bi a n’enyi bɛgye ho dɛ obosũa Bible no a. Sɛ ɔkã nyimpa bi ho asɛm kyerɛ wo a, hwehwɛ nyimpa no ekyir kwan ntsɛmara ama eetum enye no ahyɛ Bible adzesua ase. Yi video a wɔato dzin Ɔkwan Bɛn do na Yɛyɛ Bible Adzesũa? * no kyerɛ nyimpa no.

10. Dɛ mbrɛ asɛm a ɔwɔ 1 Thessalonicafo 2:7, 8 kyerɛ no, Bible kyerɛkyerɛfo besi dɛn esũasua Paul no nhwɛdo no?

¹⁰ Ɔsɛ dɛ Bible akyerɛkyerɛfo kyerɛ dɛ wɔdwen hɔn esuafo ho. Bi a, ɔnnkɛkyɛr na esuafo a wɔtse dɛm no abɛyɛ wo nuanom mbarimba na mbaa wɔ asafo no mu. (Kenkan 1 Thessalonicafo 2:7, 8.) Ɔnnda famu dɛ wobegyaa hɔn anyɛnkofo a wɔnnsom Jehovah no ekyir dzi. Dɛmara so na ɔnnda famu dɛ wɔbɛyɛ nsesa ahorow a no ho hia no ama woeetum asom Jehovah. Ɔsɛ dɛ yɛboa hɔn ama woeenya anyɛnkofo pa wɔ asafo no mu. Gye ber na enye wo Bible suanyi no mbɔ na fa no nyɛnko. Ɔnnyɛ ber a hom rukosũa adze no nko, mbom obotum ayɛ ber fofor mpo a hom mmfa nnyɛ adzesua. Ibotum afrɛ no wɔ fon do, anaa akyerɛw tɛst mɛsegye dze amona no. Nkyii so, ofi ber to ber no, ibotum akɛsera no ber mpo a adzesua ho nhyehyɛɛ biara nnyi hɔ. Sɛ eyɛ dɛm a, obohu dɛ edwen noho papaapa.

11. Ebɛnadze na yɛpɛ dɛ hɛn Bible esuafo no nya wɔ asafo no mu, na ebɛnadze ntsi a?

¹¹ Abɛbusɛm bi kã dɛ, “Ɔbaakofo nntsetse abofra.” Yebotum akã no wɔ kwan fofor do dɛ: “Ɔbɛgye asafo mũ no nyina mbɔdzembɔ ana yeetum enya osuanyi kor.” Dɛm ntsi, Bible akyerɛkyerɛfo a hɔnho akokwaa no bɔ mbɔdzen dɛ wɔbɛma hɔn esuafo no ehu afofor a wɔwɔ asafo no mu no ama hɔn nhwɛdo pa no eetum aboa esuafo no. Afei, Bible esuafo no enyi bɛgye dɛ wɔdze hɔnho abɔ Nyankopɔn no nkorɔfo ho. Osiandɛ, Nyankopɔn no nkorɔfo botum aboa hɔn ma wɔnye Jehovah enya anyɛnkofa a no mu yɛ dzen, na dɛmara na wɔbɛhyɛ hɔn nkuran ber a worihyia ɔhaw ahorow no. Yɛpɛ dɛ yɛma Bible suanyi biara tse nka dɛ noho hia wɔ asafo no mu, na ɔka hɛn sunsum afamu ebusua no ho. Hɛn Christianfo enuayɛkuw a ɔdɔ wɔ mu no, yɛpɛ dɛ ɔbɛka ho. Iyi bɔboa osuanyi no ma oeetum atwe noho efi nkorɔfo a wɔma ɔyɛ dzen ma no dɛ ɔbɔdɔ Jehovah no ho. (Mbɛ. 13:20) Sɛ n’anyɛnkofo a nna ɔnye hɔn bɔ no pow no mpo a, obohu dɛ obotum enya anyɛnkofo pa wɔ Jehovah n’ahyehyɛdze no mu.​—Mark 10:29, 30; 1 Pet. 4:4.

12. Ebɛnadze ntsi na ɔsɛ dɛ yɛkã Christianfo ahodohyira nye esubɔ ho asɛm kyerɛ hɛn Bible suanyi?

¹² Kã siantsir a ohia dɛ ohyira no ho do dɛ Christiannyi na ɔbɔ esu no ho asɛm kyerɛ no.  Adze yi, siantsir a yɛyɛ Bible adzesua nye dɛ yɛpɛ dɛ yɛboa nyimpa no ma ɔbɛyɛ osuanyi a ɔabɔ esu. Sɛ yɛnye osuanyi no hyɛɛ ase sũaa adze no abosoom kakra etwa mu, na adzesua no taa kɔ do ma mpo ɔahyɛ ase ba asafo nhyiamu a, ɔsɛ dɛ yɛma ohu dɛ siantsir a yɛnye no rusũa Bible no nye dɛ yɛpɛ dɛ yɛboa no ma ɔbɛyɛ Jehovah Adasefo no mu kor.

13. Ebɛnadze na ɔsɛ dɛ Bible suanyi yɛ ama oeetum abɔ esu?

¹³ Nkakrankakra Bible suanyi a no botae nye dɛ ɔbɔbɔ esu no, obotum edu ho! Odzi kan no, ɔsɛ dɛ osuanyi no sũa Jehovah ho adze, onya ɔdɔ ma no na onya no mu gyedzi. (John 3:16; 17:3) Nkyii so, ɔsɛ dɛ osuanyi no nye Jehovah nya ebusuabɔ pa na ɔhyɛ ase dɛ ɔdze noho robɔ asafo no. (Heb. 10:24, 25; Jas. 4:8) Ewiei koraa no, ɔsɛ dɛ osuanyi no gyaa ndzeyɛbɔn na onu noho wɔ no bɔn ho. (Andw. 3:19) Ber kor no ara mu no, ɔsɛ dɛ gyedzi a oenya no kenyan no ma ɔkã nokwar no ho asɛm kyerɛ afofor. (2 Cor. 4:13) Afei, ɔsɛ dɛ ohyira noho do ma Jehovah na ɔdze nsu mu esubɔ yɛ n’ahodohyira ho asɛnkyerɛdze. (1 Pet. 3:21; 4:2) Da a ɔbɔbɔ esu no, hwɛ enyigye kɛse ara a obiara benya! Ber a osuanyi no robɔ mbɔdzen dɛ obodu no botae ho no, ɔyɛ a, kamfo no na hyɛ no nkuran dɛ ɔnkɔ n’enyim wɔ ndzɛmba pa a ɔreyɛ no mu.

14. Bible kyerɛkyerɛfo besi dɛn ehu osuanyi bi no nkɔenyim?

¹⁴ Sɛ yebotum aboa osuanyi bi ma oeehyira noho do na ɔaabɔ esu a, ɔsɛ dɛ yenya abotar. Naaso ber rokɔ do no, ɔsɛ dɛ yɛhwɛ dɛ osuanyi no wɔ ɔpɛ dɛ ɔbɔsom Jehovah Nyankopɔn anaa. Ana ihu ndzɛmba ahorow a ɔkyerɛ dɛ osuanyi no robɔ noho mbɔdzen dɛ obedzi Jesus n’ahyɛdze do? Anaa dza ɔpɛ ara nye dɛ obosũa Bible no kɛkɛ?

15. Ebɛnadze na ɔbɛma Bible kyerɛkyerɛfo ehu dɛ osuanyi no rinya nkɔenyim?

¹⁵ Nkɔenyim a osuanyi no rinya no, ɔyɛ a kɔ do susu ho. Dɛ nhwɛdo no, ana nsɛm a ɔkã no da no edzi dɛ ɔdɔ Jehovah? Ana ɔbɔ Jehovah mpaa? (Ndw. 116:1, 2) Ana n’enyi gye ho dɛ ɔbɛkenkan Bible no? (Ndw. 119:97) Ana ɔtaa kɔ asafo nhyiamu? (Ndw. 22:22) Ana ɔayɛ nsesa ahorow bi a ohia wɔ n’abrabɔ mu? (Ndw. 119:112) Ana ɔkã dza orusũa no ho asɛm kyerɛ n’ebusuafo nye n’anyɛnkofo? (Ndw. 9:1) Dza ohia papaapa no, ana ɔwɔ ɔpɛ dɛ ɔbɛba abɛyɛ Jehovah Adasefo no mu kor? (Ndw. 40:8) Sɛ Bible suanyi no nnya nkɔenyim wɔ dza yɛakã ho asɛm yi mu a, fa enyifir kwan do hwehwɛ siantsir a ɔtse dɛm no. Afei, enye no nsusu asɛm no ho na ma no  mu nda hɔ pefee, naaso mma mmfa nntwuw n’enyim. *

16. Ebɛnadze na ɔbɛma ehu dɛ ɔsɛ dɛ igyaa Bible adzesua a enye osuanyi bi yɛ no?

¹⁶ Dɛ ibegyaa Bible adzesua bi yɛ anaadɛ ebɔtoa do ayɛ no, ber rokɔ do no ɔsɛ dɛ isusu ho. Bisa woho dɛm nsɛm yi: ‘Aso Bible suanyi no nnsiesie noho mma adzesua no? Aso n’enyi nngye ho dɛ ɔbɔkɔ asafo nhyiamu? Aso ɔda ho ara da suban bɔn edzi? Aso ɔda ho ara nye ator som bɔ?’ Sɛ iyi dɛm nsɛmbisa yi ano dɛ nyew, na ekɔ do nye osuanyi no sũa adze a, ɔtse dɛ mbrɛ erekyerɛ obi mbrɛ wosi bor nsu na nyimpa no mmpɛ dɛ noho bɔfɔw! Sɛ Bible suanyi no nnkyerɛ dza orusũa no ho enyisɔ na onnyi ɔpɛ dɛ ɔbɛyɛ nsesa wɔ n’asetsena mu a, ebɛnadze ntsi na ɔsɛ dɛ ekɔ do nye no sũa adze?

17. Dɛ mbrɛ asɛm a ɔwɔ 1 Timothy 4:16 kyerɛ no, ebɛnadze na ɔwɔ dɛ Bible akyerɛkyerɛfo nyina yɛ?

¹⁷ Asodzi a yɛwɔ dɛ yɛbɛyɛ nkorɔfo esuafo no, yebu no enyibersɛm, na yɛpɛ dɛ yɛyɛ dza yebotum biara dɛ yɛbɔboa hɛn Bible esuafo no ma wɔaabɔ esu. Dɛm ntsi, yɛdze Bible no bedzi dwuma wɔ hɛn nkyerɛkyerɛ mu na yɛdze ahokekã nye gyedzi aakyerɛkyerɛ. Yɛbɛhyɛ hɛn Bible esuafo no nkuran dɛ wɔnhwehwɛ anyɛnkofo wɔ asafo no mu. Afei, yɛbɛkã ahodohyira nye esubɔ ho asɛm akyerɛ hɔn. Nkyii so, ber rokɔ do no, yɛbɔhwɛ dɛ hɛn esuafo no hɔn nkɔenyim tse dɛn. (Hwɛ adakaba a wɔato dzin “ Dza Ɔsɛ Dɛ Bible Akyerɛkyerɛfo Yɛ Dze Kenyan Hɔn Esuafo Ma Wɔbɔ Esu” a ɔwɔ krataafa 13 no.) Ɔyɛ hɛn enyigye dɛ yɛreyɛ edwuma a ɔgye nkwa yi bi! Ɔmbra dɛ yebesi hɛn bo dɛ yɛbɛyɛ dza yebotum nyina ayɛ Bible adzesua a otu mpon na eekenyan esuafo no ma wɔaabɔ esu.