Ber a nna asɛnka edwuma no mu retserɛw no, nna noho ebehia dɛ enuanom no nya nwoma ahorow pii a wɔdze bɛyɛ edwuma no. Nna enuanom a wɔwɔ Brooklyn Bethel no tsintsim magazine ahorow, naaso mbuukuu a n’ekyir yɛ dzen no dze, nna wɔdze ma ndwumakuw bi ma wotsintsim ma hɔn. Abosoom dodow bi ntamu no, nna ndwumakuw no nntum nntsintsim mbuukuu dodow a enuanom hia dze ayɛ asɛnka edwuma no. Iyi ntsi Onua Rutherford bisaa Robert Martin a nna ɔhwɛ asafo no no nwoma tsintsimbea no do dɛ sɛ hɔnankasa wobotum ahyɛ ase etsintsim mbuukuu a n’ekyir yɛ dzen no a.

Onua Martin kaa dɛ, “Nna ɔyɛ adwen papa paa, osiandɛ nna ɔno bɛma yenya hɛnankasa hɛn nwoma tsintsimbea a yɛdze betsintsim mbuukuu a n’ekyir yɛ dzen.” Enuanom no kɛgyee dan bi wɔ 18 Concord Street wɔ Brooklyn, na wɔtotɔɔ ndzɛmba a wobehia dze ayɛ edwuma no.

Aber a biribiara totɔɔ mu dɛ enuanom no ankasa betsintsim hɔn mbuukuu no, nnyɛ obiara na n’enyi gyee ho. Panyin a ɔda edwumakuw bi a nna wotsintsim mbuukuu ma hɛn ano no bɔhwɛɛ hɛn nwoma tsintsimbea fofor no. Ɔkaa dɛ: “Woara hwɛ o, hom wɔ mfir apapa a wɔdze tsintsim nwoma, naaso obiara nnyi ha a onyim mbrɛ wosi dze dzi dwuma. Mehyɛ hom abosoom esia pɛ, ne nyinara bɛdan bɔɔla.”

Onua Martin kaa dɛ, “Dza nna ɔreka no, ehwɛ a ebɛka dɛ ntseasee wɔ mu, naaso nna onnyim dɛ Ewuradze ka hɛnho aber nyinara.” Dza Onua Martin kae no yɛ nokwar. Hɔn enyi baa hɔnho do no, nna wotsintsim mbuukuu 2,000 da biara.

Sɛ yɛdze mbuukuu a Jehovah no nkorɔfo tsintsimii no to nkyɛn a, wɔsanee faa kwan fofor do kaa asɛmpa no. Ɔno nye dɛ wɔkaa asɛmpa no wɔ radio do. February 26, 1922 no, Onua Rutherford  maa ne kasa a odzi kan wɔ radio do. Nna ɔyɛ Kwesida ewiaber. Nna ɔkasa no n’asɛntsir nye “Nyimpa Ɔpepem Pii A Wɔtse Ase Ndɛ No Runnwu Da.” Nna radio steehyɛn no wɔ Los Angeles, California, U.S.A., na wɔfrɛ no KOG.

Nyimpa bɛyɛ 25,000 na wotsiee ɔkasa no bi. Hɔn mu binom kyerɛɛw nkrataa dze kyerɛɛ ɔkasa no ho enyisɔ. Nna nkrataa no mu kor fi banyin bi a wɔfrɛ no Willard Ashford a ɔtse Santa Ana, California no hɔ. Ɔkamfoo Onua Rutherford na ɔkaa dɛ, ne kasa no “ka akoma na ɔhyɛ nkuran so.” Ɔtoaa do dɛ: “Oye paa dɛ emaa ɔkasa no wɔ radio do. Sɛ emaa no wɔ beebi a ɔbɛn hɛn paa mpo a, nkyɛ yerunntum mmbetsie bi, osiandɛ nna nyimpa baasa na wɔyar wɔ hɛn fie.”

Ofi dɛm aber no rokɔ no, wɔmaa ɔkasa pii a ɔka akoma wɔ radio do. Aber a afe 1922 baa n’ewiei no, Ɔweɔn-Aban no bɔɔ amandzɛɛ dɛ “annyɛ yie koraa no nyimpa bɛyɛ 300,000 na wotsiee asɛmpa no wɔ [radio] do.”

Nkorɔfo kyerɛɛ enyisɔ wɔ dwumadzi no ho na iyi hyɛɛ Bible Esuafo no nkuran paa. Iyi ntsi wosii hɔn bo dɛ wobesi hɔnankasa hɔn radio steehyɛn wɔ Staten Island a ɔbɛn Brooklyn Bethel. Wɔtoo radio steehyɛn no dzin WBBR. Bible Esuafo no dze dɛm radio steehyɛn yi tserɛɛw Ahendzi asɛmpaka edwuma no mu wɔ mfe a ɔda hɔn enyim no mu.

June 15, 1922 Ɔweɔn-Aban no bɔɔ amandzɛɛ dɛ wɔbɛyɛ ehyiadzi bi wɔ Cedar Point, Ohio, ofi September 5 kesi 13, 1922. Bible Esuafo no kɔr ehyiadzi no wɔ Cedar Point no, hɔn enyi gyee basaa!

Onua Rutherford ne kasa a ɔdze maa enuanom no akɔaba no, ɔkaa dɛ: ‘Megye dzi paa dɛ Ewuradze behyira ehyiadzi yi do, na ɔbɔhwɛ ma yaayɛ asɛnka edwuma no akyɛn ber biara a abɛsen kɔ.’ Hɔn a wɔmaa ɔkasa wɔ ehyiadzi no ase nyinara hyɛɛ enuanom no nkuran mpɛn pii dɛ wɔnyer hɔnho nyɛ asɛnka edwuma no.

Ehyiadzi no ne da a otsia anan a ɔyɛ Fida, September 8 no, nyimpa bɛyɛ 8,000 na wɔbɛhyɛɛ ehyiadzi asa hɔ ma. Nna wɔrohwɛ kwan dzendzenndzen dɛ wobetsie Onua Rutherford ne kasa no. Nna wɔrohwɛ kwan dɛ Onua Rutherford bɛkyerɛkyerɛ akyerɛwmba “ADV” a opue wɔ nsato krataa no do mu akyerɛ hɔn. Aber a enuanom no tse ehyiadzi no ase no, hɔn mu pii hun dɛ  wɔabobɔw tam kɛse bi ma ɔsɛn beebi a wogyina ma ɔkasa no no sor. Onua bi a wɔfrɛ no Arthur Claus fi Tulsa, Oklahoma, U.S.A. baa ehyiadzi no ase. Ɔhwehwɛɛ beebi tsenae wɔ ehyiadzi no ase mbrɛ ɔbɛyɛ a ɔbɛtse ɔkasa no yie. Dɛm aber no, nna enuanom nnyi akasamu a ɔbɛma obiara atse ɔkasa no yie.

Eguamutsenanyi no dze too gua dɛ sɛ Onua Rutherford hyɛ ne kasa no ase a, wɔremma obiara kwan ma ɔmmba ehyiadzi no ase, mbrɛ ɔbɛyɛ a biribiara nnkɔtwetwe etsiefo no hɔn adwen. Onua Rutherford hyɛɛ ne kasa no ase anapa 9:30. Asɛm a Jesus kae wɔ Matthew 4:17 no na ɔdze hyɛɛ ase. Hɔ ka dɛ: “Ɔsor ahenman no abɛn.” Aber a ɔreka kwan a nkorɔfo bɛfa do atse Ahendzi no ho asɛm no, ɔkaa dɛ: “Jesus nankasa kaa dɛ wɔ ne mbae mu no, ɔbɛpaapaa nyimpa mu na ɔaaboaboa no nkorɔfo a wodzi nokwar no ano.”

Onua Claus a nna ɔwɔ ehyiadzi no ase no kaa dɛ: “Nna yɛakyɛn hɛn aso pɛnn ritsie dza ɔreka nyina.” Naaso awerɛhosɛm nye dɛ, mpofirmu ara na ɔtsee dɛ no honam mu ayɛ no basaa, ntsi ofii ehyiadzi no ase. Nna ɔyɛ no yaw dɛ orifi hɔ, osiandɛ nna onyim dɛ wɔremma no kwan ma onnwura mu bio. Naaso nna ɔsɛ dɛ ɔkɔ ara.

Annkyɛr biara na noho tɔɔ no kakra. Aber a ɔresan akɔ ehyiadzi no ase no, ɔtsee dɛ etsiefo no robɔ nsamu dzendzenndzen. Iyi maa n’enyi gyee papaapa! Ntsi ɔyɛɛ n’adwen dɛ, sɛ dan n’etsifi mpo na ɔbɔfow akɛhyɛ mbrɛ ɔbɛyɛ a obetsie ɔkasa no ne fa a aka no a, ɔbɔfow. Onua Claus pɛɛ kwan bi dze foow dan no kɛhyɛɛ n’etsifi. Dɛm aber no, nna oedzi mfe 23. Aber a odur dan no n’etsifi no ohun dɛ woebuebue ntokura a ɔwɔ hɔ no. Aber a odur hɔ no, ɔkaa dɛ “nna metse ɔkasa no yie kama.”

Nna nnyɛ Arthur nankotsee na ɔwɔ hɔ. Ɔkɔtoo n’anyɛnkofo bi so wɔ hɔ. Hɔn mu kor nye Frank Johnson. Ɔkɔr Arthur ne nkyɛn kebisaa no dɛ: “Ewɔ sekan kakraba bi hyɛ woho anaa?”

 Arthur kaa dɛ: “Nyew mowɔ bi hyɛ moho.”

Frank kaa dɛ: “Iyi dze, Nyankopɔn etsie hɛn mpaabɔ ae. Ehu dɛm tam kɛse a wɔabobɔw sɛn hɔ yi a? Wɔakyerɛw biribi wɔ mu na wɔdze n’ahoma no akyekyer dɛm mprɛgow yi ho. Kyɛn w’aso pɛnn tsie Ɔtsɛmbuafo no. * Sɛ inya tse dɛ ɔaka dɛ, ‘Dɛm ntsi hom mbɔ, hom mbɔ’ ara pɛ a, nna etwa ahoma anan no mu.”

Ntsi Arthur yii ne sekan no kitsae, na ɔnye n’anyɛnkofo no yɛɛ krado dɛ wobotwa ahoma no aber a Onua Rutherford aka dɛm asɛm no. Annkyɛr koraa na Onua Rutherford dur ne kasa no ne fa a ohia paa no. Ɔdze enyigye na ahokeka maa ne ndze do kaa dɛ: “Hom nyɛ Ewuradze n’adasefo a hom dzi nokwar. Hom nko nkɔ hom enyim kesi dɛ Babylon Kɛse no bɔhwe ase. Hom nka asɛmpa no wɔ wiadze ne mfɛndzanan nyina. Ɔwɔ dɛ wiadze yi hu dɛ Jehovah na ɔyɛ Nyankopɔn na Jesus Christ nye ahemfo Hen nye ewuranom mu Ewuradze. Hwɛ, ndɛ yɛ da tsitsir. Hwɛ, Ɔhen no ridzi tum! Na hom nye n’adawurbɔfo. Ntsi hom mbɔ, hom mbɔ, hom mbɔ Ɔhen no nye n’Ahendzi no ho dawur!”

Arthur kaa dɛ ɔnye n’anyɛnkofo no twaa ahoma no, na tam a wɔakyekyer no sianee. Nna dza wɔakyerɛw wɔ mu nye: “Advertise the King and Kingdom.” (Hom Mbɔ Ɔhen No Nye Ahendzi No Ho Dawur) Nna akyerɛwmba “ADV” no gyina hɔ ma “Advertise” a wɔakyerɛw wɔ tam no mu no.

Ehyiadzi a wɔyɛe wɔ Cedar Point no boaa enuanom no ma wɔdze hɔn adwen sii Ahendzi asɛmpaka edwuma no do. Na enuanom a wɔwɔ ɔpɛ no dze enyigye yɛɛ edwuma no bi. Onua bi a ofi Oklahoma, U.S.A. a nna ɔsom dɛ colporteur (ndɛ a nkyɛ wɔfrɛ no ɔkwampaafo) kaa dɛ: “Beebi a yɛwɔ no, nna wotu coal, na nyimpa a wɔwɔ hɔ no dzi hia paa.” Ɔkaa dɛ sɛ nna nkorɔfo tse nsɛm a ɔwɔ Golden Age magazine no mu a, ɔyɛ a “wotu su.” Ɔtoaa do dɛ, “Nna iyi ma yenya hokwan fi Kyerɛwnsɛm no mu kyekye hɔn werɛ, na ɔno maa hɛn enyi gyee paa.”

Bible Esuafo yi hun dɛ asɛm a Jesus kae wɔ Luke 10:2 no ho hia paa. Hɔ ka dɛ: “Otwa-edwuma no dɔɔ so ampa, na edwumayɛfo no dze, wosuar.” Aber a afe no kɔr ewiei no, nna Bible Esuafo no awe ataa do dɛ wɔbɔbɔ Ahendzi no ho dawur wɔ wiadze nyina.