Enyidado​—Ana Obotum Enya Hɛn Asetsena Do Nkantando Kɛse?

NNA DANIEL edzi mfe du pɛ, naaso aber a odzii mfe akron no na kokoram yarba hyɛɛ ase dɛ ɔrehaw no. Nna ne datser a ɔhwɛ no nye hɔn a wɔbɛn no no nyina hɔn enyidado asã. Naaso, nna Daniel wɔ enyidado dɛ ndzɛmba bɛyɛ yie. Nna ɔwɔ gyedzi dɛ, obotum enyin abɛyɛ obi a ɔyɛ ndzɛmba mu nhwehwɛmu na ɔaaboa ma woeenya kokoram n’ano edur. Nna ɔnnkɛkyɛr na datser bi a noho akokwaa na onyim mbrɛ wosi tu Daniel no kokoram n’ase no abɛsera abɔhwɛ no. Nna ɔwɔ enyidado dɛ dɛm datser no botum aboa no ma noho aatɔ no. Naaso, datser no enntum ammbɔhwɛ no wɔ da a ɔdze hyɛɛ no no osian wimu tsebea a nna ɔnnyɛ ntsi. Daniel no werɛ howee papaapa. Iyi maa n’abaw mu bui, osiandɛ nna n’enyidado nyina asã. Wɔ nda ebien ekyir no, owui.

Obi a ɔhwɛ hɔn a wɔyar no yɛɛ nhwehwɛmu bi faa dwuma a enyidado na abagura dzi wɔ obi n’apɔwmudzen mu, na ɔno na ɔkãa Daniel n’asɛm yi. Bi a ɔwo so atse nsɛm ahorow a ɔtsetse dɛm pɛn. Dɛ nhwɛdo no, ebɔhwɛ no nna obi a ne mfe akɔ enyim na ɔnnkɛkyɛr ma oeewu no reper dɛ obohu anaa ɔbɛyɛ biribi ansaana oeewu. Bi a nna ɔpɛ dɛ ohu no dɔfo bi anaa ɔhyɛ da tsitsir bi ho fã. Sɛ dza ɔhwɛ kwan no ba mu a, ɔnnkyɛr koraa nna oewu. Ebɛnadze ntsi na ɔba no dɛm? Ana enyidado ho hia papaapa dɛ mbrɛ binom gye dzi no?

Nkorɔfo pii a wɔyɛ ayarsa ho nhwehwɛmu no susu dɛ enyidado, ahotodo a obi wɔ dɛ ndzɛmba bɛyɛ yie, nye nkatse afofor a ɔtsetse dɛm no wɔ nkantando kɛse wɔ obi n’asetsena nye n’apɔwmudzen do. Naaso, hɔn nsusui ahorow no nnhyia. Nhwehwɛmufo binom kã dɛ nsɛm ahorow a ɔtsetse dɛm no yɛ atorsɛm a abɔdzenyansahufo nngye nnto mu. Wosusu dɛ biribi a yebotum dze hɛn enyiwa ehu nkotsee na obotum ama obi ayar.

Nokwasɛm nye dɛ, binom gye dzi dɛ mfaso nnyi enyidado do, na iyi nnyɛ adze fofor. Mfe pii a abɛsen kɔ no, wobisaa Greek nyansapɛfo bi a wɔfrɛ no Aristotle dɛ ɔnkyerɛkyerɛ enyidado mu. Dza ɔkãa nye dɛ: “Enyidado yɛ adaaso.” Ndaansa yi ara, America ɔmanyɛnyi bi a wobu no papaapa a wɔfrɛ no Benjamin Franklin kãa dɛ: “Sɛ obi ɔdze enyidado bɔ ne bra no, ne nsa besi famu.”

Sɛ yɛkã enyidado a, ɔyɛ ebɛnadze ankasa? Ana ɔyɛ adaaso bi kɛkɛ a ɔma afofor nya ahotodo dɛ wobotum edu botae ahorow bi a worunntum ndu ho no ho? Anaa yɛwɔ siantsir papa bi ntsi a ɔwɔ dɛ yɛgye dzi dɛ enyidado yɛ dza hɛn nyina hia ama yeetum enya apɔwmudzen papa na enyigye? Ana mfaso mapa wɔ do dɛ obi benya enyidado?