Ibotum Akõ Etsia Ndzɛmba Ho Adwen A Ɔnntsen

IBU nsɛndzendzen a ihyia no dɛn? Abemfo pii gye dzi dɛ asɛmbisa yi ho mbuae na ɔbɛkyerɛ dɛ ewɔ ndzɛmba ho adwempa anaadɛ ewɔ ndzɛmba ho adwen a ɔnntsen. Hɛn nyina hyia nsɛndzendzen wɔ hɛn asetsena mu, na obi nedze sõ sen obi nedze. Ɔyɛ dɛn ntsi na sɛ binom hyia nsɛndzendzen a wɔbɔ mbɔdzen gyina hɔn anan do, na binom so dze sɛ wohyia nsɛndzendzen ketseaba bi mpo a, nna wɔatɔ bahaw no?

Dɛ mfatoho no, yɛmfa no dɛ erohwehwɛ edwuma bi ayɛ. Na aber a ikohun mpanyimfo a wɔda edwuma no ano na wobisaabisa wo nsɛm no, wɔammfa wo wɔ edwuma no mu. Ebɛtse nka dɛn wɔ fa a wɔammfa wo wɔ edwuma mu hɔ no ho? Annhwɛ a ebekã dɛ dɛmara na w’edwumasɛm bɛyɛ daa, na akã wɔ wo tsirmu dɛ, ‘Obiara nnyi hɔ a ɔbɛfa obi tse dɛ emi wɔ n’edwuma mu. Mirinnya edwuma nnyɛ da.’ Dza ɔnnyɛ koraa no, iyi botum asɛɛ adwen a ewɔ wɔ biribiara ereyɛ wɔ w’asetsena mu no ho. Na ibotum mpo eenya adwen bi dɛ, ‘Emidze mammbɔbɔ bra. Mfaso biara nnyi mo do.’ Nsusui a ɔtse dɛm mu biara kyerɛ dɛ innyi ndzɛmba ho adwempa.

Kõ Tsia Ndzɛmba Ho Adwen A Ɔnntsen

Ibesi dɛn akõ etsia ndzɛmba ho adwen a ɔnntsen? Adze a odzi kan a no ho hia papaapa nye dɛ ibohu dɛ adwen a ɔtse dɛm no nnyɛ adwempa. Dza odzi hɔ bio nye dɛ ebɔkõ etsia. Fa adwempa susu siantsir a wɔammfa wo wɔ edwuma no mu hɔ no ho. Dɛ mfatoho no, aso ɔyɛ nokwar dɛ wɔammfa wo wɔ edwuma no mu osiandɛ obiara mmpɛ dɛ ɔbɛfa wo wɔ n’edwuma mu ntsi a? Anaaso dɛ nna edwumawura no rohwehwɛ obi a ɔwɔ abɔdzin krataa fofor bi?

Sɛ edze w’adwen si nokwasɛm pɔtsee bi do a, ɔbɛma adwen a ɔnntsen a enya no ada edzi. Ana ho kwan kor a wo nsa annka no kyerɛ dɛ wɔdze wo yɛ hwee a ɔrennyɛ yie? Anaa ndzɛmba afofor bi so wɔ hɔ a ɔnodze itum yɛ no yie​—tse dɛ ndzɛmba a ɔfa Nyankopɔn no som ho, dza ɔfa w’ebusua anaa w’anyɛnkofo ho? Sũa dɛ ibeyi w’adwen efi ndzɛmba a ɔnntsen a isuro dɛ ɔbɛba daakye no do, na hu no dɛ ɔyɛ “biribi a oruhunahuna wo kɛkɛ.” Ntsi, aso ɔyɛ ampa dɛ irinnya edwuma nnyɛ araa da? Ibotum ayɛ pii dze edzi adwen a ɔnntsen do.

Nya Wo Botae Ho Adwempa

Ndaansa yi hɔn a wɔyɛ nhwehwɛmu no dze enyidado ho nkyerɛkyerɛmu bi a ɔyɛ enyigye ama, naaso enyidado ne fã bi pɛ na wɔakyerɛkyerɛ mu. Wɔkã dɛ enyidado kyerɛ dɛ ibotum edu wo botae ho. Dɛ mbrɛ asɛm a odzi hɔ no bɛma yehu no, enyidado kɔ ekyir sen gye a ebɛgye edzi dɛ ibotum edu wo botae ho, naaso nkyerɛkyerɛmu yi botum aboa wɔ akwan pii do. Enyidado ho nkyerɛkyerɛmu fã yi botum aboa hɛn ma yeenya adwempa wɔ hɛn botae ho.

Mbrɛ ɔbɛyɛ na yeenya gyedzi dɛ yebotum edu hɛn botae ho no, ɔsɛ dɛ yesũa dɛ yɛdze botae ahorow besisi hɛn enyiwa do na yɛbɔ mbɔdzen dɛ yebodu ho. Sɛ etse nka dɛ emmbɔ woho mbɔdzen wɔ iyi mu a, ɔbɛyɛ papa dɛ isusu botae ahorow a edze esisi w’enyiwa do no ho yie. Odzi kan, ebɛn botae mpo na edze esi w’enyiwa do? Ɔnnyɛ dzen koraa dɛ yɛbɛma hɛn daadaa asetsena mu nsɛm agye hɛn adwen abɔ do ma ntsi yerinnya ber mpo mmfa nnsusu dza yɛpɛ ankasa wɔ hɛn asetsena mu nye dza ohia hɛn ankasa ho. Ɔdze fa ndzɛmba a ohia papaapa a yɛdze hɛn adwen besi do ho no, Bible no kãa no yie wɔ mfe pii a abɛsen kɔ no dɛ: ‘Hom nsɔ ndzɛmba a ohia no nhwɛ.’​—Philippifo 1:​10.

Sɛ yenya hu ndzɛmba a ohia hɛn papaapa no a, ɔma ɔyɛ mberɛw dɛ yɛbɛpaw asetsena mu ndzɛmba etsitsir a yɛbɛyɛ wɔ Nyankopɔn no som mu, hɛn ebusua mu, hɛn edwuma mu, anaa skuul mu. Ɔyɛ papa dɛ ahyɛse no yɛremmfa botae pii nsisi hɛn enyiwa do, na mbom yɛbɛpaw dza yenyim dɛ yebotum edu ho. Sɛ yɛpaw botae a ɔyɛ dzen dɛ yebodu ho a, obotum dze dadwen abɔto hɛn do ma hɛn abaw mu eebu. Dɛm ntsi, dza ɔyɛ papa nye dɛ yɛbɛkyekyɛ botae a ɔsõ no mu nkakraba na yaayɛ no nkakrankakra.

Ɔyɛ a wɔka asɛm bi wɔ Borɔfo kasa mu dɛ, “Sɛ ɔpɛ no wɔ hɔ a, ibotum ayɛ.” Ɔtse dɛ mbrɛ nokwasɛm bi wɔ asɛm yi mu. Ber a yɛdze botae etsitsir bi esisi hɛn enyiwa do no, ɔsɛ dɛ yɛbɔ mbɔdzen so dɛ yebodu ho. Yebotum ahyɛ hɛn bo a yesi no mu dzen aber a yesusu hia a hɛn botae ho hia, nye mfaso a yebenya efi mu ho no. Nokwasɛm nye dɛ, nsɛndzendzen dze, yebehyia bi, naaso ɔwɔ dɛ yebu no dɛ ɔyɛ akwansidze a yebotum edzi do, na ɔnnyɛ dza yerunntum nnyɛ ho hwee.

Naaso, ohia dɛ yehu akwan pɔtsee yebotum afa do edu hɛn botae ahorow ho. Nwoma kyerɛwfo C. R. Snyder yɛ obi a ɔahwehwɛ hia enyidado ho hia mu akɔ ekyir. Ɔdze afotu bi mae dɛ, ɔsɛ dɛ yɛhwehwɛ akwan pa a yɛbɛfa do edu hɛn botae bi ho. Ntsi sɛ yɛfa ɔkwan kor do na annyɛ yie a, nna yaafa ɔkwan fofor so do.

Snyder san so dze afotu mae dɛ, ɔwɔ dɛ yesũa dɛ yɛbɛyɛ nsakyer wɔ hɛn botae mu, na yɛdze afofor ahyɛ ananmu. Sɛ ɔyɛ ampa dɛ yerunntum nndu hɛn botae bi ho, na sɛ yɛhaw hɛnho wɔ ho a, obobu hɛn abaw mu. Naaso wɔ ɔkwan fofor do no, sɛ yɛdze botae bi a yebotum edu ho no hyɛ ananmu a, ɔbɛma yenya enyidado fofor.

Nhwɛdo bi wɔ Bible no mu a ɔboa hɛn a yɛtse asɛm yi ase. Nna ɔda Ɔhen David n’akoma do dɛ obesi asɔrdan ama Jehovah ne Nyankopɔn. Naaso Nyankopɔn kãa kyerɛɛ David dɛ ne ba Solomon na obenya dɛm ho kwan no. Dɛ nkyɛ David bɛtse nka dɛ ne nsa esi famu no, ɔannyɛ dɛm. Mbom no, ɔsesaa no botae no. Ɔdze n’ahoɔdzen boaboaa sika nye ndzɛmba ahorow a ɔbɔsõ asɔrdan no ne si ano maa ne ba no.​—1 Ahemfo 8:​17-​19; 1 Mbermunsɛm 29:​3-7.

Sɛ mpo yɛbɔ hɛnho mbɔdzen kõ tsia abagura na yenya adwempa wɔ hɛn botae ho a, ɔrennyɛ mberɛw dɛ yebenya enyidado. Ebɛnadze ntsi a? Asɛm no nye dɛ, ndzɛmba pii a obu hɛn abaw mu a ɔwɔ wiadze yi mu no, yerunntum nnyɛ ho hwee. Sɛ yɛdwendwen ɔhaw akɛse a abɔsoɛ adasamba do tse dɛ ohia, akodzi, atsɛnkyew, yarba a adɔɔ sõ nye owu ho a, ɔbɛyɛ dɛn na yeenya enyidado?

[Mfonyin]

Sɛ wɔammfa wo wɔ edwuma bi mu a, ebɛkã dɛ irinnya edwuma biara nnyɛ da anaa?

[Mfonyin]

Ɔhen David daa no edzi dɛ sɛ obi runntum nndu no botae bi ho a, obotum ayɛ nsesa wɔ mu