Bible No Sesa Nyimpa N’abrabɔ

EBƐNADZE na ɔbarimba bi a ofi Scotland hun dɛ ohia koraa kyɛn edwuma a sika wɔ mu? Ebɛnadze na ɔboaa ɔbarimba bi a ɔwɔ Brazil ma ogyaa bra bɔn nye cocaine a n’ano yɛ dzen nom? Osii dɛn na ɔbarimba bi a ɔwɔ Slovenia gyaa nsãwe? Kenkan dɛm mbarimba yi hɔn anomu nsɛm.

“Nna Ɔtse Dɛ Mbrɛ M’asetsena Rokɔ Yie.”​—JOHN RICKETTS

AFE A WƆWOO NO: 1958

ƆMAN A OFI MU: SCOTLAND

DZA NNA ƆYƐ: GUADZINYI A ƆWƆ SIKA PII

ME NKAN ABRABƆ: Wɔwoo me too ebusua a wodzi yie mu. Nna me papa yɛ Britain sogyanyi panyin. Ntsi, nna hɛn ebusua no taa tu kwan kɛtsena aman afofor do. Scotland da nkyɛn a, beebi a yɛtsenae no bi nye England, Germany, Kenya, Malaysia, Ireland, nye Cyprus. Midzii mfe awɔtwe no, mokɔr bɔɔden skuul wɔ Scotland. Ekyir yi, Cambridge University na mukowiee skuul.

Midzii mfe 20 no, mehyɛɛ ase yɛɛ edwuma dɛ obi a odzi fango ho gua. Mehyɛɛ ase wɔ South America, na ekyir yi mikefir Africa. Ewiei koraa no, edwuma yi dze me baa Australia Anee afamu. Mokɔr Australia no, mubuei edwuma bi wɔ hɔ. Naaso, ekyir yi motɔnee.

Motɔnee edwuma no, minyaa sika kɛse. Ntsi mebaa pɛnhyɛn ber a medzi mfe 40. Medze ber pii a minyae no tutuu akwan. Medze moto kyinkyiin Australiaman no mu nyina mpɛn ebien. Afei so, mikyinkyiin wiadze nyina. Nna ɔtse dɛ mbrɛ m’asetsena rokɔ yie.

MBRƐ BIBLE NO SESAA M’ABRABƆ: Ansaana mankasa mereba pɛnhyɛn mpo no, nna mepɛ dɛ mohwehwɛ ɔkwan bi a mebɛfa do ada Nyankopɔn ase wɔ asetsena pa a mowɔ mu no ho. Mokɔr Anglican Asɔr, osiandɛ ɔsom a ɔtse dɛm na wɔtsetsee me wɔ mu. Naaso, nna hɔn nkyerɛkyerɛ dodow no ara mmfi Bible mu. Afei, menye Mormonfo sũaa adze. Nna wɔmmfa Bible no nnyɛ edwuma, ntsi migyaa hɔn ekyirdzi.

Da kor bi, Jehovah Adasefo bɔbɔɔ m’abow mu. Wɔnye me bɔɔ nkɔmbɔ, na annkyɛr koraa na muhun dɛ wɔdze hɔn nkyerɛkyerɛ nyina gyina Bible no do. Kyerɛwsɛm kor bi a wɔnye me susuu ho nye 1 Timothy 2:​3, 4. Dɛm kyerɛwsɛm yi kã dɛ, Nyankopɔn ne pɛ nye dɛ “wɔbɛgye nyimpa nyina nkwa, na wɔba nokwar no ho nyimdzee mu.” M’enyi gyee dɛ Adasefo no sii do dua dɛ ɔnnyɛ nyimdzee kɛkɛ na ohia, na mbom nyimdzee a odzi mũ a ofi Bible mu.

Bible a Jehovah Adasefo nye me sũae no maa minyaa dɛm nyimdzee a odzi mũ no. Dɛ nhwɛdo no, mubohun dɛ Nyankopɔn na Jesus nnyɛ Baasakor. Nkyerɛkyerɛ a innhu ne tsir, na innhu ne nan no. Mbom, ɔsor hɔn mu biara. (John 14:28; 1 Corinthfo 11:3) M’enyi gyee paa dɛ muhun nokwasɛm a no mu da hɔ a ɔtse dɛm. Naaso, ɔyɛɛ me yaw papaapa dɛ mesɛɛ mber pii wɔ nkyerɛkyerɛ a ntseasee biara nnyim, na etse ase a ɔnnyɛ yie no ho!

Annkyɛr na mehyɛɛ ase kɔr Jehovah Adasefo asafo nhyiamu. Muhun dɛ nna wɔpɛ obiara asɛm na wɔbɔ bra pa so. Ehwɛ hɔn a, ebɔdwen dɛ wɔmmfom mpo. Iyi kaa m’akoma papaapa. Ɔdɔ mapa a ɔwɔ hɔn ntamu no maa muhun dɛ hɔn som nye nokwar som.​—John 13:35.

MBRƐ MENYA DO MFASO: Wonumaa me, na ɔno ekyir no, mihyiaa ɔbaa papabi a wɔfrɛ no Diane. Wɔtsetsee no dɛ Jehovah Dasefo. Nna ɔwɔ suban papa pii a m’enyi gye ho. Mber bi ekyir no, yɛwaree. Diane nye me atsena kama, na mbrɛ oesi aboa me no ama menya Jehovah ne nhyira.

Menye Diane nyaa ɔpɛ pa dɛ yebotu akɔ beebi a wohia asɛmpakafo pii na yaakɛyɛ asɛnka edwuma no wɔ hɔ. Afe 2010 mu no, yetui kɔr Belize, Central America. Yɛbaa ha no, yɛkã asɛm no kyerɛ nkorɔfo a wɔdɔ Nyankopɔn na hɔn enyi aber dɛ wobosũa Bible no.

Nyankopɔn nye n’Asɛm mu nokwasɛm a mehu no ama menya asomdwee mapa. Ber nyina som edwuma a mereyɛ no ama menya enyigye dɛ mebɛkyerɛkyerɛ nkorɔfo Bible no. Biribiara nnyi hɔ a ɔyɛ enyigye kyɛn dɛ ibohu dɛ Bible mu nokwar no resesa nkorɔfo abrabɔ, dɛ mbrɛ ɔsesaa m’asetsena no. Afei dze, mehu ɔkwan pa mebɛfa do ada Nyankopɔn ase wɔ asetsena pa mowɔ mu no ho.

“Wɔmaa Muhun Dɛ Wɔdwen Moho Papaapa.”​—MAURÍCIO ARAÚJO

AFE A WƆWOO NO: 1967

ƆMAN A OFI MU: BRAZIL

DZA NNA ƆYƐ: NNA ƆBƆ NDWAMANBRA

ME NKAN ABRABƆ: Wɔtsetsee me wɔ Avaré, ɔyɛ kurow ketseaba bi a ɔwɔ São Paulo. Hɔn a wɔtse hɔ no mu dodow no ara yɛ edwumayɛfo.

Me papa wui ana me maame rowo me. Ber a meyɛ banyimba no, sɛ me maame nnyi fie a, nna ɔyɛ a mehyɛ ne ntar. Nna meyɛ moho banyin-basia, ntsi nna nkorɔfo susu dɛ meyɛ obi a menye mbarimba da. Ekyir yi, mehyɛɛ ase nye mbanyimba nye mbarimba a hɔn enyi efir dedae.

Ber a midzii mfe bɛyɛ 20 no, nna mohwehwɛ mbarimba nye mbaa a menye hɔn bɛda wɔ beebiara a mobɔkɔ no​—dɛ ɔyɛ bar, disko, anaa mpo asɔrdan mu. Sɛ odu afahyɛ ber a, nkorɔfo pii bɔ ngua, na skuulfo saw wɔ ase. Nna misiesie moho dɛ ɔbaa kɔ kɛsaw bi. Nna nkorɔfo nyim me papaapa.

Nna m’anyɛnkofo binom yɛ mbarimba a wɔnye mbarimba da, tuutuufo, nye hɔn a wɔnom ndubɔn. Hɔn mu binom piapiaa me ma monoom cocaine a n’ano yɛ dzen. Odur beebi no, nna ɔaka mo hɔ. Ɔtɔ da a, nna monom ndubɔn anadwe mũ nyina. Ɔtɔ da bi so a, metsew moho kɛhyɛ beebi nom cocaine da mũ nyina. Mofɔnee araa ma nna nkorɔfo kekã dɛ menya AIDS.

MBRƐ BIBLE NO SESAA M’ABRABƆ: Dɛm ber no mu ara na mihyiaa Jehovah Adasefo. Wɔmaa muhun dɛ wɔdwen moho. Bible mu asɛm a wɔkenkanee kyerɛɛ me no mu kor nye Romefo 10:​13. Hɔ kã dɛ: “Obiara a ɔbɔbɔ [Jehovah] ne dzin no obenya nkwa.” Dɛm nsɛm yi maa muhun dɛ ohia dɛ medze Jehovah ne dzin yɛ edwuma. Mpɛn pii no, sɛ monom cocaine anadwe mũ nyina a, mubue mo ntokura, na mema m’enyi do hwɛ sor dze nyinsu bɔ mpaa serɛ Jehovah dɛ ɔmboa me.

Ber a muhun dɛ ndubɔn a medze resɛɛ moho no ama me maame ridzi awerɛhow no, meyɛɛ m’adwen dɛ mibegyaa nom. Annkyɛr koraa na mepeen do dɛ Jehovah Adasefo nye me nsũa adze. Wɔmaa minyaa awerɛhyɛmu dɛ adzesua no bɛhyɛ me dzen ma meegyaa ndubɔn nom. Ampaara, ɔboaa me so!

Ber a mugu do rusũa Bible no, mubohun dɛ ɔwɔ dɛ mesesa mo suban. Nna ɔyɛ dzen ma me papaapa dɛ mibegyaa dɛ menye mbarimba bɛda, osiandɛ nna mayɛ akyɛr. Adze kor a ɔboaa me nye dɛ mesesaa ndzɛmba mu. Motwee moho fii m’anyɛnkofo dadaw no hɔnho, na migyaa dɛ mobɔkɔ disko nye beebi a wɔnom nsã.

Nokwasɛm nye dɛ, nna ɔnnda famu dɛ mebɛyɛ nsesa a ɔtse dɛm. Naaso, ber a muhun dɛ Jehovah dwen moho na ɔtse me ase no, ɔkyekyee mo werɛ papaapa. (1 John 3:​19, 20) Odur afe 2002 no, nna megyaa mbarimba a menye hɔn da no nyina. Dɛm afe no ara mu na wonumaa me ma mebɛyɛɛ Jehovah Adasefo no mu kor.

MBRƐ MENYA DO MFASO: Nsakyer ahorow a meyɛe no, me maame n’enyi gyee ho papaapa ma ɔno so hyɛɛ ase nye Adasefo no sũaa adze. Awerɛhosɛm nye dɛ, ofitsi dɛm aber no reba no, ɔayar ma ne fã adwedwe. Naaso, ɔdɔ a ɔwɔ ma Jehovah nye Bible mu nokwar no gu do reyɛ kɛse.

Mfe awɔtwe a abɛsen kɔ no, medze moho ahyɛ ber nyina som edwuma no mu, na medze me ber piinara kyerɛkyerɛ nkorɔfo Bible no. Nokwasɛm nye dɛ, ɔtɔ da a, akɔndɔ bɔn a ɔmmfata tum ba mo mu. Naaso, dza ɔma me ahoɔdzen nye dɛ, mehu dɛ sɛ mammfa m’adwen eennsi dɛm akɔndɔ bɔn no do a, Jehovah n’enyi bɛgye moho.

Jehovah a m’atwe abɛn no nye bra a mobɔ a ɔsɔ n’enyi no ama nkorɔfo bu me. Ndɛ, mubotum dze me nsã esi mobo akã dɛ mowɔ enyigye.

“Nna Meyɛ Nsãwe Mu Okunyin.”​—LUKA ŠUC

AFE A WƆWOO NO: 1975

ƆMAN A OFI MU: SLOVENIA

DZA NNA ƆYƐ: NNA ƆWE NSÃ PAA

ME NKAN ABRABƆ: Wɔwoo me wɔ Slovenia ahenkurow Ljubljana. Nna m’enyi gye wɔ mo mbofraber mu. Naaso, aber a midzii mfe anan no, me papa kum noho. Awerɛhosɛm yi ekyir no, nna ɔwɔ dɛ me maame yɛ edwumadzen dze hwɛ emi nye me brɛda panyin.

Midzii mfe 15 no, mekɛtsenaa me nanabasia nkyɛn. Mekɛtsenaa ne nkyɛn no, m’enyi gyee paa, osiandɛ nna m’anyɛnkofo pii tse bɛn beebi a ɔtse no. Nna mutum yɛ dza mepɛ kyɛn aber a metse me maame nkyɛn no. Midzii mfe 16 no, mehyɛɛ ase dze moho bɔɔ nkorɔfo a wɔwe nsã wɔ dapɛn no n’ewiei biara mu. Migyaa me tsir do nhwi ma ofuuw tsentsenntsen, na mehyɛɛ ase siesiee moho dɛ otuatsewfo. Ekyir yi, mehyɛɛ ase noom sigarɛt.

Mosɔɔ ndubɔn pii hwɛe, naaso nsãnom na ɔkaa mo hɔ osiandɛ, nna nsã yɛ me dɛw. Ahyɛse no, nna monom nsã no nkakrankakra, naaso owiee ase no, nna mutum nom bor bɔdambɔ kor. Sɛ mobow dɛn ara mpo a, nna ɔyɛ dzen dɛ obi bohu. Nna adze a nkorɔfo taa dze hu dɛ manom nsã yɛ nka a ofi m’anomu ba no. Ɔno mpo no, obiara nnkotum ehu dɛ manom wenyin anaa beer mbɔdambɔ beberee a wɔdze vodka afora!

Mpɛn pii no, sɛ yɛkɔ disko kɔnom nsã a, emi na moboa m’anyɛnkofo ma wotum nantsew. Naaso ebɔhwɛ no, nna manom nsã no beberee koraa kyɛn hɔn. Da kor bi, metsee dɛ me nyɛnko bi rekã dɛ meyɛ nsãwe mu okunyin. Slovenia kasa mu no, sɛ wɔkã biribi dɛm fa obi ho a, ɔkyerɛ dɛ, sɛ ewe nsã kyɛn no a, wɔbɛkyer wo ato mu. Dɛm asɛm yi twaa me yamu dɛ sekan.

Mehyɛɛ ase susuu ɔbra a morobɔ no ho. Mebɛtsee nka dɛ mennsɛ hwee koraa. Minyaa adwen dɛ biribiara a meyɛ wɔ m’asetsena mu no nnka hwee.

MBRƐ BIBLE NO SESAA M’ABRABƆ: Dɛm aber yi mu no, muhun obi a menye no kɔr skuul a no suban asesa ma ɔabɛyɛ obi a ɔdwe. Nna moho per me dɛ mubohu dza ama wɔayɛ nsãkyer a ɔtse dɛm. Ntsi, menye no kɛtsenaa beebi bɔɔ nkɔmbɔ. Ɔkãa kyerɛɛ me dɛ ɔnye Jehovah Adasefo ahyɛ ase rusũa Bible. Ɔkãa dza oesũa no bi ho asɛm kyerɛɛ me. Dza ɔkãe no, nna menntsee ho asɛm da, osiandɛ nna monnkɔr asɔr biara da. Mehyɛɛ ase kɔr Adasefo no hɔn asafo nhyiamu no bi na wɔnye me sũaa adze.

Bible a musũae no maa muhun nokwasɛm a tum wɔ mu a ɔkã akoma. Dɛ nhwɛdo no, musũae bohun dɛ yɛtse ber a Bible no frɛ no “nda a odzi ekyir” mu. (2 Timothy 3:​1-5) Afei so, mubohun dɛ Nyankopɔn beyi ndzebɔnyɛfo efi asaase do na ɔaama atseneneefo atsena Paradise wɔ asaase do daa. (Ndwom 37:29) Mibenyaa ɔpɛ pa dɛ mebɛyɛ nsesa wɔ m’asetsena mu mbrɛ ɔbɛyɛ a menye atseneneefo a wɔtse dɛm bɛtsena.

Mehyɛɛ ase kãa dza murusũa no ho asɛm kyerɛɛ m’anyɛnkofo. Hɔn mu piinara dzii moho fɛw, naaso iyi boaa me wɔ kwan bi do. Dza wɔyɛe no boaa me ma muhun dɛ wɔnnyɛ anyɛnkofo apapa. Afei so, mubohun dɛ anyɛnkofo binom a menye hɔn bɔ pampee no, ɔma mowe nsã dɛ biribi no. Dapɛn mũ no nyina, dza wɔda dwen ho ara nye dɛ dapɛn no nkɔ ewiei ama wɔaawe nsã abow.

Menye dɛm nkorɔfo yi twaa anyɛnkofa mu, na mepɛɛ anyɛnkofo apapa a wɔyɛ Jehovah Adasefo. Moho a medze bɔɔ hɔn no hyɛɛ me nkuran papaapa, osiandɛ nna wɔyɛ nkorɔfo a wɔdɔ Nyankopɔn ankasa. Afei so, nna wɔdze Nyankopɔn ne mbra bɔ hɔn bra. Nkakrankakra no, mutumii gyaa nsã a nna monom bow no.

MBRƐ MENYA DO MFASO: Meda Jehovah ase papaapa, osiandɛ seseiara onnhia dɛ monom nsã ama m’enyi aagye. Sɛ mokɔr do bɔɔ me bra dɛ nkan no a, nkyɛ minnyim dza ɔbɔto me. Naaso, seseiara dze megye dzi paa dɛ mowɔ enyigye mapa wɔ m’asetsena mu.

Menya hokwan rosom wɔ Jehovah Adasefo edwumayɛbea a ɔwɔ Slovenia no mfe esuon nye yi. Jehovah a mehu no na morosom no no ama menya enyigye mapa wɔ m’asetsena mu.