Bible Mu Nsɛmbisa A Woebua
Aso Nyankopɔn botum dze hɛn bɔn akyɛ hɛn?
Yebotum enya Nyankopɔn n’enyim adom, na iyi ne yɛ nnyɛ dzen dodoodow
Bible no ma yehu dɛ nyimpa nyina yɛ ndzebɔnyɛfo. Adam a ɔyɛ nyimpa a odzi kan no bɔn no aka hɛn nyinara. Osian iyi ntsi, ɔtɔ da a yɛyɛ ndzɛmba bɔn; na ekyir yi ebɔhwɛ no nna yeenu hɛnho. Nyankopɔn ne Ba Jesus Christ bowui dze tuaa hɛn bɔn ho kaw maa hɛn. Osian Jesus no werdam afɔrbɔ no ntsi, yebotum enya bɔnfakyɛ. Werdam no yɛ akyɛdze a ofi Nyankopɔn hɔ.—Kenkan Romefo 3:23, 24.
Nyimpa binom ayɛ bɔn akɛse, ntsi wonntum nnhu dɛ sɛ Nyankopɔn botum dze hɔn bɔn akyɛ hɔn mpo a. Enyigyesɛm nye dɛ, Nyankopɔn n’Asɛm kã dɛ: “Ne Ba Jesus Christ bɔgya no tsew hɛn ho fi bɔn nyina mu.” (1 John 1:7) Sɛ yenu hɛnho wɔ nokwar mu a, Jehovah befi ne pɛ mu dze bɔn akɛse a yɛayɛ no mpo akyɛ hɛn.—Kenkan Isaiah 1:18.
Ebɛnadze na ɔwɔ dɛ yɛyɛ ama Nyankopɔn dze hɛn bɔn akyɛ hɛn?
Sɛ yɛpɛ dɛ Jehovah Nyankopɔn dze hɛn bɔn kyɛ hɛn a, ohia dɛ yesũa noho adze—ama yaatse n’akwankyerɛ, n’afotu, nye dza ɔhwehwɛ fi hɛn hɔ no ase. (John 17:3) Jehovah fi ayamuyie mu dze hɔn a wonu hɔnho wɔ hɔn bɔn ho na wɔbɔ mbɔdzen dɛ wɔbɛyɛ nsesa no hɔn bɔn kyɛ hɔn.—Kenkan Asomafo Ndwuma 3:19.
Yebotum enya Nyankopɔn n’enyim adom, na iyi ne yɛ nnyɛ dzen dodoodow. Jehovah tse hɛn mberɛwyɛ ase. Ɔyɛ mbɔbɔrhufo na ne yamu ye. Sɛ ehwɛ mbrɛ Jehovah n’adɔyɛ dɔɔ sõ no a, aso ɔmma innhu dɛ ɔwɔ dɛ isũa mbrɛ ibotum asɔ n’enyi no ho adze pii?—Kenkan Ndwom 103:13, 14.
