Wɔwoo me wɔ Acul, ɔyɛ kurow bi a wɔatsew no ho wɔ Guatemala n’anee afamu. Dɛm kurow yi wɔ koko do. M’ebusuafo yɛ Ixilfo a wofi Maya ebusuakuw no mu. Hɛn kurow mu kasa na wɔdze twaa mo mfunuma, naaso mesan so kã Spanish. Wɔwoo me no, annkyɛr biara na ɔkõ bi sii Guatemala. Ɔkõ no kɔr do mfe 36 na wokunkum Ixilfo beberee.

Midzii mfe anan no, awerɛhosɛm bi sii. Da kor bi, mo nua panyin a nna oedzi mfe esuon no kɛfaa topaa bi dɛ ɔdze ridzi agor, na ɔpaae. Iyi maa m’enyi furae; naaso mo nua no dze owui. Iyi ekyir no, wɔdze me kɔtoo enyifurafo skuul bi mu wɔ Guatemala City ma mukosũaa Braille akenkan. Skuul no mu edwumayɛfo no kãa dɛ, mma skuulfo nkaa no nnye me mmbɔ. Ampaara so skuulfo yii me baako hyɛɛ me nsa. Siantsir a edwumayɛfo no yɛɛ dɛm no dze, minnyim. Iyi maa meyɛɛ ankonam. Afe biara nna yɛma kwan a yekedzi abosoom ebien wɔ fie, ntsi sɛ mowɔ skuul a, nna me yamu araa nkyɛ yɛama kwan ma maakɔ me maame hɔ. Nna me maame wɔ abadaa na ɔpɛ m’asɛm so. Naaso, awerɛhosɛm nye dɛ, midzii mfe du no, me maame wui gyaa mo hɔ yayaayaw. Obi a ɔdɔ me paa na oewu yi, ntsi afei dze nna mo wiadze nyina asã!

Midzii mfe 11 no, mesaan kɔr mo kurow mu, na mekɛtsenaa me papa ne ba bi nye n’ebusua hɔn nkyɛn. Wɔdze dza nna mihia wɔ asetsena mu nyina maa me, naaso enyigye a wɔfrɛ no enyigye dze, nna minnyi bi. Ɔtɔ da a, nna musũ gu Nyankopɔn do dɛ: “Ebɛnadze ntsi na me maame wui? Ebɛnadze ntsi na m’enyi efura?” Nkorɔfo kãa kyerɛɛ me dɛ Nyankopɔn na ɔama iyinom nyina atoto me. Mibenyaa adwen dɛ Nyankopɔn nndwen nyimpa ho. Odur beebi no, minyae a nkyɛ nna mewu efi wiadze, ntsi nna mepɛ dɛ muku moho.

Osiandɛ nna m’enyi efura ntsi, nna m’asɛm yɛ mbɔbɔr dɛ. Ber a nna meyɛ banyimba no, nkorɔfo too me mbɔndar mpɛn pii, naaso mannkã ho asɛm annkyerɛ obiara​—nna ɔyɛ me dɛ sɛ mekã mpo a, obiara remmfa nnyɛ asɛm. Nna m’asɛm mmfa obiara ho, ntsi nna meyɛ dzinndzinn. Da biara nna mo werɛ ahow; afei so nna menngye obiara nndzi ntsi nna mennka nnkɔ nyimpa mu.

Da kor bi, aber a nna yeridzi agor wɔ skuul no, Jehovah Adasefo awarfo bi baa me nkyɛn. Dɛm aber no nna medzi mfe 13. Me kyerɛkyerɛnyi bi a nna m’asɛm yɛ no mbɔbɔr na ɔkãa moho asɛm kyerɛɛ Adasefo no. Adasefo no kãa kyerɛɛ me dɛ, Bible no abɔ anohoba dɛ ber bi bɛba a ewufo bɔsoɛr na enyifurafo so bohu adze. (Isaiah 35:5; John 5:​28, 29) M’enyi gyee nsɛm a wɔkãe no ho naaso menntum nye hɔn ammbɔ nkɔmbɔ, osiandɛ nna kasa yɛ me dzen. Naaso, ɔmmfa ho mbrɛ nna metse no hɔn abaw mu emmbu, mbom wonyaa moho abotar na wɔkɔr do nye me sũaa Bible no. Nna awarfo no fow nkoko twa kwan bɔbor kilomita 10 (akwansin 6) ba mo kurow mu bɛkyerɛkyerɛ me.

Mo nua a nna menye no tse no kãa kyerɛɛ me dɛ, Adasefo no siesie hɔnho kama eso sɛ ehwɛ hɔn so a wonnyi bi. Naaso aber biara a nna wɔbɛba me nkyɛn no, nna wɔkyɛ me adze. Muhun dɛ sɛ wɔnnyɛ nokwar Christianfo a nkyɛ wɔrennyɛ dɛm.

Wɔmaa me Bible ho nwoma bi a wɔayɛ no Braille, na ɔno na medze sũaa Bible no. Ɔwɔ mu dɛ nna metse dza murusũa no ase dze, naaso nna ɔyɛ dzen ma me dɛ mebɛgye ato mu. Adze kor a nna ɔyɛ dzen ma me dɛ mebɛtse ase nye dɛ, Nyankopɔn dwen moho, na nkorɔfo so dwen moho dɛmara. Mubohun siantsir a Jehovah ama amandzehu ho kwan no, naaso nna ɔyɛ dzen ma me dɛ mebɛgye ato mu dɛ ɔyɛ Egya bi a ɔdɔ me ankasa. *

Bible no a musũae no boaa me, na nkakrankakra mesesaa m’adwen. Mubosũae hunii dɛ amandze a nkorɔfo ruhu no yɛ Nyankopɔn mbɔbɔr papaapa. Aber bi a nna nkorɔfo retseetsee Nyankopɔn n’asomfo no, ɔkãa dɛ: ‘Ampaara mehu me man hɔn amandzehu; na minyim hɔn awerɛhow.’ (Exodus 3:7) Mubohun dɛ Jehovah wɔ su pa ahorow pii, na iyi kaa me ma mihyiraa mo nkwa do. Wɔ afe 1998 mu no, wonumaa me ma mebɛyɛɛ Jehovah Dasefo.

Wonumaa me bɛyɛ afe kor ekyir no, mokɔr enyifurafo skuul bi wɔ Escuintla. Mowɔ mo kurow mu no, m’asafo mu panyin bi hun dɛ meberɛ ana metum akɔ Christianfo nhyiamu. Asɛm no nye dɛ, nna asafo a ɔbɛn me paa no wɔ koko bi do, beebi a nna Adasefo awarfo no a wɔba me nkyɛn no fi ba. Nna hɔ no kɔ nnda famu. Ntsi m’asafo mu panyin no yɛɛ nhyehyɛɛ bi dze boaa me paa. Ɔkãa moho asɛm kyerɛɛ ebusua bi a wɔyɛ Jehovah Adasefo wɔ Escuintla, na hɔn so peen do dɛ wɔbɛgye me atsena hɔn fie na wɔboaa me ma mutumii kɔr asafo nhyiamu dabaa. Ndɛ a merekasa yi, meda ho ara nye dɛm ebusua no tse, na wɔnye me tse dɛ hɔn busuanyi.

Sɛ mekã dɛ merekã ɔdɔ a asafo no mufo ada no edzi akyerɛ me no ho asɛm a, nkyɛ adagyer bɔbɔ me. Mohwɛ dza mo nuanom yi ayɛ ama me no a, asɛm a mubotum akã ara nye dɛ, Jehovah Adasefo yɛ nokwar Christianfo na ɔyɛ me dɛw dɛ meka hɔnho.​—John 13:34, 35.

Sesei menntse nka dɛ mfaso biara nnyi mo do anaadɛ minnyi enyidado biara bio, mbom no metse nka dɛ meka nyimpa ho. Menya tsirmpɔw papabi wɔ m’asetsena mu. Bible nkyerɛkyerɛ edwuma a Jehovah Adasefo yɛ no, mara so medze me ber pii reyɛ bi. Mekyerɛkyerɛ nkorɔfo Bible mu nokwar no, ntsi memmfa m’adwen nnsi m’enyi a w’efura no do bio koraa. Afei so, meyɛ asafo mu panyin wɔ asafo a mowɔ mu no mu, na mema ɔkasa kyerɛkyerɛ Bible no mu kyerɛ asafo no mufo no. Ehyiadzi akɛse a yɛyɛ ma nyimpa mpempem pii ba bi no, minya ho kwan ma ɔkasa dze kyerɛkyerɛ Bible no mu wɔ ase.

Wɔ afe 2010 mu no, mokɔr Asomfo Ntsetsee Skuul (seseiara wɔfrɛ no Ahendzi Asɛmpakafo Skuul) wɔ El Salvador. Dɛm skuul yi boaa me ma muhun mbrɛ mebɛyɛ m’edwuma yie wɔ asafo no mu. Afei so, skuul no tsetsee me paa, na ɔmaa mubohun dɛ Jehovah Nyankopɔn dɔ me na moho hia no. Ɔno na obotum atsetse obiara dze no edzi dwuma.

Jesus kãa dɛ: “Ɔma yɛ nhyira kyɛn ɔgye.” (Asomafo Ndwuma 20:35) Ndɛ, mubotum akã dɛ m’enyi gye paa, na mennsusu da dɛ emi paa mubotum aboa nkorɔfo. Naaso hwɛ dɛ ndɛ mutum boa nkorɔfo na mekyerɛkyerɛ hɔn!