Minyinii wɔ Puerto Limón, ɔyɛ kurow bi a ɔda mpoano wɔ Costa Rica no boka afamu. Me papa nye me maame woo mba awɔtwe. Emi na motɔ do esuon. Me papa wui no, nna medzi mfe awɔtwe. Iyi ekyir no, me maame nkotsee na ɔtsetsee emi na mo nuanom no nyina.

Aber a misii do no, dza medze sii m’enyi do ara nye baseball. Meyɛ abofra no nna m’enyi gye ho papaapa. Wɔaka kakra ma meedzi mfe 20 no, mokɔdɔm baseball kuw bi. Aber a midzii mfe 20 nye kakra no, obi a ɔhwehwɛ nkorɔfo a wonyim baseball bɔ kãa kyerɛɛ me dɛ ɔpɛ dɛ ɔnye me kɛka Nicaragua baseball kuw bi ho. Naaso dɛm aber no, nna me maame nntse apɔw; na osiandɛ nna emi na mohwɛ no ntsi no, nna memmpɛ dɛ megya no hɔ kɛtsena Nicaragua, ntsi mannkɔ. Iyi ekyir no, obi fofor so bɛkãa kyerɛɛ me dɛ ɔnye me bɔkɔ ma maakɔbɔ ama Costa Rica ɔman no ne baseball kuw no. Hɔn a nna wɔwɔ dɛm kuw yi mu no nyinaa yɛ hɔn a nna wɔbɔ baseball dze gyegye hɔn enyi kɛkɛ. Dɛm aber yi dze, megyee too mu dɛ mobɔbɔ. Mobɔe maa ɔman no fi 1949 kesi 1952. Wɔnye me kɔr mbea ahorow bi tse dɛ Cuba, Mexico, na Nicaragua ma mekesii akan. Nna meka hɔn a agor no gyina hɔn do paa no ho, na nna minyim bɔ yie. Mutumii sii akan 17 toatoaa do a menndzi mfomdo biara. Sɛ bɔhwɛadzefo bɔ gye mo do a, nna me tsir ahon dei!

Awerɛhosɛm nye dɛ mehyɛɛ ase dɛ murubu bra bɔn so. Ɔwɔ mu, nna mowɔ mpona kortsee dze, naaso nna metaa nye mbaa afofor deda. Nna mowe nsã so ma wɔnngye. Da kor bi dze, mobowee araa ma adze kyee no, nna mennkaa kwan a mefaa do baa fie mpo! Agor bi a wɔfrɛ no domino so, nna medze tow kyakya. Afei, nna motwa loto.

Aber a morobɔ dɛm bra no, no mu ara na me maame bɛyɛɛ Jehovah Dasefo. Ɔbɔɔ mbɔdzen biara dɛ ɔbɛma m’enyi abɛgye no som no ho. Naaso ahyɛse no dze, wɔannyɛ yie osiandɛ nna akansi no agye me tsir araa ma megye moho a, ɔnngye. Sɛ morobɔ baseball na sɛ ber sõ dɛ mikedzidzi mpo, nna menntse kɔm! Dza nna modwen ho ara nye baseball no. Nna mepɛ baseball kyɛn biribiara!

Naaso aber a midzii mfe 29 no, mipirae paa aber a nna morobɔ baseball. Dza ɔbae nye yi, meyɛe dɛ nkyɛ merekye bɔɔl bi, nanso wɔankɔ yie. Aber a moho tɔɔ me no, mammfa baseball annyɛ m’edwuma bio. Ne nyinaa ekyir no, nna meda ho ara dzi baseball ekyir. Hɔn a wɔbɔ baseball dze gyegye hɔn enyi wɔ mo mpotamu no, nna mekyerɛ hɔn bɔ.

Wɔ afe 1957 mu no, nna Jehovah Adasefo rebɛyɛ ehyiadzi bi wɔ agoprama bi a nna mobɔ baseball wɔ do no do. Wɔtoo nsa frɛɛ me ma mokɔr bi. Wɔ ehyiadzi no ase no, muhun mbrɛ Adasefo no tsena hɔ dzinn ritsie asɛm no. Naaso sɛ nkorɔfo rohwɛ baseball a dede nye ndzeyɛɛ a wɔyɛ no wɔ hɔ no, sɛ medze toto ho a, nna muhu dɛ Adasefo no yɛ soronko koraa. Dza muhunii no kaa m’akoma papaapa, ntsi mehyɛɛ ase dɛ menye Adasefo no rusũa Bible no na mehyɛɛ ase kɔr hɔn asafo nhyiamu ahorow no bi.

Bible nkyerɛkyerɛ no pii kaa m’akoma. Dɛ nhwɛdo no, Jesus kãa dɛ sɛ ewiei ber no dur a, n’ekyirdzifo bɛkã Nyankopɔn n’Ahendzi ho asɛmpa wɔ wiadze nyina. (Matthew 24:14) Mesanee bohun dɛ nokwar Christianfo nnkã Nyankopɔn asɛm no mmfa nngye sika. Jesus kãa dɛ: “Hom enya no kwa: hom mfa mma kwa.”​—Matthew 10:8.

Aber a mugu do rusũa Bible no, medze dza nna murusũa no totoo Jehovah Adasefo ho. Mbrɛ nna wɔyer hɔnho kã Nyankopɔn n’Ahendzi no ho asɛmpa wɔ wiadze nyina no, m’enyi sɔe paa. Jesus n’asɛm a ɔkãa kyerɛɛ Christianfo dɛ wonyi hɔn yamu nyɛ nkorɔfo papa no, muhun dɛ wɔdze reyɛ edwuma paa. Ntsi aber a mekenkaan Mark 10:21 na mubohun dɛ Jesus roto nsa afrɛ obiara dɛ “Bra bɛka mo do” no, meyɛɛ m’adwen dɛ mara so mebɛyɛ Ɔdasefo.

Ɔgyee mber kakra, naaso nkakrankakra no misii m’adwen pi na meyɛɛ nsakyer ahorow. Dɛ nhwɛdo no, ndaawɔtwe biara nna medze me “lucky” nɔmba twa loto. Meyɛɛ dɛm mfe pii, naaso Bible no boaa me ma mubohun dɛ hɔn a wɔsom “Isiar” nyame anaa nyame a ɔma nkorɔfo hɔn tsir yɛ yie, nye hɔn a hɔn enyi ber adze no, Nyankopɔn enyi nngye hɔnho. (Isaiah 65:11; Colossaefo 3:5) Ntsi misii gyinae dɛ mibegyaa kyakyatow. Aber a migyaa kyakyatow no, kwesida a odzi hɔ no ara na wɔbɔɔ me “lucky” nɔmba no! Nkorɔfo sereew me papaapa osiandɛ menntwa loto dɛm dapɛn no ntsi, na wɔdze guu mo do dɛ mensan nkotwa loto bio, naaso mannyɛ. Manntow kyakya bio wɔ m’abrabɔ mu.

Da a wonumaa me wɔ Jehovah Adasefo ehyiadzi bi ase no, mihyiaa ‘nyimpasu fofor’ a nna ɔwɔ dɛ mehyɛ no ho sɔhwɛ. (Ephesians 4:​24) Dɛm ewimbir no, aber a mudur hotel a nna meda no, muhun dɛ me mpona a me nye no egyaa mponatwe dada no gyina m’abow no ano. Ɔkãe kyerɛɛ me dɛ: “Sammy, ma yɛnkɛgye hɛn enyi!” Naaso, ntsɛm ara na miyii no ano dɛ, “Oho!” Mesan kãa kyerɛɛ no dɛ seseiara medze Bible a murusũa no na medze bɔ me bra. (1 Corinthfo 6:​18) Hɔ ara na ɔkãa dɛ: “Ese dɛn?” Ɔkekãa nsɛm bi dze kyerɛɛ dɛ, dza Bible no kã fa edwamambɔ ho no, onnhia dɛ medze yɛ edwuma. Ɔyɛe biara dɛ memma yɛnsan ntwe mpona. Naaso, mekɛhyɛɛ me dan mu too abow no mu. Ndɛ, m’enyi agye paa dɛ ofitsi afe 1958 a mebɛyɛɛ Ɔdasefo no, mennsan m’ekyir nkɔr bra bɔn a nna mowɔ mu no mu bio.

Sɛ mohwɛ mfaso a menya efi Bible a medze robɔ me bra no mu a, ɔyɛ me dɛ mubotum akyerɛw no ho buukuu mpo! Seseiara menya anyɛnkofo apapa pii, m’abrabɔ ayɛ papa na mowɔ nokwar enyigye so.

M’enyi da ho ara gye baseball ho, naaso ndzɛmba afofor wɔ hɔ a no ho hia me kyɛn ɔno. Baseball maa megyee dzin na minyaa sika so, naaso ne nyina ennkesi hwee. Naaso seseiara ebusuabɔ a menye Nyankopɔn na mo nuanom Christianfo wɔ no dze, ɔbɛtsena hɔ daa. Bible no kã dɛ: “Wiadze rutwa mu, nye n’akɔndɔ, na nyia ɔyɛ Nyankopɔn apɛdze no tsena hɔ daa.” (1 John 2:​17) Seseiara modɔ Jehovah Nyankopɔn nye no nkorɔfo kyɛn biribiara!