“Aber a musuar no, nna da biara mo nuabanyin panyin bor me na ɔhyehyɛ me ahorba. Mokɔwaree so a, m’asew basia so tseetsee me dɛmara. Ɔno na m’asew banyin nyinara nye me tsenae dɛ hɔn akowaa bi. Dza mefaa mu ntsi, nna ɔyɛ me dɛ munku moho.”—Madhu, a India.

 Ahyehyɛdze a ɔhwɛ wiadze nyinara apɔwmudzen nsɛm do (World Health Organization) ka dɛ, “Ayakayakadze a wɔdze yɛ ­mbasiafo no ebu do wɔ wiadze yi mu beebiara.” Wobu akontaa dɛ, sɛ edze mbaa baasa gyina hɔ a, wɔabor hɔn mu kor pɛn anaa wɔdze nda ho asɛm atseetsee no pɛn.

 Sɛ asɛm a yɛreka yi bi ato wo da a, annhwɛ a beebiara a ebɔkɔ no w’ahom rennka woho, na ɔbɛyɛ wo dɛ sɛ wɔannhyehyɛ wo ahorba a, wɔbɔbor wo, anaa mpo dɛ wɔdze nda ho asɛm bɛtseetsee wo. Osian ayakayakadze a wɔdze yɛ mbaa na atseetsee a wɔfa mu ntsi, bi a ibotum enya adwen dɛ nyimpa pii mmbu mbaa na wosusu dɛ hɔn ho nnhia. Naaso, Nyankopɔn so ɛ, mbaa ho hia no anaa?

 Kyerɛwsɛm: ‘Nyankopɔn bɔɔ hɔn ɔbanyin nye ɔbaa.’ —Genesis 1:27.

 Dza ɔkyerɛ: Nyankopɔn na ɔbɔɔ mbanyin na mbaa nyinara. Ohu mbaa na mbanyin nyinara dɛ wɔfata enyidzi. Ɔno da nkyɛn a, ɔhwɛ kwan dɛ okun “[bɔdɔ] nankasa ne yer dɛ mbrɛ ɔdɔ nankasa noho” no. Ɔmmpɛ dɛ okun bi hyehyɛ ne yer ahorba, ɔbor no, anaa ɔhyɛ no do. (Ephesusfo 5:33; Colossaefo 3:19) Ntsi biribiara kyerɛ dɛ, mbaa hɔn bambɔ ho hia Nyankopɔn paa.

 “Meyɛ abofra no, m’ebusuafo bi dze nda ho asɛm tseetsee me dze yɛɛ me adze gyangyan. Aber a midzii mfe 17 no so, m’edwumawura kaa kyerɛɛ me dɛ menye no nda, annyɛ dɛm a obeyi me edzi efi edwuma mu. Meyɛɛ panyin yi so, mo kun, m’awofo nye hɔn a menye hɔn tse mpɔtamu no so bu me dɛ mfaso biara nnyi mo do. Naaso ekyir yi, musuaa Ɔbɔadze Jehovah b no ho adze. Mehu dɛ obu mbaa paa. Ntsi mowɔ awerɛhyɛmu dɛ ɔdɔ me na onndzi moho agor koraa.”—Maria, Argentina.

 Kyerɛwsɛm: “Ɔnyɛnko bi wɔ hɔ a ɔfam ho kɛse sen onua.”—Mbɛbusɛm 18:24.

 Dza ɔkyerɛ: Sɛ obi yɛ wo nyɛnko paa a, nna ɔboa wo. Ntsi sɛ ehwɛ na enye obi a egye no dzi bɔ dza ɔhaw wo no ho nkɔmbɔ na ɔbɛma woho atɔ wo a, yɛ no dɛm.

 “Wosusuoo mo mu wɔ kwan a ɔmmfata do no, bɛyɛ mfe 20 twaa mu a nna mommbɔɔ do nnkyerɛɛ obiara. Ɔbaa no dɛm no, nna m’enyi nngye, meyɛɛ basaa na adwendwen hyɛɛ mo do. Naaso aber a minyaa obi ma otsiee me na mekaa dza ɔhaw me no ho asɛm kyerɛɛ no no, mara muhun dɛ m’ahom aka moho.”—Elif, Türkiye.

 Kyerɛwsɛm: “Hom ntow hom dadwen nyina nkyen [Nyankopɔn] do, osiandɛ ɔdwen hom ho.”—1 Peter 5:7.

 Dza ɔkyerɛ: Sɛ ebɔ mpaa a, Nyankopɔn tsie paa. (Ndwom 55:22; 65:2) Na osiandɛ ɔdwen wo ho ntsi, obotum aboa wo ma eehu dɛ ennyɛ nyimpa gyangyan.

 “Aber a musuaa Jehovah ho adze no, ɔboaa me ma nkakrankakra yaw a nna miridzi osian dza mafa mu no n’ano kɔr famu. Seseiara, mutum ka dza ɔhaw me biara ho asɛm kyerɛ Nyankopɔn. Ɔyɛ me nyɛnko, ntsi meka m’asɛm kyerɛ no a, ɔtse me ase paa.” —Ana, Belize.

 Kyerɛwsɛm: ‘Jehovah bobua egyanka na nyia wɔtseetsee no no asɛm, ama ɔdasanyi so a asaase yi ara na ofi mu no ho annyɛ hɔn hu bio.’—Ndwom 10:17, 18.

 Dza ɔkyerɛ: Ɔnnkɛkyɛr biara, Nyankopɔn beyi esisisɛm tse dɛ mbaa a wɔyɛ hɔn ayakayakadze na wɔtseetsee hɔn no nyinara efi hɔ.

 “Mehu dɛ ɔnnkɛkyɛr biara Jehovah beyi ayakayakadze a wɔdze yɛ mbaa na mbasiamba no efi hɔ. Iyi ama m’akoma atɔ me yamu, na wɔama m’asomu so adwe me.”—Roberta, Mexico.

 Bible no ma hɛn enyidado na yebotum agye bɔhyɛ ahorow a ɔwɔ mu no nyinara edzi. Sɛ epɛ dɛ ihu pii fa dɛm nsɛm yi nye kwan a Jehovah Adasefo nam Bible no do roboa nkorɔfo no ho a, ma obi nye wo mbɔbɔ Bible no mu nkɔmbɔ a irunntua hwee.

 Twe dza ibotum aprent.