“Ehum kɛse a otu, nsu a n’ano yɛ dzen a ɔtɔ, nye ndzɛmba pii a ɔkeka ho a osisi wɔ wiadze nyina no resɛɛ nyimpa pii hɔn efie na hɔn egyapadze. Osian nsesa a ɔaba wimu ntsi, abɔdze a ɔwɔ po mu so resɛɛ. Dza ɔrokɔ do yi ama nyimpa na mbowa nyina ho rekyer hɔn ma ɔnyɛ agor.”​—Inger Andersen, na ɔkaa asɛm yi wɔ July 25, 2023. Mpanyimfo a wɔwɔ Amanaman Nkabomu kuw no mu no, ɔka ho. Na hɔn a wɔhwɛ UN Environment Programme do no, ɔno na ɔda hɔn ano.

 Abɔdze a ɔresɛɛ yi, ehwɛ a aban mpanyimfo botum aka abomu na wɔayɛ ho biribi anaa? Wobotum ayɛ biribi dze etu haw no ase korakora?

 Bible no ma yehu dɛ, aban bi wɔ hɔ a obotum esiesie haw no koraa. Ɔka dɛ, “Ɔsor Nyankopɔn dze ahendzi bi bɛba,” na dɛm ahendzi no bedzi asase do tum na woesiesie ndzɛmba a ɔasɛɛ no. (Daniel 2:44) Dɛm ahendzi no ba pɛ, nyimpa ‘rennyɛ bɔn na wɔrennsɛɛ adze bio,’ iyi kyerɛ dɛ obiara rennyɛ ne nyɛnko bɔn na wɔrennsɛɛ asase no bio.​—Isaiah 11:9.