Wɔbɔɔ amandzɛɛ wɔ aman ahorow pii mu wɔ July 2022 mu dɛ, wimu ayɛ hyew paa na bi nnsii dɛm da. Amandzɛɛbɔ no bi nye yi:

•   “China aban no abɔ amamfo a wɔwɔ nkurow bɛyɛ 70 mu amandzɛɛ dɛ, wimu rebɛyɛ hyew paa wɔ hɔ. Mpɛn ebien nye yi na wɔdze amandzɛɛbɔ a ɔtse dɛm ato gua wɔ bosoom yi mu.”​—July 25, 2022, CNN Wire Service.

•   “Wimu ayɛ hyew paa wɔ Europe na sɛ ekɔ aman pii a ɔwɔ hɔ no do a, gya atotɔ kwaa ahorow no mu ma ɔrehyew paa.”​—July 17, 2022, The Guardian.

•   “Mbrɛ wimu yɛɛ hyew paa wɔ United States Kwesida yi dze, bi nnsii dɛm da. Na wɔ ɔman no no boka afamu, ne mfinimfin mantɔw mu, nye mbea ahorow bi a ɔwɔ n’anaafo afamu mpo dze, ɔnnyɛ agor koraa.”​—July 24, 2022, The New York Times.

 Ebɛnadze na dza orisisi nyina ma yehu? Aso ber bi bɛba a yerunntum nntsena asaase yi do a? Ebɛnadze na Bible no ka?

 Nyew. Ndzɛmba a Bible no kaa dɛ obesisi wɔ nda a odzi ekyir mu no yebotum aka dɛ wimu a ayɛ hyew paa no so ka ho. Jesus hyɛɛ nkɔm dɛ yebohu ‘ndzɛmba a ɔyɛ hu nye nsɛnkyerɛdze akɛse.’ (Luke 21:11) Wimu a ayɛ hyew paa no ama nyimpa pii suro dɛ annhwɛ a nyimpa ne ndzeyɛɛ bɛsɛɛ asaase yi.

 Oho. Nyankopɔn bɔɔ asaase yi dɛ nyimpa ntsena do afebɔɔ. (Ndwom 115:16; Ɔsɛnkafo 1:4) Nyankopɔn remma kwan mma nyimpa nnkɔ do araa nnsɛɛ asaase yi, mbom ɔahyɛ bɔ dɛ ‘ɔbɛsɛɛ hɔn a wɔsɛɛ asaase no.’​—Nyikyerɛ 11:18.

 Ma yɛnhwɛ ndzɛmba ebien bi so a Nyankopɔn aka dɛ ɔbɛyɛ wɔ hɛn asaase yi do:

•   “Sar do na asaase kɛsɛɛ do bɛyɛ enyigye; na sar pradada edzi ehurusi, na ɔahan dɛ nhyiren huanhuam.” (Isaiah 35:1, Baebor) Nyankopɔn remma asaase yi nnyɛ sar pradada a nyimpa nnkotum atsena do mbom obesiesie dza asɛɛ wɔ do biara.

•   “Ɔwo na esera asaase, na igugu do nsu, ɔwo ema no do adze dɔɔ so.” (Ndwom 65:9) Nyankopɔn bɛma hɛn asaase yi ayɛ paradise.

 Sɛ epɛ dɛ ihu pii fa mbrɛ wimu tsebea a ɔresɛɛ no ma Bible nkɔnhyɛ ba mu a, kenkan asɛm a wɔato dzin “Climate Change and Our Future​—What the Bible Says.”

 Bible no ma yehu dɛ Nyankopɔn abɔ anohoba dɛ obesiesie hɛn asaase yi. Sɛ epɛ dɛ ihu pii fa ho a, kenkan asɛm a wɔato dzin “Who Will Save the Earth?”