Nya botae bi. Susu ho hwɛ dɛ ana wo kasa no botae nye dɛ edze bɛkyerɛkyerɛ asɛm bi mu akyerɛ w’etsiefo no, ebɛma wɔagye biribi ato mu, anaadɛ edze bekenyan hɔn ma wɔaayɛ biribi, na afei siesie ɔkasa no ma ɔnye dɛm tsirmpɔw no nhyia. Hwɛ hu dɛ nsɛntsitsir no nyina bɔboa wo ma eedu dɛm botae no ho.

Si wo kasa no n’asɛntsir do dua. Wɔ wo kasa no mu nyinara, kɔ do si w’asɛntsir no do dua. Mbrɛ ɔbɛyɛ ma eetum ayɛ dɛm no, nkasafua etsitsir a ɔwɔ w’asɛntsir no mu no, ɔyɛ a si do bio anaa fa nkasafua afofor a ɔnye no dzi nsɛ dzi dwuma.

Ma wo nsɛntsitsir no mu nda hɔ na mma mma ɔnnyɛ pii. Sɛ erepaw nsɛntsitsir a ebɛkã ho asɛm a, dza ɔfa w’asɛntsir no ho a ibotum akyerɛkyerɛ mu yie wɔ ber a wɔdze ama wo no mu no, ɔno nkotsee na paw. Mma nnkã nsɛntsitsir pii ho asɛm. Kã asɛntsitsir biara ma no mu nda hɔ. Sɛ iwie asɛntsitsir bi a, tweɔn kakra ana akɔ fofor do. Sɛ ifi asɛntsitsir bi do rokɔ fofor do a, kã biribi ma ɔntoa mu fɛfɛɛfɛw.