1, 2. Ebɛn asɛm na ɔsɛ dɛ ibisa woho, na ebɛnadze ntsi na ohia?

BIBLE a esũa no ama ehu dɛ, nyimpa pii na wɔkã dɛ wɔsom Nyankopɔn, naaso hɔn nkyerɛkyerɛ nye hɔn ndzeyɛɛ yɛ dza Nyankopɔn kyir. (2 Corinthfo 6:17) Dɛm ntsi na Jehovah ahyɛ hɛn dɛ, yemfi ator som anaa “Babylon kɛse” no mu no. (Nyikyerɛ 18:2, 4) Ntsi, ebɛnadze na ebɛyɛ? Hɛn mu biara wɔ gyinae a ɔsɛ dɛ osi. Ɔsɛ dɛ yebisa hɛnho dɛ, ‘Aso mepɛ dɛ mosom Nyankopɔn wɔ ɔkwan a ɔsɔ n’enyi do, anaa mepɛ dɛ mosom no wɔ ɔkwan a ɔsɔ mankasa m’enyi do?’

² Sɛ atwe woho efi ator som ho dadaw dze a, nna ɔno ayɛ no yie. Naaso, ibia wɔ w’akoma mu no, ator som ndzeyɛɛ na amandze ahorow bi wɔ hɔ a, w’enyi da ho ara gye ho. Ma yensusu dɛm ndzeyɛɛ na amandze ahorow no bi ho nhwɛ. Iyi bɛma yeehu siantsir a ohia papaapa dɛ yebu dɛm ndzɛmba yi dɛ mbrɛ Jehovah so bu no no.

3. (a) Ebɛnadze ntsi na ibia ɔbɛyɛ dzen ama nyimpa binom dɛ wobegyaa dɛ wɔdze ehonyi bedzi dwuma wɔ hɔn som mu? (b) Ebɛn asɛm na Bible no kã wɔ ehonyi a wɔdze dzi dwuma dze som Nyankopɔn ho?

³ Nyimpa binom wɔ abosondan wɔ hɔn efie mu anaa wɔnam ehonyi do asom Nyankopɔn mfrenhyia pii. Sɛ ɔtse dɛm wɔ w’afamu a, ibia ebɛtse nkã dɛ ɔnnyɛ papa anaa ɔyɛ mfomdo dɛ ebɔsom Nyankopɔn ber a eremmfa  dɛm ndzɛmba yi nndzi dwuma no. Naaso kaa dɛ, Jehovah na ɔkyerɛ hɛn mbrɛ ɔsɛ dɛ yɛsom no. Bible no kã kyerɛ hɛn pefee dɛ, Jehovah mmpɛ dɛ yɛdze ehonyi bedzi dwuma wɔ hɛn som mu.​—Kenkan Exodus 20:4, 5; Ndwom 115:4-8; Isaiah 42:8; 1 John 5:21.

4. (a) Ebɛnadze ntsi na ɔnnsɛ dɛ yɛsom hɛn nananom a woewuwu no? (b) Ebɛnadze ntsi na Jehovah kãa kyerɛɛ no nkorɔfo dɛ, ɔnnsɛ dɛ wɔbɔ mbɔdzen dɛ wɔnye ewufo bɛkasa no?

⁴ Ibia nyimpa binom bɔbɔ mbɔdzen dɛ wɔdze hɔn mber pii nye hɔn ahoɔdzen bɛyɛ dza ɔbɔsɔ hɔn nananom a woewuwu no enyi. Bi mpo a wɔbɔsom hɔn. Naaso yeesũa dɛ, ewufo runntum mboa hɛn anaa wompira hɛn. Wɔnntse ase wɔ beebiara. Nokwar mu no, esian wɔ mu dɛ obi bɔbɔ mbɔdzen dɛ ɔnye obi a oewu bedzi nkitaho. Iyi tse dɛm osiandɛ, asɛm biara a ɔbɛyɛ dɛ ofi obusuanyi a oewu no hɔ no yɛ dza ofi abɔfo bɔn no hɔ ankasa. Dɛm ntsi na Jehovah maa Israelmba no ahyɛdze dɛ, ɔnnsɛ dɛ wɔbɔ mbɔdzen dɛ wɔnye ewufo bɛkasa anaadɛ wodzi esumansɛm biara.​—Deuteronomy 18:10-12; hwɛ Nsɛm bi a Wɔakyerɛ Mu 26 nye 31.

5. Ebɛnadze na obotum aboa wo ma eegyaa dɛ edze ehonyi bɔsom Nyankopɔn anaa ebɔsom wo nananom a woewuwu no?

⁵ Ebɛnadze na obotum aboa wo ma eegyaa dɛ edze ehonyi bɔsom Nyankopɔn anaa ebɔsom wo nananom a woewuwu no? Ɔsɛ dɛ isũa Bible no na isusu mbrɛ Jehovah si bu ndzɛmba a ɔtse dɛm no ho yie. Obu ndzɛmba a ɔtse dɛm no dɛ ɔyɛ “ekyiwadze.” (Deuteronomy 27:15) Bɔ Jehovah mpaa da biara dɛ ɔmboa wo ma bu ndzɛmba dɛ mbrɛ obu no no. Nkyii so, serɛ no ma ɔmboa wo ma som no wɔ ɔkwan a ɔsɔ n’enyi do. (Isaiah 55:9) Ibotum enya awerɛhyɛmu dɛ, Jehovah bɛma wo ahoɔdzen a ihia ma edze eeyi biribiara a ɔnye ator som wɔ biribi yɛ no efi w’asetsena mu.

6. Ebɛnadze ntsi na wɔfaa December 25 dɛ da a wɔdze dzi Jesus n’awoda?

⁶ Borɔnya kã afahyɛ ahorow a wɔagye dzin wɔ wiadze nyina no ho. Nyimpa dodow no ara susu dɛ, ɔyɛ Jesus n’awoo ho afahyɛ. Naaso, Borɔnya gyina ator som do ankasa. Encyclopedia bi kã dɛ, nna December 25 yɛ da a abosonsɔrfo a wɔwɔ Rome dze dzi ewia no n’awoda. Nna Asɔr mpanyimfo no pɛ dɛ abosonsɔrfo pii dan bɛyɛ Christianfo, ntsi wosii gyinae dɛ wobedzi Jesus n’awoda wɔ December 25. Naaso, ɔnnyɛ December 25 na wɔwoo Jesus. (Luke 2:8-12) Jesus n’esuafo no enndzi Borɔnya. Nhwehwɛmu nwoma bi kã dɛ, Christ no wu ekyir mfrenhyia 200 no, “nna obiara nnyim da a wɔwoo no, nna nyimpa kakraabi na wɔpɛ dɛ wohu da pɔtsee a wɔwoo no.” (Sacred Origins of Profound Things) Borɔnyadzi hyɛɛ ase mfrenhyia ɔhaha pii wɔ Jesus no wu ekyir.

7. Ebɛnadze ntsi na nokwar Christianfo nndzi Borɔnya?

⁷ Nyimpa pii nyim dɛ Borɔnya nye no ho amandze tse dɛ, apontow na adzekyɛ fi abosonsɔr mu. Dɛ nhwɛdo no, osiandɛ Borɔnyadzi fi abosonsɔr mu ntsi, wɔbrae wɔ mber bi mu wɔ England nye America nkurow ahorow bi mu. Obiara a odzi Borɔnya no, nna wɔtwe n’aso. Naaso, ewiei koraa no, nkorɔfo hyɛɛ ase dzii Borɔnya bio. Ebɛnadze ntsi na nokwar Christianfo nndzi Borɔnya? Osiandɛ, wɔpɛ dɛ wɔyɛ dza ɔsɔ Nyankopɔn enyi wɔ biribiara a wɔyɛ mu.

8, 9. Ebɛnadze ntsi na tsetse Christianfo no enndzi awoda?

⁸ Awodadzi so yɛ afahyɛ a nyimpa pii nyim na wodzi. Ana ɔsɛ dɛ Christianfo dzi awoda? Nyimpa bi a nna wɔnnsom Jehovah na Bible no kãa hɔn ho asɛm dɛ wodzii  hɔn awoda. (Genesis 40:20; Mark 6:21) Nna wodzi awoda dze hyɛ abosom enyimnyam. Dɛm ntsi na tsetse Christianfo no “buu awodadzi nyina dɛ ɔyɛ abosonsɔrfo hɔn amandze no.”​—The World Book Encyclopedia.

⁹ Nna tsetse Romefo nye Greekfo gye dzi dɛ, sɛ wɔrowo abofra biara a, sunsum bi ba beebi a wɔrowo no no na dɛm sunsum yi bɔbɔ no ho ban no nkwa nda nyina. Buukuu a wɔfrɛ no The Lore of Birthdays (Awodadzi Ho Nsɛm) kyerɛkyerɛ mu dɛ, “Nna dɛm sunsum yi nye nyame a wɔwo nyimpa no wɔ n’awoda no wɔ ebusuabɔ bi a ɔyɛ nwanwa.”

10. Ebɛnadze ntsi na ndɛ, ɔnnsɛ dɛ Christianfo dzi awoda?

¹⁰ Ana isusu dɛ, Jehovah gye afahyɛ ahorow a ogyina abosonsɔr do no to mu? (Isaiah 65:11, 12) Oho, ɔnngye nnto mu. Dɛm ntsi na yenndzi awoda anaa afahyɛ fofor biara a ogyina abosonsɔr do no.

11. Ebɛnadze ntsi na nyimpa binom dzi afahyɛ ahorow? Ebɛnadze na ɔsɛ dɛ ema ohia wo sen biara?

¹¹ Nyimpa binom nyim dɛ Borɔnya na afahyɛ afofor pii fi abosonsɔr mu, naaso wɔkɔ do dzi. Wɔtse nkã dɛ, ɔyɛ ber a ɔma wonya hokwan nye hɔn mbusua bɔ mu gye hɔn enyi kɛkɛ. Aso dɛm na etse nkã? Sɛ epɛ dɛ enye w’ebusua bɔ mu na hom gye hom enyi a, ɔnnyɛ mfomdo. Jehovah na ɔhyehyɛɛ ebusua no; ɔpɛ dɛ yɛnye hɛn ebusua no nya ebusuabɔ pa. (Ephesusfo 3:14, 15) Naaso, ɔsɛ dɛ yɛdze hɛn adwen si ebusuabɔ pa a yɛnye Jehovah benya no do mbom sen dɛ, yebedzi ator som afahyɛ ahorow na yaasɔ hɛn ebusuafo enyi. Dɛm ntsi, ɔsomafo Paul kãa dɛ: “Hom nsɔ dza ɔsɔ Ewuradze enyi yie nhwɛ.”​—Ephesusfo 5:10.

12. Ebɛnadze na ɔnnkɛma Jehovah agye afahyɛ bi ato mu?

 ¹² Nyimpa pii susu dɛ, bea a afahyɛ bi fi bae no ho nnhia, naaso nnyɛ dɛm na Jehovah bu no. Ɔnngye afahyɛ ahorow a ofi ator som mu anaa dza ɔhyɛ nyimpa anaadɛ ɔman ahyɛnsewdze ahorow enyimnyam no nnto mu. Dɛ nhwɛdo no, nna Egyptfo wɔ afahyɛ ahorow a wodzi ma hɔn ator enyame. Ber a Israelmba no guanee fir Egypt no, wosuasuaa Egyptfo no hɔn abosonsɔr afahyɛ ahorow no mu kor na wɔfrɛɛ no “Ewuradze afahyɛ.” Naaso, dɛm a wɔyɛe no maa Jehovah twee hɔn aso. (Exodus 32:2-10) Dɛ mbrɛ nkɔnhyɛnyi Isaiah kãe no, ɔsɛ dɛ yɛtwe hɛnho fi “efifidze biara” ho.​—Kenkan Isaiah 52:11.

13. Sɛ isi gyinae dɛ irinndzi afahyɛ bio a, ebɛn nsɛm na ibia ibebisa woho?

¹³ Sɛ isi gyinae dɛ irinndzi afahyɛ bi bio a, ibia ibebisa woho nsɛm bi. Nsɛm no bi nye dɛ: Sɛ m’edwumamufo bisa me siantsir a minndzi Borɔnya a, ebɛn asɛm na ɔsɛ dɛ mekã? Sɛ obi ma me Borɔnya adze a, ebɛnadze na ɔsɛ dɛ meyɛ? Sɛ m’awar mu hokafo pɛ dɛ midzi afahyɛ bi a, ebɛnadze na ɔsɛ dɛ meyɛ? Osiandɛ me mba nnkedzi afahyɛ bi anaa hɔn awoda ntsi, mibesi dɛn aboa hɔn amma hɔn werɛ aannhow?

14, 15. Sɛ obi ma wo afrenhyia pa anaa ɔkyɛ wo adze a, ebɛnadze na ibotum ayɛ?

¹⁴ Sɛ irisi dza ebɛkã nye dza ebɛyɛ wɔ tsebea biara mu no ho gyinae a, ɔsɛ dɛ eda adwenmutsewee edzi. Dɛ nhwɛdo no, sɛ nkorɔfo ma wo afrenhyia pa a, ɔnnsɛ dɛ ibu w’enyi gu hɔn do. Ibotum akã asɛm tsiabaa dɛ, “Meda wo ase.” Naaso, sɛ ɔkɛba dɛ obi pɛ nkyerɛkyerɛmu pii a, ibotum akyerɛkyerɛ siantsir a inndzi afahyɛ bi ho  asɛm mu akyerɛ no. Naaso, da ɔdwe, obu nye enyitsew edzi ber nyina. Bible no kã dɛ: “Hom mma hom kasaa nyɛ dza adom nkyen wɔ mu daa, ama hom eehu dza ɔsɛ dɛ hom dze bua obiara.” (Colossaefo 4:6) Ibia ibotum akyerɛkyerɛ mu akyerɛ no dɛ, w’enyi gye ho dɛ enye afofor bɔbɔ mu agye w’enyi na akyɛ adze, naaso ɔnnyɛ afahyɛ mber a ɔtse dɛm mu na eyɛ dɛm.

¹⁵ Sɛ obi ma wo akyɛdze a, ebɛnadze na ɔsɛ dɛ eyɛ? Bible no mma hɛn mbra ahorow wɔ dza ɔsɛ dɛ yɛyɛ ho, mbom no ɔkã dɛ, yɛmfa tsibowa pa ndzi dwuma. (1 Timothy 1:18, 19) Ibia nyia ɔrekyɛ wo adze no innyim dɛ inndzi dɛm afahyɛ no. Anaa ibia ɔbɛkã dɛ, “Minyim dɛ inndzi dɛm afahyɛ yi, naaso mepɛ dɛ medze dɛm akyɛdze yi ma wo.” Wɔ tsebea yi mu biara mu no, ibotum esi gyinae dɛ ebɛgye akyɛdze no anaa ennkɛgye. Naaso, wɔ gyinae biara a ibesi mu no, hwɛ hu dɛ ibokura tsibowa pa mu. Yɛmmpɛ dɛ yɛbɛyɛ biribiara a ɔbɛsɛɛ ebusuabɔ a yɛnye Jehovah wɔ no.

16. Sɛ w’ebusua pɛ dɛ wodzi afahyɛ bi a, ebɛnadze na ɔsɛ dɛ eyɛ?

¹⁶ Sɛ w’ebusua pɛ dɛ wodzi afahyɛ bi a, ebɛnadze na ɔsɛ dɛ eyɛ? Ɔnnsɛ dɛ enye hɔn yiyi nsɛm ano. Kaa dɛ, wɔwɔ hokwan dɛ wosi dza wɔpɛ dɛ wɔyɛ biara ho gyinae. Da obu na ɔdwe edzi kyerɛ hɔn wɔ dza wɔpɛ dɛ wɔyɛ no ho, dɛ mbrɛ ɔwo so epɛ dɛ wɔyɛ ma wo no. (Kenkan Matthew 7:12.) Naaso, sɛ w’ebusua pɛ dɛ enye hɔn bɔ mu gye hom enyi wɔ afahyɛ ber no mu a, ebɛnadze na ɔsɛ dɛ eyɛ? Bɔ Jehovah mpaa dɛ ɔmboa wo ma si gyinae pa wɔ tsebea no ho. Susu tsebea no ho na yɛ ho nhwehwɛmu. Ma ɔntsena w’adwen mu dɛ, ɔwɔ dɛ eyɛ dza ɔsɔ Jehovah n’enyi aber nyina.

17. Sɛ wo mba hu dɛ afofor ridzi afahyɛ ahorow a, ebɛnadze na ibotum ayɛ dze aboa hɔn amma wɔanntse nkã dɛ wɔrohwer biribi?

 ¹⁷ Sɛ wo mba hu dɛ afofor ridzi afahyɛ bi a, ebɛnadze na ibotum ayɛ dze aboa hɔn? Ofi ber to ber no, ibotum ayɛ biribi soronko ama hɔn. Bio so, ibotum atɔ adze akyɛ hɔn ber a wɔnnhwɛ kwan. Akyɛdze a ɔsom bo a ibotum dze ama wo mba no, no mu bi nye wo ber nye wo dɔ.

18. Ebɛnadze ntsi na ɔsɛ dɛ yɛkɔ Christianfo nhyiamu daa?

¹⁸ Sɛ yɛbɔsɔ Jehovah n’enyi a, ɔsɛ dɛ yɛtwe hɛnho fi ator som nye amandze na afahyɛ ahorow a ogyina ator som do no ho. Nnyɛ ɔno nko, ɔsɛ dɛ yɛdze hɛnho hyɛ nokwar som mu so. Yebesi dɛn ayɛ dɛm? Ɔkwan kor nye dɛ yɛbɔkɔ Christianfo nhyiamu daa. (Kenkan Hebrewfo 10:24, 25.) Dɛm nhyiamu ahorow yi yɛ nokwar som ne fã tsitsir. (Ndwom 22:22; 122:1) Sɛ yɛbɔ mu hyia mu a, yebotum ahyehyɛ hɛnho nkuran.​—Romefo 1:12.

19. Ebɛnadze ntsi na ohia dɛ ekã nokwasɛm a esũa wɔ Bible no mu no ho asɛm kyerɛ afofor?

¹⁹ Ɔkwan fofor so a ibotum dze woho ahyɛ nokwar som mu nye dɛ, ebɛkã dza esũa wɔ Bible no mu no ho asɛm akyerɛ afofor. Nyimpa pii dzi awerɛhow wɔ ndzebɔnyɛsɛm a ɔrokɔ do wɔ asaase do no ho. Ibia inyim nyimpa bi a wɔtse nkã dɛm. Kã enyidado a ɔyɛ enyigye a ewɔ wɔ daakye no ho asɛm kyerɛ hɔn. Ber a ekɔ Christianfo nhyiamu na ekã nokwasɛm a ɔwɔ Bible no mu no ho asɛm kyerɛ afofor no, ibohu dɛ ɔpɛ a ewɔ dɛ edze woho bɛhyɛ ator som nye n’amandze ahorow mu no bɛyew. Ibotum enya awerɛhyɛmu dɛ, ber a ekɔ do som Jehovah wɔ ɔkwan pa do no, w’enyi bɛgye na obehyira wo mbɔdzembɔ do kɛsenara.​—Malachi 3:10.