ADZESUA 30
W’adɔfo A Woewuwu No Botum Atsena Ase Bio!
Owu ma yedzi yaw na hɛn werɛ how paa. Ɔno ntsi na Bible no ka dɛ owu yɛ ɔtamfo no. (1 Corinthfo 15:26) Wɔ Adzesua 27 mu no, yehun dɛ Jehovah beyi dɛm ɔtamfo no efi hɔ koraa. Naaso, hɔn a woewuwu dada no so ɛ? Wɔ adzesua yi mu no, yebosua bɔhyɛ kamakama bi so a Jehovah ahyɛ no ho adze pii. Ɔahyɛ bɔ dɛ nyimpa ɔpepepem pii a woewuwu no, ɔbɛma wɔatsena ase bio. Ɔse obenyan hɔn! Aso iyi botum ayɛ yie a? Sɛ onyan hɔn a, wɔbɛtsena sor anaa asaase do?
1. Ebɛnadze na Jehovah pɛ dɛ ɔyɛ ma hɛn adɔfo a woewuwu no?
Jehovah pɛ paa dɛ onyan hɔn a woewuwu no ba nkwa mu bio. Nna Job yɛ ɔbarimba a ɔwɔ gyedzi paa, na nna ɔwɔ awerɛhyɛmu dɛ sɛ owu a, Nyankopɔn benyan no. Ɔkaa kyerɛɛ Nyankopɔn dɛ: “Ɔwo ebɛfrɛ, na emi so magye wo do [efi adakamaa mu].”—Kenkan Job 14:13-15.
2. Yesi dɛn hu dɛ wobenyan hɔn a woewuwu no?
Aber a nna Jesus wɔ asaase do no, Nyankopɔn maa no tum ma ɔdze nyaan ewufo. Jesus nyaan basiaba bi a nna oedzi mfe 12, na ɔsanee so nyaan okunafo bi ne babanyin ma ɔbaa nkwa mu. (Mark 5:41, 42; Luke 7:12-15) Iyi ekyir no, Jesus ne nyɛnko Lazarus so wui. Lazarus wui ma wosiee no no, odzii ndaanan, naaso Jesus nyaan no baa nkwa mu. Jesus bɔɔ Nyankopɔn mpaa wiei no, ɔdze ndze kɛse tseaa mu dɛ: “Lazarus, fir bra!” Na ‘nyia oewu no firii bae.’ Lazarus sanee baa nkwa mu bio! (John 11:43, 44) Enyigye a Lazarus n’ebusuafo na n’anyɛnkofo nyae no dze, nna wɔnnka!
3. Ebɛn enyidado na ɔwɔ hɔ ma w’adɔfo a woewuwu no?
Bible no ahyɛ bɔ dɛ: “Owusoɛr bi bɛba.” (Asomafo Ndwuma 24:15) Hɔn a Jesus nyaan hɔn no, wowui no wɔannkɔ sor ansaana Jesus rinyan hɔn aba asaase yi do. (John 3:13) Ntsi aber a Jesus nyaan hɔn baa asaase yi ara do bio no, ɔyɛɛ hɔn dɛw paa. Ɔnnkɛkyɛr koraa, Jesus benyan nyimpa ɔpepepem pii ma wɔaabɛtsena ase daa wɔ Paradise wɔ asaase do. Ɔkaa dɛ hɔn a Nyankopɔn kaa hɔn no nyina, wobenyan hɔn. Ntsi sɛ nyimpa no werɛ efir dɛ dɛm nkorɔfo no atsena ase pɛn mpo a, Nyankopɔn dze ɔkaa hɔn na obenyan hɔn.—John 5:28, 29.
PƐNSAPƐNSA MU KƆ EKYIR
Yɛbɔhwɛ dase ahorow a ɔwɔ Bible mu, na ɔbɛma yehu dɛ Jesus wɔ tum a ɔdze benyan ewufo, na ɔbɛyɛ so. Afei, yɛbɔhwɛ mbrɛ owusoɛr no botum akyekye wo werɛ na wɔaama wo enyidado.
4. Jesus kyerɛɛ dɛ ɔwɔ tum a ɔdze benyan ewufo
Hwɛ dza Jesus yɛe maa ne nyɛnko Lazarus no ho adze pii. Ma yɛnkenkan John 11:14, 38-44, na yensusu nsɛmbisa yi ho:
-
Yesi dɛn hu dɛ nna Lazarus ewu ampa?—Hwɛ nyiyimu 39.
-
Lazarus wui no sɛ ɔkɔr sor a, ehwɛ a nkyɛ Jesus benyan no abɛtsena asaase yi do a?
5. Wobenyan nyimpa pii!
Ma yɛnkenkan Ndwom 37:29, na yensusu asɛmbisa yi ho:
-
Sɛ wonyan dɛm nyimpa ɔpepepem pii yi a, henfa na wɔbɛtsena?
Nnyɛ hɔn a wɔsoom Jehovah no nkotsee na Jesus benyan hɔn; obenyan nyimpa pii so aka ho. Ma yɛnkenkan Asomafo Ndwuma 24:15, na yensusu asɛmbisa yi ho:
-
Woana na wo yamu a nkyɛ ehu no bio?
Dwen asɛm yi ho: Dɛ mbrɛ egya bi botum enyan ne ba a ɔada no, dɛmara so na Jesus botum enyan obi a oewu
6. Owusoɛr no botum akyekye wo werɛ na wɔaama wo enyidado
Jairus ne babaa ho asɛm a ɔwɔ Bible mu no akyekye nyimpa pii a owu ama woridzi awerɛhow no werɛ, na ahyɛ hɔn dzen. Ma yɛnkenkan dza osii no ho asɛm wɔ Luke 8:40-42, 49-56.
Ansaana Jesus ribenyan Jairus ne babaa no, ɔkaa kyerɛɛ Jairus dɛ: “Mma nnsuro, na gye dzi ara.” (Hwɛ nyiyimu 50.) Ebɛn kwan do na owusoɛr ho enyidado no botum aboa wo ber a . . .
-
wo dɔfo bi ewu?
-
igyina owu na nkwa nkwanta?
Ma yɛnhwɛ VIDEO yi, na yensusu asɛmbisa a odzi do no ho.
-
Ebɛn kwan do na owusoɛr ho enyidado no ahyɛ Phelicity n’awofo dzen, na akyekye hɔn werɛ?
BINOM KA DƐ: “Wobenyan ewufo akɔ sor, na nnyɛ asaase yi do.”
-
Edwen ho dɛn?
-
Sɛ obi ka dɛm a, ebɛn kyerɛwsɛm na edze bɔboa no ma oeehu dɛ ewufo a wobenyan hɔn no mu pii bɛtsena asaase yi ara do?
DZA ESUA
Bible no abɔ anohoba dɛ wobenyan nyimpa ɔpepepem pii a woewuwu no ma wɔaatsena ase bio. Jehovah pɛ dɛ wɔtsena ase bio, na ɔama Jesus tum a ɔdze benyan hɔn.
Mbobɔdo
-
Yesi dɛn hu dɛ Jehovah na Jesus pɛ paa dɛ wonyan ewufo?
-
Nyimpa ɔpepepem pii a wobenyan hɔn no, wɔbɛtsena hen—wɔbɛtsena sor anaa asaase yi ara do? Ebɛnadze ntsi na ereka dɛm?
-
Ebɛnadze na ɔma egye dzi paa dɛ w’adɔfo a woewuwu no bɛtsena ase bio?
HWEHWƐ PII KA HO
Sɛ owu ama iridzi awerɛhow a, kenkan asɛm yi na ibohu ndzɛmba bi a obotum aboa wo.
Aso Bible no botum aboa obi a no dɔfo bi ewu ma oridzi awerɛhow no?
Sɛ abofra bi no dɔfo wu a, ebɛnadze na ɔbɔboa no ma oeegyina awerɛhow no ano?
Ana wobenyan binom akɔ sor? Woananom na worinnyan hɔn?
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
