Ena ika25 ni Seviteba 2024, e tauca na Mataveilewai Levu e Brazil e dua na vakatulewa vakasakiti e tokona nodra dodonu na tauvimate uabula mera kua ni tauri dra, mera digia na veiqaravi vakavuniwai e sega ni vakayagataki kina na dra.E vakatulewataka tale ga na dodonu me raica na Tabana ni Bula me caka tale ga na veiqaravi vakavuniwai vei ira na tauvimate era sega ni tauri dra e na vuku ni nodra vakatulewa vakaitaukei se na nodra vakabauta.

Na vakatulewa oqo e baleta tiko nodrau kisi e rua na iVakadinadina i Jiova e Brazil. Ena 2018, ni oti nona sega ni via sainitaka o Sister Malvina Silva na fomu ni kena soli na dra ena gauna ni veisele (heart surgery), e sega ni vakadonuya na valenibula me caka vua na veisele. E taura e rua na yabaki me qai vakadonui me qaravi o Malvina, e rokovi kina nona vakatulewa.

Ena 2014, e tuvanaki me caka vei Brother Heli de Souza na veisele. Ia na valenibula qori e sega ni tiko kina na iyaya ni veisele, e sega ni vakayagataki kina na dra. E sega ni ciqoma na tabacakacaka ni bula na kerekere nei Heli me tokitaki ki na dua tale na valenibula koya e tu vakarau me na rokova nona vakatulewa kei na vakabauta. E se waraka tiko ga qo o Heli nona veisele. Levu na iVakadinadina i Jiova mai Brazil era sotava tale ga na ituvaki qo, wili kina na kena soli vakaukaua na dra.

Ni tau na lewa, e kaya na Peresitedi ni Mataveilewai o Luís Roberto Barroso: “Na dodonu ni nona sega ni taura na dra e dua ena vuku ni nona vakabauta e yavutaki ena galala ni vakatulewa kei na sokalou. Koya gona, ena vuku ni veiqaravi vakavuniwai, e soli vei ira na [iVakadinadina i Jiova] na dodonu mera kua ni ciqoma na iwalewale ni veiqaravi e vakayagataki kina na dra, e nodra na vakatulewa.”

Na lewa vou oqo e sa vakayagataki ena mataveilewai kece e Brazil mera rokova na dodonu ni nodra vakatulewa na tauvimate ena nodra qaravi vakavuniwai. E vaka tale ga qori na lewa ni Mataveilewai Levu ena so na vanua me vakataki Ositerelia, Kenada, Japani, Sauca Aferika, kei Merika. Na lewa oqo e tautauvata kei na lewa e tau ena Seviteba 17, 2024, mai na Grand Chamber ni Mataveilewai ni Dodonu ni Lewenivanua e Urope, ka uqeta na 46 na vanua me rokova na nodra na dodonu na tauvimate.

Eda marau ni vakatulewataka na Mataveilewai Levu e Brazil me rokova na nodra vakabauta na lewenivanua kei na dododnu mera lewa na veiqaravi vakavuniwai e caka vei ira.