E sa qai vakaoti ga qo ena valenivolavola ni tabana e Colombia e dua na tarataravaki levu. E tekivu ena Feperueri 2019 qai mai vakaoti ena Maji 2023. Era vakaitavi kina na 200 na tacida mai Ositerelia, Kenada, Chile, na Dominican Republic, Igiladi kei Merika.

Me tekivu ena imatai ni June 2023, era gade na vulagi ena Peceli e se qai vakavoutaki. E papitaiso o Brother John Rodriguez ena gauna ni matedewa na COVID-19 qai se bera vakadua ni gade e Peceli. E kaya: “Na cakacaka e qaravi e ke e vakaraitaka na loloma kei na kaukaua i Jiova. Au marau qai vakavinavinakataka niu mai lewena na nona isoqosoqo.” E kaya e dua tale na tacida tagane: “Au qoroya na sala era vakayagataka kina na tacida na iwalewale vovou ni tarataravaki. E laurai kina ni dau toso tu ga i liu na isoqosoqo i Jiova.”

E tiko na valenivolavola ni tabana ena rauta na 42 na kilomita mai na vuaira ni siti o Bogotá e Colombia. E qarava na vale ni tabana na cakacaka vakaitalatala e Bolivia kei Colombia. E tabaka tale ga na noda ivola mera vakayagataka e Colombia, Ecuador, Peru kei Venezuela. Na tarataravaki vou qo ena tokona na tubu ni cakacaka ena veivanua qori. E tiko kina e sivia na 350 na rumu mera vakaicili kina na lewe i Peceli kei na ofisi era vakavinakataki. E taravaki vou e 156 na ofisi. E tara tale ga na rumu me caka kina na veivakavulici kei na bose. E sa levu gona na vanua ni sarasara ena gauna qo.

E kaya o Brother Tait Boulais, na kodineita ni komiti ni tarataravaki: “E levu na ituvaki dredre e vakilai ena gauna ni COVID-19, ia e vakalougatataka na cakacaka o Jiova. Dina ga ni lailai na rawa ni vakaitavi ena tarataravaki, ia era marau na tacida mera qarava na cakacaka era sega ni kila vinaka. Me vakataki ira ga na dauveiqaravi ni Kalou ena gauna makawa, e totolo na nodra lai kenadau ena cakacaka qori ena veivuke ni yalo tabu.”

Eda nuidei ni tarataravaki qo ena tokoni ira na tacida kei ira na ka vou era vulica na iVolatabu ena yasa ni vuravura qo.—Cakacaka 1:8.