Ena ika13 ni Janueri ina ika11 ni Feperueri 2024, a caka na sotasota ni nodra qito soka eso na veimatanitu e vakatokai na 34th Africa Cup of Nations. A vakayacori e Côte d’Ivoire, e Aferika ra qai gole kina e levu na dauqito ena veivanua e Aferika. Era tiko kina e vica vata na udolu na lewenivanua mai na 24 na vanua. Ia era vakayagataka na gauna qori na iVakadinadina i Jiova mera wasea kina na itukutuku ena iVolatabu. E vakarautaki e sivia e 120 na qiqi ni vunau ena lima na siti e vakayacori tiko kina na qito.

A gole e dua na tagane vei rau na tacida rau tiko ena qiqi ena siti o Abidjan. E mani kaya vei rau na tacida ni taleitaka na brochure, Ni Mate e Dua na Wekamu Voleka, baleta ni se qai mate ga na nona itokani voleka. E uqeti koya sara ga nodrau wilika vua na tacida na tikinivolatabu veivakacegui na Joni 5:​28, 29. E mani sureti rau na tacida i nona vale me lai tomani nodratou veitalanoa.

Ena dua tale na gauna, a gole e dua na ovisa ina qiqi ni vunau e tiko e Anyama. E kaya vei rau na tacida ni dau taleitaka me wilika noda ivola vakaivolatabu, vakauasivi na veika me baleta na veikabuli kei na itekitekivu ni bula. E kaya na ovisa qori ni dau osooso, ia e solia na nona naba ni talevoni vei rau na tacida qai kaya me rau veitaratara tale vua.

A gole e dua na turaga ina qiqi ni vunau e toka e Abidjan. E kaya sara vei rau na tacida ni a vulica tu na iVolatabu ni se itabagone, ia sa sega ni sotavi ira tale na tacida. Ena veiyabaki sa sivi, e raica na turaga qori nida duidui na iVakadinadina i Jiova mai na so tale na matalotu. Kena ivakaraitaki, e qoroya na nodra duavata ra qai lomavakacegu na tacida nira sotava na tikoyavavala vakapolitiki. E mani kerea na turaga qori me vulica na iVolatabu, qai sega vakadua ni calata na nona vuli kei rau na tacida.

Eda marautaka ni rawa vei ira na mataveitacini e Côte d’Ivoire mera vakayagataka na gauna qori mera vukei ira kina e levu mai na duidui vanua mera rogoca na “veika vakatubuqoroqoro ni Kalou.”​—Cakacaka 2:11.