22 NOVEBA, 2018
GEORGIA
iMatai ni Soqo Lavotaki e Georgia
Ena ika20 ina ika22 ni Julai, 2018 a vakayacori ena koroturaga e Tbilisi mai Georgia e dua na Soqo Lavotaki e kena ulutaga, “Mo Yaloqaqa”! Era marau na mataveitacini ena vanua qori mera kidavaki ira na tacidra vakayalo mai na 18 na matanitu. E imatai tale ga ni gauna me vakayacori kina e Georgia e dua na soqo ni kana magiti vakayalo. E laurai kina nodra veikauaitaki na mataveitacini, ra qai vakaraitaka tale ga na nodra itovo vakavanua, kei na kedra volaitukutuku makawa.
Na vunau kece e vakayacori ena rara ni qito na Olympic Palace, eTbilisi, ra qai tiko kina e le 7,002. E le 21,500 era sarava tale ga na porokaramu qori ena 80 na dui vanua. E marautaki duadua na nodra papitaiso e le 208 na tacida vou.
Era sarava tale ga eso na ka ni veivakamarautaki me baleta na itovo vakavanua. Era vakaitavi na tacida e keri ena meke, ivakatagi, vakasaqara na kakana taleitaki e Georgia, ra vagadetaki ira tale ga na vulagi ina so na siti makawa e Tbilisi.
E kaya o Tamaz Khutsishvili, e dua na mata mai na valenivolavola ni tabana e Georgia: “E sega ni vakatarai vakalevu na galala ni sokalou ena neimami vanua. Ia na kena qo, salavata na nodra veitokoni na vakailesilesi, sa bau guiguilecavi dredre dina ni keimami sota kina kei ira e levu na taci keimami vakayalo ena soqo marautaki qai veivakacegui.”—Roma 15:7.
Ena ika20 ina ika22 ni Julai, 2018 e vakayacori na soqo lavotaki ena rara ni qito na Olympic Palace, era tiko kina e le 7,002. E saravi tale ga na soqo qori ena so tale na vanua, ra qai tiko kina e le 14,912.
E tinia na ivunau e veisiga o Brother Stephen Lett, e dua na lewe ni iLawalawa Dauvakatulewa.
E marautaki duadua na nodra papitaiso e le 208 na tacida. E biu na tobu ni papitaiso ena yasa ni lalaga vatu e tiko ena loma ni Olympic Palace.
E saravi tale ga na porokaramu qo ena 80 na dui vanua.
Kidavaka tiko eso na tacida yalewa e Georgia e dua na vulagi, e dua vei ratou e dara tale tu ga na isala e caka ena vutunisipi. Era dau dara qori na tiko ena veiulunivanua e Georgia.
Ena ika17 kei na ika18 ni Julai e tuvanaki e dua na porokaramu e Château Mukhrani ena koro o Mukhrani, volekati Tbilisi. E vakatasuasuataki kina e dua na ivakatagi makawa vakaGeorgia kei na meke, vaka kina e rua na vidio me baleta na itukutuku makawa ni noda veiqaravi tabu e Georgia.
Era meketaka tiko na tacida e kea e dua na na meke e kilai me Adjaruli (e yavutaki na yaca qori ena vanua o Adjara, volekata na Wasa Loa). E dau tokari kina nodra isulu totoka vakavanua na tiko ena yalava qori.
Ratou lagata tiko na tacida e dua na sere makawa vakaGeorgia e kilai me polyphonic.
Rawa ni o Wilika Tale ga
ITUKUTUKU VOU
Era Veikauaitaki Qai Duavata na iVakadinadina i Jiova ena Soqo Lavotaki e Ukraine
Era veikidavaki na tacida e Lviv mai Ukraine vei ira na vica vata na udolu na vulagi era gole ena soqo lavotaki qori. Era marautaka na vulagi na nodra itovo ni vanua kei na veivakasarasarataki.