Ena ika27 ni Maji 2022, e sevutaki na ivola The Bible—The Gospel According to Matthew ena vosa vaKonkani, qai vakayagataki kina na matanivola vakaRoma. E katoni na kena porokaramu, ra qai vakarorogo kina e voleka ni le 600. E sevutaki ena iyaya vakalivaliva, ena qai vakarautaki malua na kena ilavelave tabaki.

Na vosa vaKonkani e dua vei ira na 23 na vosa e vakayagataki raraba e Idia, qai vosataki vakalevu ena loma kei Idia. Ena 1957, era lesi na painia lavotaki mera vunau ena yalava vosa vaKonkani. E tauyavutaki sara na imatai ni ivavakoso vosa vaKonkani ena 1959.

Me yacova mai na 1974, a vica tiko ga na iVolatabu ena vosa vaKonkani. E mani sevutaki ena yabaki qori e dua na ilavelave ni iVolatabu vaKirisi vaKarisito. Ena 2006, e vakarautaki tale ga e dua na iVolatabu vakaIperiu ena vosa qori. Ia e vakayagataki ena rua na iVolatabu qori na vosa e dredre mera kila na lewenivanua era vosa vaKonkani.

E yaga dina vei ira na dautukutuku vosa vaKonkani na noda ivola vakaivolatabu e vakarautaki ena vosa qori. Ia e sega ga ni dua na vakadewa donu ni iVolatabu. Kena ivakaraitaki, e kaya e dua na daunivakadewa: “Qo na vakadewa ni Maciu 6:33 ena iVolatabu i liu, ‘E dodonu meda leqataka vakalevu duadua na noda muria na lawa ni Matanitu ni Kalou, qai cakava na ka e vinakata na Kalou.’ Ia e matata sara qai kilai rawarawa na tikinivolatabu qori ena vakadewa vou qo.”

E kaya e dua tale na daunivakadewa: “Era le lailai na dautukutuku era vosa vaKonkani. Ia na kena vakadewataki na ivola qo i Maciu ena neimami vosa, e vakaraitaka ni mareqeti keimami o Jiova.”

Eda nuidei ni vakadewa vou qo ena vukei ira na tacida vosa vaKonkani mera veivolekati kei Jiova.—Joni 6:44.