Ena ika9 ni Okotova 2024, e ravuravu na cagilaba o Milton ena Gulf Coast e Florida, mai Merika. E toka ena category 3 na kena kaukaua qai dua na ka na vakacaca e cakava ena levu na vanua. A yaco na cagilaba qori ni oti ga e rua na macawa nona vakacaca na cagilaba o Helene ena yasayasa vata qori, qai vakacacani kina e levu na ka, e yaco tale ga na waluvu. Na tataba ni cagi e cakava o Milton e rauta ni 289 na kilomita ena dua na aua. Na tau bi ni uca kei na kaukaua ni cagi e tubu kina na wai ena levu na baravi lai vakavuna sara na waluvu.

Kuria ya, na cagilaba o Milton e yaco kina e 38 na covulaca qai dua na ka na vakacaca e cakava ena ceva kei na loma kei Florida. E voleka ni le 80,000 e boko nodra livaliva, ra qai mate e rauta ni le 24.

• Sega ni dua na tacida e mate

• Mavoa vakaca e rua na dautukutuku

• Mavoa vakalailai e va na dautukutuku

• Tokitaki e 9,949 na dautukutuku

• Vakarusai e 16 na vale

• Vakacacani vakalevu e 235 na vale

• Vakacacani vakalailai e 1,398 na vale

• Vakacacani vakalailai e dua na Vale ni Soqoni

• Boko na livaliva ena 30 na Vale ni Soqoni qai sega ni rawa ni vakayagataki

• Ni vo e rua na siga me yaco na cagilaba, sa vakauta na valenivolavola ni tabana e Merika e dua na ivola ina sivia na 800 na ivavakoso era tiko ena vanua ena muria mai na cagilaba. Na ivola qori e tiko kina na idusidusi yaga mera muria na tacida era via toki ena dua tale na vanua mera taqomaki kina

• Era veivakayaloqaqataki na ivakatawa ni tabacakacaka kei ira na qase ni ivavakoso vei ira na tacida era vakaleqai ena cagilaba o Helene kei Milton

• Tuvanaki e tolu na Komiti ni Vakacoko me vakarautaka na ka ni veivuke ena cagilaba ruarua qori

• Vica vata na drau na mataveitacini e Georgia kei South Carolina e Merika era sa veivakaicilitaki tiko vei ira na tacida era tokitaki

Nida mataveitacini e vuravura raraba, meda masuti Jiova mada ga me nodra ‘idrodro kei na ivunivuni’ vei ira kece na vakaleqai ena cagilaba kaukaua qori.​—Aisea 4:6.