Ena ika4 ni Noveba 2019, erau sereki mai valeniveivesu e rua na tacida yalewa o Tirtha Maya Ghale kei Pushpa Ghimire. Erau totogitaki me tolu na vula, ia erau mani sereki mai ni oti ga e dua na vula. Erau vesu ni rau vakaraitaka na nodrau vakabauta, na dodonu e taqomaki ira na lewenivanua e Nepal kei na lawa ni veimatanitu.

Ena Noveba 2018, erau vesu o Sister Ghale kei Ghimire ni rau vunau tiko vei ira na lewenivanua era taleitaka na iVolatabu. Ni oti e 13 na siga nodrau vesu tu, erau sauma na tacida yalewa qori e dua na ilavo levu e rauta ni $930 na ilavo ni Merika, oti rau mani sere. Ia rau se vaqaqai tiko ga vei ira na vakailesilesi.

Ena ika10 ni Tiseba 2018, e rogoci tale na nodrau kisi na tacida yalewa qori, qai toso tiko me tini na vula. Ena ika25 ni Seviteba 2019, e tauca na Mataveilewai ni Yasana o Rupandehi me rau tolu na vula e valeniveivesu, me rau sauma tale ga e rauta ni $23 na ilavo ni Merika.

E beitaki rau o turaganilewa ni rau via veisautaka na tacida yalewa qori na nodra vakabauta e levu, rau veisoliyaka tale ga na ivola ni lotu. Me vaka ni lewe ni Matabose kei Vuravura o Nepal, kei na International Covenant on Civil and Political Rights, me raica gona na matanitu ni tu na dodonu vei ira na lewenivanua mera veisautaka na nodra lotu, se mera vakaraitaka nodra vakabauta e matanalevu se nira tu taudua. Ia rau sega ni cakava qori o Sister Ghale kei Ghimire, rau a sega ni vakasaurarataki ira eso tale mera veisautaka na nodra vakabauta, ia erau veisoliyaka ga na ivola vakaivolatabu vei ira na via vakarorogo. E kaya kina na Mataveilewai Cecere ena ika31 ni Okotova, 2019 ni sega ni dodonu me rau wawa veilewai e valeniveivesu, rau mani sere gona me rau mai wawa veilewai e tuba.

Meda kerea mada ga vei Jiova me tokoni rau tiko ga o Ghale kei Ghimire na nona yalo tabu, me vakaukauataki rau, me solia vei rau na marau, kei na vakacegu ni rau waraka tiko na macala ni nodrau veilewai.—Roma 15:13.